LUKA 1

Enshokolezi

1Bulya banji bacihânganyire okushûbûza emyanzi y’ebyarhuyishîre, 2nk’oku rhwayimanyisibagwa na balya bayibonaga bônene kurhenga emurhondêro, bo bâli rhurhonzi na barhumisi b’ezo nderho, 3nâni nie nahumbaga eyo myanzi yoshi n’obushiru kurhenga aha murhondêro gwâyo, nalonz’ikuyandikirayo bwinjinjà, yâga Teofili mukengwa, 4ly’omanya bwinjà oku ebinwa wayigîrizi­bagwa binali by’okunali.

I. Okuburhwa n’oburhò bwa Yowane Mubatiza na Yezu

Malahika alêba okuburhwa kwa Yowane Mubatiza

5Oku ngoma ya Herodi, mwâmi w’e Buyahudi, hàli mudâhwa muguma, ye wali Zakariya, w’ecihe1 c’Abiya, na mukâge ye wali Luzabeti, w’obûko bw’Aroni. 6Bombi bâli bashinganyanya embere za Nyamuzinda, banakâg’ishimba kwinjà amarhegeko ga Nnâmahanga goshi na ngasi byoshi biyandisirwe. 7Ci barhàjiraga mwâna, bulya Luzabeti yali ngumba, bombi erhi banakola bashosi. 8Byanacibà ntyo! Erhi Zakariya adwîrhe akola omu ka-Nyamuzinda oku cihe c’omurhwe2 gwâge, 9nk’oku abadâhwa banakomerera, acîshogwa okujà omu ka-Nyamuzinda n’okugend’igashâniza n’enshangi3. 10Nayo engabo y’abantu erhi edwîrhe yashenga embuga amango g’okugashâniza. 11Okubundi ayagânwa na malahika wa Nyakasane, erhi ayîmanzire oluhande lw’ekulyo kw’olutare lw’okugashâniza. 12Zakariya erhi amubona afuduka, agwârhwa n’obwôba. 13Ci olya malahika amubwîra, erhi: «Orhayôbohaga. Zakariya, bulya amahûne gâwe gayumvikîne: mukâwe Luzabeti âkuburhira omwâna-rhabana, wanayish’imuyîrika izîno lya Yowane. 14Ayish’ikulêrhera obusîme n’obushagaluke, na banji bayish’icîshinga oku kuburhwa kwâge. 15Bulya ayish’ibà mukulu embere za Nyakasane; arhakanywa mamvu na ngasi cinyôbwa cijakwo engezo: ayunjula Mûka Mutagatîfu kurhenga omu nda ya nnina; 16na banji omu bene-Israheli abagalula emwa Nyakasane Nyamuzinda wâbo. 17Yênene amushokolera n’omurhima n’obuzibu bw’Eliya, agalulire abâna emirhima ya b’îshe, n’abagomi âbagalule omu bumanye bw’abashinganyanya, ârheganyize Nyakasane ishanja limâna». 18Zakariya anacishuza Malahika, erhi: «cimanyîso cici namanyirakwo? Bulya nkola mushosi na mukânie mugikulu». 19Malahika amushuza, erhi: «Nie Gabriyeli, oyimanga embere za Nyamuzinda. Narhumagwa okuyish’ikubwîra n’okukulerhera ogu mwanzi mwinjà. 20Okolaga wâbà kaduma, oyâbirwe n’okuderha kuhika olusiku okwo kwâbà, bulya orhayêmîre akanwa kâni n’obwo kayish’ibà omu mango gâko». 21Abantu erhi badwîrhe balindira Zakariya embuga, banasomîrwe n’oku alegerîre omu ka-Nyamuzinda. 22Erhi ahuluka, arhacihashag’ibadesa, bamanya oku ayagânirwe omu ka-Nyamuzinda. Naye akabakema, anayôrha kaduma. 23Erhi ensiku z’okugashâniza z’ecihe câge zihwa, ashubira emwâge. 24Erhi kugera nsiku, mukâge Luzabeti ayalala izîmi, acîfulika myêzi isharhu, erhi: 25«Ntyo kwo Nyakasane anjirire omu nsiku al’intengeza ecindêrhera enshonyi4 omu bantu!»

