ପୁନାଦ୍ ଆର୍ର୍
ଲୁକ 1
ତିୟପିଲ୍ଦେ ସେଙ୍ଗେ
ଅ ତିୟପିଲ୍, ମାୟାଗ୍ ବାତ୍ ବାତ୍ ଆଦ୍ତେ, ଆଦିନାଦ୍ ଚିଟି ଲେକାନ୍ ସେଙ୍ଗେ ନାର୍ଗେ ନାରୁଡ଼୍ ପାର୍ତେ ଆସର୍ କିସୁଡ଼୍ତଡ଼୍ । ମୁନ୍ନେ କଞ୍ଚ୍ ଇଦ୍ ସାରେତିଙ୍କ୍ ଉଡ଼ିମାନ୍ଦାନ୍ ନାରୁଡ଼୍ ବେଲା ନେଲା କାବୁର୍ କେସ୍ମାତ୍ତଡ଼୍, ଆଦ୍ ଇସାବ୍ତେ ଇଦ୍ ଚିଟି ଲେକାଆସ୍ ମିନ୍ଦେ । ହୋ ବେଡ଼୍ୟନ୍ ତିୟପିଲ୍, ନାନ୍ ଆର୍କୁଲ୍ତେ ମୁନ୍ନେ କନ୍ସ୍ ଇଦ୍ସାରେ ଗଟ୍ ଏର୍କେ ମାଡ଼୍ତାନ୍, ଆଦିନ୍ ମାଇଦିଙ୍କ୍ ମି ସେଙ୍ଗେ ଇଦିନାଦ୍ ୱେରନ୍ ପୁନ୍ଦାନାଦ୍ ବିବରନୀ ଲେକାଙ୍କ୍ ଲେକେତ୍ ହେର୍କେ ମାଡ଼୍ତାନ୍ । ଇଦ୍ ବିଷୟତେ ମିଡ଼୍ ବେନ୍ ସାରେ ବିଷୟ୍ ପୁତ୍ତିଡ଼୍, ଆଦିନାଦ୍ ସାରେ ସତ୍ ବେଲା ପୁଞ୍ଜ୍ ପାର୍ଦ୍ତିଡ଼୍, ଆଦିନ୍ ମାଇଦିଙ୍କ୍ ନାନ୍ ଇଦ୍ ଲେକୁତାନ୍ ।
ବାପ୍ତିସ୍ମ ଯୋହନ୍ତାଦ୍ ଜନମ୍ତେ ମୁନେତ୍ ଗଟ୍
ଯିହୁଦା ଦେଶ୍ତେ ରାଜାଲ୍ ହେରୋଦତେ ସମୟ୍ତେ ଅବିୟତେ ମାନ୍ଦେତେ ନାନେ ଜିକରୀୟ ପେଦେର୍ତଣ୍ଡ୍ ୱେର୍ଣ୍ଡ୍ ଯାଜକ୍ ମାତ୍ତଣ୍ଡ୍; ଅନ୍ ମୁତ୍ତେ ହାରୋଣ ବଂଶତେ ପିକିଡ଼୍, ଆଦିନ୍ ପେଦେର୍ ଏଲୀଶାବେତ୍ । ଅଡ଼୍ ଇର୍ୱୁଡ୍ ଆସ୍ସ ପ୍ରବୁନାଦ୍ ଗଟ୍ ନୁ ପାଲନ୍ ଲେକାମ୍ ନିର୍ଦୋଷ୍ ଲେକାମ୍ କାମ୍ ମାଡ଼ି ପରମେଶ୍ୱର୍ ମୁନ୍ ଦାର୍ମିକ୍ ମାତ୍ତଡ୍ । ଅଡ଼୍କିଂଙ୍କ୍ ମାର୍ ମାୟାଡ଼୍ ଇଲ୍ୱେ ମାତ୍ତେ, ବାତେଙ୍କ୍ ଇତ୍କେ ଏଲୀଶାବେତ୍ ୱାଞ୍ଜଲ୍ ମାତ୍ତେ, ମେଣ୍ଡେ ଇର୍ୱିଡ଼ାଦ୍ ବିଷୟ୍ ନାର୍ଗେଆସ୍ ମାତ୍ତେ ।
ଜିକରୀୟ ତାମ୍ ମାନ୍ଦେତେ ପାଲି ହିସାପ୍ ତେ ପରମେଶ୍ୱର୍ତେ ମୁନ୍ନେ ଯାଜକ୍ ପାଡ଼ିୟି ମାଡ଼ମାନ୍ଦାନ୍ ଦିନାମ୍ତେ, ଯାଜକ୍ ପାଡ଼ିୟିଦେ ଲେକେତ୍ ଲେକାମ୍ତେ ଗୁଲିବାଣ୍ଟ ମାଡ଼୍ତାଙ୍କ୍ ଅଂକିଙ୍କ୍ ପ୍ରବୁନ୍ ମନ୍ଦିର୍ତେ ଲୋପେ ହସି ଦୂପାମ୍ ଇଦାଙ୍କ୍ ୱେୟ୍ତେ, ମେଣ୍ଡେ ଦୂପାମ୍ ଇଦାନ୍ ୱେଲେ ସାର୍ରେ ତୋଡ୍ ନାରୁଡ଼୍ ବାଇଦେ ପ୍ରାର୍ତନା ମାଡ଼ ମାତ୍ତଡ଼୍ ।
