ጌኤዦ ማፃኣፖ
ዓይኑሞ ማፃኣፖ 132
ፂዮኔ ኬዞ ዓይኑሞ
ጌኤዦ ማኣሮ ዛሎ ዓይናዺንቴ ዓይኑሞ
ናንጊና ናንጋ ጎዳሢዮ!
ታና ዳውቴያ ማሊ ጶቂሣዎ፤
ዒዚ ሜታዺ ዓኣሤ ሜቶዋ ቢያ ሃዳራ ዋሊፖ።
ናንጊና ናንጋ ጎዳሢዮ! ኔኤና ዎላ ዒ ጫኣቄ ጫኣቁሞና
ቢያ ባኮ ዳንዳዓ፥ ያይቆኦቤ ፆኦዛሢ፥ ኔኤም
ሂዚ ጌይ ዒ ጫኣቂ ናኣቤ ናኣቦ ማሊ ጶቂሤ፦
«ናንጊና ናንጋ ጎዳሢም ኬኤሢ ታኣኒ ማዣንዳኣና
ቢያ ባኮ ዳንዳዓ ያይቆኦቤ ፆኦሲም ማኣሪ ታ ኮሻንዳኣና
ታ ኬኤፆ ታኣኒ ጌላዓኬ፤
ታ ዓርሶይዳኣ ታኣኒ ላሃዓኬ፤
ሃውሺ ጊንዖ ጋዓ ባኣዚያ ታ ጊንዓዓኬ።»
ዔፕራታይዳ ኑ ዓኣዖ
ዒዚ ጫኣቁሞ ጫኣቄ ሳኣፂኖ ዛሎ ኑ ዋይዜኔ፤
ቂሪያትይዓሪሜይዳ ዬያ ሳኣፂኖ ኑኡኒ ዴንቄኔ።
ዬካፓ ኑኡኒ፦ «ናንጊና ናንጋ ጎዳሢኮ ማኣሪ ኑ ዓኣዾም፤
ቶካ ዒዛኮ ሄርቃ ሳዖይዳ ሂርኪ ጌይ ኑ ዒዛም ዚጎም» ጌዔኔ።
ናንጊና ናንጋ ጎዳሢዮ!
ኔኤኮ ዎልቆ ፔጋሲ ዔርዛያ ማዔ
ጫኣቁሞ ሳኣፂኖና ዎላ ኔኤኒ ሃውሻ ቤዞ
ኔኤኮ ጌኤዦ ማኣሮ ጌሌ።
ኔኤም ማዻ ቄኤሳ ፂሎ ማዾ ማዾም!
ኔኤም ጉሙርቂንታያ ማዔዞንሢ ዎዛና ኔና ቦንቺ ዓይናዾም!
ኔ ዓይላሢ ዳውቴ ጋይቴ ጌይጋፓ
ኔኤኒ ካኣታሣኒ ቲሽኪ ዶኦሜሢ ሃሺፖ። 1
ናንጊና ናንጋ ጎዳ ዳውቴም
ሂዚ ጌይ ላኣሚንቱዋ ጫኣቁሞ ጫኣቄኔ፦
«ኔ ናኣቶፓ ፔቴሢ ታኣኒ ካኣታሣንዳኔ፤ 2
ኔኤኮ ናኣታ ታኣኒ ዔያቶም ጫኣቄ ጫኣቁሞንታ
ታ ዔያቶ ዓይሤ ባኮንታ ካፒ ኩንሣያ ማዔቴ
ዔያቶኮ ናኣታ ሃሣ ኔና ሄሊሲ
ናንጊና ካኣታዺ ናንጋያ ማዓንዳኔ።»
ናንጊና ናንጋ ጎዳ ፂዮኔ ፔኤም ማሂ ዶኦሬኔ፤
ዒኢካ ማኣሪ ማሂ ናንጋኒያ ኮዔኔ።
ሃና ታኣኮ ናንጊና ሃውሺ ናንጎ ቤሲኬ፤
ሃይካ ታኣኒ ናንጋኒ ሚርጌ ኮዔያታሢሮ
ሃኖ ቤዞ ታ ማኣሪ ታኣኒ ማሄኔ።
ፂዮኔ ታ ኮሺ ዑሣ ዓኣሢ ዓንጃንዳኔ፤
ማንቆ ዓሶ ሙኡዚ ታኣኒ ሚሻንዳኔ።
ቄኤሶ ታኣኒ ዻቂንታ ማኣዖጉዲ ማይሳንዳኔ፤
ዒኢካ ናንጋ፥ ጉሙርቂንታ ዓሳኣ ዎዛና ዓይናዻንዳኔ።
ዳውቴ ዜርፃፓ ካኣቲ ማዓያ ታኣኒ ኬሳንዳኔ፤
ታኣኒ ዶኦሚ ካኣታሤሢም ዼኤፒ ዎልቄ ታ ዒንጋንዳኔ። 3
ዒዛኮ ሞርኮ ታኣኒ ቦርሲንቲ ዓፒላንቲኖ ማይሳንዳኔ፤
ጋዓንቴ ዒዛኮ ቶኦካ ታኣኒ ዓጋንዳ ቦንቾ ባካ ዓኣፓ ዱካያ ማዓንዳኔ።
Source notes (3)
- Cross-reference 2ፆኦሲ. ዓሃኬ 6፡41-42።
- Cross-reference 2ሳሙ. 7፡12-16፤ 1ፆኦሲ. ዓሃኬ 17፡11-14፤ ዓይኑ. 89፡3-4፤ ዳኪ. ማዾ 2፡30።
- Cross-reference 1ካኣቶ. ማ 11፡36።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.