ಅಪೊಸ್ತಲೊ 22

1"ವಿಶ್ವಾಸಿಯೊ ವರಿ ಬಾಪೊ, ಹಮ್ನಾ ಮಿ ಕವಾನಿ ಸಮರ್ಥನೆನಿ ವಾತ ವ್ಹೈ ಕೈನ ಕದ್ಯೊ. 2ತೆ ತ್ಯುನಾ ಕ್ಹಾತೆ ಹಿಬ್ರಿಯ ಭಾಶೆಮಾ ಬೊಲಾನು ಐಕೊ ತ್ಯುನೆ ವರಿ ಶಾಂತ ಥೈಗೈಯಾ. ತೆಳಾಮಾ ತೆ ಸು ಕದ್ಯೊಮ; 3ಮಿ ಯಹುದಿ ವ್ಹೈ. ಕಿಲಿಕ್ಯನಿ ತಾರ್ಸಮಾ ಹುಟ್ಟಲ ವ್ಹೈ,ತೆನೈಸೊ ಎ ಗಾಮ್ಮಾ ಬೆಳದಲವಾಲೊ. ಗಮಲಿಮಾ ಪಾದ ಸನ್ನಿದಿಮಾ, ಅಪ್ನಾ ಪಿತೃವೊನಾ ಧರಮಶಾಸ್ತ್ರಮಾ ಪುರಾ ಶಿಕ್ಷಣ ಲಿದ್ಯೊ; ತುಮೆ ಕ್ಹಾರಾ ಹಮ್ನಾ ಕ್ಹುದಾನಾ ಹುತಿ ಅಭಿಮಾನ ರ‍್ಹಯಲವಾಲಾವೊಲಿಂಗತ, ಮಿಬಿ ಅಭಿಮಾನಿ ಥಯೊಸ. 4ಎ ವಾಟಮಾ ರ‍್ಹಯಲವಾವೊನೆ ತ್ರಾಸ ದಿವಾಲೊ ಥೈನ ದಾಣ್ಗಾವೊನೆ ವರಿ ಬಾಕ್ಡಿಯೊನೆ ಬೆಡಿಯೊ ಘಾಲಿನ, ತ್ಯುನೊನೆ ಜೆಲ್ಮಾ ಘಲಾತೊ ವ್ಹತ್ತೊ, ಖಲಾಸ ಕರಾನೆಬಿ ಪಾಚೊ಼ ಸರಕ್ತೊ ನ್ಹೊತೊ ತೆಕ್ಲೊ ತ್ರಾಸ ದೆತೊತೊ. 5ಇನಾಹುತಿ ಮಾಹಾ ಯಾಜಕ, ಮ್ಹೊಟಿ ಸಬೆವಾಲಾ ಮನಕ್ಹೊ ಸಾಕ್ಷಿಯೊ ಥಯಾಸ; ತ್ಯುನಾ ಹುತಿಜ಼ ಮಿ ದಮಸ್ಕಮಾ ರ‍್ಹಯಲ ವಿಶ್ವಾಸಿಯೊನೆ ಪತ್ರೊ ಕಾಳ್ಳಿನ, ತ್ಯಾ ಗಯಲವಾಲಾವೊನೆ ಬೆಡಿಯೊಕ್ಹು ಭಾಂದಿನ ಶಿಕ್ಷಾನಾ ಹುತಿ ಯೆರೊಸೆಲಿಮೆ ಲೌ ಕೈನ ಜಾ಼ವಾಲೊ 6ಮಿ ಪ್ರಯಾಣ ಕರ್ತೊ ದಮಸ್ಕನಾ ನಜಿಕ ಆತಾಮಾ ದುಪಾರ ಥೈತಿ ತೆಳಾಮಾ ಹಬಾಳಮಾತು ಯಕ್ಕ ಮ್ಹೊಟು ಉಜಾಲು ಮಾರಾ ಸುತ್ತೆ ಫೈಲಿ ಗಯು. 7ಮಿ ಜಿಮಿನಪರ ಪಡ್ಯೊ ತೆಳಾಮಾ, ಸೌಲಾ, ಸೌಲಾ ಮನೆ ಕಾ ತ್ರಾಸ ದಿವಾಡ್ಯೊಸ? ಕದಲ ಮಿ ಆವಾಜ಼ ಐಕ್ಯೊ. 