Camba 1

Feraŋ Adina

1Ŋ camba, Kooh fer eel ci na kehƴi. 2Kehƴi nikee hulang, wa nikka ɓarang. E ñuus muuree masma, te Fuuɗsiŋ Kooh seree ŋ ɗafuk wa. 3Kooh woosa ne : « Wa wiisaat ! » Wa wiissa. 4A hotta ne siñaari baahiɗ, a nistohha siñaari na ñuusi. 5A teekka siñaari "noh", a teekka ñuusi "wek". Niin raakka, ɓaaɓ raakka, wa nikka mbeha ɗeɓ.

6Wa weem coot, Kooh woosa ne : « Raɗsuk raakaat ŋ harmban masuɓ ci, ne wa nistoh masuɓ na masuɓ. » 7A haɓiɗta raɗsuki. A nistohha masmi ŋ ooɓ raɗsuki na masma ŋ ɗafka. Te wa nikohha ɗaa. 8A teekka raɗsuki "eel ci". Niin raakka, ɓaaɓ raakka, wa nikka mbeha kanakɗoh.

9Ŋ finho ineem, Kooh woosa ne : « Masmi ŋ ooɓ eel ci nangɗukohaat ɗisik yino po keheƴ suyiɗ pul. » Te wa nikohha ɗaa. 10A teekka ɓaki suyɗi "keheƴ", a teekka masmi nangɗukohɗi "cookom". A hotta ne wa baahiɗ.

11Ngaŋ woo keem, Kooh woyissa ne : « Kehƴi riifaat na in ci na paare : paangiici ɓay tisoh, na kidig ci na ñamse, kidig nu nik na rimiŋ wa na tisohiŋ wa ŋ ɗooƴi, ŋ findi mandohaaɗiŋ wa, ŋ kehƴi. » Te wa nikohha ɗaa. 12Kehƴi paarra paangi ɓayiɗ tisoh findi mandohaaɗ ciŋ ca, kidig ci na rime findi mandohaaɗ ciŋ ca, waa nu nik na tisohiŋ wa. A hotta ne wa baahiɗ. 13Niin raakka, ɓaaɓ raakka, wa nikka mbeha kaahayɗoh.

14Wa mbeheem coot, Kooh woosa ne : « Ngaŋ raɗsukiŋ eel ci, wa raakaat in ci raak siñaar, ne ca nistoh noh na wek, ca teeɓoh jamano na mbeh na kiis. 15Ŋ raɗsukiŋ eel ci, ca nikaat siñaar ne ca siñaariɗ kehƴi. » Te wa nikohha ɗaa. 16Kooh haɓiɗta siñaar kanak yakak, wi yakki ne wa adgoh noh, wi ƴini ne wa adgoh wek. A haɓiɗta yit hor ci. 17A seriɗta ca ŋ raɗsukiŋ eel ci ne ca siñaariɗ kehƴi, 18ne ca adgoh noh na wek, ca nistoh siñaar na ñuus. A hotta ne wa baahiɗ. 19Niin raakka, ɓaaɓ raakka, wa nikka mbeha nikiisɗoh.

20Ŋ woo keem, Kooh woyissa ne : « Ngaŋ masuɓ ci, cuurund na inaama wiiriis aastiɗohaat, sel pundaat ŋ eel ci, ŋ ɗafuk kehƴi. » 21Ŋ ineem, a ferra ɗoopaat ci yakak ci ŋ cookmi, na inaamaaci na huƴe, ca weƴee jen ŋ ɗooƴ masuɓ ci. A ferra ca ŋ findi mandohaaɗ ciŋ ca. A ferra yit in ci raak paɓ jen, findi mandohaaɗ ciŋ ca. A hotta ne wa baahiɗ. 22A barke'iɗta ca, an : « Nikaat ɓasloh, rimaatɗohaat, riifɗaat masmiŋ cookmi, te yit, sel ci rimaatɗoh ŋ kehƴi. » 23Niin raakka, ɓaaɓ raakka, wa nikka mbeha yatuusɗoh.

24Wa weem coot, Kooh woosa ne : « Kehƴi pulɗaat inaama findi mandohaaɗ ciŋ ca, ɗoopaat ci raakan heɗ, na ci raakanɗi heɗ, na inaama ƴin findi mandohaaɗ ciŋ ca. » Te wa nikohha ɗaa. 25A ferra ɗoopaat ci raakanɗi heɗ findi mandohaaɗ ciŋ ca, a ferra ci raakan heɗ findi mandohaaɗ ciŋ ca, a ferra inaamaaci ƴin ci ŋ kehƴi jen findi mandohaaɗ ciŋ ca. A hotta ne wa baahiɗ.

26Ngaŋ woo keem, a woyissa ne : « Ɓoo haɓɗaat ɓo' ŋ ñaamaariŋ ɓoo, findi mandohaaɗiŋ ɓoo, ne ɓa adgoh cuurund ciŋ cookmi, na sel ciŋ eel ci, na ɗoopaat ci, ne ɓa adgoh kehƴi jen, na in ci na yoonde ŋ kehƴi. » 27Kooh ferra ɓo' ŋ ñaamaariŋ ɗe. Ngaŋ ñaamaariŋ Kooh, a ferra ɓa, ƴaar na ɓitiɓ. 28A barke'iɗta ɓa, a woosa ɓa ne : « Ɓaslaat, rimaatɗohaat, riifɗaat kehƴi, minaat kehƴi jen, adgohaat cuurund ciŋ cookmi, na sel ciŋ eel ci, na in ci na yoonde ŋ kehƴi jen. »

29Kooh dokkissa, woosa ɓa ne : « Ɓayaat, ŋ on ɗu paangi nu nik ne weɗi ŋ kehƴi jen, na kidig nu amboh rim na tisohiŋ wa ɗah. Ca nik pesohaaciŋ ɗu. » 30Kooh woosa ne : « Ɗoopaat ciŋ kehƴi, sel ci na punde, in ci na yoonde ŋ kehƴi, in ci na iike jen, ŋ on ca ne, ca pesoh paangi iiri. » Te wa nikohha ɗaa. 31Kooh hotta in ci a ƴut haɓiɗ jen, ca baahha lool. Niin raakka, ɓaaɓ raakka, wa nikka mbeha yasna-yino'ɗoh.