ଆସୁଣ୍ଟ୍ ପ୍ରବୁନାଦ୍ ୱେର୍ଣ୍ଡ୍ ଦୂତ ଦୂପାମ୍ ଇଦାନ୍ ବାକ୍ଡ଼େତେ ତିନ୍ଦେ କାଇଦେ ପାକ୍ ନିଶ୍ମିକା ଅଂକିଙ୍କ୍ ତନ୍ଦ୍ତଣ୍ଡ୍ । ଜିକରୀୟ ଅଂକିଙ୍କ୍ ଉଡ଼ି ଦାଦ୍ରେଲି ମିକା ୱେର୍ତଣ୍ଡ । ବାତେଙ୍କ୍ ଇତ୍କେ ଦୂତ ଅଂକିଙ୍କ୍ କେତ୍ତେ, ଜିକରୀୟ, “ୱେର୍ମା ବାତେଙ୍କ୍ ଇତ୍କେ ନିୟାଦ୍ ପ୍ରାର୍ତନା ସଦାପ୍ରବୁ କେଞ୍ଜ୍ତଣ୍ଡ୍, ମେଣ୍ଡେ ନି ମୁତ୍ତେ ଏଲୀଶାବେତ୍ ନି ମାଇଦିଙ୍କ୍ ୱେର୍ଣ୍ଡ୍ ମାର୍ ଜନମ୍ ମାଡ଼ିତା, ମେଣ୍ଡେ ନିମେ ଅନ୍ ପେଦେର୍ ଯୋହନ୍ ଇଦ୍ତିନ୍ । ଅଣ୍ଡ୍ ନିୱାଦ୍ କୁସି ନୁ ସାର୍ଦେତେ ବିଷୟ ଆଦ୍ ତଣ୍ଡ୍, ମେଣ୍ଡେ ନାର୍ଗେ ନାରୁଡ଼୍ ଅନ୍ ଜନମ୍ତେ ୱେଡ଼୍କିତଡ଼୍ । ଅଣ୍ଡ୍ ପ୍ରବୁନ୍ ମୁନ୍ନେ ମହାନ୍ ଆଦ୍ତୋଣ୍ଡ୍; ଅଣ୍ଡ୍ ଦ୍ରାକ୍ଷାରସ୍ କି ସୁରା ବେସୁଟ୍ ବା ହୁନଣ୍ଡ୍ ମେଣ୍ଡେ ୟାୟନ୍ ଡଙ୍କେତାଗ୍ ମିକା ପବିତ୍ର ଆତ୍ମାତେ ସାରେ ଆଦ୍ତେ ।
ଆସୁଣ୍ଟ୍ ଅଣ୍ଡ୍ ଇସ୍ରାଏଲ ନାରୁଡ଼୍ ଲୋପ୍ ନାର୍ଗେ ନାରୁଡ଼୍କିଙ୍କ୍ ପ୍ରବୁ ଅଡ଼୍ୱାଦ୍ ଇଶ୍ୱର୍ତେ ସେଙ୍ଗେ ମାଲ୍ପି ମାଡ଼ି ତାତିତଣ୍ଡ୍ । ୟାୟବାବାନ୍ ହୃଦୟ୍ ପିଲାନ୍ ସେଙ୍ଗେ ନୁ ପୁନ୍ୱେ ନାରୁଡ଼୍ ଦାର୍ମିକ୍ ନାରୁଡ଼୍ତେ ବୁଦ୍ତେ କାମ୍ ମାଡ଼ାନ୍ ସେଙ୍ଗେ ମାଲ୍ପାନଙ୍କ୍ ମେଣ୍ଡେ ପ୍ରବୁନ୍ ସେଙ୍ଗେ ସାଏତ୍ ଦଣ୍ଡଆତ୍ତେ ୱେରନ୍ ନାରୁଡ଼୍ମଣ୍ଡଲି ତିଆର୍ ମାଡ଼ାଙ୍କ୍ ଅଣ୍ଡ୍ ଏଲିୟତେ ଆତ୍ମା ନୁ ଶକ୍ତିତେ ଅନ୍ ମୁନ୍ନେ ତାକି ଆଦ୍ତନ୍ ।”
ଇଗେ ଜିକରୀୟ ଦୂତ ତିଙ୍କ୍ କେତ୍ତଣ୍ଡ୍, “ନାନ୍ ବେନ୍ ଚିହ୍ନେତେ ଇଦ୍ ପୁନ୍ତାନ୍ ? ବାତେଙ୍କ୍ ଇତ୍କେ ନାନ୍ ତ ମୁଇତାନ୍, ମେଣ୍ଡେ ନା ମୁତେନ୍ ବୟଷ୍ ଗାଟି ଆଦୁତେ ।”
