Muⱪeddes Kalam (yǝngi yeziⱪ)
Pǝnd-nǝsiⱨǝtlǝr 31
Padixaⱨⱪa nǝsiⱨǝt
Tɵwǝndikilǝr, padixaⱨ Lǝmuǝlgǝ uning anisi arⱪiliⱪ wǝⱨiy bilǝn kǝlgǝn sɵzlǝrdur; anisi bu sɵzlǝrni uningƣa ɵgǝtkǝn: 1
I oƣlum, i mening amriⱪim, ⱪǝsǝmlǝr bilǝn tiligǝn arzuluⱪum, mǝn sanga nemǝ dǝy? 2
Küq-ⱪuwwitingni ayal-hotunlar tǝripigǝ sǝrp ⱪilmiƣin;
Yaki padixaⱨlarnimu wǝyran ⱪilidiƣan ixlarƣa berilgüqi bolma! 3 4
I Lǝmuǝl, xarab iqix padixaⱨlarƣa layiⱪ ǝmǝs,
Əmirlǝrgimu ⱨaraⱪⱪa humar bolux yaraxmas.
Bolmisa ular xarab iqip, muⱪǝddǝs bǝlgilimilǝrni untup,
Bozǝk bǝndilǝrning ⱨǝⱪⱪini astin-üstün ⱪiliwetixi mumkin.
Küqlük ⱨaraⱪ ɵlgüsi kǝlgǝnlǝrgǝ, ⱨǝsrǝtkǝ qɵmgǝnlǝrgǝ berilsun!
Ular xarabni iqip, miskinlikini untup,
Ⱪaytidin dǝrd-ǝlimini esigǝ kǝltürmisun! 5
Ɵzliri üqün gǝp ⱪilalmaydiƣanlarƣa aƣzingni aqⱪin,
Ⱨalak bolay degǝnlǝrning dǝwasidǝ gǝp ⱪil.
Süküt ⱪilma, ular üqün lilla ⱨɵküm ⱪil,
Ezilgǝnlǝrning wǝ miskinlǝrning dǝrdigǝ dǝrman bol. 6
Pǝzilǝtlik ayal
|א| Pǝzilǝtlik ayalni kim tapalaydu?
Uning ⱪimmiti lǝǝl-yaⱪutlardinmu zor exip qüxidu. 7 8
|ב| Erining kɵngli uningƣa tayinip hatirjǝm turidu,
U bolƣaqⱪa erining alƣan oljisi kǝm ǝmǝstur!
|ג| U ɵmür boyi erigǝ wapadar bolup yahxiliⱪ ⱪilidu,
Uni ziyanƣa uqratmaydu.
|ד| U ⱪoy yungi wǝ kǝndir tepip,
Ɵz ⱪoli bilǝn jan dǝp ǝjir ⱪilidu.
|ה| U soda kemilirigǝ ohxax,
ailini beⱪixtiki ozuⱪ-tülüklǝrni yiraⱪ jaylardin toxuydu.
|ו| Tang yorumasta u ornidin turidu,
ailisidikilǝrgǝ yemǝklik tǝyyarlaydu,
Hizmǝtkar-dedǝklǝrgǝ nesiwisini tǝⱪsim ⱪilidu. 9
|ז| U bir parqǝ etizni ɵzi kɵrüp alidu;
Ⱪoli bilǝn yiƣⱪan daramǝttin u bir üzümzar bina ⱪilidu.
|ח| Ixⱪa ⱪarap u belini küq bilǝn baƣlar,
Bilǝklirini küqlǝndürǝr;
|ט| Ɵz ixining paydiliⱪliⱪiƣa kɵzi yetǝr,
Keqiqǝ qiriƣini ɵqürmǝy ix ⱪilar.
|י| U ⱪolliri bilǝn qaⱪni qɵrǝr,
Barmaⱪliri yip urquⱪini tutar.
|כ| Ajizlarƣa yardǝm ⱪolini uzitar;
Ⱨajǝtmǝnlǝrgǝ ⱪollirini sozar.
|ל| Ⱪar yaƣⱪanda u ailisi toƣruluⱪ ǝndixǝ ⱪilmaydu,
Ɵyidikilǝrning ⱨǝmmisigǝ ⱪizil kiyimlǝr kiydürülgǝn.
|מ| Kariwat yapⱪuqlirini ɵzi toⱪuydu;
Ɵzining kiyim-keqǝkliri kanap wǝ sɵsün rǝhttindur.
|נ| Erining xǝⱨǝr dǝrwazilirida abruyi bar;
Xu yǝrdǝ u yurttiki aⱪsaⱪallar ⱪataridin orun alidu. 10
|ס| U nǝpis kanaptin kiyim-keqǝk tikip uni satidu;
Bǝlwaƣlarni tikip sodigǝrlǝrni tǝminlǝydu.
