Biblica® Open Nkanda wu Moyo, Nguizani Yimona ayi Minkunga 2002
Minkunga 47
Lusikila Nzambi zitsiaki
Nkunga bana ba babakala ba Kole kuidi pfumu minyimbidi.
Lusika zitsiaki, beno makanda moso.
Luyamikina kuidi Nzambi mu khini,
Tala phila Yave yizangama kadidi tsisi !
Niandi ntinu wunneni va mbata ntoto wumvimba.
Wutula makanda ku tsi buvika bueto,
batu ku tsi malu meto.
Wutusobudila kiuka ;
luniemo lu Yakobi ; mutu wu kazola.
Nzambi wukuma va khatitsika yamikina ku khini
Yave wukuma va khatitsika biyoko bi tulumbeta.
Luyimbila minzitusu kuidi Nzambi
Luyimbila minzitusu ;
Luyimbila minzitusu kuidi Nzambi eto,
luyimbila minzitusu.
Bila Nzambi niandi ntinu wu ntoto wumvimba ;
Lunyimbidila nkunga wu nzitusu.
Nzambi weti yadila makanda moso.
Nzambi vuendi va kundu kiandi kinlongo.
Batu banneni ba makanda bakutikini
banga batu ba Nzambi yi Abalahami
bila Nzambi niandi vuidi mintinu mi ntoto.
Niandi wuyayusu ngolo.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.