ଦୂତ ଅଂକିଙ୍କ୍ କେତ୍ତେ, “ନାନ୍ ଗାବ୍ରିଏଲ୍, ନାନ୍ ପରମେଶ୍ୱର୍ ତେ ମୁନ୍ନେ ନିଶ୍ମାନ୍ଦାନ୍, ମେଣ୍ଡେ ନିକିଂଙ୍କ୍ କେତାଙ୍କ୍ ନୁ ଇଦ୍ ସୁସମାଚାର୍ କେଞ୍ଜ୍ପାଙ୍କ୍ ନାନ୍ ୱାସମିନ୍ଦେନ୍ । ଉଡ଼ାଟ୍, ଇଦ୍ ସାରେ ଗଟେମ୍ ହାଇୱା ଦିନ୍ ଯାକ ନିମେ କନ୍ଦାହାସ୍ ଗଟ୍ତ୍ରିୟ୍ ପାର୍ୱିନ୍, ନାୱାଦ୍ ବେନ୍ ସାରେ ବାକ୍ୟ କେତ୍ତାନ୍ ଆଦ୍ ଟିକ୍ ଦିନାମ୍ତେ ସାରେ ଆଦ୍ତେ, ଆଦ୍ ସାରେତିଙ୍କ୍ ନିମେ ବିଶ୍ୱାସ୍ ମାଡ଼୍ୱିନ୍ ।”
ଆଦ୍ ଦିନାମ୍ତେ ନାରୁଡ଼୍ ଜିକରୀୟଙ୍କ୍ କେପି ମାତ୍ତଡ଼୍, ମନ୍ଦିର୍ ତାଗ୍ ଅନ୍ୱାଦ୍ ଡେରି ଆତ୍ତାଙ୍କ୍ ଅଡ଼୍ ଦାଦ୍ରେଲ୍ତଡ଼୍ । ବାତେଙ୍କ୍ ଇତ୍କେ ଅଣ୍ଡ୍ ବାଇଦେୱାସ୍ ଅଡ଼୍କିଂଙ୍କ୍ ଗଟ୍ କେତାଙ୍କ୍ ପାର୍ୱଣ୍ଡ୍; ଇଗେ ଅଣ୍ଡ୍ ମନ୍ଦିର୍ତାଗ୍ ତନ୍ଦ୍ତଣ୍ଡ୍ ଇଞ୍ଜ ଆତ୍ତଣ୍ଡ୍ ଇଞ୍ଜ ଅଡ଼୍ ପୁତ୍ତଡ଼୍ । ମେଣ୍ଡେ ଅଣ୍ଡ୍ ଅଡ଼୍କିଂଙ୍କ୍ ଚିନ୍ନେ ମାଡ଼ାଙ୍କ୍ ପସ୍ପ୍ତଣ୍ଡ୍ ନୁ କନ୍ଦାଲ୍ ହାସ୍ ମାତ୍ତଣ୍ଡ୍ ।
ପେର୍କେ ଅନ୍ୱାଦ୍ ସେବାମାଡ଼ାନ୍ ଦିନାକ୍ ତେର୍ତାଙ୍କ୍, ଅଣ୍ଡ୍ ତାମ୍ ଲୋନ୍ ମାଲ୍ସ୍ ଆତ୍ତଣ୍ଡ୍ । ତାନ୍ ମୁତ୍ତେ ଏଲୀଶାବେତ୍ ଡଙ୍କେତ୍ ଆତ୍ତେ, ମେଣ୍ଡେ ଏଇଙ୍ଗ୍ ନେଲ୍ଞ୍ଜ୍ ହେଉନା ଇଦ୍ ବିଷୟ ବେନଙ୍କେ କେଲକଟ ମିଞ୍ଜିମାଞ୍ଜ୍ ମାତ୍ତା, ମେଣ୍ଡେ ଏଲୀଶାବେତ୍ କେତ୍ତା, “ନାରୁଡ଼୍ତେ ଲୋପେ ନା ଅପ୍ମାନ୍ ଦୁରାମ୍ ମାଡ଼ାନ୍ ସେଙ୍ଗେ ପ୍ରବୁ ଦାୟାମାଡ଼ି ନା ମାଇଦିଙ୍କ୍ ଇଲା ମାଡ଼ିମିନ୍ଦେଣ୍ଡ୍ ।”
ଜିସୁନ୍ ଜନମ୍ତେ ମୁନେତ୍ ନିୟମ୍
ଏଲୀଶାବେତ୍ ଡଙ୍କେତ୍ ଆଦ୍ତେ ଆରୁ ନେଲ୍ଞ୍ଜ୍ତେ ପେର୍କେ ଇଶ୍ୱରତାଦ୍ ଗାବ୍ରିଏଲ୍ ଦୂତ ଗାଲିଲୀତେ ନାଜରିତିୟ ପେଦେର୍ତେ ନଗର୍ତାଗ୍ ଅରଟ୍ ପିକିଡ଼୍ ଗାର୍ରେ ପ୍ରେରିତ୍ ଆତ୍ତେ; 1ଦାଉଦ୍ ବଂଶତେ ଯୋଷେପ୍ ପେଦେର୍ ତଣ୍ଡ୍ ୱେର୍ଣ୍ଡ୍ ନାରୁଡ଼୍ ତଡ଼୍ ଆଦିନାଦ୍ ବେନ୍ଆସ୍ ମାତ୍ତେ; ଆଦ୍ ପିକିଡ଼୍ ତେ ପେଦେର୍ ମରୀୟମ୍ । ଗାବ୍ରିଏଲ୍ ଦୂତ୍ ଆଦିନ୍ ଗାର୍ରେ ୱାସ୍ କେତ୍ତଣ୍ଡ୍, “ଆଗୋ ଅନୁଗ୍ରହପାତ୍ରୀ, ନିୟାଦ୍ ଲେକେତ୍ ହାୟି, ପ୍ରବୁ ନି ତଡ଼୍ ।”
