मरकुस 6

नासरत ऊर दा यीशु उन अनादर

(मत्ती १३:५३-५८; लूका ४:१६-३०)

1अल टु होटकु यीशु तान प्रदेश दा बंदुन; अदिक आऊन चेलागोळ भी आऊन हिंद बंदुर. 2आराम इन दिशी आव यहूदी लॉकुर्द सभागृह दा उपदेश कोळली होदुन, अल हापाळ सा लॉकुर ईरोर, याग लॉकुर आऊन मातगोळ केळदुर, रा आंदुर सट्ट आगेदुर अदिक अनली कुरतुर, “ईऊक ईव मातगोळ यल टु होटबंदव? अदिक ईद याता ग्यान हुन जो ईऊक कोटकु आग्याद? आव चमत्कार ह्यांग माळतान? 3येन ईव व्हर्स हुळ्ली माळावाळा अन पार आलच, जो मरियम उन पार, अदिक याकूब, योसेस, यहूदा, अदिक शमौन उन वार्ट हुन? येन आऊन आकतींगेर ईल नाम न्याड्या दा ईरालुर?” इदुरसाटी लॉकुर आऊंद इनकार माळ बुटुर. 41

यीशु आंदुर से अंदुन, “भविष्यवक्ता अन्द तान नगर, तान परिवार, अदिक तान मान्या मान सम्मान आगाल लेकीन दुसरा लॉकुर आंदुर्द मान सम्मान माळतार.”

5अदिक यीशु अल येनु सामर्थ्य इन क्याल्सा माळीदील, सिर्फ थ्वाळासा बिमार लॉकुर मा कय ईटकु आंदरी चंगा माळदुन.

यीशु हन्नेळ चेलागोळी प्रचार माळली कळुदुन

(मत्ती १०:५-१५; लूका ९:१-६)

6अदिक यीशु उक आंदुर्द अविश्वास मा हापाळ आश्चर्य आत, अदिक आव नाकु दाकळव ऊरगोळ दा उपदेश कोळतेला वयाळदुन.

7यीशु तान हन्नेळ चेलागोळी तान हात्‍ती कारदुन अदिक आंदरी दुष्टआत्मागोळी तेगोद अधिकार कोट्टुन. अदिक येढ्ढ-येढ्ढ माळकु नगर दा कळुदुन 8अदिक आंदरी आग्या कोट्टुन, “हादी इन साठी कोल इक बिटकु अदिक येनु हुडुबाळी; ना रा रोट्टी, ना झ्वारा, अदिक ना नीम खिसा दा पैस्या, 9लेकीन केरू हाकी अदिक यातोदारा दुसरा कुळता ओयबाळी.” 10अदिक यीशु चेलागोळ से अंदुन, “येल्यारा नीम्द यारदारा मान्या स्वागत आत, रा यागासताका अल टु सार आगालीर आगासताका अदा मान्या दा रूक्सकु ईरी. 1123अगर नीव ऊंद ईत्‍ता नगर दा होगतीर येल लॉकुर नीम्द स्वागत माळालुर या नीम मातगोळी केळालुर, रा अदरी बिट बुळी अदिक तान कालगोळ्द धुळा झाळ्स कोमी. ईद आंदुर साटी ऊंद चेतावनी आदीन.”

12आग आंदुर अल टु होटोदुर. अदिक आंदुर होगकु प्रचार माळदुर, तान पापगोळी बिळी अदिक परमेश्वर उन दी तिर्गी. 134आंदुर हापाळ सा दुष्टआत्मागोळी तेगदुर, अदिक हापाळ सा बिमार मंळसागोळ मा जैतून इन याण्णा अन्द मालिस माळकु आंदरी चंगा माळदुर.

यूहन्ना बपतिस्मा कोळावाळा अक कोन्नोद

(मत्ती १४:१-१२; लूका ९:७-९)

145

हेरोदेस राजा भी यीशु उन चर्चा केळदुन, यतिकी आऊन हेसुर हापाळ फैलुसेगित, अदिक येनारा लॉकुर अंदुर, “यूहन्ना बपतिस्मा कोळावाळा सोत्‍तुर दा टु जित्‍ता आग्यान, इदुरसाटी आऊन से इव सामर्थ्य ईनव क्याल्सा प्रगट आगताव.”

