Camba 11

Taɓahuukaŋ Baabel

1Bala ɓa pasarkohan ɗah, ɓooɓiŋ kehƴi jen jombee peɗeem yino 2po ŋ jamanoona ɓa kurkoh pulohaaɗ-noh. Ɓa kaɗoh kaɗoh po ɓa reesa ŋ oon angiɗ ŋ kur ka na woyse Sinyaar, ɓa yippa nga. 3Ɓa woosa ŋ harmban ɓa ne : « Ɓoo muulaat, ɓoo ut ca. » Ɓa ɓayee muul findi atoh taɓahoha na godirong findi simong. 4Ɓa woyissa ne : « Ɓoo haɓɗaat kur-taah, ɓoo taɓah nga taɓah jimimim po wa maangee ŋ eel ca, wa hey tahe po ɓoo raak tiik te ɓoo heyɗi pasarkohe ŋ kehƴi. »

5Weɗ Nikiɗi ruhsoh ne a marak kur ka na taɓaha ɓooɓi ŋ kehƴi tufkiɗe. 6A woosa ŋ haf ce ne : « Findi ɓa camboh an, ɓa nikka cuuɓ yino, ɓa ɓaahha peɗeem, ali in wooñissanɗi ɓa ŋ in nu ɓa waaɗ tum ɗah. 7Mbaa ɗah, ɓoo ruhsaat, ɓoo ɗalohiɗ woo ciŋ ɓa po ɓaa nu nga ɗah, kerhuu peɗmi ɓinooɓi na woye. » 8Nikiɗi pasarohha ɓa ŋ kehƴi jen ; kur ka ɓa taɓahee toppa ndaam. 9Weɗ tah ɓa teekkaa Baabel laam, ŋ ndaam weɗ Nikiɗi ɗalohiɗ peɗeem ci1, a pasarohha ɓooɓi ngaŋ kehƴi jen.

Ɓi rimkoh ŋ Sem

10Inii weɗ naandsuku ŋ Sem na ɓi rimkoh nga ɗe. Wa Sem pes kiis teemet (100), a raakka kuɓu ƴaar, a teekka ɗe Arpaksad, raak toɓa yakka cootiɗ po wa tummba kiis kanak. 11Ŋ finho raakuukaŋ Arpaksad, Sem pesiɗ kiis teemet-yatuus (500). A nameen raak ɓi kuɓu ƴaar na ɓitiɓ.

12Wa Arpaksad pes kiis ndaŋkiyaah-kaahay na kiis yatuus (35), a raakka kuɓu ƴaar, a teekka ɗe Selah. 13Ŋ finho raakuukaŋ Selah, Arpaksad pesiɗ kiis teemet-nikiis na kiis kaahay (403). A nameen raak ɓi kuɓu ƴaar na ɓitiɓ.

14Wa Selah pes kiis ndaŋkiyaah-kaahay (30), a raakka kuɓu ƴaar, a teekka ɗe Eber. 15Ŋ finho raakuukaŋ Eber, Selah pesiɗ kiis teemet-nikiis na kiis kaahay (403). A nameen raak ɓi kuɓu ƴaar na ɓitiɓ.

16Wa Eber pes kiis ndaŋkiyaah-kaahay na kiis nikiis (34), a raakka kuɓu ƴaar, a teekka ɗe Peleg. 17Ŋ finho raakuukaŋ Peleg, Eber pesiɗ kiis teemet-nikiis na kiis ndaŋkiyaah-kaahay (430). A nameen raak ɓi kuɓu ƴaar na ɓitiɓ.

18Wa Peleg pes kiis ndaŋkiyaah-kaahay (30), a raakka kuɓu ƴaar, a teekka ɗe Reyu. 19Ŋ finho raakuukaŋ Reyu, Peleg pesiɗ kiis teemet-kanak na kiis yasna-nikiis (209). A nameen raak ɓi kuɓu ƴaar na ɓitiɓ.

20Wa Reyu pes kiis ndaŋkiyaah-kaahay na kiis kanak (32), a raakka kuɓu ƴaar, a teekka ɗe Serug. 21Ŋ finho raakuukaŋ Serug, Reyu pesiɗ kiis teemet-kanak na kiis yasna-kanak (207). A nameen raak ɓi kuɓu ƴaar na ɓitiɓ.

22Wa Serug pes kiis ndaŋkiyaah-kaahay (30), a raakka kuɓu ƴaar, a teekka ɗe Nahor. 23Ŋ finho raakuukaŋ Nahor, Serug pesiɗ kiis teemet-kanak (200). A nameen raak ɓi kuɓu ƴaar na ɓitiɓ.

24Wa Nahor pes kiis ndaŋkiyaah-kanak na kiis yasna-nikiis (29), a raakka kuɓu ƴaar, a teekka ɗe Tera. 25Ŋ finho raakuukaŋ Tera, Nahor pesiɗ kiis teemet na kiis ndaŋkiyaah na kiis yasna-nikiis (119). A nameen raak ɓi kuɓu ƴaar na ɓitiɓ.

26Tera raakeen kuɓu ƴaar kaahay, Ibram2, Nahor na Haaraan, wa a raak kiis ndaŋkiyaah-yasna-kanak (70).

Ɓi kahan Tera, baab ɓi Ibrahiima.

27Inii weɗ naandsuku ŋ Tera na ɓi rimkoh nga ɗe ; Tera a yi baabiŋ Ibram na Nahor na Haaraan yi rim Loot. 28Haaraan yeem a kaanoh kur ɓa, ŋ kur-taaha na woyse Uur ŋ Babilon, raak baab ɓa peseeɗa. 29Ɓiti Ibram teeksee Saraay3, yiŋ Nahor nikka Milka, kuɓkiŋ Haaraan. Haaraan a yi namee nik baab ɓi Iska. 30Waaye, Saraay mineeɗi raak kuɓu, a jaasiree jaasir.

31Wa raakka mbeh, Tera kurkohha Uur ŋ Babilon a toorkeeɗa Kanaan. A ɓayndohha kuɓkiŋ ɗe Ibram, na setiŋ ɗe Loot kuɓkiŋ Haaraan. A nammba ɓayndoh payum ce Saraay ɓiti Ibram. Ɓa kaɗoh kaɗoh po ŋ waas, ŋ kur-taaha na woyse Haaraan, ɓa yippa nga. 32Tera kaanohha ndaam raak ɗe pesiɗ kiis teemet-kanak na kiis yatuus (205).