Matej 27

E Judasoro meriba

(Delja 1,18–19)

1Rano sabale, sa o šerutne sveštenici hem o starešine e jevrejengere dogovorinde pe te mudaren e Isuse. 2Phandle le, i legarde le hem dinde le ko Pilat, ko upravniko e rimesoro.

3Kad o Juda, olesoro izdajniko, dikhlja soi o Isus osudime ko meriba, pelo lese žal hem irinđa o trijanda srebrna kovanice e šerutne sveštenikonenđe hem e starešinenđe, 4vaćerindoj: “Grešinđum! Izdajinđum e manuše kova nane krivo.”

On phende lese: “Nane adava amari briga. Adavai to stvaro.”

5I o Juda frdinđa o srebrna kovanice ano Hram, i dželo hem obesinđa pe.

6O šerutne sveštenici lelje o srebrna kovanice, vaćerindoj: “Nane muklo te čhiva len ani blagajna e hramesiri, adalese so inele plata zako rat.”

7Adalese dogovorinde pe olencar te činen e Čarutnesiri njiva, te ovel than kote ka parunen pe o abanđije. 8Adalese adaja njiva hem avdive vičini pe “Ratvali njiva.” 9Ađahar pherdilo okova so phenđa o proroko o Jeremija:

“Lelje o trijanda srebrna kovanice,

edobor proceninde le o Izraelci,

10hem činde e Čarutnesiri njiva,

sar so o Gospod naredinđa maje.”

E jevrejengere vođe tužinena e Isuse ko Pilat

(Mk 15,2–5; Lk 23,3–5; Jn 18,33–38)

11A o Isus terdino anglo e rimesoro upravniko, kova pučlja le: “Tu li injan o caro e Jevrejengoro?”

A o Isus phenđa: “Ađahari sar so pheneja.”

12O šerutne sveštenici hem o starešine tužinena ine e Isuse, a ov ništa na vaćeri ine.

13Tegani o Pilat pučlja le: “Tu li na šuneja so vaćerena sa adava protiv tute?”

14Ali o Isus nijekh lafi na vaćerđa lese, i o upravniko but začudinđa pe.

O Pilat ćerela e narodosiri volja ađahar so osudini e Isuse ko meriba

(Mk 15,6–15; Lk 23,13–25; Jn 18,39–19,16)

15A e upravniko e Pilate inele adeti ko prazniko Pasha te mukel e narodose jekhe manuše taro phandlipe kole on mangle. 16Ko adava vreme jekh e prešunde phandlendar inele o Varava.

17Kad o narodo čedinđa pe, o Pilat pučlja len: “Kas mangena te mukav tumenđe: e Varava ili e Isuse vičime Hrist?”

18Adalese so džanđa so e Isuse predinde tari zavist.

19Sar o Pilat bešela ine ki stolica e sudosiri, reslo lese lafi lesere romnjatar: “Muk tut adale manušestar kovai nevino, adalese so erat ano suno but mučinđum man zbog leste.”

20Ali o šerutne sveštenici hem o starešine pherde e narodo te roden o Varava te ovel muklo, a o Isus te ovel mudardo.

21O upravniko pučlja len: “Kas akale dujendar mangena te mukav tumenđe?”

On phende: “E Varava!”

22O Pilat pučlja len: “A so te ćerav e Isuseja vičime Hrist?”

On sare vičinde: “Čhiv le ko krsto!”

23A ov phenđa: “A savo bišukaripe ćerđa?”

Ali on pana po zorale vičinde: “Čhiv le ko krsto!”

24Kad o Pilat dikhlja da ništa na pomožini, nego da sa po bari pobuna ovela, lelja o pani hem anglo narodo thovđa ple vasta, vaćerindoj: “Me na injum krivo zako rat akale manušesoro – adavai tumaro stvaro!”

25A sa o narodo phenđa: “Nek lesoro rat perel upro amende hem upro amare čhavende!”

26O Pilat tegani muklja lenđe e Varava, a e Isuse dinđa ko vojnici te šibinen le hem palo adava te čhiven le ko krsto.

O vojnici marena muj e Isuseja

(Mk 15,16–20; Jn 19,2–3)

27Tegani e upravnikosere vojnici legarde ki lesiri palata e Isuse, i uzalo leste čedinde sa i četa e vojnikonendar. 28Huljavde le hem čhivde upro leste lolo ogrtači. 29I ćerde kruna oto kare hem čhivde lese ko šero, a ko desno vas trska. Tegani pele ko kočija anglo leste, i lelje te maren muj oleja, vaćerindoj: “Te ove sasto, e jevrejengere carona!” 30I čhungarena le ine, hem lelje i trska hem khuvena le ine olaja ko šero.

31I palo adava so marde muj oleja, huljavde lestar o ogrtači, hem urjavde le lesere šeja, i legarde le te čhiven le ko krsto.

