ପୁନାଦ୍ ଆର୍ର୍
ପ୍ରେରିତ 12
ଗାଟି ତାଡ଼ନା
ଇଦ୍ ସମୟ୍ତେ ରାଜାଲ୍ ହେରଦ୍ ମଣ୍ଡଲିତେ ବେସ୍କ୍ତୁଡ଼୍ ସବ୍ୟଡ଼୍କ୍ ଅତ୍ୟାଚାର୍ ମାଡ଼୍ତଣ୍ଡ୍ । ଅଣ୍ଡ୍ ବିଶ୍ୱାସୀ ଯୋହନ୍ତେ ତାମୁଣ୍ଡ୍ ଜାକୁବଙ୍କ୍ ଚୁର୍ତଡ଼୍ ନାରୁଡ଼୍କିଂଙ୍କ୍ କେସ୍ ଆୱୁକ୍ତଣ୍ଡ୍ । ଇହୁଦୀ ନାରୁଡ଼୍ ଇଦ୍ ଉଡ଼ି କୁସି ଆତ୍ତଡ଼୍ ମେଣ୍ଡେ ଅଣ୍ଡ୍ ପିତର୍ତିଙ୍କ୍ ମିକା ବନ୍ଦି ମାଡ଼୍ତଣ୍ଡ୍ । ଇଦ୍ ଗଟନା ସୋଡ଼ା ୱାଟ୍ୱାଦ୍ ରୋଟି ପାଣ୍ଡୁମ୍ ସମୟ୍ତେ ଆସ୍ମାତ୍ତେ । ପିତର୍ ବନ୍ଦି ଆସ୍ ଜଇଲ୍ତାଗ୍ ଆତ୍ତଣ୍ଡ୍ ନୁ ନାଲୁ ଜାନ୍ତିଙ୍କ୍ ଆସ୍ ତିଆର୍ ଆତ୍ତେ ନାଲୁ ମାନ୍ଦେ ସୈନିକ୍ ଅଂକିଙ୍କ୍ କେପିମାତ୍ତଡ଼୍ । ନିସ୍ତାର୍ ପାଣ୍ଡୁମ୍ତେ ପେର୍କେ ସାରେତଡ଼୍ ମୁନ୍ନେ ଅନାଦ୍ ବିଚାର୍ ମାଡ଼ାନଙ୍କ୍ ହେରଦନ୍ ଇଚ୍ଛା ମାତ୍ତେ । ପିତର୍ ଜଇଲ୍ତାଗ୍ ମାନ୍ଦାନ୍ ୱେଲେ ମଣ୍ଡଲିତ୍ ନାରୁଡ଼୍ ଅଣ୍ଡୟ୍ ମନ୍ତେ ଅନ୍ ସେଙ୍ଗେ ଇଶ୍ୱର୍ତିଙ୍କ୍ ପ୍ରାର୍ତନା ମାଡ଼ମାତ୍ତଡ଼୍ ।
ଜଇଲ୍ତାଗାଙ୍କ୍ ପିତର୍ ମୁକ୍ତି ଆତ୍ତଣ୍ଡ୍
ହେରଦ୍ ବେନ୍ ଦିନ୍ ପିତର୍ତିଙ୍କ୍ ବିଚାର୍ ମାଡ଼ାନଙ୍କ୍ ବାୟିଦେ ତାତାନଙ୍କ୍ ହାଲ୍ସି ମାତ୍ତଣ୍ଡ୍, ତାନ୍ ମୁନେତ୍ ନାର୍କେତ୍ ପିତର୍ ରେଣ୍ଡ୍ ଇକ୍ଲେମ୍ତେ ତଅସ୍ ଇର୍ୱୁଡ଼୍ ସୈନିକିନ୍ ନାଡ଼୍ମେ ପାଟିମାତ୍ତଣ୍ଡ୍ । ନାର୍ଗେ କେପାନଡ଼୍ ମାର୍ତାଗ୍ ମାଞ୍ଜ୍ ଜଇଲ୍ତିଙ୍କ୍ କେପି ମାତ୍ତଡ଼୍ । ହଟାତ୍ ପ୍ରବୁନାଦ୍ ୱେରଣ୍ଡ୍ ଦୂତ୍ ୱାସ୍ ନିତ୍ତଣ୍ଡ୍ ନୁ ଆଦ୍ ବାକ୍ଡ଼େ ୱେସ୍ ଆତ୍ତେ । ଦୂତ୍ ପିତର୍ତିଙ୍କ୍ ହାଟ୍ଜାବ୍ତିଙ୍କ୍ ଉହୁସ୍ ତେଏସ୍ କେତ୍ତଣ୍ଡ୍, “ସିଟ୍ପାଟ୍ ତେଏଦେ !” ସାଙ୍ଗେ ସାଙ୍ଗେ ପିତର୍ତିଙ୍କ୍ ତଅସ୍ମାତ୍ତେ ଇକ୍ଲେମ୍ କୁସି ରାୟ୍ତେ । ତାନ୍ପେର୍କେ ଦୂତ୍ କେତ୍ତଣ୍ଡ୍, “ଟିକିଡ଼୍ ତୁୱାଲ୍ ଉତ୍ତେ, ପିତା ହେର୍ପୁକ୍ କେର୍ମ୍ ।” ପିତର୍ ଆଲା ମାଡ଼୍ତଣ୍ଡ୍ ପେର୍କେ ଦୂତ୍ କେତ୍ତଣ୍ଡ୍, “ମେନ୍ଦୁଲ୍ତାଗ୍ ଡୁପଟ୍ ମୁସି ନା ତଡ଼୍ ୱାଡ଼େ ।” ଦୂତ୍ ବାତ୍ମାଡ଼ମାତ୍ତଣ୍ଡ୍ ଆଦ୍ ନିଜାତାଦ୍ କି ଆୟ୍ୟ, ପିତର୍ ପୁନ୍ଦାନଙ୍କ୍ ପାର୍ୱଣ୍ଡ୍ । ଅଣ୍ଡ୍ ସାପ୍ନା ଉଡ଼୍ତଣ୍ଡ୍ ଇଞ୍ଜ ହାଲ୍ସ୍ତଣ୍ଡ୍ । ମିକା ପିତର୍ ଜେଲ୍ତାଗାଙ୍କ୍ ପେଇସ୍ ଦୂତନ୍ ପେର୍କେପେର୍କେ ଆତ୍ତଣ୍ଡ୍ । ଅଡ଼୍ କେପାନଡ଼ାଦ୍ ରେଣ୍ଡ୍ ପଡ଼ିୟେ ପାର୍ ଆତ୍ତେ ପେର୍କେ ନାର୍ତାଗ୍ ହସାନାଗ୍ ମାନ୍ଦାନ୍ ଲୁହା ମାର୍ ବକେତ୍ ଆତ୍ତଡ଼୍ । ଅଡ଼୍ ସେଙ୍ଗେ ମାର୍ ତାନ୍ ମାନ୍ତେ କୁଲେମ୍ ଆତ୍ତେ ନୁ ଅଡ଼୍ ପେଇସ୍ ଆତ୍ତଡ଼୍ । ଅଡ଼୍ ହାର୍ଦାଗ୍ ଆଦାନ୍ ୱେଲେ ହଟାତ୍ ସ୍ୱର୍ଗ ଦୂତ ଅଂକିଙ୍କ୍ ୱିଡ଼୍ସି ଆତ୍ତଣ୍ଡ୍ ।
ତାନ୍ପେର୍କେ ବାତ୍ ଗଟେମ୍ ଆତ୍ତେ, ପିତର୍ ଆଦ୍ ପୁଞ୍ଜ୍ କେତ୍ତଣ୍ଡ୍, “ଇଦ୍ ନିଜାମ୍ ଇଞ୍ଜ ନାନ୍ ପୁନ୍ଦ୍ତାନ୍ । ହେରଦ୍ତାଗାଙ୍କ୍ ନୁ ଇହୁଦୀଡ଼ାଗାଙ୍କ୍ ବାତ୍ ଗଟେମ୍ ଆଦ୍ତେ ଇଞ୍ଜ ଆଶେ ମାଡ଼ିମାତ୍ତଡ଼୍, ଆଗାଙ୍କ୍ ନାକିଂଙ୍କ୍ ଉଦ୍ଦାର୍ ମାଡ଼ାନଙ୍କ୍ ପ୍ରବୁ ସ୍ୱର୍ଗ ଦୂତତିଙ୍କ୍ ରହତ୍ତଣ୍ଡ୍ ।”
