Ɓi Rom 3

Kooh na faɗeeɗi ambtiɗohiŋ ɗe

1Nik ne wa ɗaa ɗah, Yawuut uupɗoh ɓinooɓi ye, wala wa ye weɗ njirñiŋ nguɗuk ? 2Ca laayiɗ, ŋ in nu nik ! Wi koc nga, Yawuut ci ɓeɗ dengkohu yegɗoh ciŋ Kooh. 3Nik ne raakiɗ ɓi ɓo' nga, ɓi ambɗi ambtiɗohiŋ ɓa na Kooh ɗah, ineem min min hondoh Kooh amb ambtiɗohiŋ ɗe e ? 4Muk ! Ɓoo kay teyɗukaat ne Kooh woyoh keeh te ɓooɓi jen nikka leyoh, findi wa fiisohu an :

« Ŋ ineem, Kooh,

kiyurhiŋ ɗa hey hotke

ŋ woo ciŋ ɗa,

te ŋ ngel ciŋ ɗa jen,

yaf ɓuran. 1 »

5Ŋ ndii, mi na woye findi ɓum na woyohe, ɓa na woye ne : « E yurhaaɗiikiŋ ɓoo weɗ na teeɓohe yurhiŋ Kooh. Kon a ruhsiɗ ayrukiŋ ɗe nga ɓoo ɗah, a tumɗi ini lah waas. » 6An ɓa woo ne Kooh tumɗi ini lah waas i ? Muk, ineem minɗi nik ! Kon, a minohan atte Adina na ? 7Waaye nik ne ley ɓo' na teeɓohe keeh kiŋ Kooh, wa ɓaatee yaki a yak ɗah, wee tah ɓo' atte'see findi bakaaɗoh poyi ?

8Kon wee tah ɓoo tumanɗi baahaaɗi ne wa rim in baahiɗ ? Raakiɗ sah ɓi na ɓase ɓoo, ɓa woyee ne weɗ ɓoo na woye ! Ɓooɓeem, atteeni Kooh atte'an ɓa, weɗ ɓa yeyyoo.

Ali ɓo' yurahɗi

9An ye ? E ɓoo ngisoh ɓinooɓi e ? Muk ! Laam ŋ teeɓohiɗ po ƴutiɗ ne Yawuut na nikaaɗi Yawuut jen, e bakaaɗ yilif ɓa. 10Fiis ci woyiɗ ne :

« Yurhiɗ raakɗi,

ali yino sah ;

11ali ɓo' ñaañɗi,

ali ɓo' waakɗi Kooh.

12E ɓooɓi jen faɗ waasi,

ɓeɗ hun ɓa mbalaye,

raakɗi yi na tume baahiɗ,

yino dong sah raakɗi.2 »

13« Nguɓ ciŋ ɓa ruy-ruy kunsuuɗ,

ɓa na ñaañohohe peɗeem ciŋ ɓa.3 »

« Njootoot ciŋ ɓa

na pulɗe daŋar iiñ.4 »

14« Nguɓ ciŋ ɓa riifiɗ na kiimiɗ ɓo' alku

te wa na hune na aay keeñ.5 »

15« Kot ciŋ ɓa

gaawiɗ ŋ kaɗ aama ñif.

16Ɗisik nu ɓa lah ɗah,

yahroh na naamo

ceɗ ɓa na faɗe nga.

17Ɓa inahɗi waas jam.6 »

18« Nup Kooh nikɗi nga ɓa,

ɓa liiɓɗaa sah.7 »

19Te ɓoo inhiɗ ne Fiis ciŋ waasi, ca jen, ca na woye na ɓi waasi yilif, ne ɓooɓi jen ɗek, te Adina jen ɓuru ŋ fiki Kooh. 20Kon ali ɓo' na ambseeɗi findi yurhiɗ ŋ tum in ci waasi nakoh. Waasi kay, wa na rime inah bakaaɗ.

Kiyurhi Kooh onoh te wa taambohɗi ŋ nakoh ciŋ waasi

21Waaye ɗiski wa nik, Kooh teeɓohiɗ findi a na onohe ɓo' kiyurah, te wa taambohanɗi ŋ nakoh ciŋ waasi, waaye teereeciŋ waasi na woosuuɗ ci ndengiɗ ndengiɗ ineem. 22Kiyurheem, Kooh onoha taamboh ŋ kos Yeesu Kiristaa. Wa ɗaa ŋ ɓooɓi kos jen, wa raakɗi talsoh ; 23ɓooɓi jen ɓeɗ bakaaɗ, tahha po ɓa ñakiɗ kiyak ki puloh ŋ Kooh ; 24waaye a baahohiɗ ɓa, a onnda ɓa kiyurah, taamboh ŋ mucɗi Kiristaani Yeesu muciɗ ɓa.

25-26Kooh eɗoh Kiristaani giifɗoha ayrukiŋ ɗe taamboh ŋ kosi, taamboh ŋ ñif miŋ ɗe aamu ; Kooh haɓɗiɗ ineem ne a teeɓoh kiyurhiŋ ɗe ŋ muñi a muñee bakaaɗ ca ɗeɓgaan, a ɗaasohha ca. A namiɗ teeɓoh kiyurhiŋ ɗe ŋ jamanoonii : Kooh ris yurhiɗ, ali a onoh kiyurah taamboh ŋ kos Yeesu Kiristaa.

27Kon, ɓo' na hee ndamkohe ye ? Ali tus ! Wee tah ali tus ? A waasi nakoh tumohaaɗ ci tah e ? A'aa, waaye a waasi nakoh kos tah. 28Laam ɓoo amb ne e kos na tahe ɓo' onu kiyurah, e tumohaaɗ ci waasi nakoh haa.

29Wala Kooh a Koohiŋ Yawuut ci dong e ? A namɗi nik Koohiŋ ɓi nikɗi Yawuut e ? Ee di', a nam nik Koohiŋ ɓi nikɗi Yawuut. 30Nik ne wa keeh ne a Kooh yino dong raak ɗah, a yi onan nguɗkiɗ ci kiyurah sagu kos, a yi naman on nguɗkaaɗiici kiyurah sagu koseem.

31Andi ineem tokis ne, ɓoo taamboh ŋ kos, nihissa waasiŋ Musaa ? Muk ! Ɓoo kay, ɓoo na ndengɗe ini a fiis.