কড়া অনুবাদ
কুলিজকুরাআ কামি 8
শৌল এনথাংরে ইনি স্তিফান রাঃআ গয়ঃজ রাঃআ নাতিনাং সায় তাহিলেনা। ইনা হুলাং যিরুশালেম শেহার মন্ডলী রাঃআ চেতাংরে কুঠিন সাসেৎ সাতাও এতহবেনা, ইনাতে কুলিচ কু বাগীকাতে এটা যতচ ইহুদিয়া মুলুক হেৎদ শমরিয়াতে ছিতিবিতিইনাকু।
ফিলিপরাঃআ উছান
ইনা হুলাং কথক ভক্ত হড় স্তিফানকে তপা কিয়াকু, হেৎদ ইনিরা নাতিরাং শোক সদর কেয়াকু। মেন্খান শৌল মন্ডলীকে নাশ নাতিনাং, অড়া অড়াতে বলকাতেন পাতিয়ান কড়া- কুড়ি কুকে সাবকাতে গহাড় গহাড়তে আউকাতে জিহালরে খড়া কাতে আটক কেৎকুয়ায়্।
শমরিয়ারে ফিলিপ রাঃআ উচ্ছান।
ইন্তং অকয় গোটা ছিতি বিতি লেনাকু, ইঙ্কূ ইনা যত জায়গারে বুগিনবার্তা উছান লাগায়নাকু। হেৎদ ফিলিপ শমরিয় রাঃআ মুর্ধুন শেহার সেন কাতেন হড়কুরাঃআ হান্ডে খ্রীষ্টকে উছান লাগায়নায়। হড়কু ফিলিপরাঃআ থুতি আয়ুম কেয়াকু হেৎদ ইনিরা যত হাহাড়া কামি নেলকেৎ তুকু মিৎ মনতে ইনি রাঃআ থুতি আয়ুম লাগায়নাকু। চিয়াচি বাড়িচ আত্মাতে নামাকান গাদা হড় কুরাঃআ তালা হাতেন ইঙ্কূ বঙ্গা আত্মাকু কিকিচ কাতে উডুঙ হিচেনাকু হেৎদ গাদা অসাড় হেৎদ লেংড়া হড়কু বুগিনাকু। ইনাতে ইনা নগররে কুঠিন রাস্কা হুইয়েনা।
পাইটকার শিমোন।
মেন্খান শিমোন নুতুমতে মিয়াৎ হড় তাহীনকেনায়, ইনি মাড়াঙ হাতেন ইনা নাগার রে যাদু দেখায়কেনায়, হেৎদ শমরিয় জাতি রিঙ্কূ হড়কুকে হায়কাট কেনকুয়ায়্য়, হেৎদ নিজেকে মিয়াৎ মারাং হড় মেন্তে উদুই সদর কেনায়, ইনিরা থুতি হুডিং মারাং যতচ আয়ুমেৎ কেনাকু, হেৎদ গামেৎ কেনাকু, নিই হড় ঈশ্বর রাঃআ ইনা দাড়ি, অকা মাপরাং নুতুমতে সারিয়াআ। হড়কু ইনিরা থুতি আয়ুমমেৎ কেনাকু, চিয়াচি ইনিদ গাদা হুলাং হাতেন ইঙ্কূ যাদু দেখাকাতেন হায়কাট কাতেন দঃহলাৎ কুয়ায়্য়। মেন্খান ফিলিপ ঈশ্বর রাঃআ মুলুক হেৎদ যীশু খ্রীষ্টরাঃআ নুতুম বুগিন বার্তা উছান কেয়ায় খানঃঅ ইঙ্কূ ইনিরা থুতিরে পাতিয়া আয়নাকু, হেৎদ কড়াহন হেৎদ কুড়িহনকু ডুবুলেনাকু। হেৎদ শিমোন নিজেহঅ পাতিয়াআয়নায়, হেৎদ ডুবুলেনতে ফিলিপ লঅগে তাহিনায়, হেৎদ হাহাড়া হেৎদ দাড়িয়ান কামী নেলকাতেন হায়কাটেনায়।
শমরিয় রে রিলামালা আত্মা কেকু আতাং কিয়া
