ಲುಕ 10

ಯೆಸು ಸುವಾರ್ತೆ ಕವಾನೆ ಮೊಕ್ಲಲ ಸತ್ತರಪರ ಬೆ ಜ಼ನಾವೊನೆ

1ತೆ ಥಯಲ್ಪರ ಯೆಸು ಸತ್ತರಪರ ಬೆ ಜ಼ನಾವೊನೆ ಇನಿಲಿನ ತೆ ಜೌ಼ ಕೈನ ವಿಚಾರ ಕರಲಿದಲ ಗಾಮೊಯೆ ತ್ಯುನೊನೆ ಬೆ-ಬೆ ಜ಼ನಾವೊನೆ ಪೈಲಾಜ಼ ಮೊಕ್ಲಿಪಾಡ್ಯೊ. 2ಯೆಸು ತ್ಯುನೊನೆ "ಬೆಳಿ (ಮನಕ್ಹೊ) ಘನ್ನಿ ಛೆ ತೆನೈಸೊ ಕಾಮ ಕರಾಲಾ ಕಮ ಛೆ ಕ್ಹುದಾ ಬೆಳಿನೊ ಮಾಲಕ ವ್ಹೈ ವರಿ ಬೆಳಿ ಮಳಾವಾನೆ ಘನ್ನಾ ಕಾಮ ಕರಾಲಾ ಚಾ಼ಯೆ ಕೈನ ಮಾಲಕಕನ (ಕ್ಹುದಾಕನ) ಮಾಂಗಿಲಿವೊ. 3ಹಮ್ನಾ ತುಮೆ ಜಾ಼ ಸಕೊಸಿ ವರಿ ಮಾರಿಯೊ ವಾತೊ ಐಕೊ ನರಿಯೊನಾ ವಚ್ಮಾ಼ ಬಕ್ರಾವೊನೆ ಮೊಕ್ಕಲಾಲಾಲಿಂಗತ ತುಮೊನೆ ಮೊಕ್ಕಲಾಡ್ಯೊಸ. 4ಕೈಚಿಲಾ ರ‍್ಹೈನೆಕಾ ದೊಕ್ಡಾ ರ‍್ಹೈನೆಕಾ ಚಪ್ಲೊ ರ‍್ಹೈನೆಕಾ ನಿಂಜಾ಼ವೊನಕೊ, ವಾಟ್ಮಾ ಹುಬ್ರೈನ ಮನಕ್ಹೊನೆ ಚೊ಼ಕು ಥಾವಾದೆ ಕೈನ ಬೊಲೊನಕೊ.

