Yakobo

Lihamba kuhuma kwa

YAKOBU

Ulongolelo

Kitabho aki kya Yakobo kikityekwa na mundu yumu ywakakemitwe Yakobo. Yinguhyubhalika kukita pangi Yakobo ayu kakibhegha nnongo ghwake Yesu, ywakabheghite kilongohi mu ngwemuko lya bhandu bhaanhyubhalilite kilisito bha makachu, na kakibhegha mjumbe ywa hilongohi ghwa njenga kaya, mukitabho kya Andumilwa, kipalamande kya 15:13. Nndumilwa Paulo bhubho kakinkema Yakobo “Ngimiko” ya ngwemuko lya bhandu bha anhyubhalilite kilisito, mukitabho kya Akaagalatia, kipalamande kya 2:9. Asomi bhanguhyubhalila kukita kitabho kya Yakobo kikityekwa yikali ya ngungwa ya mbindamabhoko nhano mbole ya kubhelekwa Kilisito. Kiyaha Yakobo kakibhegha kilongohi ghwa ngwemuko ya bhandu bha anhyubhalilite Kilisito akwo Yelusalemu, yinguhyubhalika kukita kakilyeka lihamba ali pakabheghite kangutama ku Yelusalemu.

Yakobo kakilityeka kitabho aki kwa “Makabila mbinda mabhoko yimo na abhili yiipwilinganikite mu milima” 1:1. Mahundo ghaabheghite mu kitabu kya Yakobo, ghanguanogha ahyubhalila bhoha, peni lilagho “Kabila mbinda mabhoko yimo na abhili” ghangutenda tumanye kukita pangi Yakobo kakiatyekelagha Akaayahudi bhaanhyubhalilite Kilisto. Kiyaha kitabho aki kikialinga kuahikila asomi atangalo. Yakobo kakilinga malingano mu kuhyubhalila na mandendelo. Kuhyubhalila kwa hoto kuubhoneha mu mandendelo, kipalamande kya 2:17. Kangi kakiakinya bhando kwa kulema kwa kubhonela ubhaghulo kwa bhaabheghite na utopelo, kipalamande kya 2:1-4 na kakitulongela yakya kulindakila kwa ghala ghatughalongela, kipalamande kya 3:1-12.

Ghaabheghite

Yakobo kanguajambua asomaji bhake mu 1:1.

Mbole kanguayonjokeha mwoyo bhandu bhaanhyubhalila Kilsto 1:2-27

Kangi kangulubhulila yakya bhula payikwiliha kuhyubhalila kubhonehwa kwa mandendelo 2:1-26

Mbole kangulubhulila yakya bhula malagho paghabhegha na makakala 3:1-12

Kangi kangulubhulila bhula mahala gha Chapanga paghabhegha kihyengo na mahala gha anabhandu 3:13—4:10

Mbole kanguakinya hilongohi bhake yakya mihalo ya kulikweha, kipalamande kya 4:11—5:6

Yakobo kanguyomolela kitabho kyake kwa kuapegha malaghilo gha kighughumu, kipalamande kya 5:7-20