কুলিজকুরাআ কামি 27

পৌলরাঃআ রোম শেহার রে সেনঃঅ হেৎদ বুগিনবার্তা পাস্না।

1চিন্তং ফায়সালা হাতা হুইয়েনা আলে জাহাজতে ইতালিয়া দিসুম সেনালে, ইন্তং পৌল হেৎদ এটা কথক আটকান হড় আগস্তীয় পাল্টন রিনিজ পাল্টন যুলিয় নুতুমান গম্কে জুলু পতি রাঃআ তিহিরে সম্পায়নালে।

2হেৎদ আলে আদ্রামুত্তীয় শেহার হাতেন জাহাজ রে দেজেন্তেলে সেনেএনা, অকা জাহাজটা এশিয়া মুলুক রাঃআ উপকূল রাঃআ যত ঘাটতে সেনা। মাকিদনিয়া রাঃআ থিষলনীকী রিনিজ অদিবাসী আরিষ্টার্খ আলে লঅ তাহিন কেনায়।

3হেৎদ দশার হুলাং আলে সীদোন শেহার তেলে সেটেরেনা, কদেরে যুলিয় পৌলেরকে সম্মান লঅ ইনিকে গাতিকুরা হান্ডে ইদিকিদতে খাতির এমঅ নাতিনাং অনুমুতি এমকেৎ কুয়ায়।

4হেৎদ এনথাং হাতেন জাহাজ লাড়াকাতে সামাং দর হোয়অ কেদ খানয় আলে কুপ্র ঢিপ রাঃআ দানাং দানাংতেলে সেনেএনা।

5হেৎদ কিলিকিয়া হেৎদ পামফুলিয়া টলা রাঃআ সামাং দররাঃআ দরেয়া পারমকেৎতেলে লুকিয়া তালুক রাঃআ মুরা শেহার তেলে সেটেরেনা।

6হেৎদ পাল্টন কুরাঃআ গমকে এনথাং হাতেন ইতালিয়াতে সেনকেনায় মিয়াদ আলেকজান্দ্রীয় জাহাজ নেলনামকাতে আলেকে ইনা জাহাজরে দেচকেৎ লেয়ায়।

7হেৎদ গাদা মাহা বাই বাইতে জাহাজটা সেনেএন্তে কুঠিন কষ্টেতে ক্লীদ শেহারতে সেটেরেনা, হোয়অ রাঃআ দেঙ্গা কা নামকেদতে মাড়াঙ কাদাড়িলাদআয় খানঅ আলে সলমোনি রাঃআ মাড়াঙ হরকাতে ক্রীতী ঢিপ রাঃআ অছাড় হরকাতে সেনেনা।

8হেৎদ আলে সাশাতি-তে ইনা পারমে তানলো আলে বুগিন ঘাট নুতুমান মিয়াৎ তাহীনথাং তেলে সেটেরে না। ইনা ঠাইন রে লাসেয়া শেহার মেনা।

পৌল রাঃআ পরামর্শ

9হেৎদ গাদা মাহা হুইয়েন রে হেৎদ ইহুদি কুরাঃআ বার পরব পারমলেনা হেৎদ দাআ হরাতে সেসেন বর আন হুইওতান তাহি কেনা, ইনা মেন্তে পৌল ইঙ্কূ পরামর্শকেৎ কুতে গামাৎ কুয়ায়্য়য়,

10এ হাগাকু ইঞ নেলনামে তানাইঞ যে, নিয়া দাআ তে সেসেন রে গাদা বিপদ হেৎদ ক্ষতি হুইয়া, ইনা একেন জিনিসপত্র হেৎদ জাহাজরা লহয়, আবুয়াহঅ গজয়াবু।

11মেন্খান জুলুপতি পৌলরাঃআ থুতি কা লুতুর কাতে ক্যাপ্টেন হেৎদ জাহাজ মালিক রাঃআ থুতিরে ডের মন এম কেয়ায়।

12হেৎদ ইনা থাং রাবাং মাহা তাহি নাতিন গটা কা তাহি কান রে এনথাং হাতেন সেন কু তে হুই দাড়িয়া রেদ ফৈনীকা শেহার রে রাবাং মাহা তাহি কেনা মেন্তে ঢের লেকা কু গাম কেয়া, ইনা ক্রীতীঢিপ রাঃআ মিয়াৎ বন্দর তানা, নিয়া উত্তরপশ্চিম হেৎদ দক্ষিণপশ্চিম দর নিজোতানা। 13হেৎদ দক্ষিণ হোও বাই বাই তে হয়ওয় তান রে ইঙ্কূ আবুয়া মনে লেকা হুইয়া মেন্তে কু সারি কেৎতে লাঙ্গার কু রাকাব কেয়া হেৎদ ক্রীতী ঘাট তেকু সেনে য়ানা।

