ಮಾರ್ಕ 7

ಮ್ಹೊಟಾ ಮನಕ್ಹೊತಿ ಆಯಲ ಪದ್ದತಿ

(ಮತ್ತಾಯ 15:1-20)

1ಎ ಥಯಲ್ಪರ ಯೆರುಸಲೆಮ್ತಾ ಆಯಲ ಫರಿಸಾಯರೊಮಾನಾ ದಕ್ಹಾ ಜ಼ನಾ ಶಾಸ್ತ್ರಿಯೊ ಕುಡಿನ ಯೆಸುನಾ ಸುತ್ತೆ ಆಯಾ. 2ವರಿ ಯೆಸುನಾ ಶಿಷ್ಯಾ ತಿವ್ನಿ ಪದ್ದತಿನಿOಗತ ಹತ್ ಧ್ವಯಾವಾಚಿ ಅನ್ನ ಖಾವಾನು ದೆಕ್ಯಾ ತ್ಯುನೆ ಕಾಕದ್ಯಾಮ ತ್ಯುನಿ ಪದ್ದತ್ ಲಿಂಗತ ಖಾವಾತಿ ಅಗ್ದುರ ಹತ್ ಧ್ವಯಾನ್ಹೊತಾ. 3(ಕಾಕದ್ಯಾಮ ಫರಿಸಾಯರೊ ವರಿ ಯೆಹುದಿ ತ್ಯುನೊನೆ ಮ್ಹೊಟಾ ಮನಕ್ಹೊ ಶಿಕ್ಲಾಯಲ ಪದ್ದತ ತಿವ್ನಾ ಹತೊ ಚೊ಼ಕಿ ತರಾ ಧ್ವಲಿದ್ಯಾವಾಚಿ ಖಾತಾನ್ಹೊತಾ. 4ತಿನಾನಿOಗತ ಬಾಜ಼ರಮಾತಾ ಖಾವಾನು ಸುಬಿಲಾಯಮ ಧ್ವಯಾವಾಚಿ ಖಾತಾನ್ಹೊತಾ ಎ ಯಕ್ಕ ತರಾನಿ ಪದ್ದತ ತ್ಯುನೆ ಘನ್ನಿ ತರಾನಿಯೊ ಪದ್ದತೊ ಕರತಾತಾ ಎನೈಸೊ ತ್ಯುನೊಮಾ ತಾಂಬಿಯಾ ವಾಟಕಾ ತಪಾಲೊ. ಬೆಳಗಿನ ಧವಾನು ವಚ್ಚಾ಼ನಾ ಧೊತಾತಾ ಹಜು಼ನ ಘನಿಯೊ ಶುದ್ಧಾಚಾರ (ಪದ್ದತ) ಕರತಾತಾ. 5ಇನಾಹುತಿ ಫರಿಸಾಯೊರೊ ಶಾಸ್ತ್ರಿಯೊ ಯೆಸುನೆ ಪುಚ್ಯಾ ತಾರಾ ಶಿಷ್ಯಾಮ್ಹೊಟಾ ಮನಕ್ಹೊತಿ ಆಯಲ ಪದ್ದತಿ ಲಿಂಗತ ಕಾ ನೈ ಚಾ಼ಲ್ತಾ? ರಾಡಿ ಹತೊ ಕ್ಹು ಅನ್ನ ಕಾ ಖಾವಸ? 6ಯೆಸು ಜ಼ವಾಬ ದಿದ್ಯೊ ಕಪಟಿಯೊ ಥಯಲ ತಮಾರಾ ವಾಸ್ತರ ಯೆಶಾಯಾ ಬರ್ದಲ ಕೆಕ್ಲೊ ಕರೆಟ್ಟ ಛೆ! ತುಮೆ ಮ್ಹೈ ಯಕ್ಕ ಭಾರಾ ಯಕ್ಕ ತೆ ತಿಮ್ಮ ಬರ್ದಲ, ಕ್ಹುದಾ ಕದ್ಯೊ ಎ ಮನಕ್ಹೊ ಕ್ಹಾಲಿ ವಾತೊಕ್ಹು ಮನೆ ಮರ್ಯಾದಿ ದಿವಸ ವರಿಬಿ ತ್ಯುನು ಮನಸ ಮಕ್ಹು ಘನ್ನು ದುರ ಛೆ. 