ବାତେଙ୍କ୍ ଇତ୍କେ ଆଦ୍ ଇଦ୍ ବାକ୍ୟତେ ଗାଟି ଦାନ୍ଦେ ଆତ୍ତେ ନୁ ଇଦ୍ ବେସତ୍ କବର୍ ହିଞ୍ଜ ମାନ୍ ଦେ ହାଲ୍ସାନଙ୍କ୍ ପସ୍ପିତ୍ତେ । ଆସୁଣ୍ଟ୍ ଦୂତ ତାକିଂଙ୍କ୍ କେତ୍ତେ, “ଆଗୋ ମରୀୟମ୍, ‘ୱେର୍ମା,’ ବାତେଙ୍କ୍ ଇତ୍କେ ନିମେ ଇଶ୍ୱର୍ତାଦ୍ ଆର୍ଶିବାଦ୍ ହାସମିନ୍ଦେନି । 2ମେଣ୍ଡେ ଉଡ଼େ, ନିମେ ଡଙ୍କେତ୍ ଆସ୍ସ ୱେର୍ଣ୍ଡ୍ ମାର୍ ଜନମ୍ ମାଡ଼ିତି ନୁ ଅନ୍ ପେଦେର୍ ଜିସୁ ଇଦ୍ତିନ୍ । ଅଣ୍ଡ୍ ମହାନ୍ ଆଦ୍ତନ୍ ନୁ ସତ୍ଇଶ୍ୱର୍ତେ ମାର୍ ହିଞ୍ଜ ପୁନ୍ତଡ଼୍; ପ୍ରବୁ ଇଶ୍ୱର୍ ଅଂକିଙ୍କ୍ ତାମ୍ ଆନୀଦାଦିଡ଼୍ ଦାଉଦ୍ ତେ ରକମ୍ ରାଜାଲ୍ ମାଡ଼ିତନ୍ । ଅଣ୍ଡ୍ ଯାକୁବ୍ ବଂଶତାଗ୍ ଯୁଗ୍ଯୁଗ୍ ତିଙ୍କ୍ ଶାସନ୍ ମାଡ଼ିତନ୍, ମେଣ୍ଡେ ଅନ୍ ରାଜ୍ୟ ଶେଷ୍ ଆୟ୍ୟ !”
ବାତେଙ୍କ୍ ଇତ୍କେ ମରୀୟମ୍ ଦୂତ ତିଙ୍କ୍ କେତ୍ତେ, “ଇଦ୍ ବେଲା ଆଦ୍ ତେ ? ନାନ୍ ତ ବେନ୍ ମାନେଇ ତଡ଼୍ ଉଞ୍ଜନ୍ ।”
ଦୂତ ଆଦିଙ୍କ୍ କେତ୍ତେ, “ପବିତ୍ର ଆତ୍ମା ନି ପରୁ ଡିଗିତେ ନୁ ସତ୍ଇଶ୍ୱର୍ତେ ଶକ୍ତିତେ ନିକିଂଙ୍କ୍ ମିସିତେ, ନୁ ବେନ ଜନମ୍ ଆଦ୍ତଣ୍ଡ୍, ଅଣ୍ଡ୍ ପବିତ୍ର ନୁ ଇଶ୍ୱର୍ତେ ମାର୍ ହିଞ୍ଜ ନାରୁଡ଼୍ ପୁନ୍ତଡ୍ । ମେଣ୍ଡେ ଉଡେ, ମି ଆତ୍ମୀୟ ଏଲୀଶାବେତ୍ ମିକା ଡକ୍ରି ବୟଷ୍ ତେ ୱେର୍ଣ୍ଡ୍ ମାର୍ ଡଙ୍କେତ୍ ଆସ୍ସ ମିନ୍ଦେ । ବାଦିଙ୍କ୍ ୱାଞ୍ଜଲ୍ ହିଞ୍ଜ କେସ ମାତ୍ତଡ଼୍, ତାମ୍ୱାଦ୍ ଇଞ୍ଜେ ଆରୁ ନେଲଞ୍ଜ୍ ଆଦୁତ୍ତେ; ବାତେଙ୍କ୍ ଇତ୍କେ ଇଶ୍ୱର୍ତେ ପାୟୁର୍ କଞ୍ଜ୍ ପେଇତାନ୍ ବେନ୍ ବାକ୍ୟ ମିକା ଶକ୍ତିହୀନ ଆୟ ।”