8ತಿನಾಹುತಿ ತೆ ಉತ್ತರ ದಿದ್ಯೊ; ಕರ್ತಾ, ತು ಕುನ ವ್ಹೈ? ಕೈನ ಪುಚ್ತಾ಼ಮಾ ತೆ; ತು ತ್ರಾಸ ದಿವಾನು ನಜ಼ರೆತನೊ ಯೆಸು ಮಿಜ಼ ಕೈನ ಕದ್ಯೊ. 9ಮಾರಾ ಕ್ಹಾತೆ ರ‍್ಹಯಲವಾಲಾ ಹುಜಾಲು ಯಕ್ಕಜ಼ ದೆಕ್ಯಾ, ಮರಾ ಕ್ಹಾತೆ ಬೊಲಲವಾಲಾನು ಅವಾಜ಼ ಐಕ್ಯಾ ನೈ. 10ತೆಳಾಮಾ ಮಿ; ಕರ್ತಾ, ಮಿ ಸು ಕರು? ಕೈನ ಪುಚ್ತಾ಼ಮಾ ಕರ್ತಾ ಮನೆ; ತು ಉಟಿನ ದಮಸ್ಕಮಾ ಜಾ಼. ತು ಸು ಕರು ಕೈನ ಕವಾನು ತುನೆ ತ್ಯಾ ಕವಸ ಕದ್ಯೊ. 11ತೆ ಉಜಾಲಾನಿ ಮಹಿಮಾಕ್ಹು ಮನೆ ಡೊಳಾ ನೈ ದಿಕ್ಹಲ ಹುತಿ ಮನಾರಾ ಕ್ಹಾತೆ ರ‍್ಹಯಲವಾಲಾ ಮಾರೊ ಹತ ಧರಿನ ದಮಸ್ಕನಾ ಗಾಮ್ಮಾ ಹತ ಧರಿನ ಲಿನ ಗಯಾ. 12ತೆ ಗಾಮಮಾ ಅನನಿಯ ಕವಾಲೊ ಯಕ್ಕ ತ್ಯಾ ಧರಮಶಾಸ್ತ್ರನೆ ಕರೆಟ್ಟ ಚಾ಼ಲಾಲಾ, ತೆ ಜ಼ಗಾನಾ ಕ್ಹಾರಾ ಯಹುದಿಯೊಕ್ಹು 13ಚೊ಼ಕೊ ವ್ಹೈ ಕೈನ ಕವೈಲಿದಲ ನಾಮ ಅನ್ಯನಿಯ ಕವಾಲೊ ಮನಕ್ಹ ವ್ಹತ್ತೊ. ಹುಬ್ರೈನ; ಭೈ ಥಯಲ ಸೌಲಾ ತಾರಾ ಡೊಳಾ ದಿಕ್ಹಾದೆ. ತೆಳಾಮಾಜ಼ ಮಾರಾ ಡೊಳಾ ದಿಕ್ಹ್ಯಾ, ಮಿ ತಿನೆ ದೆಕ್ಯೊ. 14ತೆಳಾಮಾ ತೆ; ಹಮಾರಾ ಪಿತೃವೊನೊ ಬಾ, ತಿನಿ ಚಿತ್ತ ತು ತಿಳ್ದಿಲಿವಾನೆ, ತೆ ಕ್ಹರಿ ರ‍್ಹಯಲವಾಲಾನೆ ದೆಕಾನೆ ತಿನಾ ಮ್ಹೊಡಾಮಾತಿಯೊ ಆವಾನಿಯೊ ವಾತು ಐಕಾನೆ ಮನೆ ನೆಮಶ್ಯೊಸ. 15ತು ದೆಕಿನ ಐಕಲ ಕ್ಹಾರ ಮನಕ್ಹೊನಾ ಕ್ಹಾಮೊ ತು ಸಾಕ್ಷಿ ಕೌ 16ಹಮ್ನಾ ತು ಕಾ ತಡಾ ಕರಡ್ಯೊಸ? ಉಟಿನ ಕರ್ತಾನು ನಾಮ ಕೈಲಿವಾಲೊ ಥೌ ಕೈನ ಬಾಪ್ತಿಸ್ಮ ಕರೈಲಿನ ತಾರು ಪಾಪ ಧವೈಲೆ ಕೈನ ಕದ್ಯೊ ತಿನಾಹುತಿ ಪ್ರಾರ್ಥನಾ ಕರ‍್ಯೊ. 