Muⱪeddes Kalam (yǝngi yeziⱪ)

Pǝnd-nǝsiⱨǝtlǝr 16

Kɵngüldiki niyǝtlǝr insanƣa tǝwǝdur;

Biraⱪ tilning jawabi Pǝrwǝrdigarning ilkididur. 1

Insan ɵzining ⱨǝmmǝ ⱪilƣan ixini pak dǝp bilǝr;

Lekin ⱪǝlbdiki niyǝtlǝrni Pǝrwǝrdigar taraziƣa selip tartip kɵrǝr. 2 3

Niyǝt ⱪilƣan ixliringni Pǝrwǝrdigarƣa tapxurƣin,

Xundaⱪ ⱪilƣanda pilanliring pixip qiⱪar. 4

Pǝrwǝrdigar barliⱪ mǝwjudiyǝtning ⱨǝrbirini mǝlum mǝⱪsǝt bilǝn apiridǝ ⱪilƣan;

Ⱨǝtta yamanlarnimu balayi’apǝt küni üqün yaratⱪandur. 5

Tǝkǝbburluⱪⱪa tolƣan kɵngüllǝrning ⱨǝrbiri Pǝrwǝrdigarƣa yirginqliktur;

Ⱪol tutuxup birlǝxsimu, jazasiz ⱪalmas. 6 7

Muⱨǝbbǝt-xǝpⱪǝt wǝ ⱨǝⱪiⱪǝt bilǝn gunaⱨlar kǝfarǝt ⱪilinip yepilar;

Pǝrwǝrdigardin ǝyminix adǝmlǝrni yamanliⱪtin haliy ⱪilar. 8

Adǝmning ixliri Pǝrwǝrdigarni hursǝn ⱪilsa,

U ⱨǝtta düxmǝnlirinimu uning bilǝn inaⱪlaxturar.

Ⱨalal alƣan az,

Ⱨaram alƣan kɵptin ǝwzǝldur. 9

Insan kɵnglidǝ ɵz yolini tohtitar;

Əmma ⱪǝdǝmlirini toƣrilaydiƣan Pǝrwǝrdigardur.

Ⱨǝtta padixaⱨning lǝwlirigǝ ⱪaritip ǝpsun oⱪulsimu,

Uning aƣzi toƣra ⱨɵkümdin qǝtnimǝs. 10

Adil taraza-mizanlar Pǝrwǝrdigarƣa hastur;

Taraza taxlirining ⱨǝmmisini U yasiƣandur. 11

Padixaⱨ rǝzillik ⱪilsa yirginqliktur,

Qünki tǝht ⱨǝⱪⱪaniyǝt bilǝnla mǝⱨkǝm turar.

Ⱨǝⱪⱪaniy sɵzligǝn lǝwlǝr padixaⱨlarning hursǝnlikidur;

Ular durus sɵzligüqilǝrni yahxi kɵrǝr.

Padixaⱨning ⱪǝⱨri goya ɵlümning ǝlqisidur;

Biraⱪ dana kixi uning ƣǝzipini tinqlandurar. 12

Padixaⱨning qirayining nuri kixigǝ jan kirgüzǝr;

Uning xǝpⱪiti waⱪtida yaƣⱪan «keyinki yamƣur»dur. 13 14

Danaliⱪ elix altun elixtin nǝⱪǝdǝr ǝwzǝldur;

Yorutuluxni tallax kümüxni tallaxtin xunqǝ üstündur! 15

Durus adǝmning egiz kɵtürülgǝn yoli yamanliⱪtin ayrilixtur;

Ɵz yoliƣa eⱨtiyat ⱪilƣan kixi jenini saⱪlap ⱪalar.

Mǝƣrurluⱪ ⱨalak boluxtin awwal kelǝr,

Tǝkǝbburluⱪ yiⱪilixtin awwal kelǝr. 16

Kǝmtǝr bolup miskinlǝr bilǝn bardi-kǝldidǝ bolux,

Tǝkǝbburlar bilǝn ⱨaram mal bɵlüxkǝndin ǝwzǝldur.

