BIBLE MUTAL
Oekyuk 34
Masrol Ke Acn Canaan
LEUM GOD El kaskas nu sel Moses ac fahk, “Sang oakwuk inge nu sin mwet Israel: Ke kowos ac utyak nu Canaan, facl se ma nga asot nu suwos, pa inge masrol nu ke acn lowos. Masrol ke layen eir ac som nwe ke yen mwesis Zin wi na masrol nu Edom. Siska kutulap pa mutawauk e ke layen eir ke Meoa Misa. Na ac fah kuhfla nu eir nu ke Innek In Utyak Nu Akrabbim, ac som sasla acn Zin na nwe ke sun eir in acn Kadesh Barnea. Na ac fah kuhfwak nu roto epang nu Hazar Addar ac fahla nwe Azmon, yen se ma ac kuhfla nu infahlfal nu ke masrol lun Egypt, ac safla ke Meoa Mediterranean.
“Masrol layen nu roto pa Meoa Mediterranean.
“Masrol layen nu epang uh ac fah suwosme Meoa Mediterranean nwe Fineol Hor ac ut we lac ke Innek In Utyak Nu Hamath, na sifil fahla nwe Zedad ac nu Ziphron, na fahla safla ke acn Hazar Enan.
“Masrol layen nu kutulap ac fah mutawauk Hazar Enan fahla nwe Shepham. Na ac fah oatui nu eir som nwe Harbel, kutulap in acn Ain, ac suwoslana nu infulan eol kutulap in Lulu Galilee, na fahla eir lac ke Infacl Jordan nwe ke Meoa Misa.
“Pa inge masrol akosr lun acn suwos uh.”
Na Moses el fahk nu sin mwet Israel, “Pa inge facl se su kowos ac eis ke susfa, ma LEUM GOD El sang nu sin sruf eu tafu lun Israel.12 Sruf lal Reuben ac sruf lal Gad ac tafu sruf lal Manasseh eis tari acn selos, kitakatelik fal nu ke lupan sou lalos, layen kutulap in Infacl Jordan, tulanang Jericho.”
Mwet Kol Su Ac Kitalik Acn Uh
LEUM GOD El fahk nu sel Moses, “Eleazar mwet to, ac Joshua wen natul Nun, fah kitalik acn uh nu sin mwet uh. Eis pac kais sie mwet kol ke kais sie sruf in kasrelos kitalik.” Pa inge mwet su LEUM GOD El sulela:
Sruf
Mwet Kol
Judah
Caleb, wen natul Jephunneh
Simeon
Shelumiel, wen natul Ammihud
Benjamin
Elidad, wen natul Chislon
Dan
Bukki, wen natul Jogli
Manasseh
Hanniel, wen natul Ephod
Ephraim
Kemuel, wen natul Shiphtan
Zebulun
Elizaphan, wen natul Parnach
Issachar
Paltiel, wen natul Azzan
Asher
Ahihud, wen natul Shelomi
Naphtali
Pedahel, wen natul Ammihud
Pa inge mwet ma LEUM GOD El srisrngiya in kitalik acn nu sin mwet Israel in facl Canaan.
Source notes (2)
- Cross-reference Oek 26:52–56
- Cross-reference 34:13–15; Jos 14:1–5
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.