Minkunga 63

Mamboti maku maviatukidi luzingu

Nkunga Davidi mu thangu kaba mu dikanga di Yuda.

1A Nzambi ! Ngeyo widi Nzambiꞌama,

mu kiedika ngeyo ndintomba ;

muelꞌama wulembo moni phuila yi ngeyo ;

nitu ama tsatu yidi mu kumona mu tsi yi yuma ;

yibiva ; yikondolo nlangu ;

2Ndimmona mu buangu kinlongo

ndimona lulendo luaku ayi nkembo aku.

3Bila luzolo luaku luviatukidi luzingu ;

bididi biama biela kukembisa.

4Ndiela kuzitisa thangu yoso ndidi moyo.

Mu diambu di dizina diaku, ndiela vumuna mioko miama ku yilu.

5Muelꞌama wela yukuta banga kimvuama kiwombo ki bidia

mu minkunga bididi bi munu ama biela kuzitisa.

6Va mbukꞌama ndikutebukilanga moyo

ndieti kuyindula builu bu mvimba.

7Bila ngeyo lusadusu luama,

ayi ndilembo yimbila ku tsi kitsusula ki mavavi maku.

8Muelꞌama widi wukangama mu ngeyo ;

ayi koko kuaku kulubakala kueti kukhindisa.

9Bobo beti tomba luzingu luama bela bungana ;

bela kota kuna tsi ntoto.

10Bela kuba yekula mu lulendo lu sabala ;

bela kituka bidia bi zimbua zi nsitu.

11Vayi Ntinu wela mona khini mu Nzambi ;

baboso bobo banleva ndefi mu dizina di Nzambi bela kunzitisa.

Bila miunu mi bankua luvunu miela kangama.