|ע| Kiyimi küq-ⱪudrǝt wǝ izzǝt-ⱨɵrmǝttur;
U kelǝqǝkkǝ ümid bilǝn külüp ⱪaraydu.
|פ| Aƣzini aqsila, dana sɵz ⱪilidu,
Tilida meⱨribanǝ nǝsiⱨǝtlǝr bar.
|צ| ailisidiki ixlardin daim hǝwǝr alidu,
Bikarƣa nan yemǝydu.
|ק| Pǝrzǝntliri ornidin turup uningƣa bǝht-bǝrikǝt tilǝydu;
Erimu mubarǝklǝp uni mahtap: —
|ר| «Pǝzilǝt bilǝn yaxiƣan ayallar kɵptur,
Biraⱪ sǝn ularning ⱨǝmmisidinmu exip qüxisǝn» — dǝydu.
|ש| Güzǝllik seⱨri aldamqidur,
Ⱨɵsn-jamalmu pǝⱪǝt bir kɵpük, halas,
Pǝⱪǝt Pǝrwǝrdigardin ⱪorⱪidiƣan ayalla mahtilidu!
|ת| U ɵz meⱨnitining mewiliridin bǝⱨrimǝn bolsun!
Əjirliri uni dǝrwazilarda ⱨɵrmǝt-xɵⱨrǝtkǝ erixtürsun! 11
Source notes (11)
- Footnote ◼ «Padixaⱨ Lǝmuǝl» — bǝzi alimlar «Lǝmuǝl»ni Sulaymanning anisi Bat-Xeba uningƣa ⱪoyƣan lǝⱪǝm, dǝp ⱪaraydu. Israil üstidin ⱨɵküm sürgüqilǝr arisida «Lǝmuǝl» isimlik bir padixaⱨ bizgǝ namǝlum. «Lǝmuǝl» degǝnning mǝnisi: «Huda üqün». «wǝⱨiy bilǝn kǝlgǝn sɵzlǝr» — ǝgǝr bu bab Agurning (30:1) sɵzining dawami bolsa, undaⱪta «wǝⱨiy bilǝn kǝlgǝn sɵzlǝr» Pǝrwǝrdigarning Agurning «dil-roⱨiƣa yükligǝn sɵzliri»ni ng dawamini kɵrsitidu.
- Footnote ◼ «I mening amriⱪim» — ibraniy tilida «I baliyatⱪumning balisi!». «ⱪǝsǝmlǝr bilǝn tiligǝn arzuluⱪum!» — ibraniy tilida «I ⱪǝsǝmlirimning balisi!».
- Footnote ◼ «ayal-hotunlar tǝripigǝ» — demǝk, jinsiy ⱨǝwǝslǝrgǝ.
- Cross-reference ◘ Ⱪan. 17:17
- Footnote ◼ «Ular xarabni iqip, ... ⱪaytidin dǝrd-ǝlimini esigǝ kǝltürmisun!» — bu sɵzlǝr kinayilik, ⱨǝjwiy bolƣini bilǝn, mskinlǝrning xarab iqix sǝwǝbigimu ⱨesdaxliⱪ bildüridu. Lekin ayǝt ularning xundaⱪ ⱪilidiƣanliⱪini ⱨǝrgiz tǝstiⱪliƣan ǝmǝs. Kɵzdǝ tutulƣini ⱨɵkümdarlarning eƣir mǝs’uliyitidin ibarǝttur.
- Cross-reference ◘ Law. 19:15; Ⱪan. 1:16
- Footnote ◼ «pǝzilǝtlik ayalni kim tapalaydu?...» — keyinki 22 ayǝt xeir bolup, ibraniy tilida alaⱨidǝ xǝkilgǝ igǝ. Ibraniy yeziⱪida 22 ⱨǝrp bar. Bu 22 ayǝtning ⱨǝrbiri ibraniy elipbǝ tǝrtipigǝ asasǝn baxlinidu (mǝsilǝn, uyƣur tili bolsa, a-, ǝ-, b- ⱪatarliⱪ ⱨǝrplǝr bilǝn baxlanƣanƣa ohxax).
- Cross-reference ◘ Pǝnd. 12:4
- Footnote ◼ «... nesiwisini tǝⱪsim ⱪilidu» — yaki «... ixni tǝⱪsim ⱪilidu».
- Footnote ◼ «Erining xǝⱨǝr dǝrwazilirida abruyi bar» — kona ɵrp-adǝtlǝr boyiqǝ, yurttiki aⱪsaⱪallar xǝⱨǝr dǝrwazida yiƣin eqip sot ⱪilatti.
- Footnote ◼ «Əjirliri uni dǝrwazilarda ⱨɵrmǝt-xɵⱨrǝtkǝ erixtürsun!» — yuⱪiriⱪi izaⱨatta deyilgǝndǝk, xǝⱨǝr dǝrwaziliri aⱪsaⱪallar olturidiƣan orun bolup, jǝmiyǝtning ǝng yuⱪiri dǝrijisini bildüridu.
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.