7ಇವ್ನೆ ಮಾರಿ ಆರಾಧನಾ ಕರಾನು ಸುಜ಼ ಉಪಯೊಗ ನತ್ತಿ. ಕಾಕದ್ಯಾಮ ತ್ಯುನೆ ಕ್ಹುದಾನಿ ಪದ್ದತ ಛೊಡಿನ ತ್ಯುನಾ ನಿಯಮೊ ಉಪದೆಶ ಕರಸ. 8ತುಮೆ ಕ್ಹುದಾನಿಯೊ ಪದ್ದತ ಛೊಡಿನ ಮನಕ್ಹೊನಿ ಪದ್ದತ ಕರೊಶಿ. 9ಯೆಸು ತ್ಯುನೊನೆ ಕದ್ಯೊ ತುಮೆ ತುಮಾರಾ ಗ್ಯಾನ ಉಪಯೊಗ ಕರಲಿನ ಕ್ಹುದಾನಿ ಪದ್ದತಿ ದುರ ಕರಾಡಾಸ ವರಿ ತುಮಾರಿಯೊ ಪದ್ದತಿಯೊ ಮನಕ್ಹೊನೆ ಕರೊ ಕೈನ ಶಿಕ್ಕಲಾವಾಡ್ಯಾಸ. 10ಮೊಶೆ ಸು ಕದ್ಯೊಸ ಕದ್ಯಾಮ ಯಾ. ಬಾಪನೆ ಮರ್ಯಾದಿ ದ್ಯು ವರಿ ಕೈನ ಬಾಪನೆ ರ‍್ಹ್ಯೆನೆಕಾ ಯಾನೆ ರ‍್ಹ್ಯೆನೆಕಾ ಕ್ಹರಾಪಾಲಾನೆ ಮರವಾನಿ ಶಿಕ್ಷಾ ಥಾವು ; 11ತಿಮ್ಮಜ ತುಮೆ ಕವಾನು ಸುವೈ ಕದ್ಯಾಮ, ಯಕ್ಲೊ ತಿನಾ ಯಾ ಬಾಪನೆ, ದಿವಾನು ಮಿ ಕ್ಹುದಾನೆ ದಿದ್ಯೊಸ ಕವೊ ಕೈನ ಶಿಕ್ಲಾಯಾಸ್ತೊ( ತಿನು ಮತ್ಲಬ ತೆ ಕ್ಹುದಾನು ವ್ಹೈ). 12ತೆ ತಿನಾ ಯಾ ಬಾಪನೆ ಆಸ್ರೊ ನೈ ಕರ‍್ಯೊ ಸುಜ಼ ತರಾಸ ನತ್ತಿ ಇಮ್ಮ ಕವೊಸಿತೊ. 13ಇಮ್ಮ ತುಮೆ ಶಿಕ್ಲಾತಾ ಆಯಲ ಪದ್ದತಿಕ್ಹು. ಕ್ಹುದಾನಿಯೊ ವಾತೊನಿ ತಾಕತ ಇಕ್ಹರಿ ಪಾಡೊಶಿ. ವರಿ ಇಮ್ಮಜ಼ ಹವಾ ಕಾಮೊ ಕೆಕ್ಲಾ ಕರೊಶಿ ಕದ್ಯೊ.

