Muqeddes Kalam (latin yéziq)
Pend-nesihetler 5
Buzuqchiliq-pahishiwazliqning aqiwiti balayi’apettur, sadiqliqning netijisi bext-saadettur
I oghlum, danaliqimgha köngül qoyghin,
Idrakliq sözlirimge qulaq salghin.
Shundaq qilghiningda ishqa sezgürlük bilen qaraydighan bolisen,
Lewliring pem-parasettin ayrilmaydu.
Chünki buzuq xotunning aghzidin hesel tamidu,
Lewliri zeytun yéghidin siliqtur; 1
Lékin uning aqiwiti kekridek achchiq,
Ikki bisliq qilichtek ötkür.
Uning qedemliri ölüm girdawigha élip baridu,
Tutqan yoli görge bashlaydu. 2 3
Hayatliq yolini qilche bilgüm yoq dep,
Basqan qedemliri turaqsiz bolidu,
Nege baridighanliqini héch bilmeydu.
Shunga, i oghullirim, sözlirimni köngül qoyup anglanglar,
Méning dégenlirimdin chiqmanglar.
Undaq xotundin yiraq qach!
Ishiki aldighimu yéqin yolima!
Bolmisa, izzet-abruyungni bashqilargha tutquzup qoyisen,
Yashliq yilliringni rehimsizlerning qoligha tapshurisen! 4
Yat ademler bayliqliring bilen özini tolduridu,
Japaliq ejirliringning méwisi yaqa yurtluqning öyige ötüp kétidu;
Ejilingde nale-peryad kötürginingde,
Ezayi-bedining yem bolghanda,
Shu chaghda sen: — «Ah, nesihetlerdin némanche nepretlen’gendimen!
Könglümde tenbihlerni némanche kemsitkendimen!
Némishqa ustazlirimning sözini anglimighandimen?
Manga terbiye bergenlerge qulaq salmighandimen?
Jemiyettimu, jamaet aldidimu herxil nomusqa qalghandek boldum!» — dep qalisen. 5
Özüngning kölchikingdiki suni ichkin,
Öz buliqingdin éqiwatqan sudin huzurlan. 6
Bulaqliring urghup her yerge tarqilip ketse bolamdu?
Ériqliringdiki sular kochilarda éqip yürse bolamdu?
Bular sangila xas bolsun,
Yat kishilerge tegmisun! 7
Buliqing bext-beriketlik bolghay!
Yashliqingda alghan xotunung bilen huzurlan. 8
U chishi kéyiktek chirayliq! Jerendek söyümlük!
Uning baghridin hemishe qanaette bolghaysen,
Uning qaynaq muhebbitidin daim xushalliqqa patqaysen. 9
I oghlum, némishqa yat ayalgha sheyda bolisen?
Némishqa yochun xotunning qoynigha özüngni atisen?
Chünki insanning hemme qilghanliri Perwerdigarning köz aldida ashkaridur,
U uning hemme mangghan yollirini tarazigha sélip turidu. 10
Yaman ademning öz qebihlikliri özini tuzaqqa chüshüridu,
U öz gunahi bilen sirtmaqqa élinidu.
U yolyoruqtin mehrum bolghanliqidin jénidin ayrilidu,
Chékidin ashqan hamaqetliki tüpeylidin yoldin ézip kétidu.
Source notes (10)
- Cross-reference ◘ Pend. 2:16; 6:24
- Footnote ◼ «gör» — ibraniy tilida «shéol», yeni «tehtisara» déyilidu, u ölüklerning rohliri qiyamet künini kütidighan yer.
- Cross-reference ◘ Pend. 7:27
- Cross-reference ◘ Pend. 6:34,35
- Footnote ◼ «herxil nomusqa qalghandek boldum!» — yaki «pütünley zawalliqqa chüshkendekmen!».
- Footnote ◼ «Özüngning kölchikingdiki su..., öz buliqingdin éqiwatqan sudin huzurlan» — shübhisizki, özining ayalining muhebbitini körsitidu.
- Footnote ◼ «Bulaqliring urghup her yerge tarqilip ketse bolamdu? ... Bular sangila xas bolsun, yat kishilerge tegmisun!» — 16-17-ayetler shübhisizki, köchme menide. Bizningche köchme menisi: «Ishqi muhebbetliringni yat ayalgha berme, peqet öz jorangghila béghishla; bolmisa intayin nomus ish bolidu, reste-kochilarda reswa bolisen» dégendek bolsa kérek. Bezi alimlar mushu ayettiki «sular» balilarni körsitidu, dep qarap, mundaq terjime qilidu: — «Bulaqliring urghup her yerge tarqilip ketsun, ériqliringdiki sular kochilarda éqip yürsun (démek, «perzentliring urghughan bulaqlardek her yerge tarqalsun!»); peqetla sangila xas bolsun, yat ayaldin bolghan bolmisun!».
- Footnote ◼ «Buliqing bext-beriketlik bolghay!» — «buliqing» mushu ayette «öz ayaling»ni körsitidu. Ayetning ikkinchi qismini körüng.
- Footnote ◼ «Uning baghridin...» — ibraniy tilida «Uning emchekliridin...».
- Cross-reference ◘ 2Tar. 16:9; Ayup 31:4; 34:21; Pend. 15:3; Yer. 16:17; 32:19
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.