ଇଗେତିଞ୍ଚ ମରୀୟମ୍ କେତ୍ତେ, “ଉଡେ ନାନ୍ ପ୍ରବୁନ୍ ଦାସୀ; ନିୱାଦ୍ ବାକ୍ୟ ଲେକାମ୍ ନାୟାଗେ ହାୟି ।” ତାନ୍ ପେର୍କେ ଦୂତ ଆଦିନାଗାଙ୍କ୍ ମାଲ୍ସ୍ ଆତ୍ତେ ।
ମରୀୟମ୍ ଏଲୀଶାବେତ୍ତେ ଗାର୍ରେ ଆତ୍ତେ
ଇଦ୍ ସମୟ୍ ତେ ମରୀୟମ୍ ତେଦି ଯିହୁଦା ଦେଶ୍ତେ ମେଟେତାଗ୍ ମାନ୍ଦାନ୍ ୱେରନ୍ ନଗର୍ତାଗ୍ ଆତ୍ତେ, ମେଣ୍ଡେ ଆଦ୍ ଜିକରୀୟତେ ଲୋନ୍ ହସି ଏଲୀଶାବେତ୍ ତିଙ୍କ୍ ନମସ୍କାର୍ ମାଡ଼୍ତେ । ମେଣ୍ଡେ ଆଦ୍ ମରୀୟମ୍ ତେ ନମସ୍କାର୍ କେଞ୍ଜ୍ତେ ସାଙ୍ଗେ ସାଙ୍ଗେ ବାବୁ ଏଲୀଶାବେତ୍ ଡଙ୍କେତ୍ ଲୋପେମାଞ୍ଜ୍ ହେନ୍ଦଣ୍ଡ୍, ମେଣ୍ଡେ ଏଲୀଶାବେତ୍ ପବିତ୍ର ଆତ୍ମାତେ ପୁରା ହାସ୍ ଗାଟି ଲେଙ୍ଗ୍ଦେ କେତ୍ତେ, “ନାଟାନ୍ ଲୋପ୍ ନିମେ ଦନ୍ୟ, ମେଣ୍ଡେ ଦନ୍ୟ ନି ଡଙ୍କେତ୍ କାୟେ ତିଙ୍କ୍ । ମେଣ୍ଡେ, ନା ପ୍ରବୁନ୍ ୟାୟ ଯେ ନା ଗାର୍ରେ ୱାଦ୍ତେ, ନାୱାଦ୍ ଇଦ୍ ସାଏତ୍ ବିଷୟ ବେଗେତିନ୍ସ୍ ଆତ୍ତେ ? ଇଦିନ୍ ସେଙ୍ଗେ ଉଡ଼େ, ନି ନମସ୍କାର୍ କେଞ୍ଜ୍ ତେ ପେର୍କେ ନା ଡଙ୍କେତ୍ ଲୋପେ ବାବୁ ସାର୍ଦେ ଆସ୍ ହେନ୍ଦ୍ ତଣ୍ଡ୍ । ପ୍ରବୁ ବାତେଏ କେତ୍ତଣ୍ଡ୍ ହାଉସାରେ ଅଣ୍ଡ୍ ସାରେ ମାଡ଼ିତନ୍ ଇଞ୍ଜ ନିମେ ବିଶ୍ୱାସ୍ ମାଡ଼୍ତାଙ୍କ୍ ନିମେ ଆର୍ଶିବାଦ୍ ହାତ୍ତି ।”
ମରୀୟମତେ ପ୍ରସଂଶା ପାଟେ
ତାନ୍ ପେର୍କେ ମରୀୟମ୍ କେତ୍ତେ,
“ନା ଜିୱେ ପ୍ରବୁନ୍ ପ୍ରସଂଶା ମାଡୁତେ,
ମେଣ୍ଡେ ନାୱାଦ୍ ଆତ୍ମା ନା ତ୍ରାଣକର୍ତ୍ତାଲ୍ ଇଶ୍ୱର୍ତାଗ୍ ସାର୍ଦେ ମାଡ଼ମିନ୍ଦେ;
ଆଦିନ୍ ସେଙ୍ଗେ ନାନ୍ ୱେରନ୍ ସୁଦୁର୍ ଦାସୀ ହାତ୍କେମିକା ଅଣ୍ଡ୍ ନାକିଂଙ୍କ୍ ହେର୍କା ମାଡ଼୍ତଣ୍ଡ୍, ଇଞ୍ଜେ ସାରେତଡ଼୍ ନାକିଂଙ୍କ୍ ୱେଡ଼୍କେ ନାରୁଡ଼୍ ଇଞ୍ଜ କେତିତଡ଼୍ ।
ମେଣ୍ଡେ ଉଡ଼ାଟ୍, ଯୁଗ୍ଯୁଗ୍ ମାନେଇ ସାର୍ରେତଡ୍ ନାକିଂଙ୍କ୍ ଦନ୍ୟ ହିଞ୍ଜ କେତିତଡ଼୍,
