Yona 2

Mapepo akua Yona

1Yona lu-aali munda mwa lisabi waatendekele kumulomba Yawe Leza wakue walanda nangue,

2“Pa musita wa maavia ane naamulombele Yawe,

ni ye wangasukile.

Lunaali mukati kilibu naalombele bukwasi,

ni we waunvwile lizui lyane.

3Pantu wan'mpoozele pazikiisie,

mukati buziba,

naazyungulukiilue na menda engi,

mabimbi obe onse pamo ni kusana kwakue byan'mpitile peulu.

4Naalandile nangue, naapozelue kule ni wewe,

anzia evio, naakakenta kabili ku Nghanda yobe izuuke.

5Mutima uzyungulukiilue na menda,

nkupilue na buziba,

mutue wane ukupilue na bikusi bya pa menda.

6Naakookeele kwinsina mpili,

kyalo ni minkolonto yakue byankilikiile nsiku ingi,

anzia evio, wewe waaseziizie bukose bwane kufuma mu kilibu,

we Yawe Leza wane.

7Mutima mukati mwane luwaapenzukile,

naamulangulukile Yawe,

ni mapepo ane aafikile kuli wewe mu Nghanda yobe izuuke.

8Balia balibapupa mikisi ya mpuni,

balibamufunghamina Yawe ni kukaana ntono yakue.

9Inzi nene naakazanzula lizui lya malumbo,

naakakwelela ngelelo.

Naakafikilizia kilapo kinaalapile.

Bupusuko bulibwafuma kuli Yawe.”

10Kupwako, Yawe wa-ana lisabi liye limulukile Yona kunze.