Mariya abwîrwa emyanzi oku abà nnina w’Omuyôkozi

26Omu mwêzi gwa ndarhu5, malahika Gabriyeli arhumwa na Nnâmahanga omu cishagala ciguma c’e Galileya, ciderhwa Nazareti, 27emwa omubikira wali oshebirwe n’omulume, izîno lyâge ye Yozefu, w’omu mulala gwa Daudi; n’oyo mubikira izîno lyâge ye Mariya. 28Erhi ahika omu mwâge, amubwîra, erhi: «Nkuhîre omusingo, we oyunjwîre inêma, Nyakasane ali haguma nâwe»6. 29Erhi ayumva ntyo, afuduka, acîdôsa gwo musingo muci ogwo. 30Malahika anacimubwîra, erhi: «Orhayôbohaga, Mariya, bulya orhonyire emwa Nnâmahanga. 31Wâyalala enda, wâburha omwâna-rhabana, wanayish’imuyîrika izîno lya Yezu. 32Ayish’ibà mukulu, anayish’iderhwa Mugala w’Ow’enyanya; ayish’ihâbwa na Nyakasane Nyamuzinda entebe y’obwâmi bw’îshe Daudi; 33âyîma omu nyumpa ya Yakôbo emyâka n’emyâka, n’obwâmi bwâge burhakayûrha». 34Mariya anacibwîra malahika, erhi: «Kurhi okwo kwankabà ntanayishi mulume?» 35Malahika amushuza, erhi: «Mûka Mutagatîfu akuyandagalira, n’obuzibu bw’Ow’enyanya bwakubwîka ecîhôho7. Co carhuma omwâna wâburha âbà Mutagatîfu anaderhwe Mugala wa Nyamuzinda. 36Mwene winyu Luzabeti naye ali nda y’omwâna-rhabana muli bula bugikulu bwâge; guno mwêzi gwo mwêzi gwa ndarhu gw’owakâg’iderhwa ngumba. 37Bulya ntâco cirhankahashikana emwa Nyamuzinda». 38Mariya anaciderha, erhi: «Nie mwambalikazi wa Nyakasane; mbone nka okwo odesire!» Malahika anacimuleka.

Bikira Mariya aj’irhangula Luzabeti

39Muli ezo nsiku, Mariya ayimuka, akanya, aj’ebwa bishagala by’omu ntondo, omu murhundu gwa Yûda. 40Ajà omu mwa Zakariya, alamusa Luzabeti. 41Luzabeti erhi ayumva omusingo gwa Mariya, omwâna ashabire omu nda yâge; Luzabeti ayunjula Mûka Mutagatîfu. 42Anaciyâkûza n’izù linene, aderha, erhi: «Oli mugishe omu bakazi, n’omwâna w’enda yâwe naye mugishe! 43“Iragi lici nabwîne ene nnina wa Nnâhamwîrhu ajà aha mwâni?” 44“Bulya ene izù ly’omusingo gwâwe linampika omu marhwiri, omwâna anshabira omu nda n’omwîshingo”. 45“Iragi lyâwe we wayêmîre oku ebi wabwîragwa na Nyakasane byâbà!”»

Bikira Mariya akuza Nyakasane

46Mariya naye anaciderha, erhi:

Omurhima gwâni gukuzize Nyakasane,

47n’omûka gwâni gucishinzire bwenêne muli Nnâmahanga, Muyôkozi wâni,

48bulya alolêrize obunyi bwa mwambali-kazi wâge. Nêci kurhenga ene amashanja goshi ganderha muny’iragi,

49bulya Ogala-byoshi anjirire ebirhangâzo, Izîno lyâge liri litagatîfu,

50n’obwonjo bwâge buyorha bulumîre ensiku zoshi oku bantu bamurhînya.