14মেন্খান হুডিং মাহা তায়ম তে ঘুরব্যান্ডূ (উরাকুলো আইলা) নুতুমান হয়ও জাহাজ এ টঅ কেয়ায়।

15জাহাজ ইনা হয়ও তে ঠেলা ইদিয়েন তে হেৎদ ইনা কা টঅ দাড়িআদ তে আলে সেন তকা কেয়াহেৎদ লে বুহাল ইদিয়া না।

16হেৎদ কৌদা নুতুমান মিয়াৎ হুডিং ঢিপ রা দানাং রে বুহালো তানালে গাদা কষ্ট তে লাউকা লেরে রাকাব দাড়িয়াদালে।

17ইনা রাকাব কেৎ তে ইঙ্কূ রুখিয়া নাতিন তে জাহাজ কু আটক ঘুরা কেয়া হেৎদ সুতি নুতুমান চরাবালি রে নুর বরতে ইঙ্কূ জাহাজ নোঙ্গর কু আড়গু কেয়া।

18হেৎদ আলে গাদা বিরঝড় রে হবু ডাবুন খান ইঙ্কূ দশার হুলাং জিনিষকু দাআরে লেবদা গিডি কেয়াকু।

19হেৎদ আপি মাহারে ইঙ্কূ নাবি আকুয়া তিহি তে জাহাজ রা জিনিস কুকু দাআরে লেবদা গিডি কেয়া।

20হেৎদ গাদা মাহা যাকিৎ বেলাকে হেৎদ ইপিলকু কাকু নেলনাম লেনা হেৎদ মারাং হয়ওএবীর হয়ও দাআ হুইঅ তানগেএ খান আলেয়া বানচা রাঃআ আশ কা তাহীন কেনা।

21হেৎদ ইঙ্কূ গাদা মাহা বিন জম নু কাতে কাটায় কেৎকু, পৌল ইঙ্কূ য়া তালা রে তিন্গুইয়েন তেএ গামাৎ কুয়ায়্য়য়, এ মান্তান হড় কু, আপে ইঞয়া থুতি যদি মানা-বাতা কাতে ক্রীতী হাতেন কাপে হিজ লেখান নিয়া দুঃখ দুর্দশা হেৎদ হানি কাপে নাম কেয়া।

22নাহা দইঞ আপেকে সাহস এমাপে তানাইঞ, যাহায় রাঃআ জিউ নাশ কা হুয়াআ, শুধু জাহাজ রাঃআ ক্ষতিয়া।

23চিয়া চি ইঞদ ঈশ্বর রা হড়, হেৎদ অকয়্য় কে গুনমানত তিয়াং ইনি রাঃআ মিয়াৎ সেরমা রিনিজ নাঙ্গা হলা নিদা ইঞ য়া হান্ডে তিঙ্গুয়ে নায়।

24এ পৌল, আলম বরয়া, আম কৈসর রা সামাং রে তিঙ্গুন হুযুয়া হেৎদ নেলেমে, অকয়কু আম লঅ সেনতানকু যতচ কুকে ঈশ্বর দায়াদুলাড় এমাদ কুয়ায়্য়।

25এন্খান গম্কে কু, সাহস পে, চিয়া চি ঈশ্বররে ইঞয়া নেকান পাতিয়া মেনাআ, ইঞ হান্ডে চিল্কা গামা কানা এন্কাগে হুযুয়া।

26মেন্খান আবু যাহান ঢিপ রেগে সেটের হুযুয়া।

পেতেচ জাহাজ

27হেৎদ আলে আদ্রিয়া দরেয়া রে বাই বাইতে সেসেন সেসেন্তে গেলে পুন নিদা হুইয়েন্তে তালা নিদা জাহাজ নাবি কু টাহর কেৎআকু জাহান দিশুম কাতা বু সেটেরা কানা মেন্তেকু আটকার কেয়া।

28হেৎদ বায়র লেব্দা ডুম্বুইজ কেতে বিশ বাঁউ দাআ নাম কেয়া হেৎদ হুডিং লেকা সেনে য়েন্তে অট মিসা বায়র ডুম্বুইজ কে তে গেল মড়ে বাঁউ কু নাম কেয়া।

29ইন্তং ধীরি দর রে তাকিচ তাহীন রাঃআ বর তে ইঙ্কূ জাহাজ রাঃআ তায়ম দর তে উপুনিয়া গল্সীফাল কু আড়গু কেয়া হেৎদ বিন্তিতে তাহি কাতে সিঙ্গি রাঃআ তাঙ্গিরেকু তাহিন কেনা।

