ಅಪೊಸ್ತಲೊ 19

1ಅಪೊಲೊಸ ಕೊರಿಂಥಮಾ ರ್‍ಹತಾಮಾ ಪೌಲ ಬ್ಹಾರಲ್ಯಾ ಗಾಮ್ಮಾ ಫರಿನ ಎಪೆಸಮಾ ಐನ ದಕ್ಹಾಜ಼಼ನಾ ಶಿಷ್ಯಾವೊನೆ ದೆಕಿನ. 2ತುಮೆ ನಂಬೆಲಪರ ಪವಿತ್ರ ಆತ್ಮಾನಿ ವರ ವ್ಹಂದಿಲಿದ್ಯಾಸು? ಕೈನ ತ್ಯುನೊನೆ ಪುಚ಼ತಾಮಾ ತ್ಯುನೆ ಕದ್ಯಾ ನತಿ ಕೈನ ಕದ್ಯಾ ಪವಿತ್ರ ಆತ್ಮಾ ಕವಾನು ಹಮೆ ಐಕ್ಯಾ ನತ್ತಿ ತ್ಯುನೊನೆ ಛೆ ಕೈನ ಗ್ವತ್ತ ನತಿ ಕೈನ. 3ತೆ ತ್ಯುನೊನೆ ತಮೆ ಕೈ ತರಾನಿ ಬಾಪ್ತಿಸ್ಮ ಲಿದ್ಯಾಸ. ಕೈನ ಪುಚ಼ತಾಮಾ ತ್ಯುನೆ ಕದ್ಯಾ ಯೊಹಾನನು ಬಾಪ್ತಿಸ್ಮ ಕರಲಿದ್ಯಾಸ ಕದ್ಯಾ 4ತಿನಾಹುತಿ ಪೌಲಾ ಯೊಹಾನ ಪಶ್ಚಾತ್ತಾಪ ಪಡಿನ ಕ್ಹುದಾ ಕನ ಫರಿನ ಬಾಪ್ತಿಸ್ಮ ಕರೈನ ಕದ್ಯೊ ತಿನ್ಯಾ ಐನ ವರಿ ತಿಪರ ಬರೊಕ್ಹೊ ಕರಾವಾಲಾ ಮನಕ್ಹೊವೈ ಕದ್ಯೊ. 5ತ್ಯುನೆ ತೆ ವಾತೊ ಐಕಿನ ಕರ್ತಾ ಥಯಲ ಯೆಸು ನಾಮಪರ ಬಾಪ್ತಿಸ್ಮ ಕರಲಿದ್ಯಾ. 6ಪೌಲಾ ತ್ಯುನೊಪರ ಹತ ಮ್ಹೆಲೆಲಪರ ಪವಿತ್ರಾತ್ಮ ತ್ಯುನಾ ಉಪ್ಪರ ಐಯ್ಯೊ. ವರಿ ತ್ಯುನೆ ಬಿಜಿಯೊ-ಬಿಜಿಯೊ ವಾತೊ ಬೊಲ್ಯಾ,ಕ್ಹುದಾನು ಸಂದೆಶ ಕತಾ ಚಾ಼ಲ್ಯಾ. 7ತ್ಯುನೆ ಕಮಸೆ ಕಮ ಬಾರಾ ಜ಼ನಾ ದಾಣ್ಗಾ ವ್ಹತ್ತಾ. 8ತೆ ಗಾಮ್ಮಾ ಪೌಲಾ ಸಬಾಮಂದಿರಮಾ ಗೈನ ತನ ಮ್ಹೈನಾ ತ್ಯಾ ಕ್ಹುದಾನಿ ರಾಜ್ಯನಾ ಹುತಿ ಕವಾಡೊತೊ. ಮನಕ್ಹೊನೆ ಧೈರ್ಯಕ್ಹು ಬೊಲ್ಯೊ. 