BIBLIYA NTAGATIFU OMU MASHI
Endûlù 5
Endûlù ya karhanu
Nyakasane, orhayibagire okûla rhwabîre, olole obone kuno badwîrhe barhujira1.
Ebirugu bîrhu binjinjà byanyazirwe n’abandi, n’enyumpa zîrhu zàjibwamwo n’entakembûlwa2.
Balarha ntâbo bahali, na rhôno rhukola rhuli nfuzi na banyâma babîre bakana. Rhurhacinywa amîshi g’amaliba gîrhu rhurhanagaguziri nsaranga. N’enshagali ntà kucizibona rhurhanahyûziri igerha.
Abanzi bîrhu rhubahêrhe aha mugongo, rhwalibwîre, rhwarhama, omurhûla gwarhuyâsire.
Abanyamisri n’Abanyasîriya3 bo rhukolaga rhurhega amaboko nti nkabaga bo bârhubonera ebyankarhubuka ishali.
Ababusi bîrhu bakolaga ago mabî barhacibâho, ci kwône rhwe rhukolaga rhubarhwîre amaligo haguma n’amazibu g’obugoma bwâbo.
Abàli bajà bîrhu bo bakolaga barhurhegeka, na ntâye ciru odesirage mpu arhulikûza kuli bo.
Rhukola rhuja rhwahushwa n’ebishumûsi by’omu irungu erhi kujà kwalonza ebi rhwalya kurhuma.
Ecikoba c’omubiri gwîrhu cikola cirhuyôca nka kuno barhurhogeza omu cibeye c’omuliro, erhi kulumwa n’ishali kurhuma.
Abakazi badwîrhe bakolerwa ebihigo omu Siyoni, n’abanyere kwo na kuguma, omu bishagala bya Yûda.
Bagwâsire abarhambo banabamanika, barhanadesiri ciru mpu bakenge abashosi. Abâna b’emisole bakazibarhula olwanjikwa, oku abânarhabana bajà badandabagana n’emizigo y’enshâli.
Abashosi ntâho bacidwîrhe bajà omu ihano, n’emisole erhacihuma oku mulya gw’olulanga mpu yâziha.
Ntà bushagaluke bucirhuli emurhima, okusâmira engoma kwîrhu kwahindusire mishîbo.
ishungwè rhwagwêrhe oku irhwe lyàrhozire! Yajewe! Alà oku rhwabwîne rhwagomera Nyakasane!
Obu rhukola rhuhîrîre ntya oku nsholo y’omurhima, n’amasù garhurhûnzire n’emirenge:
Kuli kubà bulya entondo ya Siyoni yahindusire irungu, ekola ebà bulumbà bwa banyambwè!
Ci kwône wêhe, Nyakasane, ôbà Mwâmi ensiku zoshi4, we yôrha orhegeka omu myâka n’emyâka.
Cici cànkarhumire warhuyibagira lwoshi lwoshi? Cankarhuma waârhulekerera lwoshi lwoshi?
Orhugalule emunda oli, Yâgirwa Nyakasane, lyo rhushubira okunali lwoshi emunda oli; akalamo kîrhu oshubikajira kahyâhya nka kulya kwa mîra.
Kurhigi wankarhukabulira lwoshi lwoshi! Ka wanarhushombaga okungana âho?
Source notes (4)
- Footnote Endûlù ya karhanu omu Vulgata bàdesire oku gwo musengero gwa Yeremiya.
- Footnote Entakêmbûlwa bo barhali Buyahudi, abarhali b’omu bûko bwa bene-Israheli. Bulya Abayahudi bene Israheli hoshi bâli bakêmbûle (Lolà Murh 17, 10.24 ).
- Footnote Abanyasîriya bo balama e Babeli.
- Footnote Ciru akahà mpu aka-Nyamuzinda kâge k’en’igulu kamâshâbwa, Nyamuzinda-Nyakasane, ali Ogala-byoshi. Irenge lyâge liri ly’ensiku n’amango. Entebe yâge eri y’ensiku zirhaheka omu mpingu (Lolà Lul 102, 12; 145, 13; 146, 10 ).
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.