ዒዮቤ ማፃኣፖ 21

ዒዮቤ

1ዒዮቤ ሂዚ ጌይ ማሄኔ፦

2«ሂንዳ ታኣኮ ጌኤዞ ኮሺ ዋይዙዋቴ፤

ዒንሢ ያዺዴቶ ታና ዒንሢ ዶዲሼያ ማዒ

ዒንሢም ፓይዲንታንዳኔ።

3ሂንዳ ታ ጌስታንዳጉዲ ፔቴና ቤሲ ታኣም ሃሹዋቴ፤

ዬካፓ ዒንሢ ኮዔሢጉዲ ቦሃኒ ዳንዳዓኔ።»

4«ታኣኒ ቆፃሢ ዓሲቱዋንቴ ፆኦሲኬ፤

ዓካሪ ሃሢ ጊቢ ዳንዳዒፆ ታኣኒ ሃሼቴ ዓይጌ ዓኣይ?

5ሂንዳ ታ ባንሢ ዛጉዋቴ፤

ጌስታኒ ዒንሢ ባሻንዳያ ሄላንዳኣና

ታኣኮ ጊታ ዒንሢኮ ዑስካ ጌላንዳኔ።

6ታ ማላዛታዖ ታና ዲቃሣኔ፤

ዑፆ ታኣኮ ዒጊቹሞና ጎጋይቂሳኔ። »

7«ፑርቶ ዓሶኮ ሌዓ ዖዶቂ፥ ቆላኣ ሚርጊ

ዓይጎሮ ዔያታ ሳዓ ናንጋይ?

8ዔያቶኮ ናኣቶና ናኣቶኮ ናኣቶና

ዲጪ ኮሺና ናንጋሢ ዓይጋ ዔያታ ዛጋይ?

9ፔቴታዖ ሂርጋባኣያ ኮሺና ዔያታ ናንጋኔ፤

ፆኦሲኮ ባይዛ ፑርቶ ባካ ዔያቶ ሄሊ ቤቂባኣሴ፤

10ባኣታ ዔያቶኮ ፔቴታዖ ሜታባኣያ ቆሊንታኔ፤

ዒንዶ ባኣታ ዔያቶኮ ዓጊሱዋዖ ሾዓኔ።

11ናኣቶ ዔያታ ፔኤኮ ማራይጉዲ ሄንቃኔ፤

ዓኣሎ ናኣታኣ ዔያቶኮ ማራናይጉዲ ፂካኔ።

12ካራቤ ዔያታ ባዒ ባዒ

ጎኦላኣ ዋርቂ ዋርቂ

ዲንኮዋ ዋርቂ ዎዛና ዔያታ ኮርጋኔ።

13ዔያታ ፔኤኮ ናንጎ ሌዖ ኮሹሞና ሃሣ ዎዛና ጋፒሳኔ፤

ዋኣዪሢባኣያ ሃያ ሳዖይዳፓ ሃይቢና ዔያታ ዱማዻኔ።»

14«ዬይ ያዺታንቴ ፆኦሲ ዔያታ፦

‹ኑ ኮይላፓ ሃኬ፤ ጎይፆዋ ኔኤኮ ኑ ዔራኒ ኮዑዋሴ› ጋዓኔ።

15ዬያጉዲ ሃሣ፦ ‹ኑ ዒዛ ካኣሽካንዳጉዲ

ቢያ ባኮ ዳንዳዓ ጎዳሢ ዒ ዖናዳይ?

ዒዛ ሺኢቂፃ ኑና ዓይጎ ማኣዳይ?› ጋዓኔ።

16ዬያ ዔያታ ጋዓሢ፦ ዔያቶኮ ኩጫ ዓኣ ቆላ ቢያ

ዔያቶ ላቢሢና ጴዼያ ዔያቶም ማላሢሮኬ፤

ታ ጋዓንቴ ፑርቶ ዓሶኮ ማሊፆ ዔካዓኬ።»

17«ጌኤዞ ጋሳ ፑርቶ ዓሶኮ ፖዒ ባይቂ ቤቂያ?

ሃሣ ባይዛ ባኣዚ ዔያቶይዳ ኬዲ ዔራ?

ፆኦሲ ዔያቶ ፔ ዻጎና ሜታሲ ቤቂያ?

18ዔያታ ጎቦጉዲ ዢባሬና ዔውቴ ዎዴ

ሲላሊጉዲ ዓልጎና ፒፂንቴ ዎዴ ዓኣ?»