5ತುಮೆ ಘರಮಾ ಜಾ಼ವಾತಿ ಅಗ್ದುರಜ಼ ಆ ಘರಮಾ ಸಮಾಧಾನ ರ‍್ಹವಾದೆ ಕೈನ ತುಮೆ ಕವೊ. 6ತೆ ಘರಲ್ಯಾ ಮನಕ್ಹೊ ಶಾಂತಿ ಸಮಾಧಾನವಾಲಾ ರ‍್ಹಯಾಮ ತುಮಾರೊ ಆಶಿರ್ವಾದ ತ್ಯುನೊಪರ ರ‍್ಹವಸ. ನೈತೊ ತೆ ಆಶಿರ್ವಾದ ತುಮೊನೆ ಫರಿನ ಆವಸ. 7ತೆ ಘರಮಾ ರ‍್ಹೈನ ತ್ಯುನೆ ದಿವಾನು ಅನ್ನ ತುಮೆ ಖಾವೊ ವರಿ ತ್ಯುನೆ ದಿವಾನು ತುಮೆ ಪಿವೊ, ಕಾಮಕರಾಲೊ ಪಗಾರನೆ ಲಾಯಕ ವ್ಹೈ ತಿನಾಹುತಿ ತೆ ಘರ ಛೊಡಿನ ಬಿಜೆಕ ಘರಮಾ ಜಾ಼ವೊನಕೊ. 8ತುಮೆ ಯಕ್ಕ ಗಾಮೆ ಜಾ಼ತಾಮಾ ತೆ ಗಾಮ್ನಾ ಮನಕ್ಹೊ ತುಮೊನೆ ಮಳೈ ಲಿದ್ಯಾಮ,ತ್ಯುನೆ ದಿವಾನು ಅನ್ನ ಖಾವೊ 9ತ್ಯಾ ರ‍್ಹಯಲ ರೊಗಿಯೊನೆ ಅರಾಮ ಕರೊ, ತ್ಯಾನಾ ಮನಕ್ಹೊನೆ"ಕ್ಹುದಾನಿ ರಾಜ್ಯ ನಜಿಕ ಐಸ "ಕವೊ. 10ತೆನೈಸೊ ತುಮೆ ಯಕ್ಕ ಗಾಮೆ ಜಾ಼ತಾಮಾ ತ್ಯಾನಾ ಮನಕ್ಹೊ ತುಮೊನೆ ನೈ ಮಳೈ ಲಿದ್ಯಾಮ ತುಮೆ ತೆ ಗಾಮ್ನಿಯೊ ಒಣಿಯೊಮಾ ಗೈನ, 11ಅಪ್ನಾ ಪಗೊನೆ ಲಾಗಲ ಧುಳ್ಳ ತೆ ಗಾಮ್ನಾ ವಿರುದ್ದ ಝಾಡ್ಸಿಲಿಪಾಡಿಯೆಸ ಕ್ಹುದಾನಿ ರಾಜ್ಯ ನಜಿಕ ಆವಾಡಿಸ ಕವಾನು ತುಮೊನೆ ಕಳಾದೆ ಕವೊ. 12ಮಿ ತುಮೊನೆ ಕ್ಹರಿಜ಼ ಕೌಸ. ಕ್ಹುದಾನಿ ನ್ಯಾಯ ಫೈಸಲಾನಾ ದಿನಮಾ ತೆ ಮನಕ್ಹೊನಿ ಗತಿ ಸೊದೊಮ ಗಾಮ್ನಾ ಮನಕ್ಹೊನಿ ಗತಿತಿಬಿ ಕಠಿಣ ಥಾವಸ ಕದ್ಯೊ,

ಬರೊಕ್ಹೊ ನೈ ರ‍್ಹಯಲ ಮನಕ್ಹೊನೆ ಯೆಸು ಯಚ್ಚರ ದಿದಲ

(ಮತ್ತಾಯ 11:20-24)

13"ಕೊರಾಜಿನ ಬೆತ್ಸಾಯಿವಾಲಾ, ತಮಾರಿ ಗತಿ ಮಿ ಸು ಕೌ! ತುಮೊಮಾ ಮಿ ಘನ್ನಾ ಸುಚಕ ಕಾಮೊ ಕರ‍್ಯೊ ತೆಜ಼ ಸುಚಕ ಕಾಮೊ ತೊರ ವರಿ ಸಿದೊನ ಗಾಮೊಮಾ ಥಾವತ್ತೊ. ತ್ಯಾನಾ ಮನಕ್ಹೊ ಪೈಲಾಜ಼ ತ್ಯುನಾ ಪಾಪೊ ಛೊಡಿನ ಪಶ್ಚಾತಾಪ ಪಡಿನ ಕೊತ್ಳಾವೊನಾ ವಣ್ಣಾ ಘಾಲ್ಲಿನ ರಾಕ ಅಂಗೆ ಲಗಾಡಿ ಲೆತಾತಾ. 14ವರಿ ಕ್ಹುದಾನಿ ನ್ಯಾಯ ಫೈಸಲಾನಾ ದಿನಮಾ ತಾರಿ ಸ್ತಿತಿ ತೊರ ವರಿ ಸಿದೊನ ಗತಿತಿಬಿ ಕಠಿಣ ಥಾವಸ ಕದ್ಯೊ, 15ಕಪೆನೌರ್ಮಿ ತು ಸ್ವರ್ಗಲೊಕಮಾ ಜಾ಼ಶಿಸು! ನೈ? ತು ಪಾತಾಳಮಾ ಉತರಸಿ. 16ತುಮಾರಿಯೊ ವಾತೊ ಐಕಾಲಾ ಮಾರಿಯೊ ವಾತೊ ಐಕಾಲೊ ಥಾವಸ. ತುಮೊನೆ ವಪ್ಪಿಲಿವಾಲಾ ಮನೆ ವಪ್ಪಿಲಿವಸ ಮನೆ ಕುನ್ನ ನೈ ವಪ್ಪಿಲಿವಾಲೊ ಮನೆ ಮೊಕ್ಕಲಲವಾಲಾನೆ (ಕ್ಹುದಾನೆ) ನೈ ವಪ್ಪಿಲೆತೊ,ಕದ್ಯೊ.

