ಅಪೊಸ್ತಲೊ 24

ಫೆಲಕ್ಸಾನಾ ಕ್ಹಾಮು

1ಪಾಂಚ಼ ದಿನ್ನ ಥಯಲ್ಪರ ಮ್ಹೊಟೊ ಯಾಜಕ ಥಯಲ ಅನನಿಯಾ ಶಾನಾವೊಮಾ ದಕ್ಹಾಜ಼಼ನಾವೊಮಾ ತೆರ್ತುಲ ಕವಾಲೊ ಯಕ್ಕ ವಕಿಲನೆ ಬಲೈಲೈನ, ಪೌಲಾನಾ ವಿರುದ್ದ ದೆಶಾದಿಪತಿನೆ ದುರ ಕದ್ಯಾ. 2ಪೌಲಾನೆ ಬಲಾಯಲ್ಪರ ತೆರ್ತುಲ್ಯ ತಿಪರ ತಪ್ಪ ಘಾಲಾನೆ ಶುರು ಕರಿನ ಅಮ್ಮ ಕದ್ಯೊ"ಮ್ಹೊಟೊ ಶ್ರೆಷ್ಠ ರ‍್ಹಯಲ ಫೆಲಿಕ್ಸ, ತಾರಾ ಮುಲಕ ಹಮೊನೆ ಘನ್ನು ಸಮಾಧಾನ ಹುಟ್ಟಸ ಕೈನ, ತಾರಿ ಅಗ್ಲಿ ವಿಚಾರನಾ ಹುತಿ ಎ ದೆಶನಾ ಮನಕ್ಹೊನೆ ಕ್ಹಾರಿ ತರಾಮಾ ಕ್ಹಾರಿ ಜ಼ಗಾಮಾ, ತುಟ್ಟಿ ಗಯೆಲ ಸಂಗತಿಯೊನೆ ಸುಧಾರಣೆ ಥಾವಾನಾ ಹುತಿ 3ಹಮೆ ಎ ಉಪಕಾರ ಕೃತಜ್ಙತೆಕ್ಹು ವಪ್ಪಿಲಿಯೆಸ. 4ತೆನೈಸೊ ತುನೆ ಬೆಜ್ಜಾರ ಕರಾನು ಹಮೊನೆ ಮನಸ ನೈಸೊ ಹಮೆ ಖುಲ್ಲಾ ಕವಾನಿಯೊ ವಾತೊ ಮರ್ಗಾಕ್ಹು ಐಕು ಕೈನ ಮಾಂಗಿಲಿಯೆಸ. 5ಎ ಮನಕ್ಹಮಾ ಅಪಾಯ ದೆಕ್ಯಾ. ದುನಿಮ್ಮಾ ಕ್ಹಾರಿ ಜ಼ಗಾ ರ‍್ಹಯಲ ಯೆಹುದಿಯೊಮಾ ದಂಗೊ ಉಟಾಡಸ ಕವಾನು, ನಜರೆನ ಕವಾನು ಪಂಥನೊ ನಾಯಕ ವ್ಹೈ ಕೈನ ದೆಕ್ಯಾಸ. 6ಯಕ್ಲುಜ಼ ನೈಸೊ ತೆ ಮನಕ್ಹ, ದೆವಾಲಯಮಾ ಹೊಲಸ ಕರಾನೆ ಕೊಶಿಶ ಕರ‍್ಯೊ. ತಿನಾಹುತಿ ಹಮೆ ತಿನೆ ಧರಿನೆ ಘ್ಯಾಲ್ಯಾಸ. 7ತೆನೈಸೊ ಸಹಸ್ರಾದಿ ಪತಿ ಥಯಲ ಲುಸ್ಯನ ವಚ್ಮಾ಼ ಐನ ಜ಼ಬರದಸ್ತಿ ಕರಿನ ತಿನೆ ಹಮಾರಾ ಹತೊಮಾತೊ ಛೊಡೈಲಿನ ಗಯೊ. 