Muqeddes Kalam (latin yéziq)

Pend-nesihetler 16

Köngüldiki niyetler insan’gha tewedur;

Biraq tilning jawabi Perwerdigarning ilkididur. 1

Insan özining hemme qilghan ishini pak dep biler;

Lékin qelbdiki niyetlerni Perwerdigar tarazigha sélip tartip körer. 2 3

Niyet qilghan ishliringni Perwerdigargha tapshurghin,

Shundaq qilghanda pilanliring piship chiqar. 4

Perwerdigar barliq mewjudiyetning herbirini melum meqset bilen apiride qilghan;

Hetta yamanlarnimu balayi’apet küni üchün yaratqandur. 5

Tekebburluqqa tolghan köngüllerning herbiri Perwerdigargha yirginchliktur;

Qol tutushup birleshsimu, jazasiz qalmas. 6 7

Muhebbet-shepqet we heqiqet bilen gunahlar kefarǝt qilinip yépilar;

Perwerdigardin eyminish ademlerni yamanliqtin xaliy qilar. 8

Ademning ishliri Perwerdigarni xursen qilsa,

U hetta düshmenlirinimu uning bilen inaqlashturar.

Halal alghan az,

Haram alghan köptin ewzeldur. 9

Insan könglide öz yolini toxtitar;

Emma qedemlirini toghrilaydighan Perwerdigardur.

Hetta padishahning lewlirige qaritip epsun oqulsimu,

Uning aghzi toghra hökümdin chetnimes. 10

Adil taraza-mizanlar Perwerdigargha xastur;

Taraza tashlirining hemmisini U yasighandur. 11

Padishah rezillik qilsa yirginchliktur,

Chünki text heqqaniyet bilenla mehkem turar.

Heqqaniy sözligen lewler padishahlarning xursenlikidur;

Ular durus sözligüchilerni yaxshi körer.

Padishahning qehri goya ölümning elchisidur;

Biraq dana kishi uning ghezipini tinchlandurar. 12

Padishahning chirayining nuri kishige jan kirgüzer;

Uning shepqiti waqtida yaghqan «kéyinki yamghur»dur. 13 14

Danaliq élish altun élishtin neqeder ewzeldur;

Yorutulushni tallash kümüshni tallashtin shunche üstündur! 15

Durus ademning égiz kötürülgen yoli yamanliqtin ayrilishtur;

Öz yoligha éhtiyat qilghan kishi jénini saqlap qalar.

Meghrurluq halak bolushtin awwal kéler,

Tekebburluq yiqilishtin awwal kéler. 16

Kemter bolup miskinler bilen bardi-keldide bolush,

Tekebburlar bilen haram mal bölüshkendin ewzeldur.

Kimki ishni pem-paraset bilen qilsa payda tapar;

Perwerdigargha tayan’ghan bolsa, bext-saadet körer. 17 18

Köngli dana kishi segek atilar;

Yéqimliq sözler ademlerning bilimini ashurar.

Pem-paraset özige ige bolghanlargha hayatliqning buliqidur;

Eqilsizlerge telim bermekning özi eqilsizliktur. 19

Aqilane kishining qelbi aghzidin eqil chiqirar;

Uning lewzige bilimni ziyade qilar.

Yéqimliq sözler goya heseldur;

Köngüllerni xush qilip ten’ge dawadur.

Adem balisigha toghridek körünidighan bir yol bar,

Lékin aqiwiti halaketke baridighan yollardur. 20

Ishligüchining ishtiyi uni ishqa salar;

Uning qarni uninggha heydekchilik qilar. 21

Muttehem kishi yaman gepni kolap yürer;

Uning lewliri lawuldap turghan otqa oxshar. 22 23

Egri adem jédel-majira tughdurghuchidur;

Gheywetchi yéqin dostlarni ayriwéter. 24

Zorawan kishi yéqin adimini azdurar;

Uni yaman yolgha bashlap kirer. 25

Közini yumuwalghan kishi yaman niyetni oylar;

Léwini chishligen kishi yamanliqqa teyyardur. 26 27

Heqqaniyet yolida aqarghan chach,

Ademning shöhret tajidur. 28

Asan achchiqlimaydighan kishi palwandin ewzeldur;

Özini tutuwalghan sheher alghandinmu üstündur. 29

Chek étekke tashlan’ghini bilen,

Lékin netijisi pütünley Perwerdigardindur.

