ಲುಕ 23

ಯೆಸುನೆ ಪಿಲಾತನಕನ ನಿಂಗೈಯಲ

(ಮತ್ತಾಯ 27:1,2,11-14; ಮಾರ್ಕ 15:1-5; ಯೊಹಾನ 18:28-38)

1ವರಿ ತ್ಯಾ ಪಂಚ್ಯಾತಿನಾ ಹುತಿ ಕುಡಿನ ಆಯಲ ವಾಲಾ ಯೆಸುನೆ ಪಿಲಾತನಕನ ಬಲೈ ಲಿನಗಯಾ. 2ತ್ಯುನೆ ಯೆಸುಪರ ದೊಷ ಘಾಲಾನೆ ಶುರು ಕರ‍್ಯಾ ಆ ಮನಕ್ಹ ಹಮಾರಾ ಮನಕ್ಹೊನೆ ತಪ್ಪ ವಾಟಮಾ ನಿಂಜಾ಼ವಾನೆ ಕವಾಡ್ಯೊಸ. ಹಮೆ ಸಿಸರನೆ ಭುಭಾಡೊ ದಿವೊನಕೊ ಕೈನ ಎ ಕವಾಡ್ಯೊಸ. ತೆನೈಸೊ ಇನಾಕ್ಹು ಎಜ಼ ಕ್ರಿಸ್ತ ವ್ಹೈ ಕೈನ ಕೈಲಿವಾಡ್ಯೊಸ. ಇನಾಹುತಿ ಹಮೆ ಇನೆ ಧರಿನ ಲಾಯಾಸ. 3ತೆಳಾಮಾ ಪಿಲಾತನ ಯೆಸುನೆ "ತು ಯಹುದ್ಯೊನೊ ರಾಜೊ಼ ವ್ಹೈಸು? ಕೈನ ಪುಚ್ಯೊ. ತೆಳಾಮಾ ಯೆಸು ತುಜ಼಼ ಕವಾಡ್ಯೊಸ್ತೊ ಕೈನ ಕದ್ಯೊ.

4ಪಿಲಾತನ, ಖಾಸ ಯಾಜಕೊನೆ ವರಿ ಮನಕ್ಹೊನೆ"ಮನೆ ಆ ಮನಕ್ಹಮಾ ಕಯೊಜ಼ ತಪ್ಪ ದಿಕ್ಹಾಡ್ಯು ನತ್ತಿ "ಕದ್ಯೊ.

5ತೆ ವಾತೆ ತ್ಯುನೆ"ಎ ಮನಕ್ಹ ಯುದಾಯಾ ಗಾಮ್ಮಾ ಉಪದೆಶ ಕರಿನ ಮನಕ್ಹೊನೆ ಭಡ್ಕಾಯೊಸ. ಗಲಿಲಾಯಮಾ ಶುರು ಕರಿನ ಎ ಹಮ್ನಾ ನ್ಹ್ಯಾ ಆಯೊಸ" ಕೈನ ಹಗ್ಲೆಲ್ಲಾ ಕದ್ಯಾ.

