Yozwè 9

Israheli arhêrwa

1Oku mwanzi gw’ebyo byabîre, abâmi boshi bayûbasire olundi lunda lwa Yordani, abâli bayûbasire omu ntondo n’omu bihugo by’omu marhambi, ab’oku burhambi bw’enyanja, kuhika hofi na Libano, Abahiti, Abamori, Abanya-Kanani, Abaperezi, Abahevi, Abayebusi, 2boshi bacîlunga haguma mpu balwîse caligumiza Yozwè na bene Israheli.

Obwengehusi bwa Bene Gabaoni

3Abantu b’e Gabaoni erhi bayumva kurhi Yozwè ahenyeraga Yeriko na Ayi. 4Banacisinga bôhe obwenge bwâbo. Banacirhôla enjira yâbo n’oluhembo nka bantu babalama. Bayanka ebishoho bikoyire babîhira oku ndogomi zâbo n’orhubindi rhw’idivayi rhwa mîra rhukola rhukoyire n’ebyajire byâhangwa, 5emagulu gâbo banacihirayo enkwêrho zikola zishosihire, zanajire zahangwa, bône bayambala emishangi y’enkoyera; emigati bali baciyikire yali migati yayûmusire na ya buvungunyukiza. 6Bakanya bajà emunda Yozwè ali oku cihando aha Gilgala, banacimubwîra yêne na bene Israheli boshi, mpu: «Rhwono rhuli bantu barhenga omu cihugo ca kuli, na buno murhusingire emihigo, nîrhu rhubasingire emigabo1, rhuyumvanye». Bene Israheli banacishuza abo ba-Hiviti, mpu: 7«K’arhankabà emwîrhu muyûbaka; kurhigi rhwankajira endagâno haguma ninyu?» 8Banacibwîra Yozwè, mpu: «Rhwono rhuli bambali bâwe». Yozwè anacibadôsa, erhi: «Muli ba ngahi, munali bantu baci?» 9Banacimushuza, mpu: «Bambali bâwe barhenga omu cihugo ca kuli bwenêne; rhuyishire nti rhukuze izîno lya Nyakasane, Nyamuzinda wâwe; bulya rhwayumvîrhe ba­rhuganîrira kuli ye na ngasi oku anajizire omu Mîsiri koshi. 10Rhwayumvîrhe kurhi akoleraga abâmi banya-Moreni2 ebwa lindi ishiriza lya Yordani, abo bâmi baligi Sihoni, mwâmi w’e Hesboni, na Ogu mwâmi w’e Bashani, ayûbakaga aha Astaroti. 11Abagula bîrhu, n’abantu b’omu cihugo cîrhu boshi banacirhubwîra, mpu: Muyanke ebiryo mucîyikîre omu njira, mujè emunda bali, mubabwîre mpu: Rhwono rhuli barhumisi binyu na buno mulekage rhujire e­ndagâno na ninyu. 12Lolagi omugati gwîrhu, gwàli gudûrhubîre erhi rhuguyanka nti rhucîyikire gwo kurhenga omu mwabîrhwe, olusiku rhwagurhôlaga rhunagenda mpu rhukola rhwajà emunda muli mulolage buno oku gukola guyumûsire, gunakola buvunyungukiza. 13Orhu rhubindi rhucîyikiremwo idivayi, rhwàli rhuyunjwîre erhi rhunaciri rhuhyâhya, mwêne mubonage kurhi rhwajire rhwabereka; emishangi yîrhu n’enkwêrho zîrhu byo ebi bikola bikoyire n’enjira ndî bwenêne». 14Bene Israheli banaciyanka oku biryo byâbo buzira kurhangidôsa3 Nyakasane. 15Yozwè anacijira endagâno y’omurhûla haguma nabo, kandi banacijira eyindi ndagâno y’okuderha mpu babaleka balame; n’abakulu b’ihano bacîgashira bo.

16Enyuma lya nsiku isharhu bali bajizire eyo ndagâno, bamanyîsa bene Israheli oku balya bantu bali balungu bâbo n’oku bayûbaka ekarhî kâbo. 17Oku bundi obwo banacilîkûla bahika oku lugo lwâbo enyuma lya nsiku isharhu. E­bishagala byâbo byàli: Gabaoni, Kefira, Bêroti na Kiryati-Yarimi. 18Barhabayîrhaga erhi gulya mwîgasho abagula bacîgashiraga bo gurhuma, oku izîno lya Nyakasane, Nyamuzinda w’Israheli; ci olubaga loshi lwacîduduma bwenêne kuli abo bashamuka.

Amarhegeko ga Bene Gabaoni

19Balya bashamuka boshi banacibwîra erya mbugânano y’olubaga erhi: «Rhwabajirire endahiro okw’izîno lya Nyakasane, Nyamuzinda w’Israheli; na buno rhurhankacibahumakwo. 20Lolagi oku rhwabajirira: Rhwabaleka balame ly’oburhè bwa Nyakasane bulekiyâka kuli rhwe, erhi kulya rhwabajiriraga e­ndahiro4 kurhuma.» 21Mpu: «Mubaleke balame», kwo abashamuka bàdesire; ci kône bahâbwe omukolo gw’okukashenya enshâli n’okudôma amîshi oku mbugânano ya bene Israheli yoshi nk’oku abashamuka banababwizire. 22Yozwè anahamagala abo bantu b’e Gabaoni abadosa, erhi: «Carhumaga murhurheba murhubwîra mpu: Rhuli bantu ba kuli na ninyu, n’obwo muyûbasire ekarhî kîrhu? 23Kurhenga buno mukola mwayôrha bantu bahehêrirwe, na ntâye muli mwe wacileke okubà mujà, omukolo gwinyu gwabà gwa kukazishenya enshâli n’okukazidôma amîshi oku nyumpa ya Nyamuzinda wâni». 24Banacishuza Yozwè, banacimubwîra, mpu: «Bulya bambali bâwe bayumvîrhe oku Nyakasane, Nyamuzinda wâwe arhegekaga omurhumisi wâge Mûsa mpu: muhâbwe ecihugo coshi, munanigûze ngasi banayûbaka muli eco cihugo, ntâye mwaleka e­mbêre zinyu, rhwanayumva oku rhwamalibwa n’amagala, co carhumire rhujira ntyo. 25“Buno rhwono rhukola rhucîhizire omu maboko gâwe: orhujirage nka kulya obwîne kunali kwinjà kuli we, kunashingânîne kuli rhwe”». 26Yozwè anacibajira ntya: abayôkola, abarhenza omu maboko ga bene Israheli, lyo barhangibayîrha. 27Ci konene Yozwè abajira bantu ba kukazibeza enshâli n’abà okukazidômera embugânano amîshi n’oluhêrero lwa Nyakasane, ngasi abà Nyakasane anacîshozire5 boshi: kwo banacikola ntyo ciru kuhika na buno.