ନିଜେତ୍ ପରିସ୍ଥିତି ବିଷୟ୍ତେ ହେର୍କେମାଡ଼ି ଅଣ୍ଡ୍ ଯୋହନ୍ ନୁ ମାର୍କନ୍ ୟାୟ୍ ମରୀୟମ୍ତେ ଲନ୍ ଆତ୍ତଣ୍ଡ୍ । ଆଗେ ନାର୍ଗେ ନାରୁଡ଼୍ ଅଣ୍ଡୟାଗେ ଗୁଡ଼ି ପ୍ରାର୍ତନା ମାଡ଼ମାତ୍ତଡ଼୍ । ପିତର୍ ବାୟିଦେ ମାର୍ତାଗ୍ ତାଲ୍ସ୍କ୍ତଣ୍ଡ୍, ରୋଦା ପେଦେର୍ତେ ଅଣ୍ଡୟ୍ କ୍ରୀତଦାସୀ କାପାଟ୍ ତେର୍ତାନଙ୍କ୍ ୱାତ୍ତେ । ପିତର୍ତେ ଲେଙ୍ଗ୍ ପୁଞ୍ଜ୍ ମିକା ଆଦ୍ ଇସର୍ ୱେଡ଼୍କେତେ ଆତ୍ତେ ଯେ ମାର୍ ତେର୍ୱକଟ ପିତର୍ ବାୟିଦେ ନିସ୍ ମିନ୍ଦେଣ୍ଡ୍ ଇଞ୍ଜ କେତ୍ତେ । ଅଡ଼୍ ଆଦିଙ୍କ୍ କେତ୍ତଡ଼୍, “ନିମ୍ ବାୟେ ଆତ୍ତି ।” ଇତ୍କେ “ଇଦ୍ ନିଜାମ୍,” ଇଞ୍ଜ ଆଦ୍ କେତ୍ତାଙ୍କ୍, ଅଡ଼୍ ହାଲ୍ସ୍ତଡ଼୍, “ଆଲେକେ ଇଦ୍ ଅନାଦ୍ ଦୂତ ।”
ପିତର୍ ସେନେମାନ୍ କାପାଟ୍ତିଙ୍କ୍ ତାଲ୍ସ୍କମାତ୍ତଣ୍ଡ୍ । ପେର୍କେ ଅଡ଼୍ କାପାଟ୍ ତେର୍ସ୍ ଅଂକିଙ୍କ୍ ଉଡ଼ି ଦାଦ୍ରେଲ୍ତଡ଼୍ । ଅଣ୍ଡ୍ କାୟ୍ ଉହୁସ୍ କଟମାନ୍ଦାନଙ୍କ୍ କେତ୍ତଣ୍ଡ୍ ନୁ ପ୍ରବୁ ବେଲା ଅଂକିଙ୍କ୍ ଜଇଲ୍ତାଗାଙ୍କ୍ ପେସ୍ପି ତାତ୍ତଣ୍ଡ୍, ଆଦ୍ ବିଷୟ୍ ଅଡ଼୍ ମୁନ୍ନେ କେତ୍ତଣ୍ଡ୍ । ତାନ୍ପେର୍କେ ଇୱୁସାରେ ଗଟି “ଯାକୁବ୍ ନୁ ବାଗାତ୍ ସାରେତଡ଼୍ ବିଶ୍ୱାସୀ ଦାଦାଲଡ଼୍ କେତାନଙ୍କ୍ ଗଟ୍ ଇସ୍,” ଅଣ୍ଡ୍ ଆଗାଙ୍କ୍ ମେଣ୍ଡେଅଣ୍ଡା ଆତ୍ତଣ୍ଡ୍ ।
ନାର୍କା ଆତ୍ତେ ୱେଲେ ପିତର୍ ବେକେ ଆତ୍ତଣ୍ଡ୍ ଇଞ୍ଜ କେପାନଡ଼୍ ଗାବ୍ରା ଆତ୍ତଡ଼୍ । ହେରଦ୍ ଅଂକିଙ୍କ୍ ମେହେକାନଙ୍କ୍ ଗଟ୍ ହିତ୍ତଣ୍ଡ୍, ବାତେଙ୍କ୍ଇତ୍କେ ଅଡ଼୍ ଅଂକିଙ୍କ୍ ଦର୍ସ୍କାଙ୍କ୍ ପାର୍ୱଡ଼୍ । ପେର୍କେ କେପାନଡ଼୍କିଙ୍କ୍ ପାଚ୍ରାମାଡ଼ି ଅଡ଼୍କିଂଙ୍କ୍ ଡଲାନ୍ଦଣ୍ଡ୍ ହିଦାନ୍ ସେଙ୍ଗେ ଗଟ୍ ହିତ୍ତଣ୍ଡ୍ । ତାନ୍ପେର୍କେ ହେରଦ୍ ଯିହୁଦା ପ୍ରଦେଶ୍ତାଗାଙ୍କ୍ ଆଞ୍ଜ୍ କାଇସରିଆତାଗ୍ ମାତ୍ତଣ୍ଡ୍ ।