ಹೆರೊದನಾ ಕ್ಹಾಮೊ ಯೆಸು

6ಪಿಲಾತನ ಎ ಐಕಿನ, ಎ ಮನಕ್ಹ ಗಲಿಲಾಯ ವಾಲೊ ವ್ಹೈಸು? ಕೈನ ಪುಚ್ಯೊ. 7ಯೆಸು ಹೆರೊದನಾ ಅದಿಕಾರಮಾ ರ‍್ಹಯಲ ಗಾಮ ವಾಲೊ ವ್ಹೈ ಕೈನ ತಿಳದಿಲಿನ. ತೆ ಟೈಮ್ಮಾ ಹೆರೊದ ಯೆರುಸೆಲೆಮ್ಮಾ ವ್ಹತ್ತೊ. ತಿನಾಹುತಿ ಯೆಸುನೆ ಹೆರೊದಕನ ಮೊಕಲ್ಯೊ. 8ಹೆರೊದ ಯೆಸುನೆ ದೆಕ್ತಾಮಾ ಘನ್ನೊ ಖುಶಿ ಥಯೊ, ಕಾಕದ್ಯಾಮ ತೆ ಯೆಸುನಾ ಹುತಿ ಕ್ಹಾರುಜ಼ ಐಕ್ಯೊತೊ ವರಿ ಯೆಸು ಕರಾನು ಅದ್ಭುತ ದೆಕು ಕೈನ ವ್ಹತ್ತೊ. 9ಹೆರೊದ ಯೆಸುನೆ ಘನ್ನಾ ಪ್ರಶ್ನೆ ಪುಚ್ಯೊ. ತೆಳಾಮಾ ಯೆಸು ಯಕ್ಕಬಿ ಜ಼ವಾಬ ದಿದ್ಯೊ ನೈ. 10ಖಾಸ ಯಾಜಕೊ ವರಿ ಶಾಸ್ತ್ರಿಯೊ. ತ್ಯಾಜ಼ ಹುಬ್ರಯಾತಾ. ತ್ಯುನೆ ಯೆಸುನಾ ವಿರುದ್ದ ವದ್ರಾಡ್ಯಾತಾ. 11ತೆಳಾಮಾ ಹೆರೊದ ವರಿ ಸೈನಿಕೊ ಯೆಸುನೆ ಕದ್ರಾಯಾ ತ್ಯುನೆ ಯೆಸುನೆ ರಾಜಾ಼ವೊನಾ ವಣ್ಣಾ ಘಾಲಿನ ಹಿನಾಯಾ. ಪಾಚಾ಼ತಾ ಹೆರೊದ ಯೆಸುನೆ ಪಿಲಾತನಕನ ಮೊಕ್ಕಲಿ ಪಾಡ್ಯೊ. 12ಪೈಲಾ ಪಿಲಾತನ ವರಿ ಹೆರೊದ ದುಶ್ಮನೊ ವ್ಹತ್ತಾ. ವರಿ ತೆ ದಿನತಾ ತ್ಯುನೆ ಭಂಬಿಜ಼ನಾ ದೊಸ್ತೊ ಥಯಾ.

ಯೆಸುನೆ ಮರಾನಿ ಶಿಕ್ಕಶಾ ದಿದಲ

(ಮತ್ತಾಯ 27:15-26; ಮಾರ್ಕ 15:6-15; ಯೊಹಾನ 18:39—19:16)

13ಪಿಲಾತನ ಖಾಸ ಯಾಜಕೊನೆ ಯೆಹುದಿನಾ ಮ್ಹೊಟಾ ಮನಕ್ಹೊನೆ ಕ್ಹಾರಾ ಜ಼ನಾವೊನೆ ಬಲೈನ, 14ತ್ಯುನೊನೆ"ತುಮೆ ಆ ಮನಕ್ಹನೆ ಮಕನ ಬಲೈ ಲಾಯಾಸ. ಎ ಮನಕ್ಹೊನೆ ತಪ್ಪ ವಾಟಪರ ಚ಼ಲಾವಾಡ್ಯೊಸ ಕೈನ ಕದ್ಯಾ. ವರಿ ಮಿ ತಮಾರಾ ಕ್ಹಾಮೊ ಇನೆ ವಿಚಾರ ಕರ‍್ಯೊ, ಇಮಾ ಮಿ ಸುಜ಼ ತಪ್ಪ ದಿಕ್ಹ್ಯು ನೈ. ತುಮೆ ಇಪರ ಘಾಲಾನು ದೊಶ ಹೊಂದಾಡ್ಯು ನತ್ತಿ. 15ಎನೈಸೊ ಹೆರೊದನೆಬಿ ಎ ಮನಕ್ಹಮಾ ಸುಜ಼ ತಪ್ಪ ದಿಕ್ಹ್ಯು ನೈ. ಹೆರೊದ ಯೆಸುನೆ ಹಮೊಕನ ವರಿ ಮೊಕಲ್ಯೊಸ, ದೆಕೊ ಯೆಸುಮಾ ಸುಜ಼ ತಪ್ಪ ನತ್ತಿ ಕರ‍್ಯೊ. ತಿನೆ ಮರವಾನಿ ಶಿಕ್ಷಾ ಥೌ ನೈ. 16ತಿನಾಹುತಿ ಮಿ ಇನೆ ನ್ಹಾನಿ ಶಿಕ್ಷಾದಿನ ಛೊಡಿಪಾಡುಸ" ಕೈನ ಕದ್ಯೊ. 17ಹರಿ ಯಕ್ಕ ಫಸ್ಕಾನಾ ಸನ್ಮಾ ರಾಜ್ಯಪಾಲ ಥಯಲ ಪಿಲಾತನ ಮನಕ್ಹೊ ಮಾಂಗಲ ತೆ ಕೈದಿನೆ ಛೊಡಾನಿ ಪದ್ದತ ವ್ಹತ್ತಿ. 1

