UMtshumayeli 1

Konke Kuyize

1Amazwi oMtshumayeli, indodana kaDavida inkosi yaseJerusalema:

2“Ize! Ize!”

kutsho uMtshumayeli.

“Ize elipheleleyo!

Konke kuyize.”

3Umuntu uzuzani ngawo wonke umsebenzi wakhe awusebenza nzima

ngaphansi kwelanga?

4Izizukulwane ziyafika, izizukulwane ziyedlula,

kodwa umhlaba umi lanini.

5Ilanga liyaphuma njalo ilanga liyatshona,

liphinde liphange libuyele lapho eliphuma khona.

6Umoya uphephethela eningizimu

ujike uye enyakatho;

uyabhoda, ubhode njalo

ujinge ubuyela endleleni yawo.

7Zonke izifula zigelezela olwandle,

kodwa ulwandle kalugcwali.

Endaweni lapho izifula ezidabuka khona

zicina zibuyela khona njalo.

8Zonke izinto ziyadina,

lokho okungelandiswe muntu.

Ilihlo kalidinwa yikubona,

lendlebe layo kayigcwali ngokuzwa.

9Lokho okwake kwaba khona kuzakuba khona njalo;

okwake kwenziwa kuzakwenziwa njalo;

akulalutho olutsha ngaphansi kwelanga.

10Kukhona yini umuntu angathi ngakho,

“Khangela! Lolulutho lutsha?”

Selwake lwaba khona ngaphambili, kudala;

lwalukhona singakabi khona.

11Kayikho imikhumbulo ngabantu bakudala,

njalo lalabo abezayo abayikukhunjulwa

yilabo abalandelayo.

Ukuhlakanipha Kuyize

12Mina Mtshumayeli, ngangiyinkosi yako-Israyeli eJerusalema. 13Ngazinikela ekufundeni lokudingisisa ngolwazi konke okwenziwayo ngaphansi kwezulu. Unzima kangakanani umthwalo uNkulunkulu awethese abantu! 14Sengizibonile zonke izinto ezenziwayo ngaphansi kwelanga; zonke kazitsho lutho, kuyikuxotshana lomoya.

15Okutshileneyo kungaze kwaqondiswa;

okungekho kungaze kwabalwa.

16Ngacabanga ngedwa ngathi, “Khangela, sengikhulile njalo kwanda ukuhlakanipha kwami okudlula bonke asebake babusa eJerusalema ngaphambi kwami; sengibe lakho ukuhlakanipha okukhulu lolwazi.” 17Ngasengizimisela ukuzwisisa ukuhlakanipha, njalo lokuphambana ingqondo lobuwula, kodwa ngafunda ukuthi lokhu lakho kuyikuxotshana lomoya.

18Phela ngokwanda kokuhlakanipha kuyanda lokukhathazeka;

ukwandisa ulwazi yikwandisa usizi.