Minkunga 41

Lusambulu lu mbevo

Nkunga Davidi kuidi pfumu minyimbidi.

1Lusakumunu kuidi mutu wowo thaluꞌandi yidi kuidi mutu wulebakana,

Yave weti ku nkula mu thangu yi ziphasi.

2Yave wela kunkeba ayi wela tanina luzingu luandi ;

wela kunsakumuna va ntoto

ayi kalendi kunyekula ko mu luzolo

lu bobo beti kunlenda ;

3Yave wela kunkindisa va mfulu andi yi kimbevo.

Ngeyo wela kumbelusa va mfulu andi yi kimbevo.

4Ndituba : “A Yave, wumboni kiadi.

Wumbelusa bila kuidi ngeyo ndivodidi masumu.”

5Bambeni ziama zilembo tubi mambu mu diela dimbimbi

mu diambu diama : “Thangu mbi kela fua

ayi dizina diandi diela lalakana e ?”

6yoso thangu mutu kizidi mu kuthala ;

mutu wowo wuntubanga luvunu.

Ntimꞌandi wufulukidi mambu ma mvuezolo ;

buna wuntotukanga ku nganda ayi wunyolukilanga mawu.

7Bambeni ziama zioso zilembo niunguta va kimosi mu diambu diama.

Balembo yindula mambimbi mu diambu diama,

balembo tubi :

8“Nsongo wumbimbi wumbuididi.

Kalendi buela vumbuka ko va buangu kioki kalambididi.”

9Ka diambu ko nkundi ama wu luzolo,

wowo ndibedi silanga diana,

wubedi kabulanga dipha diama, wumbalumukini.

10Vayi ngeyo Yave, wumboni kiadi

wuthedimisa.

Muingi ndiba vutudila landi.

11Nzebi ti ngeyo wunyangalalanga mu minu ;

mu diambu di mbeni ama kabika kundunga.

12Mu bufuana kuama, ngeyo wutsimba ;

wuthedimisa mu zithangu zioso va tuala meso maku.

13Nzitusu wuba kuidi Yave, Nzambi yi Iseli,

mu thangu yi kayimani.

Ameni ayi Ameni !