18ತೆನೈಸೊ ಮನಕ್ಹೊ ಯೆಸುನೆ ಜೊ಼ರ ವದ್ರಿನ ಮರವಾನಿ ಶಿಕ್ಷಾ ದೆ ಕೈನ ಕವಾಡಾತಾ. ವರಿ ಬರಬ್ಬನೆ ಛೊಡ ಕೈನ ಕವಾಡಾತಾ. 19(ತೆ ಜೆಲಮಾ ವ್ಹತ್ತೊ ತೆ ದಕ್ಹಾ ಮನಕ್ಹೊನೆ ಖಲಾಸ ಕರ‍್ಯೊತೊ)

20ಪಿಲಾತನ ಯೆಸುನೆ ಛೊಡಿಪಾಡು ಕೈನ ವ್ಹತ್ತೊ. ತಿನಾಹುತಿ ಯೆಸುನೆ ಛೊಡಿಪಾಡು ಕೈನ ಮನಕ್ಹೊನೆ ಕದ್ಯೊ. 21ತೆ ನೈಸು ತ್ಯುನೆ ವರಿ ತಿನೆ ಮರವಾನಿ ಶಿಕ್ಷಾ ದೆಕಿನ ವರಿ ಜೊ಼ರ ವದ್ರ್ಯಾ. ವರಿ ತಿನೆ ಶಿಲುವಿಪರ ಚ಼ಡಾ ಶಿಲುವಿಪರ ಚ಼ಡಾ"ಕದ್ಯಾ.

22ತನ್ವಾ ಸಲಾ ಪಿಲಾತನ ಮನಕ್ಹೊನೆ, ಕಾ? ತೆ ಸು ತಪ್ಪ ಕರ‍್ಯೊಸ? ತೆ ತಪ್ಪ ಕರಲವಾಲೊ ನ್ಹವೈ. ತಿನೆ ಮರವಾನಿ ಶಿಕ್ಷಾ ದಿವಾನೆ ತಿಮಾ ಸುಜ಼ ತಪ್ಪ ದಿಕ್ಹಾಡು ನತ್ತಿ. ತಿನಾ ಹುತಿ ತಿನೆ ನ್ಹಾನಿ ಶಿಕ್ಷಾ ದಿನ್ನ ಛೊಡಿ ಪಾಡುಸ "ಕದ್ಯೊ.

23ವರಿ ಮನಕ್ಹೊ ವದ್ರಾನು ದೆಕಿನ ಪಿಲಾತನ ಯೆಸುನೆ ಶಿಲುವಿಪರ ಚ಼ಡೈನ ಮರವಾನಿ ಶಿಕ್ಷಾ ದಿದ್ಯೊ. 24ಪಿಲಾತನ ತ್ಯುನೆ ಮಾಂಗಲ ತೆ ಪುರಾ ಕರಾನೆ ಒಪ್ಪಿಲಿದ್ಯೊ. 25ಪಿಲಾತನ, ಬರಬ್ಬನೆ ಛೊಡಿನ ಯೆಸುನೆ ಶಿಲುವಿಪರ ಘಾಲಾಹುತಿ ಮನಕ್ಹೊನಾ ಹತಮಾ ದಿದ್ಯೊ.

