Waraga ka Paulo më acël both Timoteo

1 Timoteo

Köp na tye ï waraga ka Paulo më acël both Timoteo

Timoteo n'obedo ngat n'oye Kiricito kï ï Acia, onwongo aya mërë obedo Ayuda ëka apap mërë obedo dhanö më Grecia. Timoteo owotho kï Paulo ëka ökönyö ën ï tic më tïtö köp më Emuth na Bër.

Waraga ka Paulo më acël both Timoteo makö köp adek na pïrgï tëk.

Köp më acël na tye ï waraga ni obedo më jükö pwony më twodo na tye ï kin jö n'oye Kiricito. Pwony ni orubere kï thama k'Eyuda ëka jö na ba obedo Eyuda, n'onwongo ocung ï kom köp më yee nï lobo ni obedo gin na rac ëka nï ngat mörö twërö nwongo larë ka cë tye kï müng më ryëkö ëka kï lübö pwony mökö na calö kwero cem mökö ëka kwërö nyom. Waraga ni thon tye kï köp na makö kite më tëla ï kin jö n'oye Kiricito ëka wörö Obanga, ëka kï kite n'ëtëla ka jö n'oye Kiricito ëka ëköny tic myero obed ködë. Më ajiki mërë, Paulo mïö thama both Timoteo më bedo atic na bër ka Yecu Kiricito ëka kite na myero ën oti ködë both gurup na papath n'oye.