Jovan 13

O Isus thovela e učenikonengere pre

1Angleder o prazniko Pasha, o Isus džanđa so alo lesoro vreme te džal taro akava sveto koro Dad. Tegani o Isus đi o kraj mothovđa kobor volini okolen kola inele olesere ko akava sveto.

2O Isus hem lesere učenici hana ine zajedno i večera. O beng e Judase e Iskariotese, e Simonesere čhavese, već čhivđa ano vilo te izdajini e Isuse. 3A o Isus džanđa so o Dad dinđa lese sa i vlast; džanđa da e Devlestar alo hem da ko Devel ka džal. 4Uštino oti večera hem huljavđa plo ogrtači, i lelja o peškiri hem phandlja le pese ko maškar. 5Tegani čhorđa pani ano lavori hem lelja te thovel e učenikonengere pre hem te kosel len peškireja saveja phandlja po maškar.

6Kad alo đi o Simon Petar, ov phenđa lese: “Gospode, tu li ka thove mle pre?”

7O Isus phenđa lese: “Tu akana na haljoveja so me ćerava, ali jekh dive ka haljove.”

8A o Petar phenđa lese: “Tu nikad naka thove mle pre!”

A o Isus phenđa lese: “Te na thovđum te pre, našti te ove jekh mle učenikonendar.”

9Tegani o Simon Petar phenđa lese: “Gospode, ma onda thov samo mle pre, nego hem mle vasta hem mlo šero!”

10A o Isus phenđa lese: “Okolese kovai nanđardo valjani te thoven pe samo o pre, adalese soi već čisto. Hem tumen injen čista, ali na sare.”

11Džanđa ko ka izdajini le, i adalese phenđa: “Na injen sare čista.”

12Kad thovđa lengere pre, lelja plo ogrtači hem palem čhivđa pe uzalo astali, hem pučlja len: “Haljovena li so ćerđum tumenđe? 13Tumen man vičinena Učitelju hem Gospode, hem šukar phenena, adalese so me adava injum. 14I te me, o Gospod hem o Učitelj, thovđum tumare pre, onda valjani hem tumen te thoven o pre jekh averese. 15Dinđum tumen primer, hem tumen te ćeren ađahar sar so me ćerđum tumenđe. 16Čače, čače vaćerava tumenđe: o sluga nane po baro ple gospodarestar, ni o bičhaldo okolestar kova bičhalđa le. 17Adalese so džanen akava, blago tumenđe te ađahar ćerđen.”

O Isus vaćeri ple učenikonenđe da jekh olendar ka izdajini le

(Mt 26,20–25; Mk 14,17–21; Lk 22,21–23)

18“Na vaćerava sarijendar tumendar. Me džanav okolen kas birinđum. Ali mora te pherđol okova soi pisime ano Sveto lil: ‘Okova kova mancar hala maro, irinđa pe protiv mande.’ 19Vaćerava tumenđe akana, angleder nego so te ovel, da kad ka ovel, te poverujinen da Me injum. 20Čače, čače vaćerava tumenđe: ko primini okole kole me bičhalava, man primini, a ko primini man, primini Okole kova bičhalđa man.”

21Kad phenđa adava, lesoro duho inele but uznemirime, i tegani phravdeste phenđa lenđe: “Čače, čače vaćerava tumenđe: jekh tumendar ka izdajini man.”

22Tegani o učenici dikhle jekh avere, adalese so na džande kastar o Isus vaćeri. 23Jekh e učenikonendar – okova kas o Isus but volinđa – inele odmah uzalo Isus, 24i o Simon Petar dinđa le znako te pučel e Isuse kastar vaćeri.

25Ađahar adava učeniko pašljarđa pe nakoro Isus hem pučlja le: “Kovai adava, Gospode?”

26A o Isus phenđa lese: “Okova kase ka dav o maro savo ka macinav ano čaro.”

Tegani lelja o kotor maro, macinđa le hem dinđa le e Judase, e Simonesere Iskariotesere čhavese. 27I samo so o Juda halja o maro, đerdinđa ano leste o Sotoni.

Tegani o Isus phenđa lese: “Adava so mangeja te ćere, ćer po sig.”

28Ali niko e učenikonendar kola inele uzalo astali na halilo sose phenđa lese adava. 29Adalese so ko Juda inele o zajednička pare, nesave mislinde da o Isus phenđa lese te džal hem te činel nešto hajbnase zako prazniko ili te del nešto e čororenđe. 30Palo adava so o Juda halja o maro, odmah iklilo avri. A inele rat.

O Isus dela ple učenikonenđe nevi naredba

31Kad o Juda iklilo, o Isus phenđa: “Akanai proslavime o Čhavo e manušesoro hem o Devel proslavinđa pe ano leste. 32Te o Devel proslavinđa pe ano leste, hem o Devel ole ka proslavini ana peste, hem ka proslavini le odmah. 33Mle čhavoralen, pana hari injum tumencar. Ka roden man, ali, sar so phenđum e jevrejengere vođenđe: ‘Kaj me džava, tumen našti te aven’, ađahar adava hem tumenđe phenava. 34Nevi naredba dava tumen – te volinen jekh avere. Sar so me volinđum tumen, ađahar hem tumen volinen jekh avere. 35Palo akava sare ka džanen da injen mle učenici: te ine tumen mangipe jekh averese.”

O Isus vaćeri so o Petar ka odreknini pe olestar

(Mt 26,31–35; Mk 14,27–31; Lk 22,31–34)

36O Simon Petar pučlja le: “Gospode kaj džaja?”

A o Isus phenđa lese: “Kaj me džava, tu akana našti te ave pala mande. Ali ka ave posle.”

37O Petar pučlja le: “Gospode, sose našti te džav tuja akana? Spremno injum mlo dživdipe te dav tuće!”

38A o Isus pučlja le: “To dživdipe te de maje? Čače, čače vaćerava će, angleder so o bašno ka đilabi, trin puti ka hovave da na pendžareja man.”