ಯೆಸುನೆ ಶಿಲಬಿಪರ ಚ಼ಡಾಯಾ

(ಮತ್ತಾಯ 27:32-44; ಮಾರ್ಕ 15:21-32; ಯೊಹಾನ 19:17-19)

26ಸೈನಿಕೊ ಯೆಸುನೆ ಶಿಲುವಿಪರ ಚ಼ಡಾವಾನೆ ನಿಂಜಾ಼ತಾಮಾ ಖೆತರಮಾತೊ ಗಾಮ್ಮಾ ಆತೊ ರ‍್ಹಯಲ ಸಿಮೊನ ಕವಾಲಾನೆ ದೆಕ್ಯಾ. ಸಿಮೊನ ಕವಾಲೊ ಸಿರೆನ ಗಾಮವಾಲೊ ವ್ಹತ್ತೊ. ಯೆಸುನಿ ಶಿಲುವಿ ಉಚೈಲಿನ ಯೆಸುನಾ ಪಾಚೊ಼-ಪಾಚೊ಼ ಆ ಕೈನ ವತ್ತಾಯ ಕರ‍್ಯಾ. 27ಘನ್ನಾ ಮನಕ್ಹೊ ಯೆಸುನಾ ಪಾಚಾ಼-ಪಾಚಾ಼ ಆವಾಡಾತಾ. ಮ್ಹೊಟು ಗುಂಪ ಥೈನ ಮಳಲ ಹೆಣ ಮನಕ್ಹೊ ಘನ್ನಿಯೊ ರವಾಡಿಯ್ಯುತೊ. 28ಯೆಸು ತೆ ಹೆಣ ಮನಕ್ಹೊನೆ "ಯೆರೊಸೆಲಿಮಿನಿಯೊ ಹೆಣ ಮನಕ್ಹೊ, ಮಾರಾ ಹುತಿ ರವೊ ನಕೊ ತಮಾರಾ ಹುತಿ ತಮಾರಾ ಬಚ್ಚಾ಼ವೊನಾ ಹುತಿ ರವೊ" 29ಬಚ್ಚಾ಼ ನೈಸೊ ವಾಲಿಯೊ ಚೊ಼ಕಿಯೊ ವ್ಹೈ ಬಚ್ಚಾ಼ವೊನೆ ಛಾತಿನು ದುದ್ದ ನೈ ಪಿಲಾಯಲ ವಾಲಿಯೊ ಚೊ಼ಕಿಯೊ ವ್ಹೈ. ಕೈನ ಮನಕ್ಹೊ ಕವಾನು ಟೈಮ ಆವಸ. 30ತೆಳಾಮಾ ಮನಕ್ಹೊ ಡೊಂಗರನೆ ಮಪರ ಪಡ! ಕೈನ ಡೊಂಗರೊ ಹಮೊನೆ ಝಾಕಿ ಪಾಡಾದೆ ಕೈನ ವದ್ರಸ. 31ಮನಕ್ಹೊ ಝಾಡ ಚೊ಼ಕು ರ‍್ಹತಾಮಾ ಇಮ್ಮ ಕರಸ. ವರಿ ಕುಕ್ಹಾಯಲ ಟೈಮ್ಮಾ ಕಿಮ ರ‍್ಹಸ? ಕೈನ ಕದ್ಯೊ. 32ಯೆಸುನಾ ಕ್ಹಾತೆ ಬೆ ಚ್ವಟ್ಟಾವೊನೆ ಮರವಾನಿ ಶಿಕ್ಕಶಯಾ ದಿದ್ಯಾತಾ. 33ಯೆಸುನೆ ವರಿ ಬೆ ಚ್ವಟ್ಟಾವೊನೆ ತ್ಯುನೊನೆ "ಕಪಾಲ "ಕವಾನಿ ಜ಼ಗಾಪರ ಬಲೈ ಲಿನಗಯಾ. ತ್ಯಾ ಯೆಸುನೆ ಶಿಲುವಿಪರ ಚ಼ಡಾಯಾ ಬೆ ಚ್ವಟ್ಟಾವೊಮಾ ಯಕ್ಲಾನೆ ಯೆಸುನಾ ಶಿದಾಬಗಲ ಯಕ್ಲಾನೆ ಡಾವಾ ಬಗಲ ಚ಼ಡಾಯಾ, 34ತೆಳಾಮ ಯೆಸು, ಬಾ, ಅವ್ನೊನೆ ಮಾಫ ಕರ. ಅವನೆ ಸು ಕರಾಡಾಸ ತಿಳದ್ಯಾ ನತ್ತಿ "ಕೈನ ಪ್ರಾಥನಾ ಕರ‍್ಯೊ. ಸೈನಿಕೊ ಚಿಟಿಯೊ ಘಾಲಿನ ಯೆಸುನಾ ವಣ್ಣಾ ಕಿನೆ-ಕಿನೆ ವಾಟಿಲಿದ್ಯಾ.

