UJobe 26

UJobe Uyaphendula

1UJobe wasephendula wathi:

2“Usumsize njani ongelamandla!

Usuyilamulele njani ingalo ebuthakathaka!

3Yiseluleko esinjani osusiphe lowo ongelakuhlakanipha!

Njalo usubonise mbono bani!

4Ngubani okuncedisileyo ukukhuluma amazwi la na?

Ngokabani umoya okhulume ngomlomo wakho na?

5Abafileyo basebuhlungwini obukhulu,

labo abangaphansi kwamanzi lalabo abahlala kuwo.

6UKufa kwambulekile phambi kukaNkulunkulu;

ikhamisile indawo yokubhubha.

7Uyawendlala umkhathi wenyakatho endaweni engelalutho;

aphanyeke umhlaba phezu kweze.

8Ugoqele amanzi emayezini akhe,

kodwa amayezi kawapatshaki yikusindwa ngamanzi.

9Uyayigubuzela inyanga egcweleyo,

endlale amayezi phezu kwayo.

10Umisa umkhawulo wokwengama umkhathi emanzini

kube ngumngcele phakathi kokukhanya lobumnyama.

11Izinsika zamazulu ziyazamazama,

zisethuswa yikukhuza kwakhe.

12Ngamandla akhe waluthulisa ulwandle;

ngenhlakanipho yakhe waquma uRahabi waba yiziqa.

13Ngomoya wakhe umkhathi wacethula;

isandla sakhe sayigwaza inyoka ibaleka.

14Njalo le yimisebenzi yakhe engaphandle nje ekucineni;

esikuzwayo yilizwana nje lokunyenyeza kwakhe!

Pho ngubani ongawuzwisisa umdumo wamandla akhe na?”