Kimki ixni pǝm-parasǝt bilǝn ⱪilsa payda tapar;

Pǝrwǝrdigarƣa tayanƣan bolsa, bǝht-saadǝt kɵrǝr. 17 18

Kɵngli dana kixi sǝgǝk atilar;

Yeⱪimliⱪ sɵzlǝr adǝmlǝrning bilimini axurar.

Pǝm-parasǝt ɵzigǝ igǝ bolƣanlarƣa ⱨayatliⱪning buliⱪidur;

Əⱪilsizlǝrgǝ tǝlim bǝrmǝkning ɵzi ǝⱪilsizliktur. 19

Aⱪilanǝ kixining ⱪǝlbi aƣzidin ǝⱪil qiⱪirar;

Uning lǝwzigǝ bilimni ziyadǝ ⱪilar.

Yeⱪimliⱪ sɵzlǝr goya ⱨǝsǝldur;

Kɵngüllǝrni hux ⱪilip tǝngǝ dawadur.

Adǝm balisiƣa toƣridǝk kɵrünidiƣan bir yol bar,

Lekin aⱪiwiti ⱨalakǝtkǝ baridiƣan yollardur. 20

Ixligüqining ixtiyi uni ixⱪa salar;

Uning ⱪarni uningƣa ⱨǝydǝkqilik ⱪilar. 21

Muttǝⱨǝm kixi yaman gǝpni kolap yürǝr;

Uning lǝwliri lawuldap turƣan otⱪa ohxar. 22 23

Əgri adǝm jedǝl-majira tuƣdurƣuqidur;

Ƣǝywǝtqi yeⱪin dostlarni ayriwetǝr. 24

Zorawan kixi yeⱪin adimini azdurar;

Uni yaman yolƣa baxlap kirǝr. 25

Kɵzini yumuwalƣan kixi yaman niyǝtni oylar;

Lewini qixligǝn kixi yamanliⱪⱪa tǝyyardur. 26 27

Ⱨǝⱪⱪaniyǝt yolida aⱪarƣan qaq,

Adǝmning xɵⱨrǝt tajidur. 28

Asan aqqiⱪlimaydiƣan kixi palwandin ǝwzǝldur;

Ɵzini tutuwalƣan xǝⱨǝr alƣandinmu üstündur. 29

Qǝk etǝkkǝ taxlanƣini bilǝn,

Lekin nǝtijisi pütünlǝy Pǝrwǝrdigardindur.

Source notes (29)