35ಮನಕ್ಹೊ ದೆಕತಾ ತ್ಯಾ ಹುಬ್ರಯಾತಾ. ಯೆಹುದಿಯೊನಾ ಮ್ಹೊಟಾ ಮನಕ್ಹೊ ಯೆಸುನೆ ಕದ್ರಾಯಾ. ತ್ಯುನೆ ಯೆಸುನೆ ತು ಕ್ಹುದಾ ಇನಿಲಿದಲ ಕ್ರಿಸ್ತ ರ‍್ಹಯೊಮ ತಿನಾಕ್ಹು ತೆ ವಚಾ಼ಡಿಲಿವಾದೆ. ಎ ಬಿಜಾ಼ವೊನೆ ವಚಾ಼ಡಲ ವಾಲೊ ನ್ಹವೈಸು? ಕದ್ಯಾ. 36ಸೈನಿಕೊ ಯೆಸುನೆ ಕದ್ರಾಯಾ. ತ್ಯುನೆ ಯೆಸುಕನ ಐನ. ದಕ್ಹು ಖಾಟು ದ್ರಾಕ್ಷಿಯೊನು ರಕ್ಹ ಪಿವಾನೆ ದಿದ್ಯಾ. 37ವರಿ ಯಹುದ್ಯನೊ ರಾಜೊ಼ ರ‍್ಹಯೊಮ, ತಾರಾ ಕ್ಹು ತು ವಚಾ಼ಡಿಲೆ "ಕದ್ಯಾ. 38(ಶಿಲುಬಿನಾ ಉಪ್ಪರ, ಎ ಯಹುದ್ಯೊನೊ ರಾಜೊ಼ ವ್ಹೈ ಕೈನ, ಕೈನ ಬರದ್ಯಾತಾ)

39ತ್ಯಾ ಚ಼ಡಾಯಲ ಬೆ ಚ್ವಟ್ಟಾವೊಮಾನೊ ಯಕ್ಲೊ ಯೆಸುನೆ "ತು ಕ್ರಿಸ್ತ ನ್ಹ ವ್ಹೈಸು? ತಿಮ್ಮ ರ‍್ಹಯುಮ ತಾರಾಕ್ಹು ತು ವಚಾ಼ಡಿ ಲೆ! ವರಿ ಹಮೊನೆಬಿ ವಚಾ಼ಡ"ಕದ್ಯೊ.

