Luk 4

Seytaani jaɗɗiɗ Yeesu fiir

1Wa Yeesu puloh kalaŋ Yurdan, raak Fuuɗsi Hoolohngaani, Fuuɗsiŋ Kooh riifiɗ ɗe. Fuuɗseem kaɗɗukohhaa ɗe nduufa. 2A nikka nga neeh ndaŋkiyaah-nikiis (40), ndaam, Seytaani fiireeɗa ɗe. A ñamɗi ŋ neeh ceem, ŋ mirndaani a aɗukka. 3Weɗi Seytaani woyoh ɗe ne : « Nik ne fu Kuɓkiŋ Kooh ɗah, woya atoh fii wa ɓoƴsuk mbuuru. » 4Yeesu loffa ɗe ne : « Fiis ci Hooliɗ ci woyiɗ ne : “ Ɓo' na pesohe mbuuru dong haa.1 ” »

5Seytaani ɓayya ɗe ŋ ɗiska uup ɗafuk, a teeɓpa ɗe, ŋ harmban ñep na marak, nguur ciŋ adinaani jen. 6A woosa ɗe ne : « Nguur cii jen na ini ŋ ɗooƴ ca degu ŋ yaah ciŋ ngo te ŋ miniɗ ca eɗ ɓoyi neɓ po. 7Fu teyɗuk ƴek ŋ fikiiso ɗah, ŋ hey ɗa ca one jen. » 8Yeesu loffa ɗe ne : « Fiis ci woo ne “ Ƴekɗa Kooh Heɗ fu, te fu ñaamuk a yi dong.2 ” »

9Seytaani ɓayissa ɗe Yerusalem, ŋ jol Kahnaŋ Kooh, a woosa ɗe ne : « Nik ne fu Kuɓkiŋ Kooh ɗah, faɗsuka ŋ kehƴi ; 10Fiis ci Hooliɗ ci woyiɗ ne : “ Kooh hey nake malaakaaciŋ ɗe, ca niiɗ ɗa. ” 11Te : “ Ca ɓay ɗa ŋ yaah ciŋ ca, po kot ciŋ ɗa laɓkanɗi ŋ atoh. ” » 12Yeesu nammba ɗe lof ne : « Fiis ci namiɗ woo ne : “ Kana markisuk Kooh Heɗ fu.3 ” »

13Wa Seytaani jaɗiɗ ɗe fiir po a miniɗɗi ɗe in, a cootta, a sekɗoheeɗa ɗe mbeh wiiriis.

Yeesu ŋ Galile

14A Yeesu dokuk Galile kotii, raak ɗe riifiɗ na doolndiŋ Fuuɗsi Hoolohngaani. Ɓooɓa laamtoheeɗa ɗe ŋ kur caam jen, 15a jangɗoheeɗa ŋ sinaagog ca, ɓooɓa jen laaskeeɗa ɗe.

16A aaseeɗa, a puleeɗa kur ca po a reesa ŋ Nasareet, kur ka a yakoh. Wa mbehi na iɗsiɗkohse ree, a aassa ŋ sinaagoga findi a meeɗa tumoh, a kurukka ne a jang ini fiisu. 17Ɓa eɗta ɗe teerndiŋ woosuuɗi na woyse Esayi, a puliɗta ɗiski inii fiisu :

18« Fuuɗsiŋ Heɗ ɓoo yii nga so,

laam a yi kooɗ to ne ŋ kom ñakiɗ ci Yegɗohiŋ Muci,

a yi woos so ne ŋ woo ambuuɗ ci faɗsuukiŋ ɓa,

ŋ woo fuuliɗ ci ne ɓa hey hote

te ŋ nam puliɗ torhiɗuuɗ ci ŋ miskiɗiŋ ɓa,

19ŋ yegɗoh ne kiis kii, weɗ kiis ki Heɗ ɓoo teeɓohan baahkiŋ ɗe.4 »

20Wa Yeesu ƴut, a lemmba teernda, a dokinndaa ƴaara na ɗaakee wa, a ɓooffa ne a woo ; ɓooɓa nikee ŋ sinaagoga jen yurhiɗkohha na ɗe. 21A woosa ɓa ne : « Ini Fiis ci woyee wii te ɗu kerahhaa, wa raakiɗ woti. » 22Ɓooɓa jen woyeeɗa in baahiɗ nga ɗe, ɓa feyuusa ŋ woo ca neɓiɗ ca a woo. Ɓa weeɗa ne : « Ƴaarii a kuɓu Suseef haa e ? » 23Yeesu woosa ɓa ne : « Ŋ inhiɗ ne ɗu hey yo woye woo kii : “ Paƴohi, paƴa haf fu. Ɓoo kerhiɗ in ca fu tum ŋ Kapernawum jen, tuma mand ɗaa ndii, ŋ kur ki fu genoh. ” »

