I Biblija ki Arli romani čhib Srbija
Luka 4
E Isuse ki pustinja kušini o beng
(Mt 4,1–11; Mk 1,12–13)
A o Isus, pherdo e Svetone Duhoja, irinđa pe tari len Jordan; i oto Duho inele legardo ki pustinja, kaj inele saranda dive iskušime e bengestar. I na halja ništa adala dive, a kad nakhle adala dive, tegani bokhalilo.
I o beng phenđa lese: “Te injan o Čhavo e Devlesoro, vaćer akale barese te ovel maro.”
A o Isus phenđa lese: “Pisimei ano Sveto lil: ‘O manuš naka živini samo oto maro.’”
I o beng legarđa le ko učo than hem otojekhvar mothovđa lese sa o carstvija e phuvjakere, i phenđa lese: “Tuće ka dav sa akava zoralipe hem i slava olengiri adalese soi maje dindi, i dava la kase me mangava. Adalese, te peljan ko kočija angla mande, sa ka ovel klo.”
I o Isus phenđa lese: “Pisimei ano Sveto lil: ‘Per ko kočija samo anglo Gospod, to Devel, hem samo ole kande!’”
I o beng anđa le ko Jerusalim hem čhivđa le upro naj učo than e Hramesoro hem phenđa lese: “Te injan o Čhavo e Devlesoro, frde tut akatar tele! Adalese soi pisime:
‘Ka naredini ple anđelenđe te arakhen tut,
te akharen tut ko vasta
te na khuve tut preja ko bar.’”
O Isus phenđa lese: “Hem akavai phendo ano Sveto lil:
‘Ma kušin e Gospode, te Devle.’”
I kad završinđa svako kušnja, o beng cidinđa pe olestar đi nesavi aver prilika.
O Isus sikaj ani Galileja
(Mt 4,12–17; Mk 1,14–15)
I o Isus irinđa pe ki regija Galileja ano zoralipe e Duhosoro, i šundilo o glaso olestar ko sa o krajo. I sikavđa e manušen olenđe ano sinagoge hem inele pohvalime sarijendar.
E Isuse ispudinena taro Nazaret
(Mt 13,53–58; Mk 6,1–6)
I o Isus alo ki diz Nazaret kote barilo hem, palo plo adeti ko savato, đerdinđa ki sinagoga. Uštino te čitini, a ine lese dindo o lil e prorokosoro e Isaijasoro. Ov phravđa o lil hem arakhlja o than kaj inele pisime:
“O Duhoi e Gospodesoro upra mande,
adalese so pomazinđa man
te vaćerav o šukar lafi e čororenđe.
Bičhalđa man te proglasinav e phandlenđe da ka oven oslobodime,
e kororenđe da ka irini pe lenđe o dikhiba,
e mučimenđe da ka oven slobodna,
te proglasinav o adžićerdo berš oti e Gospodesiri milost.”
Tegani phandlja o lil, irinđa le e slugaste, i beštino te sikaj. I sare ani sinagoga dikhle ano leste.
A o Isus lelja te vaćeri lenđe: “Avdive pherdile akala lafija save šunđen tumare kanencar.”
I sare šukar vaćerde olestar hem inele zadivime oto šukar lafija save iklile lesere mujestar, i vaćerde: “Nane li ov e Josifesoro čhavo?”
A ov phenđa lenđe: “Čače ka vaćeren maje akaja poslovica: ‘Doktore, sasljar korkore tut!’ So šunđam so ulo ano Kafarnaum, ćer hem akate, ano to than kaj bariljan.”
I phenđa: “Čače, vaćerava tumenđe, nijekh proroko nane prihvatime ano plo than kaj barilo. I čače, vaćerava tumenđe, inele but udovice ano Izrael e Ilijase ano vreme, kad na pelo bršim trin berš hem šov masek i ulo baro bokhalipe ki sa i phuv. I nijekhaće olendar na inele bičhaldo o Ilija sem e udovicaće ki e abanđijengiri diz Sarepta uzalo Sidon. I inele but gubavci ano Izrael ano vreme e prorokosoro e Jelisejesoro, i nijekh olendar na inele sasljardo, sem o Neman o Sirijco.”
I sare ani sinagoga pherdile holi kad šunde adava. I uštine hem ispudinde le tari diz, i legarde le upre ko brego upro savo lengiri diz inele vazdime te šaj frden le odupral. Ali o Isus nakhino maškar olende hem dželo.
O Isus ispudini e demone e manušestar
(Mk 1,21–28)
I o Isus huljilo ani e galilejakiri diz Kafarnaum, i sikavđa e manušen ko savato. I on inele zadivime lesere sikavibnaja adalese so lesoro vaćeriba inele ano autoritet.
A adari, ani sinagoga, inele manuš opsednutime e demonesere bišukare duhoja hem oto sa o glaso vičinđa: “Oh, so mangeja amendar, Isuse Nazarećanine? Aljan li te uništine amen? Džanav ko tu injan: o Sveco e Devlesoro.”
Tegani o Isus ukorinđa le: “Phand to muj hem ikljov olestar!”
I o demoni frdinđa le ki phuv anglo sarijende, iklilo olestar hem ni hari na dukhavđa le.
I sare but začudinde pe hem vaćerde jekh avereja ađahar: “Savo li vaćeriba adava da ano autoritet hem ano zoralipe naredini e bišukare duhenđe te ikljon hem on ikljona?”
I o glaso e Isusestar šundilo ko sa o pašutne thana.
O Isus sasljari e Petresere sasuja hem bute averen
(Mt 8,14–17; Mk 1,29–39)
O Isus iklilo tari sinagoga hem dželo ko čher e Simonesoro. E Simonesere sasuja inele bari jag. I on zamolinde le te sasljari la. I o Isus terdino uzalo late, naredinđa e jagaće hem oj muklja la. I odmah uštini hem lelja te poslužini len.
Kad o kham huljilo, sarijen kolen inele namborme manuša oto razna nambormipa, ande len koro Isus. A ov upra svakoneste olendar čhivđa ple vasta hem sasljarđa len.
A butendar da iklile o demonja vičindoj hem vaćerindoj: “Tu injan o Čhavo e Devlesoro!”
O Isus pretinđa len hem na muklja lenđe te vaćeren adalese so džande dai ov o Hrist.
Kad dislilo, o Isus iklilo tari diz hem dželo ko jekh čučo than. I but džene rodinde le. Ale đi leste hem na mukena le ine te džalfse olendar.
A ov phenđa lenđe: “I ko avera dizja valjani te vaćerav o šukar lafi oto carstvo e Devlesoro adalese so zako adava injum bičhaldo.”
I o Isus nastavinđa te propovedini ano e judejakere sinagoge.
I Biblija ki Arli romani čhib Srbija. Copyright © 2025 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.