9ದಕ್ಹಾ ಮನಕ್ಹೊ ತ್ಯುನಾ ಮನಸಮಾ ಕಟಿನ ಕರಲಿನ ವರಿ ನಂಬ್ಯಾ ನೈ ಗುಂಪ ಕರಿನ ಮನಕ್ಹೊನ ಕ್ಹಾಮಾ ಆ ವಾಟ ಕೆಟ್ಟ ಛೆ ಕವಾನೆ ತಿನಾಹುತಿ ಪೌಲಾ ತ್ಯುನೊನೆ ಛೊಡಿನ ಗೈನ ಶಿಷ್ಯಾವೊನೆ ಬಿಜಾ಼ ಕರಿನ ತುರನ್ನ ಕವಾನಿ ಶಿಕ್ಲಾವೊನಿ ಕ್ಹೊಲಿಮಾ ತಿನಾಹುತಿ ತರ್ಕಸಾಲಿಮಾಕದ್ಯೊ 10ತೆ ಬೆ ವರಕ್ಹತು ಥಯಲ ಅಸ್ಯಸಿಮೆಮಾ ಕ್ಹಾರಾ ಯೆಹುದಿಯೊ ವರಿ ಯೆಹುದಿಯೊ ನೈಸೊ ಮನಕ್ಹೊ ಗ್ರಿಕವಾಲಾ ಪ್ರಭು ಯೆಸುನು ಸಂದೆಶ ಐಕ್ಯಾ. 11ಕ್ಹುದಾ ಪೌಲಾನಾ ಹತಕ್ಹು ಖಾಸ ಅದ್ಭುತ ಕರತಾ ರ‍್ಹತಾಮಾ 12ತಿನಾಹುತಿ ಪೌಲಾನಾ ಉಪ್ಪರಲ್ಯಾ ವಣಾ ವರಿ ನ್ಹಾನು ಟುವಾಲ ಮನಕ್ಹೊ ಲಿನ ರೊಗಿಯೊನಾ ಉಪ್ಪರ ಘಾಲ್ತಾಮಾ ತ್ಯುನಾ ರೊಗೊ ವಾಸಿ ಥಯಾ ವರಿ ಭುತ್ಡಾ ಛೊಡಿನ ಜಾತ್ತಾತ್ತಾ. 13ಭುತ್ಡಾ ಛೊಡಾವಾಲಾ ಗಾಮೊ-ಗಾಮೊ ಪ್ಹರ್ತಾ ರ‍್ಹಯಲ ದಕ್ಹಾ ಯೆಹುದಿಯೊ ಯೆಸುನು ನಾಮ ಕೈನ ಭುತ್ಡಾ ಛೊಡಾವಾನೆ ಕೊಶಿಶ ಕರ್ತಾತಾ ದಕ್ಹಾ ಕೆಟ ಆತ್ಮವೊನಾ ಉಪ್ಪರ ಪೌಲಾ ಕವಾನು ಯೆಸುನು ಕ್ಹಮ್ಮ ಕೈನ ಕರ್ತಾ ಥಯಲ ಯೆಸು ನಾಮ್ಮಪರ ಪ್ರಯೊಗ ಕರಾನೆ ಗಯಾ. 14ಖಾಸ ಯಾಜಕ ಸ್ಕೆವ ಕವಾಲೊ ಎಕ ಯಹುದಿ ವ್ಹತೊ. ತಿನಾ ಕ್ಹಾತ ಬಚ್ಚಾ಼ ವ್ಹತಾ. ತ್ಯುನೆ ಬಿ ಅಮ್ಮಜ಼ ಕರತಾ ಥಾ. 15ತೆನೈಸೊ ದುರಾತ್ಮ ತ್ಯುನೊನೆ ಕದ್ಯು ಯೆಸುನು ವಳಕ ಮನೆ ಛೆ ವರಿ ಪೌಲಾ ಬಿ ಮನೆ ಗೊತ್ತ ಛೆ. ತೆನೈಸೊ ತ್ಯುನೊನೆ ಗೊತ್ತಚ್ಹೆ ಕೈನ. 16ವರಿ ಕೆಟ ಆತ್ಮ ಧರಲವಾಲಾ ತೆ ಮನಕ್ಹೊ ಪರ ತೆ ಆಕ್ರಮಣ ಕರಿನ ತ್ಯುನೊನೆ ಸೊಲಸಿನ ಘಾಬ್ರಾ ಥೈನ ದುಕ ಕರಲಿನ ಭೊಗಳಾ ಥೈನ ತಿನಾ ಘರಮಾ ನ್ಹಾಟಿನ ಗಯಾ. 17ತೆ ಸಂಗತಿಯೊ ಎಪೆಸಮಾ ರಹೆಲ ಕ್ಹಾರಾ ಯೆಹುದಿಯೊನೆ ವರಿ ಗ್ರಿಕರೊನೆ ತಿಳ್ದಿನ ಆತಾಮಾ ತ್ಯುನೆ ಘನಾ ಭುಚ಼ಕಿ ಗಯಾ ವರಿ ಕರ್ತಾ ಯೆಸುನು ನಾಮ ಘನ್ನು ಉಚ್ಚು಼ ಥಯು. 