ዓይኑሞ ማፃኣፖ 72

ሃጊ ሙካ ካኣታሢ ፆኦሲ ማኣዳንዳጉዲ ሺኢቂንቴ ሺኢጲሢ

1ፆኦሲዮ! ኔኤኮ ዎጎ ካኣቲም

ፂሉሞዋ ኔኤኮ ካኣቲ ናኣዚም ዒንጌ።

2ዒዚ ኔ ዴሮኮ ጌኤዞ ፂሉሞና ዛጋንዳኔ፤

ሜታዼዞንሢማኣ ፒዙሞና ዎጋንዳኔ።

3ዹካ ዖርጎቹሞ

ጌሜራኣ ዴሮም ፂሉሞ ዓኣፒ ዔኪ ዬዓንዳኔ።

4ዒዚ ሜታዼ ዴሮም ሞኦቲንታንዳኔ፤

ማንቆ ዓሶዋ ዓውሳንዳኔ፤

ዓሶ ሄርቂ ዎይሣ ዓሶዋ ዒ ጋኣጫንዳኔ።

5ዓባ ዓኣ ዎዶይዳ ቢያ

ዓጊናኣ ፖዓ ዎዶይዳ ቢያ

ሾይንቲፓ ሾይንቲ ሄላንዳኣና ዒዚ ናንጋንዳኔ።

6ሃኣኮ ቡሪንቴም ማኣሊዳ ዋርቃ ዒርዚጉዲ

ዒ ዋርቃንዳኔ፤

ዓዳ ፁቢ ዒርዚጉዲ ሳዓ ጌላንዳኔ።

7ዒዛ ካኣቱሞና ፂሉሞ ሚርጋንዳኔ፤

ዓጊና ፖዖ ሃሻንዳያ ሄላንዳኣና

ዖርጎቹማ ዒዛኮ ሚርጊ ዴዓንዳኔ።

8ዒዛ ዓጮኮ ዛጳ ባዛፓ ባዞ ሄላንዳኣና

ዔፕራፂሴ ዎራፓ ዴንዲ ዓጮ ጋፖ ሄላንዳኣናኬ። 1

9ዳውሎ ዓጮ ዓሳ ዒዛም ዚጋንዳኔ፤ 2

ሞርካ ዒዛኮ ዒዛ ቤርታ ሎኦሚ ዓጪ ኩኡላንዳኔ።

10ቴርሴሴንታ ዋኣፆ ሳዛ ዓኣ ዓጮ ካኣታኣ

ጊኢራ ሚኢሼ ዒዛም ዔኪ ዬዓንዳኔ፤

ዓሬቤንታ ሳኣባ ዓጮ ካኣታኣ ዔኤቢ ዒንጋኒ ዒዛም ሺኢሻንዳኔ።

11ካኣታ ቢያ ዒዛም ዚጋንዳኔ፤

ዴራኣ ቢያ ዒዛም ዎርቃንዳኔ።

12ሜታዼሢ ዒላታ ዎዶና

ማንቆ ዓሶንታ ማኣዳይ ባኣ ዓሶዋ ዒዚ ሄሊ ዓውሳንዳኔ።

13ማንቆንታ ሜታዼ ዓሶንታም ዒ ሚጪንታንዳኔ፤

ዬያቶ ሃይቢዳፓኣ ዒ ዓውሳንዳኔ።

14ሄርቂንቲ ዎርቆ ዎይፆይዳፓ ዒዚ ዔያቶ ኬሳኔ፤

ሱጉፃ ዔያቶሲ ዒዛ ቤርታ ቦንቺንቴያኬ።

15ካኣታሢ ሚርጌ ሌዔ ናንጎም!

ሳኣባ ዓጮይዳፓ ዎርቄ ዒዛም ሺኢኮም፤

ሺኢጲሢያ ቢያ ዎዴ ዒዛም ሺኢቂንቶም፤

ቢያ ዎዴ ፆኦሲኮ ዓንጃ ዒዛም ማዖም።

16ዓጫ ዒዛሲ ሚርጌ ሃኣኮ ካሦም፤

ዹካ ዒዛኮ ሃኣኮ ባቃልሶም፤

ሊባኖኦሴ ዹኮጉዲ ማሊ ማዖም፤

ሃኣኮኮ ናታ ዒዛኮ ማኣቲጉዲ ሚርጎም።

17ሱንፃ ዒዛሲ ናንጊና ዶዲ ናንጎም!

ዔርቲፃ ዒዛኮ ዓቢ ናንጋሢጉዲ ማዖም፤

ዴሬ ቢያ ዒዛና ዓንጂንቶም፤

ዴራ ቢያ፦ «ኔኤኒ ዓንጂንቴያኬ!» ዒዛ ጎዖም።

18ፔኤሮ ሌሊ ሄርሺሲ ዲቃሣ ዓኪ ባኣዚ ማዻ

ናንጊና ናንጋ ጎዳ ማዔ ዒስራዔኤሌ ፆኦዛሢ ዓንጂንቶም!

19ዒዛኮ ቦንቾ ሱንፃ ናንጊና ዓንጂንቶም፤

ዓጫ ቢያ ዒዛኮ ቦንቾና ኩሞም!

ዓኣሜን! ዓኣሜን!

20ዒሴዬ ናኣዚ ዳውቴ ሺኢጲፃ

ሃይማ ሄሊ ጋፔኔ።