ಯಕ್ಕ ಮನಕ್ಹನೆ ಹೊಲಸ ಕರಾನು ಕಾಮ

14ತೆ ಥಯಲ್ಪರ ಯೆಸು ಮನಕ್ಹೊನಾ ಗುಂಪನೆ ತಿಕನ ಬಲೈನ ತ್ಯುನೊನೆ ಸು ಕದ್ಯೊ ಕದ್ಯಾಮ ಕ್ಹಾರಿಯೊ ಮಾರಿಯೊ ವಾತೊ ಕಾನ ದಿನ್ನ ಐಕೊ ವರಿ ತಿಳದಿಲಿವೊ. 15ಭಾರಾತು ಮನಕ್ಹೊನಾ ಮ್ಹೈ ಗೈನ ತ್ಯುನೊನೆ ಹೊಲಸ ಕರಾನು ಯಕ್ಕ ಬಿ ನತ್ತಿ; 16ತೆನೈಸೊ ಮನಕ್ಹೊಮಾತು ಜಾ಼ವಾನು ತಿನೆಜ ಹೊಲಸ ಕರಸ. 17ತೆ ಥಯಲ್ಪರ ಯೆಸು ಮನಕ್ಹೊನೆ ಛೊಡಿನ ಘರಮಾ ಜಾ಼ತಾಮಾ ತಿನಾ ಶಿಷ್ಯಾತಿನೆ ತೆ ವಾತನೊ ಮತ್ಲಬ ಸುವೈ ಕೈನ ಪುಚ಼ತಾಮಾ ತೆ ತ್ಯುನೊನೆ. 18ಯೆಸು ಶಿಷ್ಯಾವೊನೆ ಕದ್ಯೊ. ತುಮೊನೆ ತೆಕ್ಕಲಿಬಿ ಗ್ಯಾನ ನತ್ತಿಸು? ತುಮೊನೆ ಗೊತ್ತ ಥಾತು ನೈಸು ಯಕ್ಕ ಮನಕ್ಹನಾ ಮ್ಹೈಜಾ಼ವಾನು ಕ್ಹರಿಮಾಜ಼ ತಿನೆ ಹೊಲಸ ನೈ ಕರತು. ತೆವೊ ಸುಜ಼ ನತ್ತಿ ಭಾರಾತು ಮನಕ್ಹೊನಾ ಮ್ಹೈ ಜಾ಼ವಾನು. 19ಕಾಕದ್ಯಾಮ ತೆ ಮನಸ್ಮಾ ಗಯಾವಾಚಿ ಪೆಟಮಾ ಗೈನ ಪಾಚಾ಼ತು ಭಾರು ಜಾ಼ವಸ (ಯೆಸು ಎ ಕೈನ ಖಾವಾನು ಕ್ಹಾರುಬಿ ಚ಼ೊಕು ವ್ಹೈ ಕದ್ಯೊ) 20ಯೆಸು ವರಿ -ಮನಕ್ಹೊನಾ ಮ್ಹೈತು ಜಾ಼ವಾನುಜ಼ ಮನಕ್ಹೊನೆ ಹೊಲಸ ಕರಸ. 21ಯಕ್ಕ ಮನಕ್ಹನಾ ಮ್ಹೈತು ಕದ್ಯಾಮ ಮನಕ್ಹೊನಾ ಮನಸ ಮಾತು. ಜಾ಼ವಾನು ಕೈ ವ್ಹೈ ಕದ್ಯಾಮ ತೆ ತಿನೆ ಕೆಟ್ಟ ಕಾಮೊಮಾ ಚ಼ಲಾವಸ ತೆ ಕೈಯು ವ್ಹೈ ಕದ್ಯಾಮ ವೈಭಿಚಾರ ಕಾಮೊ ಚೊ಼ಟ್ಟಿತನಾ ಖಲಾಸ ಕರಾನು. 22ಸುಳಿತನಾ ಹಾದರತನಾ ದೊಕಡಾವೊಪರ ಆಸ ಕೆಡತನಾ ಮೊಸ ಸಂಗಟ ಘಾಲ್ಲಿವಾನು ಗಾಳೊ ದಿವಾನು ಸೊಕ್ಕಕ ಸುಳ್ಳ ಬೊಲಾನು. 23ಎ ಕ್ಹಾರಿಯೊ ಕೆಟ ವಿಚಾರೊ ಮನಕ್ಹೊನಾ ಮ್ಹೈತು ಗೈನ ತೆ ಮನಕ್ಹನೆ ಹೊಲಸ ಕರಸ ಕದ್ಯೊ.