15दुसरा लॉकुर अंदुर, “इव एलिय्याह हुन.”

लेकीन यारारा दुसरा लॉकुर अंदुर, “इव भविष्यवक्ता हुन, हाळोद जमाना अन भविष्यवक्तागोळ घाई ऊंद.”

16ईद केळकु हेरोदेस राजा अंदुन, “आव बपतिस्मा कोळावाळा यूहन्ना हुन. यार्द ताल्ला ना कळसुसीदीन, आवा सोत्‍तुर दा टु जित्‍ता आग्यान!” 176हेरोदेस राजा तान सिपाईगोळी कळुकु यूहन्ना अक हुळसुसदुन अदिक संकलीगोळ देल कटकु जयल दा हाक बुटीदुन. ईद हेरोदियास इन कारण हेरोदेस हिंग माळदुन, यतिकी हेरोदेस तान वार्ट फिलिप्पुस उन हिंग्स हेरोदियास इन सांगुळ मदा माळ कोंडीदुन. 18बपतिस्मा कोळावाळा यूहन्ना घळी घळी हेरोदेस राजा से अनतेला ईत्‍तुन, “नीन साटी तान वार्ट उन हिंग्स उन से मदा माळोद उचित हैलेच.”

19इदुरसाटी हेरोदियास बपतिस्मा कोळावाळा यूहन्ना से दुश्मनी ईटतोगोर अदिक ईद चाहासोर कि आऊक ह्यांगारा भी कोन्सुस बुळाईन; लेकीन हेरोदेस राजा अन्द कारण देल हिंग माळ सकिदील. 20हेरोदेस यूहन्ना से अंजतोगोन. यतिकी हेरोदेस जान्सतोगोन कि बपतिस्मा कोळावाळा यूहन्ना ऊंद न्यायी अदिक पवित्र मंळसा आन, इदुरसाटी हेरोदेस आऊक ऊळस्कु ईटतोगोन, अदिक यागल्यारा भी आव यूहन्ना अन्द मातगोळ केळतोगोन रा हापाळ अंजेगतोगोन, लेकीन खुशी देल आऊन मातगोळ भी केळतोगोन.

21आखरी दा हेरोदियास इक हेरोदेस उन जनम दिन मा वळ्लीद मौका सिक्त. अदिक आंदुर प्रधानगोळी, सेनापतीगोळी, अदिक गलील इन धोळ धोळ लॉकुरी ऊमली कार्सदुर. 22रा हेरोदियास इन पोर बुळ्क बंदुर, अदिक कुणुकु हेरोदेस उक अदिक आऊन सांगुळ जो कुर्तकु पावनागोळ ईरोर आंदरी खुश माळदुर. रा राजा आ पोर इन से अंदुन, “नी जो चाहास्या अद नान से बेळ, ना नीनी कोळाईन.” 23अदिक आव किर्‍या तिनकु आकी वचन कोट्टुन, कि नी जो भी नान से बेळ्या अद ना नीनी कोळाईन, ईल ताका कि नांद आरधा राज्य भी.

24आग आ पोर व्हार्या होगकु तान मोय इन से केळदुर, “ना येन बेळाईन?” रा आक इन मोय हेरोदियास माताळदुर,

“यूहन्ना बपतिस्मा कोळावाळा अन्द ताल्ला.”

25आक तुरन्त राजा हेरोदेस उन हात्‍ती बुळ्क बंदुर अदिक आऊन से विनती माळदुर, “ना चाहासतीन, कि नी ईगल्या बपतिस्मा कोळावाळा यूहन्ना अन्द ताल्ला ऊंद टाटी दा नानी कारस्कु कोळ.”