Source notes (29)

Cross-reference ◘ Pend. 16:1; 19:21; 20:24; Yer. 10:23
Footnote ◼ «qelbdiki niyetler» — ibraniy tilida «(ademlerning) rohliri» déyilidu.
Cross-reference ◘ Pend. 21:2
Cross-reference ◘ Zeb. 37:5; 55:22; Mat. 6:25; Luqa 12:22; 1Pét. 5:7
Cross-reference ◘ Ayup 21:30
Footnote ◼ «qol tutushup birleshsimu,...» — bashqa birxil terjimisi: «shubhisizki,...».
Cross-reference ◘ Pend. 6:17; 8:13; 11:21
Footnote ◼ «...gunahlar kefarǝt qilinip yépilar» — Tewrat dewride, gunahlar qurbanliqlar arqiliq «yépilip kechürüm qilindi» (yeni, «kefarǝt qilindi»). Injil dewrige kelgendila, gunahlar «élip tashlandi» (mesilen, «Yh.» 1:29).
Cross-reference ◘ Zeb. 37:16; Pend. 15:16
Footnote ◼ «Hetta padishahning lewlirige qaritip epsun oqulsimu, uning aghzi toghra hökümdin chetnimes» — yene ikki xil terjimisi bar: (1) «Padishahning lewliride Perwerdigarning wehiyi bolsa, uning aghzi toghra hökümdin chetnimes»; (2) «Padishahning lewliri wehiyge qarap sözleydu; uning aghzi toghra hökümdin chetnimesliki kérek».
Cross-reference ◘ Law. 19:36; Qan. 25:13-16; Pend. 11:1; 20:10, 23
Cross-reference ◘ Pend. 19:12; 20:2
Footnote ◼ «Uning (padishahning) shepqiti waqtida yaghqan «kéyinki yamghur»dur» — ibraniy tilida: «Uning (padishahning) shepqiti «kéyinki yamghurlar»ni epkelgen buluttur». «Kéyinki yamghurlar» Israilda 3-ayda yéghip, etiyazliq ziraetlerni pishurushtek halqiliq rolni oynaydu. Shunga herbir déhqan «kéyinki yamghur»gha teshnadur, ular uni bek qedirleydu.
Cross-reference ◘ Pend. 19:12; Hosh. 6:3; Zek. 10:1; Yaq. 5:7
Cross-reference ◘ Ayup 28:15; Zeb. 19:10; 119:72; Pend. 3:14,15; 8:11,19
Cross-reference ◘ Pend. 11:2; 17:19
Footnote ◼ «Kimki ishni pem-paraset bilen qilsa payda tapar» — yaki «nesihet sözige köngül qoyghan payda tapar».
Cross-reference ◘ Zeb. 2:12; 34:8-9; 125:1; Yesh. 30:18; Yer. 17:7
Cross-reference ◘ Pend. 13:14
Cross-reference ◘ Pend. 14:12
Footnote ◼ «Uning qarni uninggha heydekchilik qilar» — ibraniy tilida «Uning aghzi uninggha heydekchilik qilar».
Footnote ◼ «Muttehem kishi» — ibraniy tilida «Bélialning oghli» déyilidu. «Bélial»ning menisi «erzimes» dégenlik bolup, belkim Iblisni körsitidu.
Cross-reference ◘ Pend. 12:18
Cross-reference ◘ Pend. 15:18; 26:21; 29:22
Footnote ◼ «Uni yaman yolgha bashlap kirer» — ibraniy tilida «Uni yaxshi emes bir yolgha bashlap kirer».
Footnote ◼ «Közini yumuwalghan kishi» — yaki «köz qisquchi kishi», «közini chimildatquchi adem».
Cross-reference ◘ Pend. 6:13,14
Footnote ◼ «Heqqaniyet yolida aqarghan chach, ademning shöhret tajidur» — ayetning bashqa birxil terjimisi: «Aq chach bolsa ademning shöhret tajidur; u heqqaniyet yolida peyda bolidu».
Footnote ◼ «Özini tutuwalghan» — ibraniy tilida: «Öz rohini idare qilidighan» dégen sözler bilen ipadilinidu.

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.