ಹೆಣ ಮನಕ್ಹನೊ ಬರೊಕ್ಹೊ

(ಮತ್ತಾಯ 15:21-28)

24ಯೆಸು ತ್ಯಾಂತೊ ಉಟಿನ ಜಾ಼ತೊ ತೊರ ಕವಾನಾ ಗಾಮ್ನಾ ನಜಿ಼ಕ ರ‍್ಹಯಲ ಪ್ರದೆಶೆ ಗಯೊ. ಗೈನ ಯಕ್ಕ ಘರಮಾ ಗಯೊ ತೆ ಕಿನೆಜ಼಼ ಗೊತ್ತ ಥಾವುನೈ ಕೈಲಿದ್ಯೊ. ತೆನೈಸೊ ತೆ ಝಕೈನ ರ‍್ಹವಾನೆ ಥಯೊ ನೈ 25ತೆಳಾಮಾಜ಼ ಯಕ್ಕ ಹೆಣ ಮನಕ್ಹ ತಿನಿ ದಿಕ್ರಿನಾ ಅOಗಮಾ ಕೆಟ್ಟ ಆತ್ಮಾ ವ್ಹತ್ತಿ ಯೆಸು ತ್ಯಾ ಛೆ ಕೈನ ಸುದ್ದಿ ಐಕಿನ ತಿನಾ ಪಗೊಮಾ ಐನ ಪಡಿ. 26ತೆ ಹೆಣ ಮನಕ್ಹ ಬಿಜಿ ಜಾ಼ತನಿ ವ್ಹತ್ತಿ ತೆ ಶಿರಿಯ್ಯಾ ಪೊಯಿನಿಕ್ಕಯ ಪ್ರಾOತ್ಯ ಮಾ ಹುಟ್ಟಿತಿ ತೆ ಯಹುದ್ಯೊನಿ ಜಾ಼ತನಿ ನ್ಹೊತಿ. ತೆ ತಿನಿ ದಿಕ್ರಿನು ಕೆಟ್ಟ ಆತ್ಮಾ ಛೊಡಾ ಕೈನ ಯೆಸುಕನ ಮಾಂಗಿಲೆತಾಮಾ. 27ಯೆಸು ತಿನೆ- ಬಚ್ಚಾವೊನೆ ಪೈಲಾ ತೃಪ್ತ ಥಾವಾದೆ; ಬಚ಼್ಚಾಖಾವಾನೊ ರೊಕ್ಲೊ ಕಾಳ್ಳಿನ ಕುತ್ರಾವೊನಾ ಬಚ್ಚಾವೊನೆ ಘಾಲಾನು ಚೊ಼ಕು ವ್ಹೈಸು ಕದ್ಯೊ. 28ತೆ ವಾತೆ ತೆ -ಸ್ವಾಮಿ ಆ ವಾತ ಕ್ಹರಿ ವ್ಹೈ ಟೆಬಲನಾ ಹೆಟಾ ರ‍್ಹಯಲ ಕುತ್ರಾವೊನಾ ಬಚ್ಚಾ ಮನಕ್ಹನಾ ಬಚ್ಚಾ಼ನಾ ಹತಮಾತಾ ಪಡಲ ರೊಕ್ಲಾನಾ ತುಕಡಾ ಖಾವಸ್ತೊ ಕೈನ ಜ಼ವಾಬ ದೆತಾಮಾ. 29ಯೆಸು ತಿನಿ ವಾತೆ ತಿನೆ ಸು ಕದ್ಯೊ ಕದ್ಯಾಮ ತಾರಿ ದಿಕ್ರಿನೆ ಕೆಟ್ಟ ಆತ್ಮಾ ಛೊಡಿಪಾಡ್ಯುಸ ಜಾ಼ ಕದ್ಯೊ. 30ತೆ ತಿನಾ ಘರೆ ಗೈನ ದೆಕ್ತಾಮಾ ತೆ ಛೊಕ್ರಿ ವಚ್ಚಾ಼ನಾಮಾ ಅರಾಮ ಕ್ಹುರೈತಿ ವರಿ ತಿನೆ ಕೆಟ್ಟ ಆತ್ಮಾ ಛೊಡಿನ ಗೈ ಪಡಿತಿ.