ಸತ್ತರಪರ ಬೆ ಜ಼ನಾ ಫರಿನ ಆಯಲ

17ಸತ್ತರಪರ ಬೆ ಜ಼ನಾ ಶಿಷ್ಯಾ ಗಾಮೊಪರತಾ ಫರಿನ ಆತಾಮಾ ಘನ್ನಾ ಖುಶಿ ಕ್ಹು ವ್ಹತ್ತಾ ತ್ಯುನೆ ಯೆಸುನೆ "ಪ್ರಭು ಹಮೆ ತಾರು ನಾಮ ಕತಾಮಾ ಕೆಟ್ಟ ಆತ್ಮಾಬಿ ಹಮೊನೆ ವಿಧೆಯೆ ಥಯ್ಯೊ, ಕದ್ಯಾ. 18ಯೆಸು ತ್ಯುನೊನೆ ಸೈತಾನ ಬಿಜ್ಲಿನಾ ರುಪಮಾ ಸ್ವರ್ಗಮಾತೊ ಹೆಟೊ ಪಡ್ವಾನು ಮಿ ದೆಕ್ಯೊ. 19ಐಕೊ, ಕ್ಹಾಪೊ ವರಿ ಇಚ್ಚಿಯೊಪರ ಚಾ಼ಲಾನು ತುಮೊನೆ ಮಿ ಅದಿಕಾರ ದಿದ್ಯೊಸ. ವೈರಿಯೊನೆ (ಸೈತಾನ) ರ‍್ಹಯಲ ಅದಿಕಾರಿತೊಬಿ ಹೆಚ್ಕಿ ಅದಿಕಾರ ಮಿ ತುಮೊನೆ ದಿದ್ಯೊಸ ಕದ್ಯೊ. ತುಮೊನೆ ಸುಜ಼ ಕೆಡ ಕರತು ನೈ. 20ಹೊ ಕೆಟ್ಟ ಆತ್ಮಾವೊಬಿ ತುಮೊನೆ ವಿಧೆಯ ಥಾವಸ ಎ ಅದಿಕಾರ ತುಮೊನೆ ಛೆ ರ‍್ಹಯಲ ಹುತಿ ಖುಶಿ ಥಯೆ ನೈಸೊ ತುಮಾರಾ ನಾಮೊ ಸ್ವರ್ಗಮಾ ಬರ್ದಲ ಛೆ ಕವಾನಾ ಹುತಿ ಖುಶಿ ಕ್ಹು ರ‍್ಹವೊ.

ಯೆಸು ಬಾನೆ ಕರಲ ಪ್ರಾಥನಾ

(ಮತ್ತಾಯ 11:25-27; 13:16-17)

21ಪಾಚಲ್ತೊ ಯೆಸು ಪವಿತ್ರ ಆತ್ಮಾಕ್ಹು ಘನ್ನೊ ಖುಶಿ ಥೈನ ಅಮ್ಮ ಪ್ರಾಥನಾ ಕರ‍್ಯೊ ಸ್ವರಗ ಲೊಕನೊ ಭುಲೊಕನೊ ಕ್ಹುದಾ ಥಯಲ ಬಾ ಮಿ ತುನೆ ಸ್ತುತಿ ಕರುಸ ತು ಗ್ಯಾನಿಯೊನೆ ಗ್ಯಾನ ರ‍್ಹಯಲವಾಲಾವೊನಾ ಎ ಸಂಗತಿ ಝಾಕಿನ ಮುಕ್ಕಕಲ ಹುತಿ ಮಿ ತುನೆ ಸ್ತುತಿ ಕರುಸ ವರಿ ತು ನ್ಹಾನಾ ಬಚ್ಚಾ಼ವೊಲಿಂಗತ ರ‍್ಹಯಲ ಮನಕ್ಹೊನೆ ಎ ಸಂಗತಿಯೊ. ಝಾಕಿನ ಮ್ಹೆಲ್ಯಾವಾಚಿ ಕದ್ಯೊ ಹೊ ತೆಜ಼ ತಾರಿ ಆಸ ವ್ಹತ್ತಿ. 22ಮಾರೊ ಬಾ ಮನೆ ಕ್ಹಾರುಜ಼ ದಿದ್ಯೊಸ. ದಿಕ್ರೊ ಕುನ್ನ ವ್ಹೈ ಕಿನೆಜ಼಼ ಗೊತ್ತ ನತ್ತಿ. ಬಾ ನೆ ಯಕಜ಼ ಗೊತ್ತ ಛೆ. ವರಿ ಬಾ ಕುನ್ನ ವ್ಹೈ ಕವಾನು ದಿಕ್ರಾನೆ ಯಕಜ಼ ಗೊತ ಛೆ. ದಿಕ್ರೊ ಬಾನಾ ಹುತಿ ಕಿನೆ ತಿಳ್ಸಸ ತೆ ಯಕ್ಕಲೊಜ಼ ಬಾನಾ ಹುತಿ ತಿಳದಿಲಿವಸ.