Cross-reference ◘ Pǝnd. 16:1; 19:21; 20:24; Yǝr. 10:23
Footnote ◼ «ⱪǝlbdiki niyǝtlǝr» — ibraniy tilida «(adǝmlǝrning) roⱨliri» deyilidu.
Cross-reference ◘ Pǝnd. 21:2
Cross-reference ◘ Zǝb. 37:5; 55:22; Mat. 6:25; Luⱪa 12:22; 1Pet. 5:7
Cross-reference ◘ Ayup 21:30
Footnote ◼ «ⱪol tutuxup birlǝxsimu,...» — baxⱪa birhil tǝrjimisi: «xubⱨisizki,...».
Cross-reference ◘ Pǝnd. 6:17; 8:13; 11:21
Footnote ◼ «...gunaⱨlar kǝfarǝt ⱪilinip yepilar» — Tǝwrat dǝwridǝ, gunaⱨlar ⱪurbanliⱪlar arⱪiliⱪ «yepilip kǝqürüm ⱪilindi» (yǝni, «kǝfarǝt ⱪilindi»). Injil dǝwrigǝ kǝlgǝndila, gunaⱨlar «elip taxlandi» (mǝsilǝn, «Yuⱨ.» 1:29).
Cross-reference ◘ Zǝb. 37:16; Pǝnd. 15:16
Footnote ◼ «Ⱨǝtta padixaⱨning lǝwlirigǝ ⱪaritip ǝpsun oⱪulsimu, uning aƣzi toƣra ⱨɵkümdin qǝtnimǝs» — yǝnǝ ikki hil tǝrjimisi bar: (1) «Padixaⱨning lǝwliridǝ Pǝrwǝrdigarning wǝⱨiyi bolsa, uning aƣzi toƣra ⱨɵkümdin qǝtnimǝs»; (2) «Padixaⱨning lǝwliri wǝⱨiygǝ ⱪarap sɵzlǝydu; uning aƣzi toƣra ⱨɵkümdin qǝtnimǝsliki kerǝk».
Cross-reference ◘ Law. 19:36; Ⱪan. 25:13-16; Pǝnd. 11:1; 20:10, 23
Cross-reference ◘ Pǝnd. 19:12; 20:2
Footnote ◼ «Uning (padixaⱨning) xǝpⱪiti waⱪtida yaƣⱪan «keyinki yamƣur»dur» — ibraniy tilida: «Uning (padixaⱨning) xǝpⱪiti «keyinki yamƣurlar»ni ǝpkǝlgǝn buluttur». «Keyinki yamƣurlar» Israilda 3-ayda yeƣip, ǝtiyazliⱪ ziraǝtlǝrni pixuruxtǝk ⱨalⱪiliⱪ rolni oynaydu. Xunga ⱨǝrbir deⱨⱪan «keyinki yamƣur»ƣa tǝxnadur, ular uni bǝk ⱪǝdirlǝydu.
Cross-reference ◘ Pǝnd. 19:12; Ⱨox. 6:3; Zǝk. 10:1; Yaⱪ. 5:7
Cross-reference ◘ Ayup 28:15; Zǝb. 19:10; 119:72; Pǝnd. 3:14,15; 8:11,19
Cross-reference ◘ Pǝnd. 11:2; 17:19
Footnote ◼ «Kimki ixni pǝm-parasǝt bilǝn ⱪilsa payda tapar» — yaki «nǝsiⱨǝt sɵzigǝ kɵngül ⱪoyƣan payda tapar».
Cross-reference ◘ Zǝb. 2:12; 34:8-9; 125:1; Yǝx. 30:18; Yǝr. 17:7
Cross-reference ◘ Pǝnd. 13:14
Cross-reference ◘ Pǝnd. 14:12
Footnote ◼ «Uning ⱪarni uningƣa ⱨǝydǝkqilik ⱪilar» — ibraniy tilida «Uning aƣzi uningƣa ⱨǝydǝkqilik ⱪilar».
Footnote ◼ «Muttǝⱨǝm kixi» — ibraniy tilida «Belialning oƣli» deyilidu. «Belial»ning mǝnisi «ǝrzimǝs» degǝnlik bolup, bǝlkim Iblisni kɵrsitidu.
Cross-reference ◘ Pǝnd. 12:18
Cross-reference ◘ Pǝnd. 15:18; 26:21; 29:22
Footnote ◼ «Uni yaman yolƣa baxlap kirǝr» — ibraniy tilida «Uni yahxi ǝmǝs bir yolƣa baxlap kirǝr».
Footnote ◼ «Kɵzini yumuwalƣan kixi» — yaki «kɵz ⱪisⱪuqi kixi», «kɵzini qimildatⱪuqi adǝm».
Cross-reference ◘ Pǝnd. 6:13,14
Footnote ◼ «Ⱨǝⱪⱪaniyǝt yolida aⱪarƣan qaq, adǝmning xɵⱨrǝt tajidur» — ayǝtning baxⱪa birhil tǝrjimisi: «Aⱪ qaq bolsa adǝmning xɵⱨrǝt tajidur; u ⱨǝⱪⱪaniyǝt yolida pǝyda bolidu».
Footnote ◼ «Ɵzini tutuwalƣan» — ibraniy tilida: «Ɵz roⱨini idarǝ ⱪilidiƣan» degǝn sɵzlǝr bilǝn ipadilinidu.

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.