18ತ್ಯುನೊಮಾ ನಂಬೆಲವಾಲಾ ಐನ ಘನಾಜ಼ನಾ ಕ್ಹಾಮಾ ತ್ಯುನೆ ಕರಲ ಕಾಮೊ ಒಪಿಲಿದ್ಯಾ. 19ತೆನೈತೊ ಮಾಟಾ ಮಂತ್ರಾ ಕರೆಲವಾಲಾ ದಕ್ಹಾ ಜ಼ನಾ ತ್ಯುನಾ ಮಾಟಾ ಮಂತ್ರಾನಾ ಬುಕೊ ಲೈನ ಬಾಳಿ ಪಾಡ್ಯಾ. ತಿನಿ ಕಿಮ್ಮತ ಹಿಸಾಬ ಕರಿನ ಐವತ್ತ ಹಜಾರ ರುಪ್ಪಾನಾ ಬಿಲ್ಲಾ ಥಯಾ ಕೈನ ಕೈಲಿದ್ಯಾ. 20ತೆ ರಿತಿಮಾಜ಼ ಕರ್ತಾನಿ ವಾಕ್ಯ ಘನಿ ಬಡತಿ ತಾಕತವರ ಥೈ. 21ಎ ಸಂಗತಿ ಥಯಲ ಪರ ಪೌಲಾ ಬಿ ಮಕೆದೊನ್ಯಮಾ ಅಖಾಯಾಮಾ ಸಂಚಾರ ಕರಿನ ಯೆರುಸಲೆಮೆ ಜೌ ಕೈನ ಮನಸ್ಸಮಾ ಸೊಚ಼ಾಡೊ ಥೊ. ತ್ಯಾ ಗಯೆಲ ಪರ ರೊಮಾಪುರವಾಲಾವೊಬಿ ದೆಕು ಕೈನ ಕದ್ಯೊ. 22ತೆನೈಸೊ ತೆ ತಿನಾಮಾ ಸೆವೆ ಕರಾವಾಲಾ ಬೆ ಜ಼ನಾ ತಿಮೊಥಿ ವರಿ ಎರಸ್ತನ ಮಕೆದೊನ್ಯನೆ ವಳೈನ ತೆ ಆಸ್ಯಸಿಮೆಮಾ ದಕ್ಹಾ ದಿನ್ನ ವ್ಹತ್ತಾ. 23ತೆ ದಿನೊಮಾ ತೆ ವಾಟನಾ ಪರ ಘನು ಧಾಂದಲ ಉಟಿತಿ. 24ಕಿಮ್ಮ ಕದ್ಯಾಮ ದೆಮೈತ್ರಿ ಕವಾಲೊ ಎಕ ಅಕ್ಕಸಾಲಿಗಾ ರುಪಾಕ್ಹು ಅರ್ತೆಮಿನಿ ದೆವಿನಿ ಗುಡಿಯೊಕ್ಹು ನ್ಹಾನಾ ನ್ಹಾನಾ ಗುಡಿಯೊ ಕರಾವಾಲೊ ತೆ ಕಾಮ್ಮ ಕರಾಲಾ ಮನಕ್ಹೊನೆ ಘನು ಫಯದೊ ದೆತೊತೊ. 25ತೆ ತ್ಯುನೊನೆ ವರಿ ತೆ ಕುಸುಬಿಯೊನೆ ಸಂಬಂಧ ರ‍್ಹಯಲ ಕಾಮವಾಲಾವೊನೆ ಎಕ ದಮ್ಮ ಬಲೈನ ತ್ಯುನೊನೆ ಕದ್ಯೊ ಮನಕ್ಹೊ ಆ ಕಾಮಕ್ಹು ಅಪೆ ಘನ್ನಾ ಸೌಕಾರ ಥೈಯೆಸ ಕೈನ ತಮನೊನೆ ಗ್ವತ್ತ ರ‍್ಹೌ ಕದ್ಯಾ. 