24Yeesu degiɗta ɓa nga ne : « Ñam na woyee ɗu wa te wa keeh : Ali woosuuɗ na teyɗukseeɗi ŋ kur ka a genoh. 25Ɗu inhiɗ ne ŋ jamanoonaŋ woosuuɗi Ilyas, wa Kooh toɓɗi kiis kaahay na camban te aɗ miskiɗ raakka ŋ kur ka jen, wa raak ɓitiɓ laayiɗ ŋ Israayel ƴaar caŋ ɓa kaaniɗ. 26Moona Kooh tuuƴɗi Ilyas ŋ ali ɓitiɓ nga ɓa, waaye a tuuƴ ɗe ŋ ɓitɓa ƴaar ce nam kaan ya genee Sarepta ŋ kur kaŋ Sidoon. 27Te ŋ jamanoonaŋ woosuuɗi na woyse Elise, ɓo' laayiɗ raakeen kosaay ki na oɓse faan ŋ Israayel, moona ali ɓo' wirɗuuɗi nga ɓa, waaye a Naaman ya genee Siri, a yi wirɗu. »

28Wa ɓa kerah woo ceem, ɓooɓa nikee ŋ sinaagoga jen ayrukka po ɓa heeɗa pooke. 29Ɓa kurukka, ɓa puliɗta ɗe kur ka, ɓa ɓayya ɗe ŋ suunaŋ tangoora ɓa yipohee kur kaŋ ɓa ne ɓa yeñ ɗe a kaan 30waaye a lahha ŋ harmban ɓa, a cootta waas ce.

Yeesu wirɗiɗ ƴaara jiini amb

31Yeesu kaɗeeɗa po a reesa kur wiiriis ŋ Galile na woyse Kapernawum ; a jangɗeeɗa ɓooɓa ŋ mbehi na iɗsiɗkohse. 32A woyee woo kilifa, tahha po, ɓa feyuusa ŋ jangɗohiŋ ɗe. 33Ŋ ɗooƴ sinaagoga, wa raakeen ƴaara jiini ambe, a leehkeeɗa ŋ ɗafka an : 34« Hee ! Yeesu yiŋ Nasareet, waas fu ye nga ɓoo ? Fu hay ne fu yah ɓoo e ? Ŋ inhiɗ ɓoyi fu nikoh ; a fu Ɓoyi Hooliɗi Kooh woos. » 35Yeesu ngassa ɗe an : « Ɗeka, te fu pul ngaŋ ƴaari ! » Jiinnda folla ƴaara ŋ fiki ɓooɓa waaye a tumɗi ɗe in, a pulla nga ɗe. 36Wa ineem raak, ɓooɓa jen feyuusa, ɓa woyeeɗa ŋ harmban ɓa an : « Cey, woo kiŋ ƴaarii wa woo ye ? Wa hun na hatil, jiiniici sah na hoolaaɗiiki ca hoolaaɗi, ca kerhiɗiɗ ɗe po a woo ca ne pulaat ɗah, ca saandohe ! » 37Ɓa laamtoheeɗa Yeesu, ŋ ɗisik nu nik ŋ kur caam jen.

Yeesu wirɗiɗ kosaayiɗ laayiɗ

38Wa Yeesu puloh sinaagoga, a kaɗta kahan Simong tel yaayiŋ ɓiti Simong kosaayiɗ po faaniŋ ɗe nikka dohiɗ jip. Ɓa kiimmba Yeesu ne a wiriɗ ɗe. 39A hiirra nga ɗe, a ngassa kosaay ka, wa saɓsukohha na ɗe. Ŋ ɗiska ɗiska a kurukka, po a taambkoheeɗa ɓa.

40Wa noha muy, ɓa raakee kosaayiɗ jen hayya ŋ Yeesu na ɓi jangaaro ɗalohiɗ, a degga yaa nu nga ɗah yaah ciŋ ɗe, yaa nu a degga yaah ciŋ ɗe ɗah, yeem wir. 41Ɓi jiini puloheeɗa ŋ kosaayiɗ laayiɗ, ca leehkeeɗa ne : « Fu Kuɓkiŋ Kooh ! » Ca inheen ne a yi Mucɗohi Gapohse, tahha po a ngasukka ca, a faɗɗi ca ne ca woo.

42Wa Kooh wiis, Yeesu pulla kur ka, a kaɗta ŋ ɗisik ɗaayiɗ, ɓi ɓo' laayiɗ waakeeɗa ɗe. Wa ɓa hot ɗe, ɓa waaɗta ɗe amb ne a cootuu. 43Waaye a woosa ɓa ne : « Ŋ joyiɗ nam ɓay Yegɗohiŋ Muci, wiŋ Nguuriŋ-Kooh, ŋ kur ci cinooci, ineem weɗ tah ho woosu. » 44A taalndiɗta, a yegɗoheeɗaa ŋ sinaagog caŋ kur caŋ Yudee.