40ತೆನೈಸೊ ತೆ ಬಿಜೆಕ್ಲೊ ಚ್ವಟ್ಟೊ. ತಿನೆ ಭುಚ಼್ಕಾಡ್ಯೊ. ತು ಕ್ಹುದಾ ಕ್ಹು ಭುಚ಼ಕ್ತಾ ನೈಸು? ತುನೆ ಬಿ ಎಜ಼ ಶಿಕ್ಷಾ ಥೈಸ! 41ತುಬಿ ಮಿ ಪಾಪಿಯೊ ವ್ಹೈ. ಅಪೊನೆ ಅಪ್ನಾ ಪಾಪನಾ ಹುತಿ ಶಿಕ್ಷಾ ದಿದ್ಯಾಸ. ವರಿ ಎ ಮನಕ್ಹ (ಯೆಸು) ಕಯುಜ಼ ತಪ್ಪ ಕರ‍್ಯೊ ನತ್ತಿ. ಕದ್ಯೊ. 42ಪಾಚಲ್ತೊ ತೆ ಚ್ವಟ್ಟೊ ಯೆಸುನೆ ತಾರೊ ರಾಜ್ಯ ಆತಾಮಾ ಮನೆ ಶೆ ಕರಿಲೆ"ಕದ್ಯೊ.

43ತೆಳಾಮಾ ಯೆಸು ತಿನೆ ಐಕ! ಮಿ ಕ್ಹರಿಜ಼ ಕೌಸ. ಆಜಾ಼ನಾ ದಿನ್ನೆಜ಼ ತು ಮಾರಾ ಕ್ಹಾತೆ ಸ್ವರ್ಗಮಾ ರ‍್ಹಸಿ. ಕೈನ ಕದ್ಯೊ.

ಯೆಸು ಮರಲ

(ಮತ್ತಾಯ 27:45-56; ಮಾರ್ಕ 15:33-41; ಯೊಹಾನ 19:28-30)

44ತೆಕ್ಲಾಮಾಜ಼಼ ದುಪಾರ ಥೈಗೈತಿ ವರಿ ಇಡಿ ಭುಲೊಕ್ಪರ ಅಂದಾರು ಥೈಗೈಯುತು. ತೆ ಅಂದಾರು ದುಪಾರನಾ ಬಾರಾ ವಾಸ್ತಾತು ತನ, ವಾಜೆ ಲಕ್ಕಾ ವ್ಹತ್ತು. 45ಸುರ್ಯಾನು ಉಜಾಲುಜ಼ ನ್ಹೊತು! ದೆವಾಲಯನೊ ಪಡದೊ ಫಾಟಿನ ಬೆ ಭಾಗ ಥಯೊತೊ. 46ಪಾಚಲ್ತೊ ಯೆಸು"ಬಾ, ಮಾರಿ ಆತ್ಮಾ ತಾರಾ ಹತೊಮಾ ವಪ್ಸುಸ, ಕೈನ ಝೊರ ವದ್ರಿನ ಜ಼ಲಮ ಛೊ಼ಡ್ಯೊ.

47ತ್ಯಾ ರ‍್ಹಯಲ ಸೈನಿಕೊನೊ ಅದಿಕಾರಿ ತಿಮ್ಮ ಥಯಲ ದೆಕಿನ"ಎ ಮನಕ್ಹ ಕ್ಹರಿನೊಜ಼ ವ್ಹೈ ಕೈನ ಮನೆ ಗ್ವತ್ತ ವ್ಹತ್ತು" ಕೈನ ಕ್ಹುದಾನಿ ಸ್ತುತಿ ಕರ‍್ಯೊ. 48ಎ ಕ್ಹಾರು ದೆಕಾನೆ ಗಾಮತಾ ಘನ್ನಾ ಮನಕ್ಹೊ ಆಯಾತಾ. ವರಿ ಎ ಕ್ಹಾರು ದೆಕಿನ ಘನ್ನಾ ದುಕಿ ಥೈನ ಫರಿನ ತ್ಯುನಾ ಗಾಮೆ ಗಯಾ. 49ಯೆಸುನಾ ದೊಸ್ತೊ ಬಿ ತ್ಯಾ ವ್ಹತ್ತಾ. ಗಲಿಲಾಯತಿಯೊ ಯೆಸುನಾ ಪಾಚಿ಼ಯೊ ಆಯಲ ಹೆಣ ಮನಕ್ಹೊಬಿ ತ್ಯಾ ವ್ಹತ್ತಿಯೊ. ತ್ಯುನೆ ದುರತಿಯೊಜ಼ ಎ ಕ್ಹಾರು ದೆಕಾಡಿಯೊತ್ಯೊ.