17ತೆ ಥಯಲ್ಪರ ಮಿ ಯೆರುಸಲಿಮೆ ಫರಿನ ಐನ ದೆವಾಲಯಮಾ ಪ್ರಾಥನಾ ಕರ್ತಾಮಾ ಯಕ್ಕ ದರ್ಶನ ಥೈಯು. 18ಮಿ ಪ್ರಭುನೆ ದೆಕ್ಯೊ ತೆ; ತು ಭೆಗಿನ ಯೆರುಸೆಲಿಮಾತೊ ಗೈಪಡ ಮರಾಹುತಿ ತು ಕವಾನಿ ಸಾಕ್ಷಿ ತ್ಯುನೆ ವಪ್ಪಿಲೆತಾ ನೈ ಕದ್ಯೊ. 19ತಿನಾಹುತಿ ಮಿ,ಕರ್ತಾ, ಕ್ಹಾರಾ ಸಭಾಮಂದಿರಮಾ ತಾರಾ ಉಪ್ಪರ ಬರೊಕ್ಹೊ ಮ್ಹೆಲಾವಾಲಾವೊನೆ, ಮಿ ಜೆಲ್ಮಾ ಘಲಾತೊ ವರಿ ಮಾರ ಕ್ಹಲಾತಾಮಾ 20ವರಿ ತುನೆ ಸಾಕ್ಷಿಥಯಲ ಸ್ತೆಫನು ರಗತ ನಾಕತಾ ಟೈಮ್ಮಾ, ಮಿ ಕ್ಹಾಮೊ ಹುಬರೈನ ತೆ ಸಮ್ಮತಿಸಿ,ತಿನೆ ಮಾರೆಲವಾಲಾನಾ ವಣಾ ಕಾಯಿದಾಡೊತೊ. ಕವಾನು ತ್ಯುನೆ ಗೊತ್ತಥಯಲವಾಲಾ ವ್ಹತ್ತಾ. 21ತೆಳಾಮಾ ಪ್ರಭು ಮನೆ ಕದ್ಯೊ; ತು ಜಾ಼,ಮಿ ದುರ ಯೆಹುದಿಯೊ ನೈಸೊ ಮನಕ್ಹೊ ಕನ ವಳಾವಸ ಕೈನ ಕದ್ಯೊ. 22ತ್ಯಾ ಲಕ್ಕಾ ಪೌಲಾನಿಯೊ ವಾತೊ ಕತಾಮಾ ವಾತೊನೆ ಕಾನ ದಿನ್ನ ಐಕ್ಯಾ ಐಕಿನ ಚಾಲಾಡಾ ತಾ. ತೆಳಾಮಾ ತಿನೆ ಜಿಮಿನಮಾತಾ ಭಾರಾಕಾಡಿಪಡು. ತೆ ಜಿತೊ ರ‍್ಹವಾನೆ ಯೊಗ್ಯ ನತಿ ಕೈನ ವದರಿವ ಕದ್ಯಾ. 23ತ್ಯುನೆ ಅಡತಾ ತ್ಯುನಾ ವಣಾ ಪ್ಹಾಡಿಲೆತಾ ಮಾತಿ ಭಿರಕಾತಾ 24ರೊಮ್ಮನಾ ಶತಾದಿಪತಿ ಆಗನ್ಯೆ ದಿವಸ ಮನಕ್ಹೊ ಪೌಲಾನೆ ವಿರುದ್ದ ಥೈನ ವದರತ್ತಾ ರ‍್ಹತಾಮಾ ಅದಿಕಾರಿ ತಿಳಿದಿಲಿನ ಆತ್ತಾಮಾ ತಿನೆ ಕೊಟೆಮಾ ಲೈನ ಬಾರಕೊಲಕ್ಹು ಮಾರಿನ ವಿಚಾರಣೆ ಕರಿಯೆ ಕೈನ ಅಪ್ಪಣೆ ದಿದ್ಯೊ. 