51Alambwîre emisî y’okuboko kwâge, ashandazamwo abacîbonyi n’enkengêro zâbo mbî.

52Akûzire ngasi bacîbonyi oku ntebe zâbo, ahirakwo abîrhôhye.

53Ayunjuza abakenyi birugu, n’abagale abalibirhakwo maboko mûmu.

54Ashîbirira omurhumisi wâge Israheli, obwonjo bwâge burhuma,

55nka kulya alaganyagya ababusi bîrhu, Ibrahimu n’omulala gwâge ensiku n’amango!

56Mariya abêra bo na Luzabeti nka myêzi isharhu, agal’ishubira emwâge.

Okuburhwa n’okukembûlwa kwa Yowane

57Erhi ensiku zâge z’okuburha ziyunjula, Luzabeti ahiraho mugala. 58Abalungu na bene wâbo bayumva oku Nyakasane omufire bwonjo, banacîshinga bo naye. 59Erhi kugera nsiku munâni, bayisha bal’ikembûla omwâna, balonz’imuyîrika izîno ly’îshe Zakariya. 60Ci nnina anacilahira, erhi: «Nanga, ayîrikwe erya Yowane». 61Bamubwîra, mpu: «Ci ntâye omu Bûko bwinyu ojira ery’izîno», 62Banacikema îshe mpu aderhe izîno lihi alonzize bamuyirike. 63Naye anacihûna ehipaho, ayandika, erhi: «Yowane ly’izîno lyâge». Boshi banacirhangâla. 64Ho na halya, akanwa kâge kayiguka n’olulimi lwâge lwashwêkûka, arhondêra aderha n’okukuza Nnâmahanga. 65Abâlungwè bâbo boshi bayôboha, n’ogo mwanzi gwalumîra omurhundu goshi gw’e Yudeya. 66Ngasi bayumvagya ogo mwanzi boshi bagubika emurhima, mpu: «Oyu mwâna âbà mwâna muci?» Bulya okuboko kwa Nyakasane kwàli haguma naye8.

Zakariya avuga omunkwa analêba

67Naye îshe Zakariya ayunjula Mûka Mutagatîfu, arhondêra okulêba, erhi:

68«Ayâgirwe Nyakasane, Nyamuzinda w’Israheli, bulya ayishir’irhangula n’okulîkûza olubaga lwâge.

69Arhumereza ihembe9 ly’obucire omu nyumpa y’omwambali Daudi.

70Nka kulya aderhaga omu kanwa k’abalêbi bâge batagatîfu ba mîra:

71Lyo arhuciza oku babisha n’omu maboko g’abashombanyi bîrhu.

72Ntyo afirîre balarha obwonjo, anakengêra endagâno yâge ntagatîfu,

73endahiro alahiriraga larha Abrahamu,

74oku hano rhubà rhwamâlîkûzibwa omu maboko g’abashombanyi bîrhu,

75rhwamukolera buzira bwôba omu butagatîfu n’omu bushinganyanya, embere zâge ensiku zoshi z’obuzîne bwîrhu.

76Nâwe, we hyâna, wâderhwa mulêbi w’Ow’enyanya, bulya washokolera Nyakasane, orheganye enjira zâge;

77ly’omanyîsa olubaga lwâge obuyôkoke, lyo lubabalirwa ebyâha byâlwo;

78omu lukogo lw’omurhima gwa Nyamuzinda wîrhu lwarhulerhera Izûba10 lyarhenga enyanya,

79oku kumolekera abâli omu mwizimya n’omu mpehema y’olufù, n’okuyêrekeza amagulu gîrhu omu njira y’omurhûla».

Yowane Mubatiza omu irungu

80Omwâna akula, ayûshûka omu buzibu bw’omurhima, aj’ibêra omu irungu kuhika olusiku aciyêrekanaga omu Israheli.