26इदुर देल हेरोदेस राजा हापाळ उदास आदुन, लेकीन आव तान सप्पा पाऊनागोळ्द मुंद वादा माळीदुन अदिक किर्‍या तिंदीदुन. ई कारण देल आकी मना माळ सकिदील. 27इदुरसाटी राजा तुरन्त ऊंद सिपाही इक आग्या कोटकु कळुदुन कि बपतिस्मा कोळावाळा यूहन्ना अन ताल्ला कळकु तंदान, आग जल्लाद जेलखाना दा होगकु आऊन ताल्ला कळदुन. 28अदिक ऊंद टाटी दा ईटकु तंदुन अदिक आ पोर इक कोट्टुन, अदिक पोर तान मोय इक कोट्टुर. 29ईद केळकु यूहन्ना नोर चेला बंदुर, अदिक आऊन लाश इक ओतुर अदिक कब्र दा ईटदुर.

हन्नेळ प्रेरितगोळ्द वापसी

(मत्ती १४:१३-२१; लूका ९:१०)

30आग प्रेरितगोळ वापस बंदुर अदिक यीशु से सिकदुर, अदिक जो भी आंदुर माळीदुर अदिक कलसीदुर, सब यीशु अक हेळदुर. 31यीशु आंदुर से अंदुन, “नळी अदिक अलग येल्यारा सुनसान जागा दा नळुकु आराम माळी.” यतिकी अल हापाळ लॉकुर होगोद-बरोद माळतोगोर, अदिक आंदरी ऊमोद मवका भी ईला सिकतोगोद. 32इदुरसाटी आंदुर ड्वांगा मा येरकु, सुनसान जागा दा अलग होटोदुर.

यीशु भीळ इक भोजन तिन्सदुन

(मत्ती १४:१५-२१; लूका ९:११-१७; यूहन्ना ६:१-१४)

33हापाळ मुंदुर आंदरी होग्त नोळदुर अदिक ऊंद घन दा अर्त कोंडुर कि आंदुर यार उर; अदिक सप्पा लॉकुर नगरगोळ दा टु जमा आगकु अल पैदल हरदुर अदिक यीशु अदिक आऊन चेलागोळ से पयले होगकु पोहचुसदुर. 347याग यीशु ड्वांगा दा टु व्हार्या होट्टुन रा ऊंद धोळ्द भीळ नोळदुन, अदिक आऊक आंदुर मा दया होट्ट बत्‍त, यतिकी आंदुर आ म्यांडागोळ घाई ईरोर, यार्द यारू रखवाला ईरालुर; इदुरसाटी यीशु आंदरी हापाळ सा मातगोळी कल्सली कुरतुन. 35याग द्याव हापाळ मुळकेत, रा आऊन चेलागोळ आऊन हात्‍ती बंदकु अनली कुरतुर, “ईद सुनसान जागा आद, अदिक द्याव हापाळ मुळ्केग्याद. 36लॉकुरी सार माळ कि नाकु दाकळव ऊरगोळ अदिक मोहल्ला दा होगकु, ताम साटी येनारा तिनली कोंड कोमुल.”

37लेकीन यीशु आंदरी उत्‍तर कोट्टुन, “नीवा आंदरी येनारा तिनली कोळी.”

चेलागोळ यीशु से अंदुर, “नाव येढ्ढ सौ दीनार8 इन रोट्टीगोळी कोंडेव, अदिक आंदरी तिनसेव?”

38इदुरसाटी यीशु आंदुर से अंदुन, “होगकु नोळी नीम हात्‍ती यास रोट्टीगोळ आव?”

आंदुर मालूम माळकु अंदुर, “अईद रोट्टीगोळ अदिक येढ्ढ मेन.”