8ಇನೆ ತುಜ಼಼ ವಿಚಾರ ಕರ‍್ಯೊಮ, ಹಮೆ ಇನಾ ಉಪ್ಪರ ಘಾಲಲ ತಪ್ಪೊ ಕ್ಹರಿ ವ್ಹೈ ಸು ಸುಳ್ಳ ವ್ಹೈಸು ಇನಾಕ್ಹು ವಳಕಿಲಿಯೆಸ ಕೈನ ಕದ್ಯೊ. 9ತೆಳಾಮಾ ಯಹುದಿಯೊ ವಕಿಲನಾ ಕ್ಹಾತೆ ಮಳಿನ ಸಂಗತಿಯೊ ಕ್ಹರಿ ವ್ಹೈ ಕೈನ ತ್ಯುನೆ ತೆ ದೊಶಾರೊಪಣೆ ಕರಾಲಾವೊನಾ ಕ್ಹಾತೆ ಮಳ್ಯಾ. 10ದೆಶಾದಿಪತಿ ಪೌಲಾನೆ, ತು ಬೊಲಸಕ್ಸಿ ಸ್ವನ್ನಿ ಕರ್ತಾಮಾ, ತೆ ಫರಿನ ಉತ್ತರ ಸು ದಿದ್ಯೊ ಕದ್ಯಾಮ; ತು ಘನ್ನಾ ವರಕ್ಹತೊ ಎ ದೆಶನಾ ಮನಕ್ಹೊನೆ ನ್ಯಾಯಾದಿ ಪತಿ ಥೈನ ರ‍್ಹೌ ಕೈನ, ಕೈನ ತಿಳದಿಲಿನ ಮಿ ಖುಶಿಕ್ಹು ಪ್ರತಿವಾದ ಕರಾಡ್ಯೊಸ. 11ಮಿ ಕ್ಹುದಾನಿ ಅರಾಧಾನಾ ಕರಾನಾಹುತಿ ಯೆರುಸೆಲೆಮೆ ಗೈನ, ಕ್ಹಾಲಿ ಬಾರಾ ದಿನ್ನ ಥಯಾಸ ಕೈನ ತು ತಿಳ್ದಿಲೆಸಕ್ಸಿ. 12ತ್ಯಾ ದೆವಾಲಯಮಾ ರ‍್ಹೈನೆಕಾ, ಸಭಾಮಂದಿರಮಾ ರ‍್ಹೈನೆಕಾ, ಗಾಮ್ಮಾ ರ‍್ಹೈನೆಕಾ, ಯೆಹುದಿನಾ ಕ್ಹಾತೆ ವಾದಾ ಕರಾನು, ನೈತೊ ಮನಕ್ಹೊನು ಗುಂಪ ಮಳಾವಾನು ಇವ್ನೆ ದೆಕ್ಯಾ ನತ್ತಿ. 13ಎನೈಸೊ ಇವ್ನೆ ಮಪರ ಘಾಲಾನು ತಪ್ಪೊ ಸಾಬಿತ ಕರಾನಾಹುತಿ ತಾರಾ ಕ್ಹಾಮಾ ತುನೆ ದೆಕಾಡಿನ ದೆತಾ ನೈ. 14ಯಕ್ತೊ ತಾರಾ ಕ್ಹಾಮೊ ವಪ್ಪಿಲ್ಯುಸ, ತೆ ಸು ವ್ಹೈ ಕದ್ಯಾಮ;ಇವ್ನೆ ಮನೆ ಧರ್ಮನೊ ವಿರೊದಿ ವ್ಹೈ ಕೈನ ಕವಾನು, ಮಿತೊ ಮಾರಾ ಪಿತೃ ಆರಾಧನ ಕರಾನಾ ಕ್ಹುದಾನೆಜ಼ ಮಿ ಆರಾದಾನಾ ಕರಾಲೊ ಥಯೊಸ. ಮೊಶೆನು ಧರ್ಮ ಶಾಸ್ತ್ರನಾ ಲಿಂಗತ ರ‍್ಹಯಲ ವರಿ ಪ್ರವಾದಿಯೊನಾ ಗ್ರಂಥೊಮಾ ಬರ್ದಲ ಕ್ಹಾರಿ ವಿಷಯನಾ ಹುತಿ ಬರೊಕ್ಹೊ ಕರಿಯೆಸ. 15ತೆನೈಸೊ ನಿತಿವಂತವಾಲಾವೊನೆ ವರಿ ಅನಿತಿವಂತವಾಲಾವೊನೆ ಪುನರುತ್ಥಾನ ಥಾವಾಸ ಕೈನ ಇನ್ವೆ ಕ್ಹುದಾಪರ ಬರಿಕ್ಹೊ ಮ್ಹೆಲಲ ಲಿಂಗತಜ಼ ಮಿಬಿ ಆಸ ಮ್ಹೆಲಲವಾಲೊ ಥಯೊಸ. 16ಇನಾಹುತಿ ಕ್ಹುದಾನಾ ಕ್ಹಾಮಾ ಶುದ್ಧ ಮನಸಕ್ಹು ರ‍್ಹವಾನೆ ಮನಸಾಕ್ಷಿಲಿಂಗತ ಮಿ ಕೆಳಾಮಾಬಿ ಮನೆ ಥಾವಾಕ್ಲು ಕೆಳಮ್ಮಾನಿ ಕೊಶಿಷ ಕರುಸ. 17ದಕ್ಹಾ ವರಕ್ಹ ಥಯಲ್ಪರ, ಯೆರುಸಲೆಮ್ಮಾ ರ‍್ಹಹೆಲವಾಲಾವೊನೆ ದೊಕಡಾ ವರಿ ಕಾಣಿಕೆ ಯಜ್ಞನೆ ಒಪ್ಪಿಸಾನಾಹುತಿ ಆಯೊ. 18ಮಿ ಶುದ್ಧಿಕರಿಲಿದಲ ಲಿಂಗತ, ತೆ ವಪಸ್ತಾಮಾ,ತ್ಯುನೆ ಮನೆ ದೆವಾಲಯಮಾ ದೆಕ್ಯಾ, ತೆಳಾಮಾ ಮಾರಾಕ್ಹಾತೆ ಮನಕ್ಹೊನು ಗುಂಪ ನ್ಹೊತು. ಗದ್ದಲಬಿ ನ್ಹೊತಿ. ಮನೆ ದೆಕಲವಾಲಾ. 19ಆಸ್ಯಸಿಮೆತ್ತಾ ಆಯೆಲವಾಲಾ ದಕ್ಹಾ ಯೆಹುದಿಯೊ ವ್ಹೈ. ಮಾರಾ ವಿರುದ್ದ ತ್ಯುನೊನೆ ಸುಬಿ ರ‍್ಹೈಯುಮ, ತ್ಯುನೆ ಕ್ಹಾಮಾ ಅಪರಾದ ಘಾಲಾನಾ ಹುತಿ ನ್ಹ್ಯಾ ಆವಾನ ವ್ಹತು. 20ನೈರ‍್ಹತಾಮ್ಮಾ ಮಿ ನ್ಯಾಯ ಸಬೆನಾ ಕ್ಹಾಮೊ ಹುಬ್ರೆತಾಮಾ, ಮಾರಾಮಾ ಅಪರಾದ ದಿಕ್ಹ್ಯುಮ ಇವ್ನೆಜ಼ ಕವಾದೆ. 21ಮಿ ಇವ್ನಾ ವಚ್ಮಾ಼ ಹುಬ್ರ್ಯೆನ; ಮರಿನ ಪುನರುತ್ಥಾನ ಥಾವಸ ಕೈನ ನಂಬಾನಾಹುತಿ ತುಮೊಕ್ಹೊ ಮನೆ ವಿಚಾರಣೆನೆ ಗುರಿ ಥಾವಾಸ’ ಕೈನ ಜೊ಼ರ ವದ್ರಿನ ಕದಲ ಹುತಿ ಕೌ ಯಕ್ಕಜ಼ ತೆನೈಸೊ ಬಿಜು಼ ಸುಜ಼ ಕತಾ ನೈ ಕೈನ ಕದ್ಯೊ. 22ಫೆಲಿಕ್ಸ ಎ ವಾಟ, ತಕ್ಕ ಟೈಮ್ಮ ತಿಳದಿಲಿದಲ ರ‍್ಹಯೊತಬಿ ತ್ಯುನೊನೆ; ತಿರ್ಮಾನ ಕರುಸ ಕೈನ, ಫೈಸ್ಲೊ ಕರಾನೆ ನಿರ್ಧಾರ ಕರ‍್ಯೊ. 23ತೆ ಥಯಲ್ಪರ ಪೌಲಾನೆ ಕಾವಲಮಾ ಮ್ಹೆಲು ಕೈನ, ಆದರೆ ಕಟ್ಟು ನಿಟ್ಟ ನಕೊ ಚಾ಼ಯೆ ಕೈನ, ತಿನೆ ರ‍್ಹಯೆಲ ದೊಸ್ತೊನೆ ತಿನೆ ಉಪಚಾರ ಕರಾನು, ಅಡ್ಡಿಕರು ನೈ ಕೈನ ಶತಾದಿಪತಿನೆ ಅಪ್ಪಣೆ ಕರ‍್ಯಾ. 24ದಕ್ಹಾ ದಿನ್ನ ಥಯಲ್ಪರ ಫೆಲಿಕ್ಸ, ಯಹುದಿಯೊನೆ ರ‍್ಹಯಲ ದ್ರೊಸಿಲ್ಲ ಕವಾಲಿ ಬಾಕ್ಡಿ ತಿನಾ ಕ್ಹಾತೆ ಐನ, ಪೌಲಾನೆ ಬಲೈನ ಕ್ರಿಸ್ತ ಯೆಸುಮಾ ಮ್ಹೆಲಾನಾ ಬರೊಕ್ಹಾನಾ ಹುತಿ ತೆ ಕವಾನಿ ವಾತೊ ಐಕ್ಯೊ. 25ತಿನಾಹುತಿ ತ್ಯಾಂತೊ ಗೈನ ಪೌಲಾ ಸ್ವ ನಿಯಂತ್ರಣ ವರಿ ಅಗು ಥಾವಾನು ಚೊ಼ಕಾನಾಹುತಿ ಚೆರ್ಚಾ ಕರಿನಾಹುತಿ ಇವ್ನಾ ಹುತಿ ಕತಾಮಾ ಫೆಲಿಕ್ಸ ಭುಚಿ಼ಕಿನ ತಿನೆ; ತೆ ಕವಸ ಹಮ್ನಾ ತು ಜಾ಼; ಮಿ ತುನೆ ಟೈಮ ಮಳಲಪರ ತುನೆ ಬಲೌಸ ಕೈನ ಕದ್ಯೊ. 26ತೆಜ಼ ಟೈಮ್ಮಾ ತೆ ಪೌಲಾನೆ ಸುಬಿ ತಿನೆ ಸುಬಿ ದೊಕ್ಡಾ ದೆಸ ಕೈನ ಆಸ ಕರಿನ, ತೆಳಾಮಾ ತಿನೆ ಬಲೈನ ತಿನಾ ಕ್ಹಾತೆ ಸಲ್ಲಾಪ ಕರ್ತೊತೊ. 27ಬೆ ವರಕ್ಹ ಥಯಲ್ಪರ ಫೆಲಿಕ್ಸನಿ ಜ಼ಗಾಪರ ಪೊರ್ಕಿಯ ಪೆಸ್ತನ ಕವಾನೊ ರಾಜ್ಯಾಪಾಲ ಆಯೊ. ಫೆಲಕ್ಸ ಯಹುದಿಯೊನಿ ಮಯಾ ಗಳಸು ಕೈನ ಪೌಲಾನೆ ಜೆಲ್ಮಾಜ಼ ಮ್ಹೆಲಿನ ಗಯೊ.