ହେରଦ୍ ଡଲ୍ତଣ୍ଡ୍
ଆସୁଟେ ହେରଦ୍ ସୋର ନୁ ସିଦନ୍ତେ ନାରୁଡ଼୍ତେ ପର୍ର କପାମ୍ ଆସ୍ ମାତ୍ତଣ୍ଡ୍ । ଆଦିଙ୍କ୍ ଅଡ଼୍ ଲୋପେଙ୍କ୍ ୱେରଡ଼୍ ମାନ୍ଦେ ଅଂକିଙ୍କ୍ ଉଡ଼ାନଙ୍କ୍ ଆତ୍ତଡ଼୍ । ମୁନେନ୍ ଅଡ଼୍ ରାଜ୍ପ୍ରାସାଦ୍ ଦାୟିତ୍ୱତେ ମାନ୍ଦାନ୍ ବ୍ଲାଷ୍ଟସ୍ତିଙ୍କ୍ ବୁଜାମାଡ଼ି ଅନାଗାଙ୍କ୍ ସାହାଯ୍ୟ ପାଏମ୍ଆତ୍ତଡ଼୍ । ତାନ୍ପେର୍କେ ଅଡ଼୍ ହେରଦ୍ତେ ବକେତ୍ ଆଞ୍ଜ୍ ଶାନ୍ତି ତାଲ୍କ୍ତଡ଼୍, ବାତେଙ୍କ୍ଇତ୍କେ ହେରଦ୍ତେ ରାଜ୍ୟତାଗାଙ୍କ୍ ଅଡ଼୍ ଦେଶ୍ କାଦି ଆଞ୍ଜମାତ୍ତେ ।
ଟିକ୍ମାଡ଼୍ତେ ଦିନେ ହେରଦ୍ ରାଜାଲଡ଼୍ ଚକାସିଲେ କେର୍ତଣ୍ଡ୍ ନୁ ବିଚାର୍ ଲୋତ୍ତାଗ୍ କୁଦି ନାରୁଡ଼୍କିଂଙ୍କ୍ ୱେରଡ଼୍ ବାଷଣ ହିତ୍ତଣ୍ଡ୍ । ଅଡ଼୍ କିଡ଼୍କି କେତ୍ତଡ଼୍, “ଇଦ୍ ବେନ୍ ନାରୁନାଦ୍ ଆୟ୍ୟ, ମାତ୍ରମ୍ ୱେରଣ୍ଡ୍ ଇଶ୍ୱର୍ତେ ଲେଙ୍ଗ୍ !” ଆସୁଟେ ସାଙ୍ଗେ ସାଙ୍ଗେ ପ୍ରବୁନାଦ୍ ଦୂତ୍ ହେରୋଦତିଙ୍କ୍ ରେହେତ୍ତଣ୍ଡ୍, ବାତେଙ୍କ୍ଇତ୍କେ ଇଶ୍ୱର୍ତିଙ୍କ୍ ବେନ୍ ଗୌରବ୍ ହିଦାନ୍ମାତ୍ତେ ଅଣ୍ଡ୍ ଆଦ୍ ଇୱେମାତ୍ତଣ୍ଡ୍ । ପୁଡ଼୍ୟି ଡଲ୍ତେ ପୁଟୁଙ୍କ୍ ଅଣ୍ଡ୍ ଡଲ୍ତଣ୍ଡ୍ ।
ଇଦ୍ ସମୟ୍ତେ ଇଶ୍ୱର୍ତେ ବାକ୍ୟ ନାର୍ଗେ ଆସ୍ ଗାଟି ପ୍ରଚାର୍ ଆତ୍ତେ ।
ବର୍ଣ୍ଣବା ନୁ ଶାଉଲ୍ ଯିରୁଶାଲେମ୍ତାଗ୍ ସେବା ପାଡ଼୍ୟି ଶେଷ୍ମାଡ଼ି ଯୋହନ୍ ଇତ୍କେ ଓରଫ ମାର୍କଙ୍କ୍ ସାଙ୍ଗେ ଆସ୍ ଯିରୁଶାଲମ୍ତାଗାଙ୍କ୍ ମାଲ୍ତ୍ତଡ଼୍ ।
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.