ಯೆಸು ಮುಕಾನೆ ಕಿವುಡಾನೆ ಅರಾಮ ಕರಲ

31ತೆ ಥಯಲ್ಪರ ಯೆಸು ತೊರ ಗಾಮ ಛೊಡಿನ ಸಿದೊನ ಗಾಮ ಪರತೊ ದೆಕಪೊಲಿ ಗಲಿಲಾಯ ಸಮುಂದರಕನ ರ‍್ಹಯಲ 10 ಗಾಮೊ ದಾಟಿನ ಚಾ಼ಲ್ಯೊತೊ. 32ತೆಳಾಮಾ ದಕ್ಹಾಜ಼಼ನಾ ತ್ವದಲಿನ ಬೊಲಾನಾ ಯಕ್ಕ ಕ್ಯುಡಾನೆ -ಯೆಸುಕನ ಬಲೈ ಲೈನ ಇಪರ ತು ಹತ್ತ ಮ್ಹೆಲ ಕೈನ ಮಾಂಗಿಲಿದ್ಯಾ. 33ಯೆಸು ತಿನೆ ಮನಕ್ಹೊನಾ ಗುಂಪಮಾತೊ ಯಕ್ಕ ಬಗಲ ಬಲೈ ಲಿನ ಗೈನ ತಿನಾ ಬೊಟೊ ತಿನಾ ಕಾನೊಮಾ ಮುಕ್ಕಿನ ಥುಕ್ಕಿನ ತಿನಿ ಜಿಬ್ಬ ಮುಟ್ಯೊ. ಹಬಾಳನೆ ದೆಕಿನ ಉಸುಲ ಛೊಡಿನ ತಿನೆ 34ಎಪ್ಫಥಾ ಕೈನ ಕದ್ಯೊ. ತೆ ವಾತನೊ ಮತ್ಲಬ ವ್ಹೈ ಖುಲ್ಲಾಥಾವಾದೆ ಕೈನ. 35ಕತಾಮಾ ತೆಳಾಮಾಜ಼ ತಿನಾ ಕಾನೊ ಖುಲ್ಲಾಥಯಾ ತಿನಿ ಜಿಬ್ಬಬಿ ಖುಲ್ಲಾ ಥೈ ತೆ ತರಾಸನೈಸೊ ಬೊಲ್ಯೊ. 36ತೆಳಾಮಾ ಯೆಸು ಕಿನೆಜ಼಼ ಎ ತಿಳಸುನಕೊ ಕೈನ ತಾಕಿತ ಕರ‍್ಯೊ ವರಿ ಕೆಕ್ಲೊ ಕದ್ಯೊತಬಿ ವರಿ ಘನ್ನಾ ಮನಕ್ಹೊಕನ ಕದ್ಯೊ. 37ಎ ಐಕಲವಾಲಾ ಕ್ಹಾರಾಜ಼ನಾ ಘನ್ನಾ ಘಾಬ್ರಾಥೈನ ಕ್ಹಾರು ಚೊ಼ಕು ಕರ‍್ಯೊಸ ಕಿವ್ಡಾ ರ‍್ಹಯಲವಾಲಾನೆ ಐಕಾ ವರಕ್ಹು ಕರಸ. ಮುಕಾ ರ‍್ಹಯಲವಾಲಾನೆ ಬೊಲಾ ವರಕ್ಹು ಕರಸ ಕೈನ ತಿಳದಿಲಿದ್ಯಾ.