ପୁନାଦ୍ ଆର୍ର୍
ଏବ୍ରୀ 5
ସାର୍ରେ ବେଡ଼୍ୟେ ପୁଜାରିଡ଼୍ ତାମ୍ ଜାତିନ୍ ନାରୁଡ଼ାଗାଙ୍କ୍ ଏଞ୍ଚିଆସ୍ ନିତିତଡ଼୍ । ଅଣ୍ଡ୍ ଅଡ଼୍ପାକାଙ୍କ୍ ପାପାମ୍ ମାୟି ଇଞ୍ଜ ପୁଜେ ଇଦ୍ତଣ୍ଡ୍ ନୁ ଦାନ୍ ଇସ୍ମାଞ୍ଜ୍ ଇଶ୍ୱରନ୍ ସେବା ମାଡ଼ିତଣ୍ଡ୍ । ଅଣ୍ଡ୍ ନିଜେ ନାର୍ଗେ ପ୍ରକାର୍ ଦଷ୍ ଦୁର୍ବଲ ତଡ଼୍ ନିଣ୍ଡିମାନ୍ଦାନ୍ ମାଇଦିଙ୍କ୍ ଦଷତୃଟି ମାଡ଼ମାନ୍ଦାନ୍ ମୁର୍କ ନାରୁଡ଼୍କ୍ ସାୟେ ଆଲ୍ସିତଣ୍ଡ୍ । ଆଦିନ୍ସେଙ୍ଗା ଆନ୍ୱେ ନାରୁଡ଼୍ ପାପାମ୍ତେ ମାଇଦିଙ୍କ୍ ବଲି ମାଡ଼ିତଣ୍ଡ୍; ଆଦ୍ ଆୟ, ଅଣ୍ଡ୍ ତାନ୍ ମାଡ଼୍ତେ ପାପାମ୍ତେ ମାଇଦିଙ୍କ୍ ମିକା ବଲି ଇଦାନଙ୍କ୍ ଆଦ୍ତେ । ବେନ ତାମ୍ ମାନ୍ତେ ବାଡ଼୍ୟେ ପୁଜାରି ଆୟେପାର୍ୱଡ଼୍, ହାରୋଣତିଙ୍କ୍ ବେଲା ପରମେଶ୍ୱର ନିତାକିତ୍ତଣ୍ଡ୍; ଅଣ୍ଡ୍ ପୁଜାରି ଆତ୍ତଣ୍ଡ୍ । ଆଦେଲେକାମ୍ ଜିସୁ ଗୌରବ୍ତେ ବେଡ଼୍ୟେ ପୁଜାରି ଆଦାନଙ୍କ୍ ଅଂକିଙ୍କ୍ ଏଞ୍ଚଣ୍ଡ୍; “ନିମା ନା ମାର୍, ନେଟ୍ତେନୁଞ୍ଚ୍ ନାନ୍ ନି ବାବାଲ୍ ଆତ୍ତାନ୍ ଇଞ୍ଜ ଇଶ୍ୱର ଅଂକିଙ୍କ୍ କେତ୍ତଣ୍ଡ୍ ।” “ନିମେ ପୁଜାରି ପଦ୍ତାଗ୍ ମଲ୍କିସେଦକ ଲେକେନ୍ ଉତ୍ତରାଦିକାରୀ ସାରେଦିନାତ୍ ପୁଜାରି ଆଦ୍ତିନ୍, ଇଞ୍ଜ ପରମେଶ୍ୱର କେତ୍ତଣ୍ଡ୍ ।” 1ବେନ୍ ଇଶ୍ୱର୍ ଅଙ୍କ୍ ଡଲାନାଗାଙ୍କ୍ ରକ୍ଷା ମାଡ଼େପାର୍ଦ୍ତଣ୍ଡ୍, ଅନ୍ ଗାରେ ଜିସୁ ପୁରା ଜିୱୁଣ୍ଡ୍ କେୟି କେୟି କାଣ୍ଡେଡ଼ି ରାପି ବିନତି ପ୍ରାର୍ତନା ମାଡ଼୍ତଣ୍ଡ୍ । ଅଣ୍ଡ୍ ନମ୍ର ନୁ ସାୟେ ଆସ୍ ମାନ୍ଦାନ୍ ମାଇଦିଙ୍କ୍, ଇଶ୍ୱର୍ ଅନ୍ ପ୍ରାର୍ତନା କେଞ୍ଜ୍ତଣ୍ଡ୍ । ଯଦି ଅଣ୍ଡ୍ ଇଶ୍ୱର୍ତେ ମାର୍ ଆତ୍କେ ଗାଲା, ଅଣ୍ଡ୍ ଦୁକାମ୍ କଷ୍ଟତଡ଼୍ ନିୟମ୍ ପାଲନ୍ ମାଡ଼ାନଙ୍କ୍ ନାଡ଼୍ସ୍ତଣ୍ଡ୍ । ଇଦ୍ରକମ୍ ଇଶ୍ୱର୍ ଅଂକିଙ୍କ୍ ୱେରଣ୍ଡ୍ ସିଦ୍ଦ ବେଡ଼୍ୟେ ପୁଜାରି ଇଞ୍ଜ ଯୋଗ୍ୟ ବିବେଚିତ୍ ମାଡ଼୍ତଣ୍ଡ୍, ଅଣ୍ଡ୍ ତାନ୍ ଗଟି କେଞ୍ଜାନ୍ ନାରୁଡ଼୍ ମାଇଦିଙ୍କ୍ ସାରେ ଦିନାମ୍ତେ ମାଇଦିଙ୍କ୍ ପରିତ୍ରାଣତେ ଗୁଦାମ୍ ଆତ୍ତଣ୍ଡ୍ । ମେଣ୍ଡେ ଅଙ୍କ୍ ମଲ୍କିସେଦକ ଲେକାମ୍ ଉତ୍ତରାଦିକାରୀ ବେଡ଼୍ୟେ ପୁଜାରି ଆତ୍ତଣ୍ଡ୍ ଇଞ୍ଜ ପରମେଶ୍ୱର ଅଙ୍କ୍ ଗୋଷଣା ମାଡ଼୍ତଣ୍ଡ୍ ।
ବିଶ୍ୱାସ୍ ଆରାମାଡ଼ାନାଦ୍ ପରିଣାମ୍
ଇଦ୍ ବିଷୟ୍ତେ ମାମ୍ ନାର୍ଗେ ଗଟି କେତାନଙ୍କ୍ ଇଚ୍ଛା ମାଡ଼ୁତମ୍, ଇତ୍କେ ମିକିଂଙ୍କ୍ ବୁଜାମାଡ଼ାନାଦ୍ କଷ୍ଟ ଆଦୁତ୍, ବାତେଙ୍କ୍ଇତ୍କେ ମିଡ଼୍ ଆତ୍ମିକ୍ ଜିୱୁଣ୍ଡ୍ ନୁ ମନ୍ତାଗ୍ ବୁଜେମ୍ ଆଦାନଙ୍କ୍ ଜାମ୍ ବୁଜେମ୍ ଆଦ୍ତିଡ଼୍ । 2ମିଡ଼୍ ଅର୍ତୁଙ୍କ୍ କାର୍ସ୍ପାନାଦ୍ ସମୟ ୱାତ୍ତେ, ଇସୁଟ୍ ଆୟ୍ନା ଇଶ୍ୱର୍ତେ ମୁନେନ୍ ନାଡ଼୍ସାନ୍ ଶିକ୍ଷା ସେଙ୍ଗେ ମେସ୍ତେରି ଦର୍କାର୍ ଆଦୁତେ । ମିଡ଼୍ ବେଡ଼୍ୟଡ଼୍ ତିନ୍ଦାନ୍ କାଦି ୱିଡ଼୍ସି ଇଞ୍ଜେକ୍ ଆନା ପିଲାନ୍ ଲେକାମ୍ ପାଲ୍ ଉନ୍ଦୂତିଡ଼୍ । ବେନ ଆସାମ୍ ପାଲ୍ ଉନ୍ତଣ୍ଡ୍, ଅଣ୍ଡ୍ ପିଲାତ୍ ଲେକେତ୍ ମାନ୍ତଣ୍ଡ୍, ଆଦିଙ୍କ୍ ଅଣ୍ଡ୍ ସାୟେ କି କାରାପ୍ ପୁନ୍ଦାନଙ୍କ୍ ବୁଦ୍ ଇଲ୍ଲା । ମେଣ୍ଡନ୍ରକମ୍ କଟିନ୍ କାଦି ବୟସ୍ତେ ନାରୁଡ଼୍ ସେଙ୍ଗେ; ଅଡ଼୍ ଜିୱୁଣ୍ଡ୍ତାଗ୍ ଚିନ୍ତେ ମାଡ଼ି ସାୟେ ନୁ କାରାପ୍ ପୁନ୍ଦାନଙ୍କ୍ ପାର୍ଦ୍ତଡ଼୍ ।
Source notes (2)
- Cross-reference ମାତିଉ ୨୬:3୬-୪୬; ମାର୍କ ୧୪:3୨-୪୨; ଲୁକ ୨୨:3୯-୪୬.
- Cross-reference ୧ କରନ୍ତିୟ 3:୨.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.