ବାତେଙ୍କ୍ ଇତ୍କେ ସାରେତିଙ୍କ୍ ଶକ୍ତିନଣ୍ଡ୍ ଇଶ୍ୱର, ଅଣ୍ଡ୍ ନା ସେଙ୍ଗେ ମହାନ୍ କାମ୍ ମାଡ଼୍ତଣ୍ଡ୍;
ଅନ୍ୱାଦ୍ ପେଦେର୍ ପବିତ୍ର,
ମେଣ୍ଡେ ଅଂକିଙ୍କ୍ ୱେର୍ତାନ୍ ନାରୁଡ଼୍ତେ ସେଙ୍ଗେ ଅନ୍ୱାଦ୍ ଦୟା ଯୁଗ୍ଯୁଗ୍ ମାନ୍ତା ।
ଅଣ୍ଡ୍ ତାନ୍ୱାଦ୍ କାଇତାଦ୍ ଶକ୍ତିତିଙ୍କ୍ କେତ୍ତଣ୍ଡ୍,
ଆଂକାର ମାଡ଼ମାନ୍ଦାନ୍ ନାରୁଡ଼୍କ୍ ତାମ୍ ହୃଦୟ୍ତେ ଆଲ୍ସାନାଦ୍ ୱେରେୱେରେ ମାଡ଼ିମିନ୍ଦେଣ୍ଡ୍,
ଅଣ୍ଡ୍ ଶକ୍ତିତଡ଼୍ ରାଜାଲଡ଼୍କ୍ ତାମ୍ ସିଂହାସନ୍ ତେ କଞ୍ଚ୍ ମଦଲ୍ ତାତ୍ତଣ୍ଡ୍ ନୁ
ଗରିବ୍ ନାରୁଡ଼୍କ୍ ପରୁ ତେହେତ୍ତଣ୍ଡ୍,
ଅଣ୍ଡ୍ କାର୍ୱିନ୍ ନାରୁଡ଼୍କ୍ ସାଏତ୍ ଜିନିଷ୍ ତେ ନିଇତ୍ତଣ୍ଡ୍,
ସାଉକାର୍ ନାରୁଡ଼୍କ୍ ଆସାମ୍ କାଇଦେ ରହସ୍ ମିନ୍ଦେଣ୍ଡ୍ ।
ମା ପିତୃପୁରୁଷତେ ସେଙ୍ଗେ କେତ୍ତାଦ୍ ଅନ୍ୱାଦ୍ ବାକ୍ୟଲେକାମ୍ ତେ ଅଣ୍ଡ୍ ଆବ୍ରାହାମ୍ ନୁ ତାନ୍ ମାର୍କିଡ୍ ସେଙ୍ଗେ,
ଯୁଗ୍ଯୁଗ୍ ଦୟା ହେର୍କା ମାଡ଼ାନ୍ ସେଙ୍ଗ୍ ଅବ୍ରାହାମ୍ ନୁ ତାନ୍ ଦାସ୍ ଇସ୍ରାଏଲ ତେ ଉପକାର୍ ମାଡ଼ତଣ୍ଡ୍ ।”
ମେଣ୍ଡେ, ମରୀୟମ୍ ତାନ୍ ତଡ଼୍ ମୁଣ୍ଡ୍ ନେଲଞ୍ଜ୍ ମାଞ୍ଜ୍ ତାମ୍ ଲୋନ୍ ମାଲ୍ସ୍ ଆତ୍ତେ ।
ବାପ୍ତିସ୍ମ ଯୋହନ୍ତେ ଜନମ୍
ପେର୍କେ ଏଲୀଶାବେତ୍ ତେ ସାୟେ ମାଡ଼ାନ୍ ଅଦାନ୍ଦିନାମ୍ ଦିନାମ୍ ହେୱତାଙ୍କ୍, ଆଦ୍ ୱେର୍ଣ୍ଡ୍ ମାର୍ ଜନମ୍ ମାଡ଼୍ତେ, ମେଣ୍ଡେ ପ୍ରବୁ ଯେ ତାନ୍ ମାଇଦିଙ୍କ୍ ଗାଟି ଦୟା ମାଡ଼୍ତଣ୍ଡ୍, ଇଦ୍ କେଞ୍ଜି ତାମ୍ ଗାରେତଡ଼୍ ନୁ ଲୋତେନଡ୍ ତାନ୍ ତୋଡ୍ କାଇଲି ସାର୍ଦେ ମାଡ଼୍ତଡ଼୍ ।
ଆଟ୍ ଦିନାତିଙ୍କ୍ ଅଡ଼୍ ବାବୁଙ୍କ୍ ହେକ୍ ମାଡ଼ାଙ୍କ୍3 ୱାତତୋଡ୍ ନୁ ତାମ୍ ବାବାନ୍ ପେଦେର୍ ଲେକାମ୍ ଅନ୍ ପେଦେର୍ ଜିକରୀୟ ହିଦାଙ୍କ୍ ଇଚ୍ଛା ମାଡ଼୍ତଡ଼୍ । ବାତେଙ୍କ୍ ଇତ୍କେ ତାମ୍ ୟାୟ କେତ୍ତେ, “ଇଲ୍ଲେ, ଅନ୍ ପେଦେର୍ ଯୋହନ୍ ଆଦ୍ ତେ ।”