30মেন্খান জাহাজ নাবি কু জাহাজ হাতেন নির জময়াকু মেন্তে কুরুমুটুৎ কেনায়কু হেৎদ গ্ল্হির রাঃআ হুডাঙ মাড়াঙ দর গল্সীফাল আড়গু ছলতে ডঙ্গা দরেয়া রে আড় গুৎকেনা কু,

31মেন্খান পৌল জুলু পতি গমকে হেৎদ পাল্টন কুকে গামৎ কুয়ায়্য়, ইঙ্কূ হড় জাহাজ রে কাকু তাহিনখান আপে কাপে বাঞ্চা কাপে নামেয়া।

32ইন্তং পাল্টন কু লাউকারা বায়র মাআটটা কেৎতেকু ইনা দাআরে কু উয়ু কেৎআ।

33হেৎদ পায়াং পুয়ুং আঙ্গ তান্খানঅ পৌল যতচ কুকে জমা জমেপে মেন্তে এ গমকেৎ কুয়ায়্য় হেৎদএ গামা কেৎ কুয়ায়্য়, আপে তিহিং গেলে পুন মাহা যুহুয়েনা,আপে তাঙ্গিরে মেনাআ পেয়া, কা জম নু কাতে মেনা আ পেয়া, জাহানা কা জম নু কাতে নিদা সিঙ্গি পে হরতাৎআ,

34ইনা মেন্তেইঞ নেহরাপে তানা জমা জমে পে ইনা দ অপেয়া বাঞ্চা নাতিনাং লাকতিয়া, আপেএ-তে বহ রা মিয়াৎ উব হঅ কা উয়ু গোয়া।

35হেৎদ নিয়া গাম কেৎ তেল পৌল ইনা পিঠা এ সাব কেয়ায়, হেৎদ যতচ কুয়া সামাং রে ঈশ্বর এ সারহাও কিয়ায় হেৎদ ইনা কেচা কেৎ তেএ জম কেয়ায়।

36এন্তে যতচ কু সাহস কেৎ তেকু জম কেয়া।

37হেৎদ জাহাজ রে আলে যতচ কু বার জুলু1 তিলি তুরুই2 হড় লে তাহীন কেনা।

38হেৎদ জম বি কেৎতে দরেয়া রে গহম কু লেবদা গিডি কেয়া হেৎদ জাহাজ কু হাউলকা কেয়া।

39আঙ্গ য়েন খান ইঙ্কূ ইনা ঢিপা কাকু নেল চীনহা দাড়ি লাৎআ, মেন্খান এনকান মিয়াৎ পাড় কু নেল নামকেয়া, ইনাদ বালিচর তাহীন কেনা, হেৎদ হুইও দাড়ি রেদ আবু জাহাজ এনথাং রেবু ঠেকা দেয়া মেন্তে কু গটা কেয়া।

40হেৎদ আকুড়া ফাল কুরা রাঃআ বায়রকু মাআটটা কেৎ তে ইনা দরেয়া রেকু বাগি তুকা কেয়া হেৎদ ইনতং গে হাল রা তলকু রাড়া কেৎ তে হেৎদ হয়ও সামাং রে পাল রাকাব কেৎ তেকু ইনা বালি ঘাট তেকু সেনে য়ানা।

41মেন্খান বানার দর দরেয়া রাঃআ গাহির দাআ মেনাআ এনে এনকান জায়গারে হিচেন খান্কু চররে জাহাজ আটকায়না হেৎদ জাহাজ সামাং দর তাকিচেন্তে রচৎ এনা মেনখান তায়ম দর ঢেউ রাঃআ তাকিচ তাকিচতে পেটেজে না।

42মেন্খান সিপাই কু আটক কুকে গচ গিডি নাতিনাং কারসাদি কেয়াকু যাতে যাহা হঅ অয়ার কাতে আল কু নির দাড়িকাআ।

43মেনখান জুলু পুতি কুরাঃআ গমকে পৌলকে বাঞ্চা নাতিনাং ইঙ্কূয়া কারসাদী এড়িচ কেৎআয় হেৎদ হুকুমাৎ কুয়া হেৎদ অকয়্য় অয়ার দাড়িআপে মাড়াঙ তে যেহেত কাতে ঘাট তে আড়গুন পেদু,

44হেৎদ বাকি যতকু তক্তা কুরে হেৎদ জাহাজ রা এটা এটা জিনিসকুরে সাহারা হাতা কাতে পরম পে মেন্তে এ আচু কেৎ কুয়ায়্য় য়। নেকা গে যতচ ডাঙা তে পারম মেন তেলে বাঞ্চায় না।