ዓይኑሞ ማፃኣፖ 118

ናንጊና ናንጋ ጎዳ ቢያ ዎዴ ሚጪንታያ ማዔሢ

1ናንጊና ናንጋ ጎዳ ኮሺ ማዔሢሮ

ዒዛ ጋላቱዋቴ፤

ሚጪንቲፃ ዒዛኮ ናንጊና ዶዲ ናንጋኔ። 1

2ዒስራዔኤሌ ዴራ ቢያ

«ሚጪንቲፃ ዒዛኮ ናንጊና ናንጋያኬ» ጎዖንጎ።

3ዓኣሮኔ ማኣሮ ዓሳ

«ሚጪንቲፃ ዒዛኮ ናንጊና ናንጋያኬ» ጎዖንጎ።

4ዒዛ ዒጊጫ ዓሳ ቢያ

«ሚጪንቲፃ ዒዛኮ ናንጊና ናንጋያኬ» ጎዖንጎ።

5ታኣኒ ሜታዼ ዎዶና ናንጊና ናንጋ ጎዳ ዔኤሌኔ፤

ዒዚያ ታኣም ማሂ ዬሄኔ፤

ኩንዒንቲፃፓ ዒ ታና ኬሴኔ።

6ናንጊና ናንጋ ጎዳ ታኣና ዎላኬ፤

ታኣኒ ዒጊጫዓኬ፤

ዓሲ ታና ዓይጎ ዎኦታንዳይ? 2

7ታና ማኣዳኒ ዒዚ ታኣና ዎላኬ፤

ታ ሞርካ ሎኦማሢ ታ ዛጋንዳኔ።

8ዓሲዳ ጌኤቂንቲሢዳፓ ባሼ

ናንጊና ናንጋ ጎዳ ፑኖ ካይዚ ማሂሢ ቃራኬ።

9ዎይሣ ዓሶ ጉሙርቂፆይዳፓ ባሼ

ናንጊና ናንጋ ጎዳ ፑኖ ካይዚ ማሂፃ ቃራኬ።

10ዴራ ቢያ ታና ማንጌኔ፤

ጋዓንቴ ታ ዔያቶ ናንጊና ናንጋ ጎዳ ሱንፆና ባይዜኔ።

11ማንጊፆ ዔያታ ቢያ ዛሎና ታና ማንጌኔ፤

ጋዓንቴ ታ ዔያቶ ናንጊና ናንጋ ጎዳ ሱንፆና ባሼኔ።

12ዓዳ ማሢጉዲ ዔያታ ታ ዑፃ ቁንዴኔ፤

ጋዓንቴ ዓንጊሢ ታሚዳ ዔኤታሢጉዲ ዔያታ ጋፔኔ፤

ጎኔና ናንጊና ናንጋ ጎዳ ሱንፆና ታ ዔያቶ ባይዜኔ።

13ሂዖም ሎኦማኒ ታ ጋኣዲንቴኔ፤

ጋዓንቴ ናንጊና ናንጋ ጎዳ ታና ማኣዴኔ።

14ናንጊና ናንጋ ጎዳ ታኣኮ ዶዱማሢና ዓይናዾሢናኬ፤

ዒዚ ታኣኮ ታና ዓውሳሢኬ። 3

15ፂሎ ዓሶኮ ማኣራ ዒላሺሢና ሶራይቲና ዋይዚንታኔ፤

ዑኡዛ ሂዚ ጋዓኔ፦

«ናንጊና ናንጋ ጎዳኮ ዎልቃ ዶዲ ማዾ ማዼኔ!»

16ናንጊና ናንጋ ጎዳኮ ሚዛቆ ኩጫ ዼግ ዼጊ ጌዔኔ፤

ዬይ ኩጫ ዶዲ ማዾ ማዼኔ።

17ቶሊ ዓቲ ሼምፔና ናንጋንዳኣፓ ዓቴም ታ ሃይቂንዱዋሴ፤

ናንጊና ናንጋ ጎዳኮ ማዾ ታ ሃጋኣ ኬኤዛንዳኔ።

18ጎሪፆ ናንጊና ናንጋ ጎዳ ታና ኮሺ ጎሬኔ፤

ጋዓንቴ ሃይቢም ዓኣሢ ታና ዒዚ ዒንጊባኣሴ።

19ፂሉሞኮ ካራ ታኣም ቡሉዋቴ4፤

ዬያና ጌሊ ታ ናንጊና ናንጋ ጎዳ ጋላታንዳኔ።

20ዬና ካሬላ ዒዛ ካራኬ፤

ፂሎ ዓሳ ዒዞና ጌላኔ።

21ዋይዚ ኔ ታኣም ማሄኔ፤

ታና ኔ ዓውሳሢ ማዔሢሮዋ ታ ኔና ጋላታኔ።

22ማኣሮ ሹጮና ማዣ ዓሳ ቶኦቼ ሹጫሢ

ማኣሮኮ ሄላሢ ማዔኔ። 5

23ዬያ ናንጊና ናንጋ ጎዳ ማዼኔ፤

ዬይ ኑ ዓኣፖም ዲቃሣያኬ። 6

24ናንጊና ናንጋ ጎዳ ማዤ ኬሌላ ሃኖኬ፤

ዬያሮ ኮሺ ኑ ዎዛዾም!

25ናንጊና ናንጋ ጎዳሢዮ! ሃዳራ ኑና ዓውሴ!

ናንጊና ናንጋ ጎዳሢዮ! ሃዳራ ኑኡም ጊኢጊሼ። 7

26ፆኦሲ ሱንፆና ሙካሢ ዓንጂንቴያኬ!

ናንጊና ናንጋ ጎዳ ማኣራፓ ኑ ዒንሢ ዓንጄኔ። 8

27ናንጊና ናንጋ ጎዳ ፆኦሲኬ፤

ፔኤኮ ፖዖ ዒ ኑ ዑፃ ፖዔኔ፤

ዒንሢ ቦንቾ ኬሎሮ ዔኪ ሙካ ባኮ

ዒንጊፆ ሺኢሾ ባኮኮ ጉራኖና ዓይሢ ቱኩዋቴ።

28ኔኤኒ ታኣኮ ፆኦሲኬ፥ ታ ኔና ጋላታኔ፤

ኔኤኒ ታኣኮ ፆኦሲኬ፥ ታ ኔና ዼግ ዼጊዳንዳኔ።

29ዒዚ ኮሺ ማዔሢሮ ዒዛ ጋላቱዋቴ!

ሚጪንቲፃ ዒዛኮ ናንጊና ዶዲ ናንጋያኬ።