23ಪಾಚಲ್ತೊ ಯೆಸು ತಿನಾ ಶಿಷ್ಯಾವೊನೆ ಫರಿನ ದೆಕ್ಯೊ. ತ್ಯಾ ತಿನಾ ಶಿಷ್ಯಾ ಯಕ್ಕ ಜ಼ ವ್ಹತ್ತಾ ಯೆಸು ತ್ಯುನೊನೆ ಹಮ್ನಾ ಥಾವಾನು ಸಂಗತಿಯೊ ದೆಕಲ ತುಮೆ ಧನೈ ವ್ಹೈ. 24ತಿನಾ ಹುತಿ ಮಿ ತುಮೊನೆ ಕೌಸ ಘನ್ನಾ ಪ್ರವಾದಿಯೊ ರಾಜಾ಼ ಹಮ್ನಾ ತುಮೆ ದೆಕಾನು ಎ ಸಂಗತಿಯೊ ದೆಕು ಕೈನ ವರಿ ತುಮೆ ಐಕಾನು ಸಂಗತಿಯೊ ಐಕೊ ಕೈನ ಆಸ ರ‍್ಹೈತಬಿ ತೆ ತ್ಯುನೊನೆ ಸಾದ್ಯ ಥೈಯು ನೈ "ಕದ್ಯೊ.

ಚೊ಼ಕಾ ಸಮಾರಯಾವಾಲಾನಿ ಸಾಮ್ಯ

25ತೆಳಾಮಾ ಶಾಸ್ತ್ರಿಯೊಮಾನೊ ಯಕ್ಲೊ ಯೆಸುನೆ ಪರಿಕ್ಷಾ ಲಿವೊ ಕೈನ ಉಟಿನ ಹುಬ್ರೈನ ಗುರು ಮಿ ಹಮೆಶಾನೊ ಜ಼ಲಮ ಲಿವು ಕದ್ಯಾಮ ಮಿ ಸು ಕರು ಕೈನ ಪುಚ್ಯೊ. 26ತೆ ವಾತೆ ಯೆಸು ಧರಮ ಶಾಸ್ತ್ರಮಾ ಸು ಬರ್ದಲ ಛೆ? ಕದ್ಯೊ.

27ತೆ ವಾತೆ ತೆ ತಾರೊ ಕ್ಹುದಾ ಥಯಲ ಕರ್ತಾನೆ ಪುರಾ ರ‍್ಹುದಯಾ ಕ್ಹು ಪುರಾ ಜ಼ಲಮಕ್ಹು ಪುರಾ ತಾಕತಕ್ಹು ಪುರಾ ಮನಸೆ ಮಯಾ ಕರು ವರಿ ತಾರಾಕ್ಹು ತು ಕೆಕ್ಲೊ ಮಯಾ ಕರಶಿ ತಾರಾ ಬಾಜು಼ವಾಲಾನೆ ತೆಕ್ಕಲೊ ಮಯಾ ಕರುಕೈನ ಕದ್ಯೊ.

28ಯೆಸು ತಿನಿ ತು ಕದಲ ಕರೆಟ್ಟ ಛೆ ತು ತಿಮ್ಮಜ಼ ಕರ ತೆಳಾಮಾ ತುನೆ ಹಮೆಶಾನೊ ಜ಼ಲಮ ಮಳಸ "ಕದ್ಯೊ.

