aAmos 3

INok ánəm uga nlà icù Inan

1O gwong achwang kà̱ nnap-nlà va̱ ta̱ uYawe là ka̱ apal wo, ónəm oga aIsa̱rila ká̱ nkpaktak akum va̱ n fa ká̱ oza̱ ka̱ aMasar.

2<<Ka̱ ashe akum va̱ ka̱ apambin pa̱ kpaktak te,

n yak mmawó na byet n nak ishi ká̱ wo.

Ka̱kul nva̱ ta te, nkpak pa̱ ń nyám ntàn a wo,

ka̱kul nnap mɓá̱ngɓa̱ng wo.>>

3I məma pa̱ onəm pa̱ oparəm i ga achen nzəng

kang anung oza̱ i gwàr kà̱ ka̱t ɗò?

4Ìlir i ɗuɗum ka̱ ashe ikún

u wa ya ìzhe chit ka̱t ɗò?

Ìyen nza̱m ìlir i gbək izər gbək ka̱ ashe agba̱k

ì yà kpán iya̱m iro chit ka̱t ɗò?

5Ajə̀p i kpán ìnyil kpán

ka̱ atak va̱ mmá lwak kà̱ ka̱t ɗò?

Ajə̀p i tətat ya nna kpán

iya̱m iro chit ka̱t ɗò?

6A yà pa̱ mma ɓur agbəshi ìkum ka̱ ashe mbin te

ayər i nəm onəm ka̱t ɗò?

Nɗaktak i fəfa kà̱ mbin

nva uYawe à nəm ka̱t ɗò?

7Nnandər, uPonzhinan uYawe i ya ká̱ nnəm iya̱m iro

nzəng ká̱ nnyám iya̱m va̱ ta

ozwal wò onəm oga nlà ìchu Inan ka̱t ɗò ka̱t.

8Ìlir ɗum te uda

i nəm ayər ka̱t yà?

UPonzhinan uYawe là nnàp chit,

te uda i yang ka̱ nlà ichəchu va̱ ta yà?

9Là nnap ká̱ oga akamsəlang aga aAshdod

ká̱ oga akamsəlang kà̱ mbin aMasar pa̱,

<<O ɓut ishi wo ka̱ aɓam aSamariya

na o dər nzwar va̱ ka̱ ashishe

ká̱ nkà̱r nnandər va̱ ka̱ ashe onənəm>>

10<<Onəm mi nyi nnəm iya̱m inəna̱n ka̱t,>> uYawe à là.

<<Oza̱ va ɓut iya̱m ka̱ akamsəlang oza̱ ka̱ atak nvyat onəm ká̱ nnəm ayi.>>

11Ka̱kul nva̱ ta te, uPonzhinan uYawe là pa̱,

<<Ukpa ìkum i gáng mbin,

i kap wo ká̱ ìkam wo

kang i lyangshin akamsəlang wo.>>

12UYawe là pa̱,

<<Wa nva unəm uga nkpak iya̱m nkang i vyat ka̱ anung ìlir

ashar pa̱ aparəm ka̱t te achwang pa̱ azəng,

te wa nnà ta mí ka̱mshi oIsa̱rila,

va̱ təm ka̱ ashe aSamariya

ka̱ aranchwang ìgban ká̱ ìtok.>>

13<<O gwong achwang na o là nnàp ákum áYakup,>>

uPonzhinan uYawe, Inan iga nggatək à là.

14<<ÌLum va̱ mi nyám ntàn óIsa̱rila ka̱kul nnap mɓá̱ngɓa̱ng oza̱ te,

mi shin atak nshì iya̱m awop aga aBetel.

Mi ɓun oga nggùnggúng atak

awop i tàk kà̱ mbin.

15Mi shin nzhi oza̱

ká̱ aghal oza̱,

nzhi oza̱ va̱ mmá zà̱m ká̱ oga inyin nlàlap,

nza̱ nzhi nchumchum nggo mí shin.>>

UYawe à là.