যিরুশালেম শেহার রিঙ্কূ কুলিচ কু চিন্তং আয়ুমকেয়াকু যে শমরিয়কু ঈশ্বর রাঃআ জাগার আতাং তাঃআকু, ইন্তং ইঙ্কূ পিতর হেৎদ যোহন তিকিনকে ইঙ্কূয়া হান্ডে কুলকেৎ কিনাকু। চিন্তং ইঙ্কিন হিচেনাকিন, ইঙ্কূ শমরিয়া রিঙ্কূ পাতিয়ান হড় নাতিনাং বিন্তি কেয়াকু, যাতে ইঙ্কূ রীলামালা আত্মা নামেকাআকু। চিয়াচি ইন্তং যাকিৎ ইঙ্কূ রীলামালা আত্মা কাকু নামতাৎ আ, ইঙ্কূ একেন প্রভু যীশু রাঃআ নুতুমতে ডুবুলাকানাকু। ইন্তং ইঙ্কিন পিতর, যহন ইঙ্কূয়া চেতাংরে তিহি দহঃঅ কেয়াকিন, হেৎদ ইঙ্কূ রীলামালা আত্মা নামকেয়াকু। হেৎদ শিমোন চিন্তং নেলকেয়ায়, কুলিচ কুরাঃআ তিহি দহঃঅকাতে (তিহি এমকাতে) রীলামালা আত্মা নামতানা, ইন্তং ইনি ইঙ্কিনা হান্ডে কাউডি আউকাতে গামকেৎ কিনায়, ইঞকেহঅ নিয়া দাড়ি এমাইঞবেন, যাতে ইঞ অকয়রাঃআ চেতাংরে তিহি দহঃঅ আইঞ, ইনিহঅ রীলামালা আত্মা নামেকাআয়। মেন্খান পিতর ইনিকে গামকিয়ায়, আমা রুপা আম লঅ নষ্টকাআ, চিয়াচি ঈশ্বর রাঃআ দান আম কাউডি দিয়া কিরিং সানাকেৎ মেয়া (দুরাং মালা . 78:37) নিয়া বাবত রে আমা যাহানাহঅ হাক বাআয়না, চিয়াচি আমা অন্তর ঈশ্বর রাঃআ মেদরে বেশ ল্হয়। এন্তে আমা নিয়া বাড়িচ হাতেন মন রুয়াড়এম, হেৎদ প্রভু রাঃআ হান্ডে বিন্তিম, তাহলে হুইদাড়িয়া, আমা অন্তররাঃআ কাই ছেমা হুইদাড়িয়া। চিয়াচি আলিঞ নেলকেয়ালিঞ, আমা হান্ডে হিংসা মেনা হেৎদ আম কাইতে আটক া কানাম (বারগাম দ্বিতীয় বিবরণী . 29:18, বিলাপ ) ইন্তং শিমোন গামকেৎ কিনায়, আবেনগে ইঞা নাতিরাং প্রভু রাঃআ হান্ডে বিন্তিবেন, যাতে আবেন যাহানা গামেয়াবেন ইনা যেন ইঞ লঅ আল হয়ু কআ। তায়মতে ইঙ্কিন লুকুন্দী এমকেয়াকিন হেৎদ প্রভু রাঃআ বাবদতে অটঃহঅ গাদা থুতি গামকেয়াকিন হেৎদ যিরুশালেম শেহার রে সেনঃঅ হুলাং ইঙ্কিন শমরিয়কুরাঃআ হাতু হাতুতে বুগিন বার্তা উছান কেয়াকিন।
ফিলিপ হেৎদ ইথিয়পিয়রে আইদারী।
তায়মতে প্রভু রাঃআ মিয়াৎ সরগ নাঙ্গা ফিলিপকে গামাকিয়ায়, জজম তিহিদর, অকা হরাটা যিরুশালেম শেহার হাতেন ঘসা নাগার রাঃআ হান্তে আড়গু ইদিয়াকানা, এন্তে সেনম। ইনাতে ইনি সেসেন এহবকেয়ায় হেৎদ, ইথিয়পিয় দিশুম রিনিজ মিয়াৎ হড় লঅ ইনিরা দেখা হুইয়েনা, অকয় ইথিয়পিয় রিনিজ কান্দাকি রাপনীরাঃআ রাজত্বরাঃআ অধীনরে বাহালাকান চেতাং পদরিনিজ মিয়াৎ মায়ো, অকয় রাপনীরাঃআ মারাং খাজাঞ্জি তাহীন কেনায়, ইনি নেহর বিন্তি