Pǝnd-nǝsiⱨǝtlǝr 13

1Dana oƣul atisining tǝrbiyisigǝ kɵngül ⱪoyar;

Mǝshirǝ ⱪilƣuqi tǝnbiⱨkǝ ⱪulaⱪ salmas.

2Adǝm durus eƣizining mewisidin ⱨuzurlinar;

Tuzkorlar zorawanliⱪⱪa ⱨǝwǝs ⱪilip zorawanliⱪⱪa uqrar. 1

3Sɵzdǝ eⱨtiyatqan kixi jenini saⱪlap ⱪalar;

Aƣzi ittik ⱨalakǝtkǝ uqrar.

4Ⱨurunning arzu-tiliki bar, lekin erixǝlmǝs;

Lekin tirixqan ǝtlinǝr.

5Ⱨǝⱪⱪaniy adǝm yalƣanqiliⱪtin yirginǝr;

Ⱪǝbiⱨ bolsa sesip, xǝrmǝndǝ bolar.

6Yoli durusni ⱨǝⱪⱪaniyǝt ⱪoƣdar;

Lekin gunaⱨkarni rǝzillik yiⱪitar. 2

7Bǝzilǝr ɵzini bay kɵrsǝtkini bilǝn ǝmǝliyǝttǝ ⱪuruⱪ sɵlǝttur;

Bǝzilǝr ɵzini yoⱪsul kɵrsǝtkini bilǝn zor bayliⱪliri bardur. 3

8Ɵz bayliⱪi gɵrügǝ tutulƣan bayning jeniƣa ara turar;

Biraⱪ yoⱪsullar ⱨeq wǝⱨimini anglimas.

9Ⱨǝⱪⱪaniy adǝmning nuri xadlinip parlar;

Biraⱪ yaman adǝmning qiriƣi ɵqürülǝr. 4

10Kibirliktin pǝⱪǝt jedǝl-majirala qiⱪar;

Danaliⱪ bolsa nǝsiⱨǝtni angliƣanlar bilǝn billidur.

11Ixlimǝy tapⱪan ⱨaram bayliⱪ bǝrikǝtsizdur;

Tǝr tɵküp ⱨalal tapⱪan güllinǝr. 5

12Tǝlmürginigǝ kütüp erixǝlmǝslik kɵngülni sunuⱪ ⱪilar,

Lekin tǝxnaliⱪta erixkini «ⱨayatliⱪ dǝrihi»dur. 6 7

13Hudaning kalam-sɵzigǝ pisǝnt ⱪilmiƣan adǝm gunaⱨning tɵlimigǝ ⱪǝrzdar bolar;

Lekin pǝrmanni ⱪǝdirligǝn adǝm yahxiliⱪ kɵrǝr.

14Aⱪilanining tǝlimi ⱨayatliⱪ bǝrgüqi bulaⱪtur,

U seni ɵlüm tuzaⱪliridin ⱪutuldurar. 8

15Aⱪilanilik adǝmni iltipatⱪa erixtürǝr;

Biraⱪ tuzkorlarning yoli ǝgri-bügri, japaliⱪ bolar.

16Pǝm-parasǝtlik adǝm bilimi bilǝn ix kɵrǝr;

Ⱨamaⱪǝt ɵz nadanliⱪini axkarilar. 9

17Rǝzil alaⱪiqi bala-ⱪazaƣa uqrar;

Sadiⱪ ǝlqi bolsa dǝrdkǝ dǝrmandur.

18Tǝrbiyǝni rǝt ⱪilƣan adǝm namratlixip uyatⱪa ⱪalar;

Əmma tǝnbiⱨni ⱪobul ⱪilƣan ⱨɵrmǝtkǝ erixǝr.

19Əmǝlgǝ axⱪan arzu kixigǝ xerin tuyular;

Lekin ǝhmǝⱪlǝr yamanliⱪni taxlaxni yaman kɵrǝr.

20Aⱪilanilǝr bilǝn billǝ yürgǝn Dan. bolar;

Biraⱪ ǝhmǝⱪlǝrgǝ ⱨǝmraⱨ bolƣan nalǝ-pǝryadta ⱪalar. 10

21Bala-ⱪaza gunaⱨkarlarning kǝynidin besip mangar;

Lekin ⱨǝⱪⱪaniylar yahxiliⱪning ǝjrini tapar.

22Yahxi adǝm pǝrzǝntlirining pǝrzǝntlirigǝ miras ⱪaldurar;

Gunaⱨkarlarning yiƣⱪan mal-dunyaliri ⱨǝⱪⱪaniylar üqün toplinar. 11

23Yoⱪsulning taxlanduⱪ yeri mol ⱨosul berǝr,

Lekin adalǝtsizliktin u wǝyran bolar. 12

24Tayaⱪni ayiƣan kixi oƣlini yahxi kɵrmǝs;

Balini sɵygǝn kixi uni ǝstayidil tǝrbiyilǝp jazalar. 13

25Ⱨǝⱪⱪaniy adǝm kɵngli ⱪanaǝt tapⱪuqǝ ozuⱪ yǝr;

Yamanning ⱪorsiⱪi aq ⱪalar.