Muⱪeddes Kalam (yǝngi yeziⱪ)
Pǝnd-nǝsiⱨǝtlǝr 5
Buzuⱪqiliⱪ-paⱨixiwazliⱪning aⱪiwiti balayi’apǝttur, sadiⱪliⱪning nǝtijisi bǝht-saadǝttur
I oƣlum, danaliⱪimƣa kɵngül ⱪoyƣin,
Idrakliⱪ sɵzlirimgǝ ⱪulaⱪ salƣin.
Xundaⱪ ⱪilƣiningda ixⱪa sǝzgürlük bilǝn ⱪaraydiƣan bolisǝn,
Lǝwliring pǝm-parasǝttin ayrilmaydu.
Qünki buzuⱪ hotunning aƣzidin ⱨǝsǝl tamidu,
Lǝwliri zǝytun yeƣidin siliⱪtur; 1
Lekin uning aⱪiwiti kǝkridǝk aqqiⱪ,
Ikki bisliⱪ ⱪiliqtǝk ɵtkür.
Uning ⱪǝdǝmliri ɵlüm girdawiƣa elip baridu,
Tutⱪan yoli gɵrgǝ baxlaydu. 2 3
Ⱨayatliⱪ yolini ⱪilqǝ bilgüm yoⱪ dǝp,
Basⱪan ⱪǝdǝmliri turaⱪsiz bolidu,
Nǝgǝ baridiƣanliⱪini ⱨeq bilmǝydu.
Xunga, i oƣullirim, sɵzlirimni kɵngül ⱪoyup anglanglar,
Mening degǝnlirimdin qiⱪmanglar.
Undaⱪ hotundin yiraⱪ ⱪaq!
Ixiki aldiƣimu yeⱪin yolima!
Bolmisa, izzǝt-abruyungni baxⱪilarƣa tutⱪuzup ⱪoyisǝn,
Yaxliⱪ yilliringni rǝⱨimsizlǝrning ⱪoliƣa tapxurisǝn! 4
Yat adǝmlǝr bayliⱪliring bilǝn ɵzini tolduridu,
Japaliⱪ ǝjirliringning mewisi yaⱪa yurtluⱪning ɵyigǝ ɵtüp ketidu;
Əjilingdǝ nalǝ-pǝryad kɵtürginingdǝ,
Əzayi-bǝdining yǝm bolƣanda,
Xu qaƣda sǝn: — «Aⱨ, nǝsiⱨǝtlǝrdin nemanqǝ nǝprǝtlǝngǝndimǝn!
Kɵnglümdǝ tǝnbiⱨlǝrni nemanqǝ kǝmsitkǝndimǝn!
Nemixⱪa ustazlirimning sɵzini anglimiƣandimǝn?
Manga tǝrbiyǝ bǝrgǝnlǝrgǝ ⱪulaⱪ salmiƣandimǝn?
jǝmiyǝttimu, jamaǝt aldidimu ⱨǝrhil nomusⱪa ⱪalƣandǝk boldum!» — dǝp ⱪalisǝn. 5
Ɵzüngning kɵlqikingdiki suni iqkin,
Ɵz buliⱪingdin eⱪiwatⱪan sudin ⱨuzurlan. 6
Bulaⱪliring urƣup ⱨǝr yǝrgǝ tarⱪilip kǝtsǝ bolamdu?
Eriⱪliringdiki sular koqilarda eⱪip yürsǝ bolamdu?
Bular sangila has bolsun,
Yat kixilǝrgǝ tǝgmisun! 7
Buliⱪing bǝht-bǝrikǝtlik bolƣay!
Yaxliⱪingda alƣan hotunung bilǝn ⱨuzurlan. 8
U qixi keyiktǝk qirayliⱪ! Jǝrǝndǝk sɵyümlük!
Uning baƣridin ⱨǝmixǝ ⱪanaǝttǝ bolƣaysǝn,
Uning ⱪaynaⱪ muⱨǝbbitidin daim huxalliⱪⱪa patⱪaysǝn. 9
I oƣlum, nemixⱪa yat ayalƣa xǝyda bolisǝn?
Nemixⱪa yoqun hotunning ⱪoyniƣa ɵzüngni atisǝn?
Qünki insanning ⱨǝmmǝ ⱪilƣanliri Pǝrwǝrdigarning kɵz aldida axkaridur,
U uning ⱨǝmmǝ mangƣan yollirini taraziƣa selip turidu. 10
Yaman adǝmning ɵz ⱪǝbiⱨlikliri ɵzini tuzaⱪⱪa qüxüridu,
U ɵz gunaⱨi bilǝn sirtmaⱪⱪa elinidu.
U yolyoruⱪtin mǝⱨrum bolƣanliⱪidin jenidin ayrilidu,
Qekidin axⱪan ⱨamaⱪǝtliki tüpǝylidin yoldin ezip ketidu.
Source notes (10)
- Cross-reference ◘ Pǝnd. 2:16; 6:24
- Footnote ◼ «gɵr» — ibraniy tilida «xeol», yǝni «tǝⱨtisara» deyilidu, u ɵlüklǝrning roⱨliri ⱪiyamǝt künini kütidiƣan yǝr.
- Cross-reference ◘ Pǝnd. 7:27
- Cross-reference ◘ Pǝnd. 6:34,35
- Footnote ◼ «ⱨǝrhil nomusⱪa ⱪalƣandǝk boldum!» — yaki «pütünlǝy zawalliⱪⱪa qüxkǝndǝkmǝn!».
- Footnote ◼ «Ɵzüngning kɵlqikingdiki su..., ɵz buliⱪingdin eⱪiwatⱪan sudin ⱨuzurlan» — xübⱨisizki, ɵzining ayalining muⱨǝbbitini kɵrsitidu.
- Footnote ◼ «Bulaⱪliring urƣup ⱨǝr yǝrgǝ tarⱪilip kǝtsǝ bolamdu? ... Bular sangila has bolsun, yat kixilǝrgǝ tǝgmisun!» — 16-17-ayǝtlǝr xübⱨisizki, kɵqmǝ mǝnidǝ. Bizningqǝ kɵqmǝ mǝnisi: «Ixⱪi muⱨǝbbǝtliringni yat ayalƣa bǝrmǝ, pǝⱪǝt ɵz jorangƣila beƣixla; bolmisa intayin nomus ix bolidu, rǝstǝ-koqilarda rǝswa bolisǝn» degǝndǝk bolsa kerǝk. Bǝzi alimlar muxu ayǝttiki «sular» balilarni kɵrsitidu, dǝp ⱪarap, mundaⱪ tǝrjimǝ ⱪilidu: — «Bulaⱪliring urƣup ⱨǝr yǝrgǝ tarⱪilip kǝtsun, eriⱪliringdiki sular koqilarda eⱪip yürsun (demǝk, «pǝrzǝntliring urƣuƣan bulaⱪlardǝk ⱨǝr yǝrgǝ tarⱪalsun!»); pǝⱪǝtla sangila has bolsun, yat ayaldin bolƣan bolmisun!».
- Footnote ◼ «Buliⱪing bǝht-bǝrikǝtlik bolƣay!» — «buliⱪing» muxu ayǝttǝ «ɵz ayaling»ni kɵrsitidu. Ayǝtning ikkinqi ⱪismini kɵrüng.
- Footnote ◼ «Uning baƣridin...» — ibraniy tilida «Uning ǝmqǝkliridin...».
- Cross-reference ◘ 2Tar. 16:9; Ayup 31:4; 34:21; Pǝnd. 15:3; Yǝr. 16:17; 32:19
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.