25ತ್ಯುನೆ ಪೌಲಾನೆ ಬಾರಕೊಲಕ್ಹು ಭಾಂದಿನ ತಿಕನ ಹುಬರೈಲ ಶತಾದಿಪತಿನೆ ; ರೊಮಾಪುರನೊ ಮನಕ್ಹ ನ್ಯಾಯ ವಿಚಾರ ಕರೆವ್ಯಾಚಿ ಬಾರಕೊಲಕ್ಹು ಮಾರಾ ಲಗಾಡಾನು ಕಯು ನ್ಯಾಯ ವ್ಹೈ? ಕದ್ಯೊ. 26ಶತಾಧಿಪತಿ ತೆ ವಾತೊ ಐಕಿನ ಅದಿಕಾರಿಕನ ಗೈನ "ತು ಸು ಕರುಕೈನ ಛೆ? ತೆ ಮನಕ್ಹ ರೊಮಾಪುರವಾಲೊ ವ್ಹೈ. 27ತೆಳಾಮಾ ಅದಿಕಾರಿ ಪೌಲಾನಾ ಕ್ಹಾಮೊ ಐನ. ತು ರೊಮಾಪುರನೊ ಹಕ್ಕದಾರ ವೈಸು "ಮನೆ ಕೆ ಕೈನ ತಿನೆ ಪುಚ್ಯೊ ತೆ ಹೊ ಕೈನ ಕದ್ಯೊ. 28ತೆಳಾಮಾ ತೆ ಅದಿಕಾರಿ ಕದ್ಯೊ, ಮಿ ಘನ್ನಾ ದೊಕಡಾ ದಿನ್ನ ತೆ ಹಕ್ಕ ಮಿ ಲಿದ್ಯೊಸ ಕತಾಮಾ ಪೌಲಾ ಮಿತೊ ರೊಮಾಪುರ ಹಕ್ಕದಾರ ಥೈನ ಹುಟೆಲವಾಲೊ ವ್ಹೈ ಕದ್ಯೊ. 29ತಿನೆ ಮಾರಿನ ವಿಚಾರ ಕರಿನ ಆಯೆಲ ಪರ ತೆಳಾಮಾ ತಿನೆ ಛೊಡಿಪಾಡ್ಯಾ. ತೆನೈಸೊ ತೆ ರೊಮಾಪುರನೊ ಹಕ್ಕದಾರ ವ್ಹೈ ಕೈನ ತಿಳ್ದಿನ ಆತ್ತಾಮಾ ತೆ ತಿನೆ ಭಾಂದಿನ ಘಾಲತ್ತಾಮಾ ಸೆನಾಧಿಪತಿ ನೆ ಬುಚುಕು ಹುಟ್ಯು. 30ಮರ್ನಾ ದಿನೆ ಪಾಟೆ ಪೌಲಾನೆ ವಿರುದ್ದ ಯೆಹುದಿಯೊ ಕೈಜ಼ ತಪ್ಪಘಾಲಾನಾ ವಿಷಯಮಾ ಕ್ಹರಿನಿಜ಼ ಸಂಗತಿ ತಿಳದಿಲಿವಾನಾ ಹುತಿ ಅದಿಕಾರಿ ಮರ್ನಾದಿನ್ನೆ ತೆ ತಿನಾ ಬೆಡಿಯೊ ಕಾಡಿನ ಖಾಸ ಯಾಜಕ, ಯೆಹುದಿಯೊನಾ ಮ್ಹೊಟಾ ಸಬೆವಾಲಾ ಕುಡಿನ ಆವಾನಾ ಹುತಿ ಅಪ್ಪಣೆ ದಿನ ಪೌಲಾನೆ ಬಲೆಲಿನ ಗೈನ ತ್ಯುನಾ ಕ್ಹಾಮೊ ಹುಬಾರಾಡ್ಯೊ.