Emigani 30

VI. Ebinwa bya Aguri

1Ebinwa bya Aguri, mwene Yâkehe w’è Masi.

Alaga ebinwa oyo muntu1 àrhumiraga Itiyeli, kuli Itiyeli bona Ukala.

2Ntà muhwinja akâni omu bantu, ntajira makengu ga muntu,

3Oburhimanya ntabuyigaga, n’obumanye bw’abimâna2

4Ndi okola osôkîre emalunga anabuligaluka?

Ndi okola ofumbasire empûsi omu nfune zâge?

Ndi okola obohire amîshi omu cirondo câge?

Ndi watwâga embibi z’igulu zoshi? K’oyishi izîno lyâge?

K’oyishi izîno ly’omugala?

5Ngasi luderho lwa Nyamuzinda lubà lucesîbwe n’omuliro;

abâ mpenzi y’oyegemire muli ye.

6Akanwa kâge orhahîra okakahebakwo akandi,

wankanatumula bakujire munywesi.

Omusengero

7Bibirhi nkusêngîre, orhabinyimaga, obinshobôze ntacifà:

8Oncînge oku bunywesi n’oku bulênzi,

orhampâga bukenyi orhampâga na bugale,

ci ondeke nâni ndye oku mugati3.

9Kuderha nti nakayigurha obone namâkuhaba,

obone nkola naderha nti: Nyamuzinda ye ndi oyo!

nîsi erhi nshalike obone nkola nazimba,

obone namâhemukira izîno lya Nyamubâho.

10Orhahîraga okashobeka omujà emunda nnabamwâbo ali,

ankanakuhehêrera ohanyagale.

VII. Emigani erimwo emibalè

Enyumpa mbî ziri inni, n’ebirhayumvîkana ho biri

11Hali obûko, oku bàjacira îshe, kwo na nnina barhamukenziri.

12Hali obûko bumanya mpu buli bwa bêru-kwêru, n’obwo izinga lyâbo libananîrekwo.

13Hali obûko bulolera abandi oku cikanyi, n’ebisike biyunjwire kagayo.

14Hali obûko bujira engôrho mpu mîno, n’orhwere mpu myanganga,

rhwo bashanyangulamwo abagûnda,

babarhenze hano igulu, banasigise abakenyi abâbo bantu.

Hali binni birhîgurha

15Omushundwe gujira banyere babirhi: bo ba lêrha! lêrha!

Hali bisharhu birhîgurha na binni birhaderha mpu: «lekaga»!

16Okuzimu, endâ y’engûmba, idaho lirhigurha mîshi,

n’omuliro gurhaderha mpu: lekaga!

17Amasù omuntu akengulamwo îshe, âgagayira nnina wa muntu obugikulu,

bihungu by’oku lwîshi byâgarhule, bigukuma byâgashêge!

18Hali bisharhu nyumva bintalusire, na binni ntishi:

19enjira ya lubaka emalunga,

enjira y’enjoka oku mbyâ,

enjira y’obwârho omu karhî k’enyanja,

enjira y’omulume omu mwanahyâ4,

20Enjira y’omukazi w’ecishungu yoshi eyo:

anabà amâlya ahôrhole nakanwa, erhi:

«ntà bubî najizire».

21Hali bisharhu bigeza igulu mw’omusisi: na binni birhalindwa:

22omujà wamâhinduka mwâmi,

n’omusirhe wamagala,

23Omunyere bàkazâgibenga wamâheruka,

n’omujà-nyere wamâyîmûla nn’omumwâbo!

Ebinyinyî nabyo hibà binni

24Hano igulu habâ binyinyi binni: cikwône barhimanya omu barhimanya.

25Obunyegere, lubà lubaga lwa butya-butya, ci kwône buyishi oku bahaka enguli canda.

26Ebishegeshe, ebà ngabo ya mbula-misî, ci kwône biyishiyûbaka omu mabâle.

27Enzige, zirhajira murhambo, ci kwône bwinjà zihinda.

28Omusherebera, nfune egugwârha, cikwône omu bwâmi guyâlukiza5.

Abayishikânânda

29Hali basharhu bayishicûka, na bani bayishikânanda.

30Wa-ntale, ntwâli omu by’erubala, arhayôboha bici!

31Nyaluhazè wakânanda omu karhî k’engoko,

n’ecihebe cayâbula obusò,

na mwâmi omu ngabo yâge.

32Erhi wankahabuka okakaliha, n’erhi wakabà wacîjîre emurhima,

onahire enfune oku kanwa!

33Bulyâla, amarhà, omuntu akagatûnda, ganarhengemwo amakâfè;

izulu, omuntu akalisinaga bwenêne, linarhengemwo omukò,

n’oburhè, okubunanîriza kunarhengemwo entambala.