AGA KABIRI EMWA ABAKORINTI 13

1Bukola bwa kasharhu obûla njà emwinyu. Ngasi lubanja lukatubwa oku cinwa ca bahamîrizi babiri erhi basharhu1. 2Nakubwîzire balya bajizire ebyâha burhanzi, nakubwîra n’abandi boshi, nnabà nanashub’ikuderha kandi ene ntabalimwo, nka kulya najiraga erhi ndi eyo obwa kabiri: nkashubira eyo, lêro ntâbe bwonjo. 3Nkabaga mulonzize mubone oku Kristu odwîrhe aderhera omu kanwa kâni? Yêhe erhabà ngonyi embere zinyu, ci ajira obuhashe muli mwe. 4Abambiragwa oku musalaba erhi kugonyâla2 kurhuma, ci azîne oku buhashe bwa Nyamuzinda. Na nîrhu, rhuli ngonyi muli ye, nêci, ci rhwayish’iyôrha rhuzîne haguma naye oku buhashe bwa Nyamuzinda muli mwe.

5Ninyu mwene mubage nka mwagerêreza, mulole erhi munali omu buyêmêre; mucîrhangule mwene. Ka ninyu mwene murhamanyiri oku Yezu Kristu ammulimwo? Nkaba abage erhi muli mihera! 6Ahâli nkaba mwamanya oku rhwêhe rhurhali mihera! 7Rhudwîrhe rhwashenga Nnâmahanga ammurhabâle murhajiraga okubî; arhali kuderha nti lyo babona oku rhuyâzize, ci kuderha nti lyo mw’oyo mujira okwinjà, rhubè rhwe rhuyâga. 8Bulyâla rhurhagwêrhi buhashe bwa kulwîsa okuli, ci bwa kulwîra okuli bwône rhujira. 9Nêci, rhusîma rhw’ono rhubè ngonyi3, ninyu mubè bazibu. Kwo rhunashenga omu nsengero zîrhu okwo: nti mushube bimâna. 10Co cirhumire nayandika nnandi kuli eco, nti lyo hano mbà nkola mmuliho, ntag’ikaliha omu buhashe Nyakasane a­mpâga mpu nyûbake, ci arhali mpu nshabe.

Enfundiko

Amahano. Omusingo. Obwangà

11Ntyo, bene wîrhu, mushagaluke, mucîsêze okubà bimâna, muhânane omurhima, muyumvanye, mubè n’omurhûla, na Nyamuzinda w’omurhûla abà ninyu. 12Mulamusanye n’ehinunugurho hitagatîfu. Abatagatîfu boshi ba­ mmulamusize. 13Enshôkano ya Nyakasane Yezu Kristu, n’obuzigire bwa Nyamuzinda, n’omulungano gwa Mûka Mutagatîfu bibè ninyu mweshi!