26ತೆ ನೈಸೊ ಹತಕ್ಹು ಕರಲ ಮೂರ್ತಿಯೊ ದೆವಸ್ಥಾನ ನ್ಹವೈ ಕೈನ ತೆ ಪೌಲಾ ಕೈನ ಎಪೆಸಮಾ ಎಕಜ಼ನೈ ಕಮ್ಮಸೆ ಕಮ್ಮ ಆಸ್ಯಸಿಮೆಮಾ ಘನಾ ಮನೊಕ್ಹೊನೆ ದೆಕಾಡಿನು ದಿವಾನು ಪ್ಹರೈಪಾಡ್ಯೊ ಕೈನ ತುಮೆ ದೆಕೊಶಿಬಿ ವರಿ ಐಕೊಶಿಬಿ. 27ತಿನಾಹುತಿ ಹಮಾರಾ ಕಾಮನೆ ಲುಕ್ಸಾನ ನೈ ಆತು ಕೈನ ಅರ್ತೆಮಿನಾ ಮಹಾದೆವಿ ದೆವಸ್ಥಾನೆ ಲೆಕ್ಕಾನೆ ನೈ ಆವಾನಾ ಹುತಿ ತಿನಾ ಹುತಿ ಕ್ಹಾರಾ ಆಸ್ಯಸಿಮೆ ವಾಲಾ ಜಗತ್ನೆ ಪುಜಾ ಕರಾಲಾ ದೆವಿನು ಶೃಂಗಾರನೆ ಲುಕ್ಸಾನ ಥೈ ಕೈನ ತ್ರಾಸ ಥಾವಸ ಕದ್ಯೊ. 28ತ್ಯುನೆ ಆ ವಾತೊ ಐಕೆಲ ಮನಕ್ಹೊನು ಗುಂಪ ಶಿಟ ಥೈನ ಎಪೆಸೊನಾ ಅರ್ತೆಮಿ ದೆವಿ ಮಹಾದೆವಿ ಕೈನ ವದ್ರ್ಯಾ. 29ತೆಳಾಮಾ ಗಾಮ್ಮಾ ಪುರಾ ಗಲಿಬಿಲಿ ಥೈ. ಪ್ರಯಾಣಮಾ ಪೌಲಾನಾ ಕ್ಹಾತೆ ಮಕೆದೊನ್ಯ ಗಾಯೊಸೆನೆ ವರಿ ಅರಿಸ್ತಾರ್ಕನೊನೆ ಮನಕ್ಹೊ ಧರ್ಲಿನ ಮಳಿನ ನಾಟಕ ಸಾಲಿಮಾ ಹೊಕ್ಯಾ. 30ಪೌಲಾ ಮನಕ್ಹೊನಾ ಗುಂಪನಾ ಕ್ಹಾಮೊ ಜಾ಼ತಾಮಾ ವಿಶ್ವಾಸಿಯೊ ತಿನೆ ಛೊಡ್ಯಾ ನೈ. 31ತೆ ನೈಸೊ ಆಸ್ಯಸಿಮೆನಾ ಅದಿಕಾರಿಯೊಮಾ ದಕ್ಹಾಜ಼಼ನಾ ಪೌಲಾನಾ ದೊಸ್ತೊ ಥಯಲ ಕ್ಹು ತಿಕನ ಮನಕ್ಹೊನೆ ವಳೈನ ತು ನಾಟಕ ಸಾಲಿನಮಾ ನಕೊ ಜೌ಼ ಕೈನ ಮಾಂಗಿಲಿದ್ಯಾ. 32ಮನಕ್ಹೊಮಾ ಗಲಿಬಿಲಿ ಥೈ ಕೈನ ದಕ್ಹಾಜ಼಼ನಾ ಎಕ ತರಾಮಾ ಅಡ್ಯಾಮ ಬಿಜಾ಼ ದಕ್ಹಾಜ಼಼ನಾ ಹಜೆಕ ತರಾಮಾ ಅ‍ಡ್ಡಾಡ್ಯಾ ಥಾ. ಘನಾ ಜ಼ನಾ ತ್ಯಾ ಮಳಿನ ಆಯೆಲ ಕಾರಣ ಗ್ವತ್ತ ನ್ಹೊತು 33ಯೆಹುದಿಯೊ ಅಲೆಕ್ಸಾಂಡರನೆ ಅಗಾ ಢಕಲ್ತಾಮಾ ಗುಂಪಮಾ ದಕ್ಹಜ಼ನಾ ತಿನೆ ಸುಚನೆ ದಿದ್ಯಾ. ತೆಳಾಮಾ ಅಲೆಕ್ಸಾಂದ್ರನೆ ಇಶಾರೊ ಕರಿನ ಶಾಂತ ಕರಸ. ಮಳೆಲ ಮನಕ್ಹೊನೆ ಪ್ರತಿವಾದ ಕರುಕೈನ ವ್ಹತೊ. 