19«ዒንሢ፦ ‹ፆኦሲ ዓዶንሢ ዻቢንቶሮ

ዔያቶኮ ናኣቶ ሜታሳኔ› ጋዓኔ፤

ሂንዳ ፆኦሲ ጎሞ ዓሶ ሆቲና ዔያቶ ሜታሶንጎ፤

ያዺ ማዔያታቴ ዻቢንቴያ ማዔሢ ዔያታ ዔራኒ ዳንዳዓኔ።

20ጎሞ ዓሳ ዔያታ ፔኤሮ ማዼ ዻቢንቶሮ

ሜቶ ዔያታ ዔኮንጎ፤

ቢያ ባኮ ዳንዳዓ ጎዳሢ ፔ ዻጎ ዔያቶይዳ ኬይሶንጎ፤

21ዓሲ ሃይቄስካፓ

ፔ ናኣቶ ዛሎ ዓይጎ ማላ ባኣዚ ዓኣይ?

22ፆኦሲ ዼኤፖ ዼኤፖ ዓሶይዳታዖ ዎዎጋኔ፤

ዓካሪ ዓሲ ዒዛ ዎጌ ዎጊሢ ዔራቶ ዔርዛኒ ዳንዳዓ?»

23«ፔቴ ፔቴ ዓሳ ናንጎ ጋፖ ሄላንዳኣና

ፔቴታዖ ሜታ ዔያቶ ሄሉዋንቴ ዶዲ፥ ሃሣ ኮሺ ማዒ

24ዑፃኣ ዔያቶኮ ዓንዲርቄ ጎይሣ ዓኣንቴ

ሜጌፃ ዔያቶኮ ሶሬና ኩሙሢ ዓኣ ጎይሣ ዓኣንቴ ሃይቃኔ።

25ዛላ ጋዓንቴ ዶዲ ዖዪሢ ዔያቶፓ ዱማዹዋንቴ

ሜቶና ቁራይኒንቴ ጎይሣ ኮሺ ባኣዚ ዴንቁዋዖ ሃይቃኔ።

26ቢያሢ ዱኡኪንታዖ ዓጪ ማዓኔ፤

ዛኣሌያ ዔያቶኮ ዑፆ ባይዛኔ።»

27«ሃሢ ታና ሜታሳኒ ማሊሢና

ዒንሢ ዒኖና ዒንሢ ማሌ ጌኖ ማሊፆ ታ ዔራኔ።

28ዒንሢ፦ ‹ዬያ ዼኤፖ ዓሢኮ ማኣራ ዎካ ዓኣይ?

ፑርቶ ዓሢኮ ናንጎ ቤዛ ዓንካዳይ?› ጋዓኔ።

29ጎይፆ ሃንታ ዓሶ ዒንሢ ዖኦጪባኣዓዳ?

ዔያታ ኬኤዜ ማርካቶ ዒንሢ ዔኩዋዓዳ?

30ዔያታ፦ ‹ባይዛ ባካ ሙካኣና ፑርቶ ዓሶ ሜታ ሄሉዋሴ፤

ፆኦሲኮ ዻጋ ፔጋዺ ጴዻ ዎዶና ዔያታ ቶቶላኔ› ጌዔኔ።

31ፑርቶ ዓሢ ፑርቶ ማዼሢ ዛሎ ‹ኔ ፑርታኬ›

ጋዓንዳሢ ዖናዳይ?

ዒዛኮ ፑርቶ ማዾሮ ዒዛይዳ ሜቶ ዖ ዓጋንዳይ?

32ዒ ሃይቄስካፓ ሌዛ ዒዛኮ ዱኡፖ ቤዞ ዔውታኔ፤

ዬካፓ ዱኡፓ ዒዛኮ ካፒንታኔ፤

33ዒዚ ዱኡኪንታኣና ዒዛ ዑፃ ማሆ ዓጫ ዒዛ ዴኤፃዓኬ፤

ዓሳ ዒዛኮ ጊንፆ ሙካንዳኔ፤

ሃሣ ኮሺ ሚርጌ ዴሬ ቤርታ ዒዛኮ ዓኣዻንዳኔ።»

34«ዓካሪ ዒንሢ ጉሪ ማዔ ሃይሴና

ዓይጋ ታና ዶዲሻኒ ኮዓይ?

ዒንሢ ታኣም ማሂ ኬኤዛ ባካ ቢያ ሉኡዚኬ።»