E Isuse čhivena ko krsto

(Mk 15,21–32; Lk 23,26–43; Jn 19,17–27)

32Iklindoj, resle jekhe manuše tari Kirinija palo anav Simon hem terinde le te akhari e Isusesoro krsto. 33Kad resle đi ko than vičime Golgota – so značini “Kokalo e šeresoro”, 34dinde e Isuse te pijel mol mešimi nesaveja so inele but ćerko, ali kad čhivđa ano muj, na manglja te pijel la.

35I kad čhivde le ko krsto, frdinde barbuti hem ađahar delinde maškara pumende lesere šeja. 36I bešena ine adari te arakhen le.

37Upreder lesoro šero čhivde znako kote inele pisime lesiri krivica: Akavai o Isus, o caro e jevrejengoro .

38Tegani oleja čhivde ko avera krstija hem duje pobunjenikonen, jekhe oti lesiri desno, a e dujtone oti lesiri levo strana.

39A okola kola nakhena ine adale dromeja vređinena le ine. Mrdinena ine šerencar, 40vaćerindoj: “Tu kova peraveja o Hram hem vazdeja le zako trin dive, spasin tut! Hulji taro krsto te injan o Čhavo e Devlesoro!”

41Ađahar da marde muj oleja o šerutne sveštenici, o učitelja e Zakonestar hem o starešine, vaćerindoj: 42“Averen spasinđa, a pes našti te spasini? Ovi o caro e Izraelesoro! Nek huljel akana taro krsto, i ka verujina ano leste. 43Nadini pe upro Devel! Nek o Devel akana spasini le te čače mangela le. Adalese so vaćerđa: ‘Me injum o Čhavo e Devlesoro.’ ”

44Ađahar da vređinena le ine hem o pobunjenici kola inele čhivde ko krsto oleja.

E Isusesoro meriba

(Mk 15,33–41; Lk 23,44–49; Jn 19,28–30)

45A ko ekvaš o dive, i tomina učharđa sa i phuv hem ađahar inele trin saća. 46Kad inele đi ko trin o sati, o Isus vičinđa oto sa o glaso: “Eli, Eli, lema sabahtani?” (so značini: “Devla mleja, Devla mleja, sose ačhavđan man?”)

47A kad adava šunde okola kola terđona ine adari, phende: “Vičini e proroko e Ilija.”

48I otojekhvar jekh olendar prastandilo, lelja o sunđeri, čhivđa le ani ušli mol, i čhivđa le upri trska hem kaninđa e Isuse te pijel.

49A avera phende: “Adžićer, te dikha ka avel li o Ilija te spasini le.”

50A o Isus palem vičinđa oto sa o glaso, i muklja pli duša.

51I otojekhvar e hramesiri zavesa pharavdili ko ekvaš, odupral natele. I phuv tresinđa pe hem o stene phađile. 52O grobija phravdile hem uštine taro mule but manuša e Devlesere. 53Palo e Isusesoro uštiba taro mule on iklile taro grobija hem džele ki sveto diz hem mothovde pe butenđe.

54A kad e rimesoro kapetani hem okola kola oleja arakhena ine e Isuse dikhle o zemljotres hem sa so ulo, but darandile hem phende: “Čače akava manuš inele e Devlesoro Čhavo!”

55A adari inele hem but đuvlja kola sa adava dikhena ine odural. On pana tari Galileja džana ine palo Isus hem kandena le. 56Maškar olende inele i Marija Magdalena, i Marija e Jakovesiri hem e Josifesiri daj, hem i daj e Zevedejesere čhavengiri.

E Isusesoro paruniba

(Mk 15,42–47; Lk 23,50–56; Jn 19,38–42)

57Kad peli i rat, alo jekh barvalo manuš tari diz Arimateja palo anav Josif, kova hem korkoro inele učeniko e Isusesoro.

58Ov dželo koro Pilat hem rodinđa te den le o telo e Isusesoro, i o Pilat naredinđa te den le. 59O Josif lelja o telo, paćarđa le neve čaršaveja 60hem čhivđa le ano plo nevo grobo savo inele ćerdo ani stena. Hem o udar e grobosoro phandlja e bare bareja, i dželo. 61A adari inele i Marija Magdalena hem i aver Marija kola bešena ine dikhindoj nakoro grobo.

O šerutne sveštenici hem o fariseja osigurinena o grobo

62Tejsato dive, ko savato, o šerutne sveštenici hem o fariseja čedinde pe koro Pilat 63hem phende lese: “Gospodarona, setinđam amen so okova hovavno kad inele dživdo phenđa: ‘Palo trin dive ka uštav taro mule’. 64Adalese naredin o grobo te ovel osigurime sa đi ko trito dive, te na aven lesere učenici hem te čoren o telo, i te phenen e narodose: ‘Uštino taro mule!’ Te ulo ađahar, adava hovajba ka ovel po baro e prvonestar.”

65O Pilat phenđa lenđe: “Isi tumen stražarija. Džan hem osigurinen o grobo sar džanen.”

66Tegani džele hem osigurinde o grobo ađahar so zapečatinde o bar hem čhivde stražaren.