ዓይኑሞ ማፃኣፖ 28

ዳውቴ ዓይኑሞ

ማኣዶ ዴንቃኒ ሺኢቂንቴ ሺኢጲሢ

1ናንጊና ናንጋ ጎዳሢዮ! ኔ ባንሢ ታ ዒላታኔ፤

ታኣኮ ላላሢዮ፥ ዋይዜዖ ታኣም ዋይዚባኣያ ማዒፖ፤

ኔኤኒ ታኣም ዚቲዮ ጌዔያታቴ

ዔቴይዳ ዱኡኪንቴ ዓሲ ታኣኒ ማዓንዳኔ።

2ማኣዶሮ ኔ ባንሢ ታ ዒላታ ዎዶና

ኔኤኮ ዱማዼ ጌኤዦ ማኣሮ ባንሢ

ኩጮ ታኣኮ ታ ዔቂሳኣና

ሺኢጲፆ ታኣኮ ዋይዜ።

3ዔያቶኮ ዒኖ ጋራ ጌኔ ባኣዚ ዓኣታንቴ

ፔ ላጎና ዎላ ኮሺ ጌስታ ፑርቶ ማዻ ዓሶና

ዋይዞ ዒፃ ዓሶና ዎላ ጎቺ ታና ዔኪ ዓኣዺፖ።

4ዔያቶኮ ማዾ ጉዴያ

ዔያታ ማዼ ፑርቱሞ ጉዴያ

ዔያቶም ጪጌ፤

ዔያታ ማዼሢ ጉዴያ ዔያቶም ማሂ ዒንጌ። 1

5ናንጊና ናንጋ ጎዳ ዔያታ ዔኤቢኬ ጎዑዋሢሮ

ዒዚ ማዼ ማዾዋ ዔያታ ማሉዋሢሮ

ዒዚ ዔያቶ ሻሃንዳኔ፤

ጊንሣ ማሂያ ዒ ዔያቶ ኮሻዓኬ።

6ታኣኮ ሺኢጲፆ ዒዚ ዋይዜሢሮ

ናንጊና ናንጋ ጎዳ ዓንጂንቴያ ማዖንጎ።

7ናንጊና ናንጋ ጎዳ ታኣኮ ዎልቃሢና ጊቲማሢናኬ፤

ዒና ታኣኮ ዒዛ ጉሙርቃኔ፤

ዒዚያ ታና ማኣዴኔ፤

ዒና ታኣኮ ኮሺ ዋዛዼኔ፥ ዓይኑሞናኣ ታ ዒዛ ጋላታንዳኔ።

8ናንጊና ናንጋ ጎዳ ፔ ዴሮኮ ዎልቃሢኬ፤

ዒዚ ዶኦሚ ካኣታሤሢማኣ ዻቂንታ ማዓ ዼጌ ዹካሢኬ።

9ዴሮ ኔኤኮ ዓውሴ!

ኔኤሮ ማዔ ዓሶዋ ዓንጄ፥ ዔያቶ ሄንቃሢ ኔና ማዔ፤

ናንጊና ዔያቶ ቶኦኮ ዛጋያ ማዔ።