ದೇವ್ನಿ ಖ್ಹಾಚಿ ವಚನ್
2 ಪೇತ್ರ 2
ಚೋ಼ರ್ ಬೋಧನೆ ಕರವಾಳು
ಕತೋಬಿ ಇಸ್ರಾಯೇಲ್ ಅದ್ಮಿಯೇವ್‍ನ ಜೋ಼ಡ್ಮ ಝೂ಼ಟು ಪ್ರವಾದಿಜಿನು ಥೂ. ಇಮ್ನಿಸ್ ಪರಕ್ಮ ತುಮಾರಮಾಬಿ ಝೂ಼ಟು ಬೋಧಕರ್ ಖ್ಹಾರು ರ‍್ಹಿಶೆ. ಇವ್ಣೆ ಖತರ್‌ನಾಕ್ ಖರಾಬ್ ಬೋಧನೆಖ್ಹಾರು ಗಪ್ಲಥ್ಥಿ ಮಹಿಲೀನ್‍ ಆವವಾಳುಬಿ ಅಜು಼ ಇವ್ಣುನ ಮೋಲ್ ಲಿದೋತೆ ಯಜಮಾನ್ನ ಜಿನು ಝಿಟ್ಕಾರವಾಳು ಹುಯಿರಿನ್ ಒಗ್ಗಿಸ್‌ಮ ಇವ್ಣಪರ್ ನಾಶನನ ಬುಲೈಲೆಸ್. ಇವ್ಣ ಖರಾಬ್ ಕಾಮ್ನ ಮಾರಗ್‌ಪರ್ ಕೈಏಕ್ ಜ಼ಣು ಚಾ಼ಲವಾಳು ಹುಯಿರ‍್ಹಿಶೆ. ಇವ್ಣೆ ಖ್ಹಾಚ ಮಾರಗ್‌ನ ದೂಷಣೆ ಬೋಲವಾಳು ಹುಯಿರ‍್ಹಿಶೆ. ಇವ್ಣೆ ಪೈಶಾನಿ ಲಾಲ್‍ಛಿವಾಳು ಹುಯಿರ‍್ಹಿನ್, ಬಣೈಹುಯ್ ಖೇಣಿನ ಬೋಲ್ತುಹುಯಿನ್‌, ತುಮಾರೇಥಿ ನಫ್ಫೊ ಕರಿಲ್ಯಾವಾಳು ಹುಯಿರ‍್ಹಿಶೆ.ಇನಖ್ಹಾಜೆ ಘಣಾದನ್‍ಥು ಇವ್ಣುನ ಛಾ಼ತೆ ನಿಶತ್ನು ತೀರ್ಪ್ ಇವ್ಣುನ ಟಿವೈರ‍್ಹುಸ್. ಇವ್ಣುನ ಆವನಿ ನಾಶನ ಇವ್ಣೇಥಿ ಛು಼ಕಿಜಾ಼ಶೇಸ್ ಕೊಯ್ನಿ. ಕಿಮ್‌ಕತೊ ದೇವ್‌ನು ದೂತಖ್ಹಾರು ಪಾಪ್ ಕರ್ತಾನ ದೇವ್ನೆ ಇವ್ಣುನ ಖ್ಹೊಪೊ ಮ್ಹೇಲ್ಯೊಕೊಂತೆ, ನರಕ್ಮ ಧಕೆಲೀನ್ ನ್ಯಾವ್ನತೀರ್ಪ್‌ನ ಲಿಲ್ಯಾವನಖ್ಹಾಜೆ ಖ್ಹಂಕಳ್‍ಥಿ ಭಂದೈನ್‌ ಅಂಧಾರಿನ ಪಾಳ್ಯಮ ದಿನಾಖಿದಿದೊ. ಜೂ಼ನ ಜ಼ಮಾನಾನು ಅದ್ಮಿ ಜಿನು ದೇವ್ನೆ ನಿಶತ್ ದಿದೊಕೊಂತೆ ಮ್ಹೆಲ್ಯೊಕೊಯ್ನಿ, ನೀತಿನ ಮಾರಗ್‌ನ ಬೋಲಿವತಾಳ್ಯೋತೆ ನೋಹಾನ ಅಜು಼ ಇನಿ ಜೋ಼ಡ್ಮಥುತೆ ಬಿಜ಼ ಖ್ಹಾತ್ ಜ಼ಣಾನ ಖಲಿಬಚಾ಼ಡಿನ್, ಖರಾಬ್ ಅದ್ಮಿಥಿ ಭರೈರ‍್ಹುತೆ ಜಗತ್ನ ಉಪ್ಪರ್ ತೋಫಾನ್ ಲಾಯೊ. ದೇವ್ನೆ ಸೊದೋಮ್ ಅಜು಼ ಗೊಮೋರ್ ಖ್ಹಯೇರ‍್ನ ಬಾಳಿನ್ ರಾಕ್‍ಕರಿನ್ ಅನಪಾರ್ ಭಕ್ತಿಕೊಂತೆ ಬಚಾ಼ವಾಳನ ಆವ್‍ಶೆತೆ ಖರಾಬ್ ಹಾಲತ್ನ ವತಾಳನ ಖ್ಹಾಜೆ ಯೋ ಅಖ್ಖಾ ಖ್ಹಯೇರ‍್ನ ನಿಶತ್ ದೀನ್‌ ಸಾಕ್ಷಿಬಣಾಯೊ. ಕತೋಬಿ ದೇವ್ನೆ ಯೋ ಖರಾಬ್ ಅದ್ಮಿನ ಖರಾಬ್‌ಚಾ಼ಲ್‌ಥಿ ದಿಲ್‍ದುಖೈರ‍್ಹೊತೆ ನೀತಿವಾಳೊ ಲೋಟನ ಬಚಾ಼ಡ್ಯೊ, ಕತೋಬಿ ಯೋ ನೀತಿವಾಳೊ ಯೋ ಖರಾಬ್ ಅದ್ಮಿನ ಇಚ಼್‌ಮರ‍್ಹಿನ್, ಇವ್ಣೆ ಕರಾತೆ ಖರಾಬ್‍ಕಾಮ್ನ ದೇಕ್ತೊ ಖ್ಹಮಜ಼್‌ತೊ ಹುಯಿನ್ ಯೋ ಅಖ್ಖಾನಖ್ಹಾಜೆ ದನ್‌ಪರ್-ದನ್ ಇನು ನೀತಿನ ಆತ್ಮಮ ಘಣು ದುಖಿಹುಯೊ. ಪ್ರಭು ಭಕ್ತಿವಾಳಾನ ಮುಶ್ಕಿಲ್‌ಮಾಥು ಬಚಾ಼ಡನಾಬಿ ಅನೀತಿವಾಳಾನ ನಿಶತ್ ದ್ಯವಾನಖ್ಹಾಜೆ ನ್ಯಾವ್ನ ದನ್ ಆವಾಲಗು ರಾಖನಬಿ ಮಾಲುಮ್‌ ಕರಿರಾಖ್ಯೊಸ್. ಮುಖ್ಯಥಿ ಇವ್ಣಿ ಶರೀರ್‌ನಿ ಖರಾಬ್ಆಖ್ಹ್‌ನ ಬಲಿ ಹುಯಿರ‍್ಹವಾಳನ ಅಜು಼ ದೇವ್ನಿ ಅದಿಕಾರ್‌ನ ದೂಷಣೆ ಕರವಾಳನ ನಿಶತ್ ದಿಶೆಕೊಂತೆ ಮ್ಹೆಲ್‍ಶೆಕೊಯ್ನಿ. ದೇವ್‌ದೂತಖ್ಹಾರು, ಶಕತ್‍ಮಾಬಿ ತಾಖತ್‍ಮಾಬಿ ಊಚ಼ರ‍್ಹಯತೋಬಿ ಪ್ರಭುನ ಖ್ಹಾಮ್ಣೆ ಇವ್ಣುನ ವಿರೋದ್‌ಥಿ ಗಾಳೇಬಿ, ಚಾ಼ವ್‌ಣ್ಯಬಿ ನಾಬೋಲ್ಯುತೊ, ಯೋ ಘಬ್ರಿಖ್ಹಾರು ಮಹಿಮೆನಾಬಿ ಗಾಳೆದ್ಯವಾನ ಪೀಛೆ ಹಟ್‌ಶೆಕೊಯ್ನಿ. ಮ್ಹಾಮುಲಿಥಿ ಕಬ್‌ಜಾ಼ಮ ಧರೈಜೈನ್ ನಾಶ ಹುವಾನಖ್ಹಾಜೆ ಪೈದಹುಯಿರ‍್ಹುತೆ ಬಿಣ್‍ ಅಕ್ಕಲ್‌ನು ಜಾನ್ವರ್‌ನಿತರ ಛಾ಼ತೆ ಆ ಖರಾಬ್ ಬೋಧನೆ ಕರವಾಳು ಖ್ಹಾರು ಇವ್ಣುನ ಮಾಲುಮ್‌ಕೊಂತೆ ಬಾರೇಮ ದೂಷಣೆ ಕರವಾಳು ಹುಯಿರ್ಹುಸ್. ಅವ್ಣೆ ಖ್ಹಾರು ಇವ್ಣಿ ಖರಾಬ್ ಫಣೈಥಿ ಇವ್ಣೆಸ್ ಪೂರನಾಶ ಹುಯಿಜಾಶೆ. ಇವ್ಣಿ ಖರಾಬ್‌ನೀತಿಥೀಸ್‌ ಬರೋಬರ್ ನಿಶತ್ ಲೀಲಿಶೆ. ಜಾ಼ಖ್ಹತ್ ಖರ್ಚ್‌ಕರಾಮಾಸ್ ದನ್‍ಕಾಡನುಸ್ ಖುಷಿಕರಿ ಗಣ್ತಿ ಕರಸ್. ಅವ್ಣೆ ತುಮಾರಿ ಜೋ಼ಡ್ಮ ಮಿಝ಼್‌ವಾನ್ ಕರಾನಿವಖ್ಹ್‌ತೆ ಠಗಾವವಾಳು ಹುಯಿರ‍್ಹಿನ್ ಖಯ್‍ಪೀನ್‍ ಕಳಂಕ್‍ನಾಬಿ ಖ್ಹರಮ್‌ಬಿ ಕಡೈಲ್ಯಾವಾಳು ಹುಯಿರ್ಹುಸ್. ಅವ್ಣೆ ವ್ಯಭಿಚಾರಿಣಿನ ದೇಖಿನ್ ಖ್ಹುಶಿಕರವಾಳುಬಿ ಅವ್ಣೆ ಕದೇಬಿ ತರಖ್ಹ್‌ ತುಟಕೊಂತೆ ಪಾಪ್ನಕರವಾಳು ಹುಯಿರ್ಹುಸ್. ಬಿಣ್‍ತಾಖತ್‍ವಾಳನ ಠಗೈನ್; ಅಜು಼ ಇವ್ಣು ದಿಲ್‌ ಪೈಶಾನಿ ಆಖ್ಹ್‌ಕರಾನಿತರ ಕರಸ್ ಅಜು಼ ಇವ್ಣೆ ದೇವ್ನಿ ಶಾಪಮ ರ‍್ಹೇಸ್. ಅವ್ಣೆ ಅಛ಼್ಛ ಮಾರಗ್‌ನ ಮ್ಹೇಲಿನ್, ವಾಟ್‌ ಭೈಕಿಹುಯು ಅಜು಼ ಬೆಯೋರಾನೊ ಛಿಯ್ಯೊ ಬಿಳಾಮಾನೊ ಮಾರಗ್‌ನ ಧರೀಹುಯು ಹುಯಿರ್ಹುಸ್, ಆ ಬಿಳಾಮ ಖರಾಬ್ ಕಾಮ್‍ಥಿ ಮಳಾತೆ ಶಂಬ್‍ಳನ ಪ್ಯಾರ್‌ಕರ‍್ಯೊ. ಕತೋಬಿ ಇನ ಖರಾಬ್ ಕಾಮ್ನ ಗುರ್‌ಕಾವ್ಣಿಮಳ್ಯು. ಮುಕ್ಕುಜಾನ್ವರ್ ಹುಯಿರ‍್ಹುತೆ ಗಧೇಡೊ ಅದ್ಮಿನಿತರ ವಾತೆಬೋಲಿನ್, ಯೋ ಪ್ರವಾದಿನು ಪಾಗಲ್‍ಪನ್ನ ಆಡುಹುಯಿನ್‌ ಭೀರಾಖ್ಯು. ಅವ್ಣೆ ಪಾಣಿಕೊಂತೆ ತಲಾವ್‌ನಿಮತ್‌, ತೋಫಾನ್ನ ವ್ಹಯಿರಾಮ ಉಡಿಜಾ಼ಸ್ತೆ ವಾದ್ಳಾನಿತರಾಬಿ ಹುಯಿರ್ಹುಸ್. ಅಥ್ರಾನ ವಾಳನಖ್ಹಾಜೆ ಅಂಧಾರಿನಪಾಳ್‌ನ ತಯಾರ್ ಕರಿನ್ ಮ್ಹೆಲೈರ‍್ಹುಸ್‍. ಗಲತ್‌ ವಾಟ್‌ಪರ್ ಚಾ಼ಲವಾಳನಿ ಖ್ಹಂಗ್‌ಥಿ ಛು಼ಕಿಜಾ಼ವಳ ನವ ಅದ್ಮಿನಿ ಜೋ಼ಡ್ಮ ಅವ್ಣೆ ಫಾಯಿದೊಕೊಂತೆ ಪೋಲಿ ವಾತೆನ ಬೋಲಿನ್, ಶರೀರ್‌ನಿ ಖರಾಬ್ ಆಖ್ಹ್‌ಮ ನಾಖಿನ್ ಘಣಿ ಢೊಂಗಿನಿ ಬುದ್ಧಿಥಿ ಇವ್ಣುನ ಮಂಕ್‍ಕರ‍್ನಖಾಸ್. ಅಥ್ರಾನವಾಳು ಛುಟ್ಕಾರ್ ದಿಯೇಸ್ ಕರಿ ಇವ್ಣುನ ವಾಗ್ದಾನ್ ಕರಸ್. ಕತೋಬಿ ಇವ್ಣೆಸ್ ಖರಾಬ್ ಫನೈನ ಗುಲಾಮ್ ಹುಯಿರ‍್ಹೋಸ್. ಶನಕತೊ ಖೆವು ಏಕ್‌ನ ಖ್ಹಾಮ್ಣೆ ಹರಸ್ಕಿ ಇನ ಯೋ ಗುಲಾಮ್ ಹುಯಿರ‍್ಹೋಸ್. ಪ್ರಭುಬಿ ರಕ್ಷಕ್‍ಬಿ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಬಾರೇಮಾನಿ ಗ್ಯಾನ್‌ಥಿ ಲೋಕ್‌ನು ಕಚಿಂಡ್‍ಮಾಥು ಛು಼ಕೈಗಯುಹುಯು ಫಾಚು಼ಪರಿನ್ ಯೋ ಅಖ್ಖಾಮ ಖ್ಹಪ್‍ಡಿನ್ ಹರಿಗಯೂತೊ, ಇನಿ ಖ್ಹರ್ತಿನಿ ಹಾಲತ್ ಪಹಿಲೆಥೀಬಿ ಖರಾಬ್ ಹುಯಿಜಾಶೆ. ಇವ್ಣೆ ನಿಯತ್‌ನೊ ಮಾರಗ್‌ನ ಪರ್ಖಿಲಿನ್‌, ಇವ್ಣುನ ದೆವೈತೆ ಪವಿತ್ರ ಹುಕುಮ್‌ನ ಝಿಟ್ಕಾರಥಿಬಿ, ಯೋ ಮಾರಗ್‌ನ ಪರ್‌ಖ್ಯ ನಾಹೋತ್ತೋಸ್‌ ಅಛ್ಛು಼ ರ‍್ಹಯುಹೋತ್‌. “ಕುತ್‌ರ‍್ಯು ಯೋ ಓಕ್‌ರ‍್ಯ ಹುಯಾನಸ್ ಚಾ಼ಟಾನ ಪಾಛು಼ ಫರಿಗಯು”. ಅಜು಼ “ನ್ಹೊವ್ಹಾಡ್ಯುಹುಯು ಡೂಕರ್‌ ಚಿಕ್ಕ್‌ಡ್‌ಮ ಕಲಾವಾನ ಗಯು”. ಕರಿ ಬೋಲಾನು ಮಶ್ಲೋ ಅವ್ಣುನ ಖ್ಹಾಚ಼ಸ್ ಹುವಾಸ್.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.