Lulanga lwa 39

Omulenge n’omusengero gw’omulwâla oli bufà

1Gwârhi omukulu w’abimbiza. Lw’e Yedutuni. Lulanga Lwa Daudi.

2Kwo nadesire nti: «Ka nsêze enjira zâni, olulimi lwâni lwakanahabuka; nti narhang’ishuba oku kanwa kâni, obu encuku endi omu malanga.»

3Nahulika, namerha, ci lêrhaga! Amababale gàbâ kudarhabala gadarhabala.

4Omurhima gundi omu nda gwabà kudûrhubala gudurhubala; okurhanya kwarhuma gwazûkamwo omuliro kwo kudumûka olulimi Lwâni lwadumûsire.

5Nti: «Yâgirwa mbwîra ngahi mpekire, nti mbwîra ensiku zâni ziri nyinganaci. nâni mmanye oku ndi ntâye.»

6Ensiku zâni wazijizire za makoro abirhi, n’okulama kwâni kuli nka ntâkwo omu masù gâwe, ngasi muntu kwo anali nka mûka kwône.

7Ngasi muntu kugera agera nka cizunguzungu, kwo ahirigirha nka mûka, anarhema analundike ci arhishi ndi wâbihabwe!

8Bindi bici nacilonza, Yâgirwa? Omurhima gwâni wêne gucikubagìre.

9Ondîkûzagye oku ngasi bubî bwâni, orhanazigaga nâgwa omu masheka g’idâga 10Kuhulika nali mpulisire, ntabumbwîre kanwa, bulya wêne wanjiraga.

11Onkûlagekwo eyi mibambu yâwe,: empîmbo z’okuboko kwâwe zambozize.

12Okuhana ohan’omuntu kunarhume ayinjiha; kunalundugurhe ebi omuntu arhonya kula ennundo ekolera omurhi.

13Yâgirwa, oyumve omusengero gwâni oyumvîrhize omulenge gwâni, orhabâga nka wa bihuli nandwîrhe nabanda olujamu.

Bulyâla ndi cigolo aha oli, ndi mubalama aka bashakulûza boshi.

14Orhang’ibà wankûlakwo amasù, mbè nka nayîsa, mbul’icîgendera ntengeho!