34ತೆಳಾಮಾ ತೆ ಯಹುದ್ಯೊ ವ್ಹೈ ಕೈನ ತಿಳದ ತಾಮಾ ಕ್ಹಾರಾಜ಼ನಾ ಎಕ ಅವಾಜಕ್ಹು ಎಫೆಸೊನಿ ಅರ್ತೆಮಿದೆವಿ ಮಹಾದೆವಿ ವ್ಹೈ ಕೈನ ಬೆ ಘಂಟಾ ವದ್ರ್ಯಾ. 35ಲಾಸ್ಟಮಾ ಗಾಮನೊ ಮಾಲಕ ಮನಕ್ಹೊನಾ ಗುಂಪನೆ ಸಮಾಧಾನ ಕರಿನ ವರಿ ಎಪೆಸೆವಾಲಾ ಎಪೆಸ ಗಾಮ್ಮವಾಲಾ ಅರ್ತೆಮಿ ಮಹಾದೆವಿ ದೆವಸ್ಥಾನೆ ಹಬಾಳಮ್ಯಾತು ಪಡೆಲ ತಿನಾ ಮೂರ್ತಿನೆ ಮಾ ಬಾಪ ಥಯಾಸ ಕೈನ ತಿಳದಲವಾಲೊ ಮನಕ್ಹ ಕುನ ವ್ಹೈ? 36ಎ ಸಂಗತಿಯೊ ನ್ಹವೈ ಕವಾನಾ ಹುತಿ ಕಿನೆಕ್ಹುಜ಼ ನೈ ಥಯಲಕ್ಹು ತುಮೆ ಶಾಂತಿಕ್ಹು ರ‍್ಹವೊ. ಗಡಬಡ ಕರಿನ ಸುಜ಼ ಕರುನೈ. 37ತುಮೆ ದ್ಹರಲಿನ ಆಯೆಲ ಆ ಮನಕ್ಹೊ ಗುಡಿಮಾ ಚೊ಼ರಿ ಕರಾಲಾ ನ್ಹವೈ ಹಮಾರಿ ದೆವಿನೆ ದುಷಿಕವಾಲಾ ನ್ಹವೈ. 38ತಿಮ್ಮ ರ‍್ಹಯಲಕ್ಹು ದೆಮೆತ್ರಿಯೊನೆ ತ್ಯುನಾ ಬಗಲ ರಹೆಲವಾಲಾ ಕಾಮ ಕರಾವಾವೊನೆ ಕುನಬಿ ತಿಪರ ತಪೊ ರ‍್ಹಯಾಮಾ ಫೈಸಲಾನಿ ಜ಼ಗಾವೊ ಅಧಿಪತಿಯೊ ಛೆ ಎಕನಾ ಉಪ್ಪರ ಎಕ ಅಪವಾದ ಘಾಲ್ಲಿವಾನು. 39ಸುಬಿ ಘನು ವಿಚಾರಣೆ ಚಾ಼ಯೆ ಥಯು ತೆ ನ್ಯ ಫೈಸಲೊಕ್ಹು ಸಬೆಮಾ ತಿರ್ಮಾನ ಕರಸ. 40ತೆ ದಿನೊಮಾ ಫೈಸಲೊಕ್ಹು ಸುಜ಼ ಕಾರಣ ನೈಸೊ ಆಯೆಲ ಮನಕ್ಹೊನಾ ವಿಷಯಮಾ ತೆ ಎಕ ದಂಗೊ ಹಮಾರಾ ಉಪ್ಪರ ತಪ್ಪ ಘಾಲಾನೆ ಕಾರಣ ಥಯು. ತೆ ತಪನಾ ಹುತಿ ವಿಚಾರ ಕರ್ಯಾಮ್ಮ ಹಮನೊಕ್ಹು ಜವಾಬ ದಿವಾನೆ ಥಾತು ನೈ ಕೈ ಕದ್ಯೊ. 41ತೆ ಥಯಲ ಪರ ವಾತೊ ಐಕಿನ ಪಂಚಾತಿ ಮುಗಶ್ಯಾ.