29ತೆನೈಸೊ ತೆ ಮನಕ್ಹ ತೆ ಖರಿನೊ ವ್ಹೈ ಕವೈ ಲಿವಾ ಹುತಿ, ಯೆಸುನೆ"ಮಿ ಮಯಾ ಕರಾನು ಮಾರೊ ಬಾಜು಼ವಾಲೊ ಕುನ್ನ ವ್ಹೈ? ಕೈನ ತಿನೆ ಪುಚ್ಯೊ

30ತೆಳಾಮಾ ಯೆಸು ತಿನೆ ಸು ಕದ್ಯೊ ಕದ್ಯಾಮ" ಯಕ್ಕ ಮನಕ್ಹ ಯೆರುಸೆಲಿಮಾ ಉತ್ರಿನ ಯೆರಿಕೊವೆ ಜಾ಼ವಾನಿ ವಾಟ್ಮಾ ಜಾ಼ತಾಮಾ. ದಕ್ಹಾ ಚ್ವಟ್ಟಾತಿನೆ ಗೊಲ ಘಾಲ್ಯಾ. ತ್ಯುನೆ ತಿನಾ ಘಾಲ್ಲಿದಲ ವಣ್ಣಾ ಫಾಡಿನ ತಿಕನ ರ‍್ಹಯಲ ತೆಕ್ಲು ಕಾಳ್ಳಿನ ತಿನೆ ಮಾರ‍್ಯಾ. ತಿನೆ ಉಟಾನೆ ಥಾಯೆ ನೈಸೊ ಜಿಮಿನ್ಪರ ಪಡಿಗಯೊತೊ. ಚ್ವಟ್ಟಾ ತಿನೆ ತ್ಯಾಜ಼ ಛೊಡಿನ ಗಯಾ. ತೆ ಮರವಾನಿ ಸ್ತಿತಿಮಾ ವ್ಹತ್ತೊ. 31ತೆಜ಼ ವಾಟ್ಮಾ ಯಕ್ಲೊ ಯಾಜಕ ಚಾ಼ಲ್ಯೊತೊ ಜಾ಼ತಾಮಾ ತೆ ಪಡಲವಾಲಾನೆ ದೆಕಿನಬಿ ದೆಕೆನೈಸೊ ಗಯೊ. 32ತಿನಾ ಲಿಂಗತಜ಼ ಯಕ್ಲೊ ಭು ಭಾಡೊ ಲಿವಾಲೊ ತೆ ಪಡಲ ವಾಲಾನೆ ದೆಕಿನಬಿ ನೈ ದೆಕಲ ಲಿಂಗತ ತ್ಯಾಂತೊ ಗೈ ಪಾಡ್ಯೊ. 33ತೆಳಾಮಾ ಯಕ್ಲೊ ಸಮಾರಯಾವಾಲೊ ತೆಜ಼ ವಾಟ್ಮಾ ಆತಾಮಾ ತೆ ಮನಕ್ಹ ಮಾರ ಖೈನ ಪಡಲ ಜ಼ಗಾ ಐನ ತೆ ಮಾರ ಖೈನ ಪಡಲ ಮನಕ್ಹನೆ ದೆಕಿನ ಘನ್ನೊ ಮರಗ್ಯೊ. 34ಸಮಾರಯಾವಾಲೊ ಬೆ ರುಪ್ಪಾನಾ ಬಿಲ್ಲಾ ತೆ ಸಮರಯಾವಾಲೊ ತೆ ಮನಕ್ಹನಾ ದುಕ್ಕಕೊಪರ ಒಲಿವ ತೆಲ ವರಿ ದ್ರಾಕ್ಷಿಯೊನೊ ರಕ್ಹ ಲಗಾಡಿನ ತೆ ದುಕ್ಕಕೊಪರ ಫಡಕಾ ಕ್ಹು ಭಾಂದಿನ. ಸಮಾರಯಾವಾಲೊ ಯಕ್ಕ ಗದಡಾಪರ ಆಯೊತೊ ತೆಜ಼ ಗದಡಾಪರ ತೆ ಮಾರ ಖಾದಲ ಮನಕ್ಹನೆ ಘಾಲ್ಲಿನ ದವಾಕ್ಹಾನಿಯೆ ನಿಂಗೈನ, ಅರಾಕಿ ಕರ‍್ಯೊ. ಮರ್ನಾ ದಿನ್ನೆ ತೆ ವಾಕ್ಹಾನಿ ವಾಲಾನೆ ದಿನ ಇನೆ ಅರಾಕಿ ಕರ ಕೈನ; ವರಿ ಹೆಚ್ಕಿ ಖರಚ಼ ಥಯಾತಬಿ ಮಿ ಬಿಜೆ಼ಕ್ಕೆಬ ಆತಾಮಾ ವರಿ ತುನೆ ದಿವ್ಸ ಕದ್ಯೊ. 35ಮರ್ನಾ ದಿನೆ,ಸಮರಯಾವಾಲೊ ಬೆ ರುಪ್ಪಾನಾ