39आग यीशु तान चेलागोळी आग्या कोटुन, कि सब मुंदरी हसीद काड्डा मा पंगत पंगत दा कुर्स बुळी. 40आग आंदुर सौ सौ अदिक पचास पचास माळकु पंगत पंगत दा कुरतोदुर. 41आव आ अईद रोट्टीगोळी अदिक येढ्ढ मेनगोळी हुळदुन, अदिक स्वर्ग दी नोळकु परमेश्वर उक धन्यवाद माळदुन, अदिक रोट्टीगोळ मुरू-मुरूकु चेलागोळी कोळतोदुन कि आंदुर लॉकुरी वाळसुल, अदिक अव येढ्ढ मेनगोळ भी आ सब मुंदुर दा वाळ्स बुट्टुन. 42अदिक सब मुंदुर तिनकु संतुष्ट आगेदुर. 43अदिक चेलागोळ मिक्‍कु रोट्टीगोळ अदिक मेनगोळ्द तुकळा देल हन्नेळ फुट्टीगोळ तुमकु नेगदुर. 44यार रोट्टीगोळी तिंदुर, आंदुर्दा सिर्फ मंळसागोळ्द संख्या अईद हजार ईरोद.

यीशु उन नीर मा नळोद

(मत्ती १४:२२-३३; यूहन्ना ६:१५-२१)

45आग यीशु तुरन्त तान चेलागोळी ड्वांगा मा कुरोर साटी मजबुर माळदुन कि आंदुर आऊन से पयले झील इन आप्पाटी बैतसैदा नगर इक होटोगुल, कि आव आगासताका लॉकुरी सार माळ्यान. 46लॉकुरी सार माळकु यीशु पहाळी मा प्रार्थना माळली होटोदुन. 47याग द्याव मुळकेत, रा आग ड्वांगा झील इन न्याड्या दा ईरोद, अदिक यीशु आबना क्यार्रा अन्द भूमी इन किनारा मा ईरोन. 48याग यीशु नोळदुन कि आंदुर ड्वांगा नळ्स नळ्सकु घबरूसेग्यार, यतिकी आँधी ड्वांगा अन्द ऊलट ईरोद, रा ईळ्लक इन मुर अदिक आर पहर इन हात्‍ती आव झील मा नळुतेला आंदुर हात्‍ती बंदुन; अदिक आंदुर से मुंद होटबुळोद चाहासोन. 49लेकीन आंदुर आऊक झील मा नळुतेला नोळकु रा सम्सदुर कि ईद ऊंद भूत हुन, अदिक चिल्ळास कुरतुर;

50यतिकी सप्पा मुंदुर आऊक नोळकु अंजेगीदुर. लेकीन यीशु तुरन्त आंदुर से मात हेळदुन अदिक अंदुन, “हिम्मत ईटी: ना हुईन; अंजबाळी!” 51आग आव आंदुर हात्‍ती ड्वांगा मा बंदुन, अदिक हवा रूकसेत: अदिक आंदुर हापाळ अच आश्चर्य माळली कुरतुर. 52आ चेलागोळ अईद हजार लॉकुरी रोट्टीगोळ तिनसोद मात सम्स ईला सकीदुर, यतिकी आंदुर अव मन कट्टर आगेगीदव.

गन्नेसरत दा यीशु रोगीगोळी चंगा माळदुन

(मत्ती १४:३४-३६)

53यीशु अदिक आऊन चेलागोळ आप्पाटी ईळुकु गन्नेसरत इन भूमी मा पोहचुसदुर, अदिक ड्वांगा घाट इन किनारा मा हचदुर. 54याग आंदुर ड्वांगा मा टु ईळदुर, रा लॉकुर तुरन्त यीशु उक अर्त कोंडुर. 55आसपास इन पुरा प्रदेश दा हरदुर, अदिक बिमारगोळी व्हर्स मा मिंग्सकु, येल येल समाचार केळदुर कि आव हुन, अल अल हरूतेला वयाळदुर. 56अदिक येल्यारा यीशु ऊरगोळ, नगरगोळ या मोहल्ला दा होगतोगोन, रा लॉकुर बिमारगोळी सात्‍तागोळ दा ईटकु आऊन से विनती माळतोगोर, कि आव आंदरी तान कपळा अन्द पल्लाक अच मुट गोळुल: अदिक यास आऊक मुटतोगोर, आंदुर सब चंगा आगेगोर.