ଅଡ଼୍ ତାକିଂଙ୍କ୍ କେତ୍ତଡ଼୍, “ମି ଆତ୍ମାତେ ନାରୁଡ଼୍ ଲୋପ୍ ତ ବେନନାଦ୍ ଇସତ୍ ପେଦେର୍ ଇଲ୍ଲେ ।” ଇଗେ ଅଂକିଙ୍କ୍ ବାତ୍ ପେଦେର୍ ହିଦାନାଦ୍ ହିଞ୍ଜ ତାମ୍ ବାବାଲ୍ ଇଚ୍ଛା ମାଡ଼ୁତଣ୍ଡ୍, ଆଦ୍ ଅଡ଼୍ ଅଂକିଙ୍କ୍ ଚିନ୍ନେ ମାଡ଼ି ପଚାର୍ ମାଡ଼୍ତଡ଼୍ ।
ଆଗେ ଆଦ୍ ୱେରନ୍ ଲେକ୍ତଦ୍ ଇଦ୍ ଲେକାମ୍ ଲେକ୍ତଣ୍ଡ୍, “ଅନ୍ ପେଦେର୍ ଯୋହନ୍ ।” ଇଗେ ସାର୍ରେ ତୋଡ୍ ଦାଦ୍ରେଲ୍ତଡ଼୍ । ମେଣ୍ଡେ, ସେନେକ୍ ତିଙ୍କ୍ ତାନ୍ ପାୟୁର୍ ନୁ ୱାଞ୍ଜେର୍ ଟେଣ୍ଡି ଆତ୍ତେ ନୁ ମେଣ୍ଡନ୍ଦାମ୍ ଅଣ୍ଡ୍ ଗଟ୍ତିର୍ୟି ପରମେଶ୍ୱର୍ ତେ ପ୍ରସଂଶା ମାଡ଼ାଙ୍କ୍ ପସ୍ପିତ୍ତଣ୍ଡ୍ । ଇଗେ ତାମ୍ ଗାର୍ରେତଡ଼୍ ସାରେ ୱେର୍ତଡ୍, ମେଣ୍ଡେ ଇଦ୍ ସାରେ ଗଟ୍ ଯିହୁଦା ଦେଶ୍ ତେ ମେଣ୍ଡନ୍ ଅଞ୍ଚଲତ୍ ସାରେ ପାକେତ୍ ନାରୁଡ଼୍ ତିରିୟା ତିରିୟି ଆତ୍ତଡ଼୍, ମେଣ୍ଡେ କେଞ୍ଜାନ୍ ନାରୁଡ଼୍ ସାରେତଡ଼୍ ଆଦ୍ ସାରେ ନିଜ୍ନିଜ୍ ହୃଦୟ୍ତାଗ୍ ନେଏସ୍ କେତ୍ତଡ଼୍, “ଇ ବାବୁ ଆଲାତ୍କେ ବାତ୍ ଆଦ୍ତଣ୍ଡ୍ ? ବାତେଙ୍କ୍ ଇତ୍କେ ପ୍ରବୁନ୍ କାୟ୍ ଅନ୍ତଡ଼୍ ମିନ୍ଦେ ।”
ଜିକରୀୟତେ ବାବବାନି
ମେଣ୍ଡେ, ତାମ୍ ବାବାଲ୍ ଜିକରୀୟ ପବିତ୍ର ଆତ୍ମାତେ ପୁରା ଆସ୍ ଇଦ୍ ବାବବାନି କେତ୍ତଣ୍ଡ୍,
“ଇସ୍ରାଏଲ୍ ତେ ଇଶ୍ୱର୍ତାଦ୍ ପ୍ରସଂଶା ଆୟି,
ବାତେଙ୍କ୍ ଇତ୍କେ ଅଣ୍ଡ୍ ଦାୟାମାଡ଼ି ତାମ୍ ନାରୁଡ଼୍କ୍ ତେ ସେଙ୍ଗ୍ ମୁକ୍ତି ତିଆର୍ ମାଡ଼ିମିନ୍ଦେଣ୍ଡ୍;
ଅଣ୍ଡ୍ ତାମ୍ ଦାସ୍ ଦାଉଦ୍ ତେ ବଂଶତ୍ ୱେର୍ଣ୍ଡ୍ ଶକ୍ତିନଡ଼୍ ପରିତ୍ରାଣ୍କର୍ତ୍ତାଙ୍କ୍ ମା ସେଙ୍ଗ୍ ରହ୍ତଣ୍ଡ୍
ପୁରାକାଲ୍ଦେ କଞ୍ଜ୍ ତାମ୍ ପବିତ୍ର ବାବବାଦୀ ନାରୁଡ଼୍ ତେ ପାୟୁର୍ ତଡ଼୍ ବେଦ୍ ପୁଟୁଙ୍କ୍ କେସ୍ ମାତ୍ତଡ଼୍,
ଆଦ୍ ରକମ୍ ମାନ୍ ଶତ୍ରୁଡ଼ାଗାଙ୍କ୍ ନୁ ମାନ୍ ସାରେ ପାସ୍କାନ୍ ନାରୁଡ଼୍ ତେ କାଇଦେକଞ୍ଜ୍ ପରିତ୍ରାଣ ତିଆର୍ ମାଡ଼ି ମିନ୍ଦେଡ଼୍,