36ತೆಳಾಮಾ ಯೆಸು ಶಾಸ್ತ್ರಿನೆ "ಎ ತನ ಜ಼ನಾವೊಮಾ (ಯಾಜಕ, ಭು ಭಾಡೊವಾಲೊ, ವರಿ ಸಮಾರಯಾ ವಾಲೊ) ಕುನ್ನ ಚ್ವಟ್ಟಾವೊನಾ ಹತೆ ಮಾರ ಖೈನ ಪಡಲವಾಲಾನೆ ಮನಕ್ಹನೆ ಕುನ್ನ ಮಯಾ ಕರ‍್ಯು? ಕೈನ ಪುಚ್ಯೊ.

37ತೆಳಾಮಾ ಶಾಸ್ತ್ರಿ, ತೆ ಮಾರ ಖೈನ ಪಡಲವಾಲಾನೆ ಆಸ್ರೊ ಕರಲವಾಲೊ ವ್ಹೈ ಕದ್ಯೊ.

ತೆಳಾಮಾ ಯೆಸು ತಿನೆ ತಿಮ್ಮ ರ‍್ಹಯುಮ, ತು ಗೈನ ತಾರಾ ಬಾಜು಼ವಾಲಾನೆ ತಿಮ್ಮಜ಼ ಮಯಾ ಕರ"ಕದ್ಯೊ.

ಮರಿಯಳ ವರಿ ಮಾರಥಳ

38ಯೆಸು ವರಿ ತಿನಾ ಶಿಷ್ಯಾ ಫರತಾ-ಫರತಾ ಯಕ್ಕ ಗಾಮೆ ಆಯಾ, ಮಾರಥಳ ಕವಾಲಿ ಯಕ್ಕ ಹೆಣ ಮನಕ್ಹ ಯೆಸುನೆ ತಿನಾ ಘರೆ ಆ ಕದಿ. 39ತಿನೆ ಯಕ್ಕಲಿ ಮರಿಯಳ ಕವಾಲಿ ನ್ಹಾನಿ ಭೆನ ವ್ಹತ್ತಿ. ಯೆಸು ತ್ಯುನಾ ಘರೆ ಆತಾಮಾ ಮರಿಯಳ ಯೆಸುನಾ ಪಗೊಕನ ಬೈಟಿನ ತಿನು ಉಪದೆಶ ಐಕಾಡಿತಿ. 40ಘರಮಾ ಘನ್ನು ಕಾಮ ರ‍್ಹಯಲ ಹುತಿ ಮಾರಥಳ ಘನ್ನಿ ಶಿಟ್ಟ ಥೈನ ಯೆಸುಕನ ಐನ, ಪ್ರಭು, ಮಾರಿ ಭೆನ ಘರನು ಪುರಾ ಕಾಮ ಮಪರ ಯಕ್ಕಲಿಪರಜ಼ ಛೊಡಿನ ತುಕನ ಐನ ಬೈಟಿಸ. ಇನಾಹುತಿ ತುನೆ ಚಿಂತಾ ನತ್ತಿಸು? ಮಾರಾ ಕ್ಹಾತೆ ಕಾಮ ಕರ ಕೈನ ತಿನೆ ಕೆ ಕದಿ.

41ತೆನೈಸೊ ಯೆಸು ಮಾರಥಳನೆ "ಮಾರಥಳ, ಮಾರಥಳ, ತು ಘನ್ನಿಯೊ ಚಿಂತಾಮಾ ವರಿ ಗಲಿಬಿಲಿಮಾ ಛೆ. 42ಯಕ್ಕಜ಼ ಯಕ್ಕ ಚೊ಼ಕು ರ‍್ಹಯಲ ಮರಿಯಳ ಇನಿಲಿದಿಸ. ತೆ ತಿಮಾತು ಕೆಳಾಮಾಜ಼ ಕಾಡಾನೆ ಥಾತು ನೈ "ಕದ್ಯೊ.