UHosiya 5

Ukwahlulela Okumelane Lo-Israyeli

1“Zwanini lokhu, lina baphristi!

Lalelani, lina bako-Israyeli.

Lalela, wena ndlu yobukhosi!

Ukwahlulela lokhu kumelane lani:

Kade lingumjibila eMizipha,

umambule owendlalwe eThabhori.

2Abahlamuki batshonile ekubulaleni,

ngizabalaya bonke.

3Mina ngazi konke ngo-Efrayimi;

u-Israyeli kafihlakalanga kimi.

Efrayimi, khathesi ususenza ubufebe;

u-Israyeli uxhwalile.

4Izenzo zabo kazibavumeli

ukubuyela kuNkulunkulu wabo.

Umoya wobufebe usezinhliziyweni zabo;

kabamamukeli uThixo.

5Ukuzigqaja kuka-Israyeli kufakaza okubi ngaye;

abako-Israyeli, kanye laye u-Efrayimi,

bayakhubeka ezonweni zabo.

LoJuda laye ukhubeka labo

6Lapho behamba lemihlambi yezimvu zabo leyenkomo

ukuyadinga uThixo,

kabayikumfumana;

uzisusile kubo.

7Kabathembekanga kuThixo;

bazala abantwana ngokungemthetho.

Khathesi imikhosi yabo yokuThwasa Kwezinyanga

izabaqothula kanye lamasimu abo.

8Khalisani icilongo eGibhiya,

lophondo eRama.

Hlabani umkhosi wempi eBhethi-Aveni;

khokhela, wena Bhenjamini.

9U-Efrayimi uzachithwa

ngosuku lokwahlulela.

Phakathi kwezizwana zako-Israyeli

ngimemezela okuliqiniso.

10Abakhokheli bakoJuda

banjengalabo abatshedisa amatshe omngcele.

Ngizathululela ulaka lwami phezu kwabo

njengesikhukhula samanzi.

11U-Efrayimi uncindezelwe,

wanyathelwa ekwahluleleni,

ehlose ukulandela izithombe.

12Mina nginjengenondo ku-Efrayimi,

njengokubola ebantwini bakoJuda.

13Kwathi u-Efrayimi ebona umkhuhlane wakhe,

loJuda ebona izilonda zakhe,

u-Efrayimi waya e-Asiriya,

wathumela ilizwi loncedo enkosini enkulu.

Kodwa kayenelisi ukukwelapha,

kayenelisi ukwelapha izilonda zakho.

14Ngoba ngizakuba njengesilwane ku-Efrayimi,

lanjengesilwane esikhulu kuJuda.

Ngizabadabudabula ngisuke ngihambe;

ngizabathwala ngihambe labo,

kungekho ozabahlenga.

15Ngizabuyela endaweni yami

baze balivume icala labo.

Njalo bazabudinga ubuso bami;

esizini lwabo

bazangidinga impela.”