ବେଲା କି ଅଣ୍ଡ୍ ମା ଆନିଦାଦିଡ଼୍ ସେଙ୍ଗେ ଦୟା ବ୍ୟବହାର୍ ମାଡ଼ିତନ୍, ନୁ ଅଡ଼୍ ସେଙ୍ଗେ ମାଡ଼ିମାନ୍ଦାନ୍ ନିଜର୍ ପବିତ୍ର ନିୟମ୍ ହେର୍କା ମାଡ଼ିତନ୍,
ମାନ୍ ବାବାଲ୍ ଅବ୍ରାହାମ୍ତେ ଗାର୍ରେ ବେନେ ଶପତ୍ ମାଡ଼ିମାତ୍ତଣ୍ଡ୍, ତାମ୍ଆଦ୍ ଆଦ୍ ପବିତ୍ର ନିୟମ୍ ହେର୍କା ମାଡ଼ିତନ୍ ।
ମାନାଡ଼୍ ମାନ୍ ଶତ୍ରୁଡ଼ାଗାଙ୍କ୍ ଉଦ୍ଦାର୍ ଆତ୍ତାଡ଼୍,
ବେଲା କି ମାନାଡ଼୍ ମାୟାଦ୍ ସାରେଜିୱୁଣ୍ଡ୍ ଅନ୍ ମୁନ୍ନେ ପବିତ୍ର ନୁ ଦାର୍ମିକ୍ ଆଦ୍ ପାର୍ଦ୍ତା ।
ହୋ ନା ମାର୍ ନିମେ ସାରେତିଙ୍କ୍ ପର ଇଶ୍ୱର୍ତେ ୱେର୍ଣ୍ଡ୍ ବାବବାଦୀ ଲେକାମ୍ ତିଆର୍ ଆଦ୍ତିଡ଼୍ । ନିମେ ପ୍ରବୁନ୍ ୱେର୍ଣ୍ଡ୍ ଅଗ୍ରଦୂତ ଲେକାମ୍ ଅନାଦ୍ ହାର୍ ତିଆର୍ ମାଡ଼ିତି ।
ପାପ୍ କ୍ଷମା ଆଦାନ୍ ତଡ଼୍ ଅଡ଼୍କିଂଙ୍କ୍ ଯେ ପରିତ୍ରାଣ ଦର୍କିତେ, ତାମ୍ ନାରୁଡ଼୍କ୍ ଇଦ୍ ଗଟ୍ କେତାଙ୍କ୍ ଆତ୍ତେ ।
ମାନ୍ ଇଶ୍ୱର୍ କୃପା ନୁ କୋମଲ ହୃଦୟ୍ ଅଣ୍ଡ୍ ମାନ୍ ସେଙ୍ଗେ ପରିତ୍ରାଣତେ ପଡ଼ଦ୍ ପେସ୍ପିତଣ୍ଡ୍ ।
ବେନଡ଼୍ ଡଲାନ୍ ଲେକାମ୍ ଇକାଡ଼୍ ନିଡ଼୍କେତାଗ୍ ବାଦ୍କିତଡ଼୍, ଅଡ଼୍କିଂଙ୍କ୍ ଶାନ୍ତି ହାର୍ ତେ ଆଦାନ୍ ସେଙ୍ଗେ ଅଣ୍ଡ୍ ସାରେତଡ଼୍ ପରୁ ସ୍ୱର୍ଗତେ ୱେସ୍ ମାଡ଼ିତନ୍ ।”
ମେଣ୍ଡେ, ବାବୁ ପେର୍ସି ଆତ୍ମାତେ ଶକ୍ତିତଣ୍ଡ୍ ଆଦାଙ୍କ୍ ପସ୍ପ୍ତଣ୍ଡ୍ ନୁ ଇସ୍ରାଏଲତେ ଗାର୍ରେ କେଲ୍ୱାଙ୍କ୍ ହାଇୱା ଯାକ୍ ଆଞ୍ଚିନା ମାତ୍ତଣ୍ଡ୍ ।
Source notes (3)
- Cross-reference ମାତିଉ ୧:୧୮.
- Cross-reference ମାତିଉ ୧:୨୧.
- Footnote ନାରୁଡ଼୍ ଡ଼ାଦ୍ ଲିଙ୍ଗତେ ମୁନେତ୍ ତଲ୍କା କଇଦାନଙ୍କ୍ ହେକ୍ କେତିତଡ଼୍
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.