ಯೆಸುನಿ ಮಜಾ಼ರ

(ಮತ್ತಾಯ 27:57-61; ಮಾರ್ಕ 15:42-47; ಯೊಹಾನ 19:38-42)

50ಅರಿಮಥಾಯ ಕವಾನು ಯೆಹುದಿಯೊನು ಯಕ್ಕ ಗಾಮ ವ್ಹತ್ತು. ಯೊಸೆಫ ಎಜ಼ ಗಾಮವಾಲೊ ಚೊ಼ಕೊ ವ್ಹತ್ತೊ. ಎ ಕ್ಹುದಾನಾ ಹುತಿ ಕ್ಹಾರು ತಿಳದಿಲಿದ್ಯೊತೊ. ವರಿ ಕ್ಹುದಾನು ರಾಜ್ಯ ಆವಸ ಕವಾನು ಇನೆ ಗ್ವತ್ತ ವ್ಹತ್ತು. 51ಯೊಸೆಫ ಯಹುದ್ಯೊನೊ ಮನಕ್ಹೊಪರ ಮ್ಹೊಟೊ ವ್ಹತ್ತೊ. ವರಿ ಯೆಹುದಿಯೊನಾ ಮನಕ್ಹೊ ಯೆಸುನೆ ಖಲಾಸ ಕರಿಯೆ ಕೈನ ಕತಾಮಾ ತೆ ವಾತೆ ವಪ್ಯೊನ್ಹೊತೊ. 52ಯೆಸುನೊ ಮರಲ ಅಂಗ ದಿಲಾ ಕೈನ ಯೊಸೆಫ ಪಿಲಾತನಕನ ಮಾಂಗ್ಯೊ. 53ಪಾಚಲ್ತೊ ಯೊಸೆಫ ಯೆಸುನು ಅಂಗ ಶಿಲುವಿಪರತೊ ಹೆಟೊ ಉತಾರಿನ ನರಮ ಪ್ಹಡಕಾಮಾ ಯೆಸುನೆ ಸುತ್ತಿನ ದಗಡಾಮಾ ಕಾಡಲ ಮಜಾ಼ರಮಾ ಮ್ಹೆಲ್ಯೊ. ತೆ ಮಜಾ಼ರಮಾ ಬಿಜಾ಼ ಕಿನೆಜ಼಼ ಘಾಲ್ಯಾ ನ್ಹೊತಾ. 54ವರಿ ತೆ ದಿನ್ನ ಸಬ್ಬತನೊ ತಯ್ಯಾರನೊ ದಿನ್ನ ವ್ಹತ್ತೊ.

55ಗಲಿಲಾಯತಾ ಯೆಸುನಾ ಕ್ಹಾತೆ ಆಯಲ ಹೆಣ ಮನಕ್ಹೊ ಯೊಸೆಫನಾ ಪಾಚಿ಼ಯೊ ಗಯ್ಯೊ. ತ್ಯುನೆ ಯೆಸುನೆ ಮುಕ್ಕಕಲ ಮಜಾ಼ರ ದೆಕಿಯೊ. 56ಪಾಚಾ಼ತಿಯೊ ತೆ ಹೆಣ ಮನಕ್ಹೊ ಯೆಸುನಾ ಅಂಗೆ ಲಗಾಡಾನಾ ಹುತಿ ಬಾಸನು ತೆಲ ಲಾವಾನಾ ಹುತಿ ಗಯ್ಯೊ. ಸಬ್ಬತ ದಿನಮಾ ತ್ಯುನೆ ಅರಾಮ ಕರಿಯೊ. ಮೊಶೆನು ಧರಮ ಶಾಸ್ತ್ರನಾ ಪ್ರಕಾರ ಸಬ್ಬತನಾ ದಿನಮಾ ಮನಕ್ಹೊ ಅರಾಮ ಕರಾನು ವ್ಹತ್ತು.