নাতিনাং যিরুশালেম শেহার তে হিচ লেনায়, হেৎদ রুয়াড় সেনঃঅ হুলাং, রাথরে দুবকাতে যিশাইয় ভাবি জাগারিজ রাঃআ পুথি পড়হাকেনায়। ইন্তং রীলামালা আত্মা ফিলিপকে গামকিয়ায়, আম ইনি হড়রাঃআ রথরাঃআ সঙ্গে সঙ্গে সেনম। ইনাতে ফিলিপ রাথরাঃআ সাথ হাতাকেয়ায় হেৎদ আয়ুমকেয়ায়, ইনি হড় যিশাইয় ভাবি জাগারিজ রাঃআ পুথি পড়হাকেনায়, ফিলিপ গামকেয়ায়, আম কিনা পড়হাতানাম, ইনা বাবত কুকি আটকার নামদাড়িতানাম? ইথিয়পীয় রেনিচ মায়ো গামকেয়ায়, যাহায় কাকু দেঙ্গা লিঞখান, ইঞ চিল্কাতে বুঝা দাড়িয়াইঞ? ইন্তং ইনি মায়ো ফিলিপকে আয়া রাথতে হিচু হেৎদ আয়চলঅ দুবতে নেহর কিয়ায়। ইনি শাস্ত্ররাঃআ অকা অংশটা পড়হাকেনায়, ইনা হুইওতানা, যেমন ভিডি বলিদান করা নাতিনাং ইদি হুইওয়া, এনকা ইনিহঅ বলিনায় হেৎদ উব কাটরপ/ছাডাকুরাঃআ হান্ডে ভিডি চিল্কা থির তাহিনায়, এনকাগে ইনিহঅ থির তাহিনায়। ইনিরা হীনাবস্তারে/হেরেশমেনরে (অসহায়রে) ইনিকে দরবার কিয়াকু, ইনি রাঃআ সমানিজ হড়কুরাঃআ বর্ণনা অকয় করাঃআ দাড়িয়াকু? চিয়াচি ইনি রাঃআ জিউ ধার্তি হাতেন হাতা হুইয়েনা1 মায়ো খাজাঞ্জি ফিলিপ কে কুলিকিয়ায় হেৎদ নেহর লঅ সারি নানামেনায়, ভাবি জাগারিজ অকয় রাঃআ বাবদতে নিয়া থুতি গামতাৎআয় ? নিজেরাঃআ বাবত তে চি এটা যাহায়রাঃআ বাবত তে? ইন্তং ফিলিপ শাস্ত্ররাঃআ অংশ হাতেন এহবকাতে, প্রভু যীশু রাঃআ বুগিন বার্তা ইনিকে গামসাডিকিয়ায়। হেৎদ ইঙ্কিন হরাতে সেন সেনতে মিয়াৎ গাডিয়া রাঃআ কাতাতে সেটেরেনাকিন, ইন্তং মায়ো ফিলিপকে গামকিয়ায়, নেএ নেলেম, দাঃআ মেনা, ডুবুল হাতাতে ইঞা বাধা কদেরে? তায়মতে ইনি রাথ তিঙ্গু নাতিনাং হুকুমকিয়ায়, ফিলিপ হেৎদ ইনি বারহড়গে দাঃআরে আড়গুইনাকিন হেৎদ ফিলিপ ইনিকে ডুবুল এমাকিয়ায়। ইঙ্কিন চিন্তং দাঃআ হাতেন রাকাববেনাকিন, প্রভু রাঃআ আত্মা ফিলিপকে আচ্কাগে ইদিকাতেন সেনেনায় হেৎদ মায়ো অটদ ইনিকে কায় নেলনাম দাড়িলিয়ায়, মেন্খান রাসকাতে ইনি রাঃআ অড়া সেনেনায়। নাতেরে ফিলিপকে আসদোদ নাগাররে নেলনামেনায়, হেৎদ ইনি নাগার নাগাররে বুগিন বার্তা উছান উচ্ছান করকৈসরিয়া শেহার শহরতে সেটেরেনায়।
Source notes (1)
- Cross-reference জিসাই 53:7-8
কড়া অনুবাদ. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.