BIBLIYA NTAGATIFU OMU MASHI

Malakiya 4

Lolagi, olusiku luyîruka, luyakirîre nka muliro. Abashombanyi na banya nkola-maligo boshi, zirhabalekere muzî nîsi erhi ishami1. Ci kuli mwe, murhînya izîno lyâni, izûba ly’obushinganyanya lyâbasha, limmulerhere obucire. Mwâyishijà mwâhama n’omwîshingo nka manina ga mitwirà. Olusiku nâyêrekana obuhashe bwâni, mwâlabarhanya ababî, bâshuba nka katulo omu magulu ginyu, kwo ndesire ntyo, nie Nyakasane w’Emirhwe.

Irenge ly’abemêzi

Mukengêre ebi mwambali wâni Mûsa àyigîrizize, mushimbe munabîkirire amarhegeko n’amahano namuhâga oku ntondo ya Horebu, nti abwîre olubaga lw’Israheli lwoshi. Loli, nâmmurhumira omulêbi Eliya2, embere olusiku lwa Nyakasane luyishe, lusiku lw’enkwi n’amîshi, lwa kujugumya. Ye wâhindula emirhima y’ababusi eyêrekere abâna bâbo, n’ey’abâna eyêrekere ababusi bâbo3, lyo ndekiyishiherêrekeza ecihugo cinyu.4

Source notes (4)

Footnote Lolà Amo 1, 4; 7, 10; Sof 1, 18; Mat 3, 10; 1 Kor 3, 13 . Ho ecigabi ca 4 ca Malakiya cirhangirire aha omu WLC, n’obwo omu BHS ciciri ca 3, mulongo 19
Footnote Abayahudi bakagilinga oku omulêbi Eliya agaluka n’oku amango g’okuyisha kwa Masiha kuli hôfi. Mwâmi Yezu aderha oku mîra Eliya ayishaga: Ye Yowane Mubatiza, lolà Mat 17, 10-13 .
Footnote Lolà Luk 1, 17; Mat 17, 10-13; Ywn 1, 15 .
Footnote WLC Malakiya 4.1-6 byo binwa biri omu BHS Malakiya 3, 19-24 .

BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY 4.0 · SourceEdition imported 2026-10-25.