रोमियो 13

तुमरो राज को अधिकारी गिनको अधिन रव्हनो

1सबअ राज को अधिकारी गिनको पालन करनो पाहिजे। काहेका कोनी भी अधिकार परमेस्वर को हुकूम को बिना मौजुद नाहती। अना मौजुद अधिकारी गिन परमेस्वर लक राख्यो गयो सेत। 2जोन मौजूद अधिकारी गिनको बिरोध करा सेत वा परमेस्वर को हुकूम को बिरोध करा सेत, अना जोन कोनी असो करा सेत उ आपरो पर नियाव आना सेत। 3राजा अना सासकगिन उन लोक हुनला नही डरावा सेत, जोन साजरा काम करा सेत, पर वय वोला च डरावा सेत, जोन बुराई करा सेत। अदी तुमी सासन लक नही डरनो चाव्हा सेव, तो भलो काम करो, तुमरो बड़ाई होहेत। 4काहेका वय परमेस्वर को सेवक सेत। जोन तुम्हारो भलो को लाय काम कर रहयो सेत। परा अगर तुम्ही बुराई करतत ता उन लक डरो, काहेका दंड देवन को ताकत उनला भेटयो सेत। अना बुराई करन वालों ला सजा देवा सेत। 5यो कारन लक तुमला अधिकारी गिनको पालन करनो पाहिजे। ना च परमेस्वर की सजा को कारन, बल्कि डिमाक लक भी।

6यो च कारन सेत, का तुम्ही जमा पटावा सेव। काहेका हरेक अधिकारी परमेस्वर को काम करा सेत। अना आपरो करतब ला पूरो करा सेत।1 7एकोलाय हरेक को हक देव, जोनला जमा पटानो से, उनको जमा पटाओ, जोको लक डरानो जरुरी से, वोको लक डराव, जोनको आदर करनो से, वोको आदर करो।

सब हुकूम को सार एक दुसरो लक पिरेम

8आपसी मा पिरेम ला छोड़ अना काही बात को करजा नोको चाहो। काहेका जोन दुसरो लक माया राखासे उ नियम धरम ला पूरो कर सेस। 9यो का छिनालापन नोको करो, कोनिला जान लक नोको मारो, चोरी नोको करो, लोभ नोको करो, इनला छोड़ अना कोनी हुकूम सेस तो यो सब बातको निचोड़ यो हुकूम मा सेत। का आपरो सेजारी लक आपरो समान माया राख। 10माया आपरो सेजारी को काही बुराई नही करा से, एकोलाय माया राखनो नियम ला पूरो करनो से।

11बेरा ला चिन्हके असोच करो, एकोलाय का अबा तुमारो लाय जप लक जगन को बेरा आय गयो सेत। काहेका जोन बेरा अमीना भरोसा राख्यो होतो, वोना बेरा को बिचार लक सूटकारा कठा होति। 12अबा रात बित गयी सेत, दिवस हिटनवारा सेस एकोलाय आमी इन्धार को काम ला छोड़-छोड़के उजाड को हतियार घालो। 13आमी दिवस को लक खरो चाल-चलबिन। आमी रगिलोपन नसा पानी गन्दोकाम, अना छिनालापन जलन अना देह को वासना झगड़ा-रगडा लक दुहुर रव्हबिन। 14तुमी पिरभू यीसु मसीह ला घालो अना देह को इक्सा पूरो करन को कोसिस नोको करो।